ᤛᤢᤑᤥ 15 - LIFOTNT

ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤏᤢᤛᤡ ᤔᤡᤴᤍᤣ᤹ᤜᤠ᤹

¹ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤣ᤹ᤛᤔᤠ ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤐᤕᤶ ᤕᤶᤒᤠ ᤀᤡᤒᤢᤃᤧᤴ ᤔᤡᤰᤛᤣ᤺ᤴᤏᤡᤴ ᤀᤡᤱᤃᤠ᤹ ᤏᤡᤛᤢᤱᤗᤥ—ᤂᤧᤵᤔᤥ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤏᤢᤛᤡ ᤁᤢᤏᤢᤵᤔᤥᤒᤠ ᤔᤡᤴᤍᤣ᤹ᤜᤠ᤹ ᤔᤧᤃᤳᤋᤢᤖᤥ॥ ᤂᤧᤴ ᤔᤡᤴᤍᤣ᤹ᤜᤠ᤹ᤀᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤏᤢᤒᤧᤀᤠᤱ ᤘᤠ᤹ᤖᤥ॥

² ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤡ ᤏᤢ ᤁᤧᤒᤢᤵᤐᤠ ᤛᤧᤸᤗᤧᤱᤄᤥ ᤁᤢᤀᤡᤛᤡ᤺ᤰᤐᤠ ᤘᤖ᤺ᤱᤎᤡᤰ ᤏᤡᤛᤢᤱᤗᤥ॥ ᤂᤧᤸᤗᤧ ᤁᤢᤕᤠᤀᤥ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤴ. ᤁᤢᤏᤠᤘᤠᤀᤡᤳᤗᤠ ᤏᤢ ᤂᤧᤸᤗᤧ ᤁᤢᤔᤡᤱᤅᤡᤸᤗᤧ ᤁᤢᤄᤠᤏᤡ᤺ᤳᤋᤡᤴ ᤁᤧᤏᤠ᤺ᤶᤒᤠᤜᤠ᤹ ᤂᤧᤵᤔᤥ ᤔᤧᤕᤧᤒᤧᤒᤠ ᤏᤡᤛᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤛᤠᤖᤠᤱᤃᤡᤜᤠ᤹ ᤔᤧᤃᤳᤋᤢᤖᤥ॥

³ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠᤖᤧ ᤁᤢᤛᤠᤶᤗᤥ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤛᤠᤶᤗᤥᤴ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤔᤧᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤕᤠ᤺ᤶᤒᤰᤜᤠ᤹ᤃ ᤐᤕᤶ ᤕᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ॥ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤣ. ᤂᤧᤏᤧ᤹ ᤁᤧᤗᤠᤶᤜᤠ᤹ᤃ ᤏᤢᤒᤠ ᤏᤢ ᤛᤧᤰᤂᤠᤒᤠ ᤆᤥᤰᤗᤥ॥

⁴ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤜᤠ᤺ᤳᤗᤧ ᤁᤧᤱᤃᤡᤳᤏᤧᤴᤒᤣ᥅ ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤧᤏᤠᤖᤠ ᤔᤧᤓᤥᤛᤢᤶᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤖᤰ ᤛᤣᤛᤣᤒᤠ ᤁᤧᤈᤥᤰ॥ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤍᤠᤀᤠᤱ ᤂᤧᤏᤧ᤹ ᤛᤧᤘᤠ ᤁᤧᤶᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤒᤠ ᤁᤧᤕᤠ᤺ᤶᤒᤰᤁᤡᤴ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”

⁵ ᤜᤧᤰᤁᤩᤠᤱ ᤀᤥᤔᤧᤳᤋᤢᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵᤐᤡᤸᤗᤧ ᤛᤠ᤺ᤱᤃᤠᤜᤡᤶᤔᤡᤴ ᤜᤖᤧᤒᤠ ᤏᤡᤛᤢᤱᤗᤥ॥

⁶ ᤂᤧᤴ ᤜᤡᤶᤔᤥᤗᤠᤶ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤏᤢᤛᤡ ᤔᤡᤴᤍᤣ᤹ᤜᤠ᤹ ᤔᤧᤕᤠᤱᤛᤡᤱᤅᤠᤱ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤖᤥ॥ ᤂᤧᤱᤜᤠ᤹ᤖᤧᤃ ᤑ᤺ ᤗ᤹ᤖᤡᤰ ᤁᤧᤀᤥ᤺ᤵᤐᤠ ᤏᤢ ᤛᤣᤛᤣᤒᤠ ᤋᤣᤳ ᤔᤧᤈᤠᤰᤂᤢᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤢᤏᤡ᤹ ᤛᤱᤒᤣ᤹ᤀᤥ ᤐᤧᤷᤄᤧᤰ ᤛᤠᤶᤔᤩᤠᤱ ᤆᤧᤵᤑᤣᤳ ᤔᤧᤜᤣᤛᤢᤀᤠᤱ ᤐᤳᤇᤧᤖᤥ॥

⁷ ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥ ᤌᤡᤰᤁᤡᤸᤗᤧ ᤂᤧᤴ ᤁᤠᤰ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤛᤍᤠᤍᤡᤱ ᤛᤍᤠᤍᤡᤱ ᤁᤧᤜᤡᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤠᤰᤁᤡᤸᤗᤧ ᤁᤧᤍᤡᤶᤒᤠ ᤏᤢᤛᤡ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹ ᤐᤡᤖᤢᤛᤡᤖᤥ॥

⁸ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤏᤢ ᤁᤢᤔᤢᤰᤛᤠᤶᤗᤠᤶ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤸᤗᤧ ᤔᤠᤱᤜᤡᤶᤔᤡᤴ ᤛᤡᤍᤠᤰ ᤌᤡᤶᤛᤢᤖᤥ॥ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤂᤧᤴ ᤏᤢᤛᤡ ᤔᤡᤴᤍᤣ᤹ᤜᤠ᤹ ᤔᤧᤴᤃᤧᤳ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤀᤠᤳᤋᤡᤴᤜᤠ᤹ᤀᤠᤱ ᤔᤠᤱᤜᤡᤶᤔᤥ ᤗᤠ᤺ᤵᤔᤠ ᤔᤧᤴᤇᤢᤰᤋᤧᤴᤗᤥ॥