ᤛᤢᤑᤥ 13 - LIFOTNT

ᤘᤖ᤺ᤱᤗᤠᤶ ᤁᤧᤗ᤺ᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ

¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤘᤖ᤺ᤱᤅᤥᤗᤠᤶ ᤁᤧᤗ᤺ᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤏᤡᤛᤢᤱᤗᤥ॥ ᤂᤧᤸᤗᤧ ᤏᤢᤛᤡ ᤁᤢᤎᤧᤃᤣ᤺ᤰᤜᤠ᤹ᤀᤥ ᤌᤡᤒᤥᤱ ᤁᤢᤍᤠᤱᤜᤠ᤹ ᤔᤧᤒᤳᤇᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤠᤱᤜᤠ᤹ᤀᤥ ᤌᤡᤒᤥᤱ ᤋᤡᤆ᤺ᤜᤠ᤹ ᤂᤢ᤺ᤰᤂᤢᤀᤠᤱ ᤐᤳᤇᤧ॥ ᤂᤧᤸᤗᤧ ᤁᤧᤖᤧᤰ ᤁᤢᤎᤧᤃᤣ᤺ᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤔᤡᤱ ᤛᤠᤵᤋᤧᤀᤠᤱ ᤐᤳᤇᤧ॥

² ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤱᤃ ᤌᤧᤖᤡᤱᤒᤠ ᤁᤢᤀᤡᤛᤡᤰ ᤏᤡᤛᤢᤱ. ᤁᤖ ᤂᤧᤸᤗᤧ ᤁᤢᤗᤠᤱᤜᤠ᤹ ᤔᤠ᤹᤺ᤕᤢᤒᤠᤸᤗᤧᤴ ᤏᤢ ᤁᤢᤔᤢᤖᤠ᤺ᤱᤃ ᤂᤡᤖᤡᤱᤒᤠᤸᤗᤧᤴ ᤜᤧᤰᤋᤱᤒᤠ ᤆᤥᤃᤧᤖᤥ॥ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤀᤠᤒᤠᤅᤣ ᤁᤢᤔᤢᤰ. ᤁᤢᤜᤠᤱᤕᤢᤰᤏᤠᤴ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤁᤢᤕᤢᤰᤁᤡᤴ ᤐᤡᤖᤢᤖᤥ॥

³ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤌᤡᤰ ᤁᤢᤎᤣᤃᤣ᤺ᤰᤐᤧᤴ ᤛᤡᤔᤠᤗᤡᤱᤎᤥᤀᤥ ᤁᤧᤖᤧᤖ ᤌᤠᤖᤡᤰ ᤁᤠ᤺ᤴᤍᤧᤀᤠᤱ ᤐᤳᤇᤧᤒᤠ ᤏᤡᤍᤧᤳᤋᤧ. ᤁᤖ ᤕᤠᤱᤛᤡ ᤂᤧᤴ ᤁᤧᤃᤠ᤺ᤶᤒᤠ ᤕᤠᤱᤄᤣ᤺ᤰᤁᤡᤴ ᤘᤣ᤺ᤳᤋᤧᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤔᤧᤍᤡᤶᤍᤢᤖᤥ॥

⁴ ᤔᤏᤠᤜᤠ᤹ᤖᤧ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤛᤧᤘᤠ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤕᤢᤰᤁᤡᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤐᤡᤖᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤛᤧᤘᤠ ᤔᤧᤈᤥᤃᤢ. “ᤁᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤜᤧᤰᤋᤱᤒᤠ ᤜᤠᤳ ᤘᤠ᤹ᤒᤣ᥅ ᤁᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤴᤏᤢ ᤌᤱ ᤆᤥ᤺ᤰᤔᤠ ᤁᤧᤛᤢᤰᤐᤠ ᤜᤠᤳ ᤘᤠ᤹ᤀᤠᤱᤒᤣ᥅”

⁵ ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤀᤠᤱᤍᤡᤱ ᤐᤠᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤔᤧᤒᤠᤱᤄᤢᤖᤥ॥ ᤜᤧᤰᤁᤩᤠᤱ ᤗᤡ-ᤏᤧᤳ ᤗᤠ (᥊᥈) ᤌᤠᤖᤡᤰ ᤁᤢᤒᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤕᤢᤰ ᤂᤥᤛᤢᤖᤥ॥

⁶ ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱ ᤏᤢ ᤁᤢᤕᤢᤱᤍᤧᤴ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤋᤣᤛᤢ ᤐᤡᤖᤢᤛᤡᤖᤥ॥

⁷ ᤜᤧᤰᤁᤩᤠᤱ ᤂᤧᤴ ᤌᤰᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤀᤠᤱ ᤏᤠ᤺ᤶᤔᤠᤛᤡ ᤕᤢᤰ ᤂᤥᤛᤢᤖᤥ॥ ᤜᤧᤰᤁᤩᤠᤱ ᤕᤠᤶᤔᤥ ᤂᤧᤴ ᤌᤰᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤛᤶᤍᤠᤱ ᤕᤢᤰ ᤆᤥ᤺ᤰᤔᤠ ᤂᤥᤛᤢᤖᤥ॥

⁸ ᤛᤧᤵᤔᤏᤠᤒᤠ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤜᤡᤱᤔᤴᤗᤧ ᤁᤢᤛᤠᤵᤐᤴᤏᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤡ᤹ ᤔᤡᤱ ᤔᤧᤴᤇᤠᤵᤐᤣ ᤁᤧᤘᤠ᤹ᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤗᤧ ᤂᤧᤴ ᤌᤰᤛᤠᤴ ᤛᤧᤘᤠ ᤔᤧᤈᤥᤃᤢᤖᤥ॥

⁹ ᤀᤠᤸᤗ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄

¹⁰ ᤐᤢᤱᤗᤠᤜᤡᤶᤔᤥ ᤌᤠ᤺ᤔᤠ ᤁᤧᤒᤥᤱᤒᤠᤴ. ᤐᤢᤱᤗᤠᤜᤡᤶᤔᤥ ᤌᤠ᤹᤺ ᤜᤧᤰᤁᤩᤠᤱ ᤋᤠᤓᤣᤗᤠᤶ ᤛᤡᤔᤠ ᤁᤧᤒᤥᤱᤒᤠᤴ. ᤋᤠᤓᤣᤗᤠᤶᤒᤠᤀᤣ ᤛᤡ᤺ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤀᤡᤏᤥᤃᤧᤴ ᤋᤢᤰᤂᤣᤴ ᤏᤠᤛᤡᤌ᤺ᤵᤔᤠ ᤐᤥᤱᤅᤠᤱ ᤏᤛᤠ᤺ᤴᤛᤠᤒᤠ ᤐᤥᤱᤔᤠᤀᤠᤱ ᤘᤠ᤹ᤔᤠᤀᤣ ᤐᤥᤱᤗᤥ॥

ᤂᤠᤶᤒᤣ᤺ᤰᤔᤥᤗᤠᤶ ᤁᤧᤗ᤺ᤶᤒᤠ ᤌᤰᤛᤠ

¹¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤘᤣ᤹ᤛᤔᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤎᤡᤰ ᤗ᤺ᤴᤍᤧ ᤌᤠᤅᤧᤒᤠ ᤏᤡᤛᤢᤱᤗᤥ॥ ᤂᤧᤸᤗᤧ ᤌᤢ᤺ᤶᤒᤠᤸᤗᤧᤴ ᤁᤢᤀᤡᤛᤡᤰ ᤏᤧᤳᤇᤡ ᤁᤢᤍᤠᤱ ᤕᤢᤅᤧ. ᤁᤖ ᤂᤧᤱᤃ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤁᤢᤀᤡᤛᤡᤰ ᤐᤠᤖᤧᤖᤥ॥

¹² ᤂᤧᤸᤗᤧ ᤌᤡᤰᤛᤡᤃᤣᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤠᤰ ᤁᤢᤕᤢᤰᤜᤠ᤹ ᤀᤥᤃᤵ ᤆᤥᤃᤢᤖᤥ॥ ᤂᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤡᤔᤠᤗᤡᤱᤎᤥ ᤌᤠᤖᤡᤰ ᤁᤧᤃᤠ᤺ᤶᤒᤠᤀᤠᤱ ᤁᤧᤜᤡᤱᤒᤠ ᤂᤧᤴ ᤌᤡᤰᤛᤡᤃᤣᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤛᤧᤘᤠ ᤆᤥ᤺ᤰᤔᤠ ᤐᤠᤱᤄᤢᤛᤡᤖᤥ॥

¹³ ᤜᤧᤰᤁᤩᤠᤱ ᤂᤧᤸᤗᤧᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤱᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤡᤖᤠ᤺ᤰᤁᤠᤱ ᤌᤠᤛᤢᤖᤥ॥

¹⁴ ᤌᤡᤰᤛᤡᤃᤣᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤢᤗᤧᤰᤘᤠ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤂᤥᤛᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤡᤱᤗᤧᤰᤋᤢᤛᤡᤖᤥ॥ ᤂᤧᤸᤗᤧ ᤂᤧᤴ ᤛᤡᤔᤠᤗᤡᤱᤎᤥᤀᤥ ᤌᤠᤖᤡᤰ ᤋᤠᤓᤣ᤺ᤸᤗᤧ ᤁᤧᤃᤠ᤺ᤶᤒᤠᤀᤠᤱ ᤕᤠᤶᤔᤥ ᤁᤧᤜᤡᤱᤒᤠ ᤌᤡᤰᤛᤡᤃᤣᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥᤀᤥ ᤏᤠᤘᤠᤀᤡᤳᤗᤠ ᤆᤥᤰ ᤐᤠᤱᤄᤢᤛᤡᤖᤥ॥

¹⁵ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤌᤡᤰᤛᤡᤃᤣᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧᤴ ᤏᤠᤘᤠᤀᤡᤳᤗᤠᤴ ᤐᤠ᤺ᤵᤔᤠ ᤛᤢᤰᤗ ᤜᤧᤰᤁᤩᤠᤱ ᤂᤧᤴ ᤛᤧᤘᤠ ᤆᤥ᤺ᤰᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤛᤧᤖᤢᤛᤡᤖ ᤑᤠ᤹ᤀᤠᤱ ᤂᤧᤴ ᤏᤠᤘᤠᤀᤡᤳᤗᤠᤀᤥ ᤛᤠ᤺ᤱᤃᤢᤃᤧᤴ ᤛᤰᤔᤠ ᤁᤣ᤺ᤵᤔᤠ ᤔᤢᤰᤛᤠᤶ ᤂᤥᤛᤢᤖᤥ॥

¹⁶ ᤂᤧᤸᤗᤧ ᤕᤶᤒᤠ ᤆᤢᤰᤐᤠ. ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤕᤠᤱᤁᤧᤛᤠ᤹ᤒᤠ. ᤕᤥ᤺ᤰᤐᤠ ᤏᤢ ᤆᤥ᤺ᤰᤕᤢᤶᤓᤥᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤢᤏᤡ᤹ ᤆᤢᤵᤛᤠᤱ ᤜᤢᤰᤁᤥ ᤀᤡᤃᤪ ᤂᤢᤏᤡ᤹ ᤋᤥᤘᤠᤒᤥ ᤀᤡᤒᤢᤃᤧᤴ ᤔᤡᤰᤛᤣᤴ ᤗᤰᤔᤠ ᤐᤠᤱᤄᤢᤛᤡᤖᤥ॥

¹⁷ ᤂᤧᤴ ᤀᤡᤒᤢᤃᤧᤴ ᤔᤡᤰᤛᤣᤴ ᤔᤣ᤺ᤴᤏᤣ ᤛᤱᤔᤠ ᤏᤢ ᤀᤡᤱᤔᤠ ᤀᤠᤳᤋᤡᤸᤗᤧᤀᤠᤱ ᤔᤧᤛᤢᤰᤋᤢᤴᤗᤥ॥ ᤂᤧᤴ ᤔᤡᤰᤛᤣ᤺ᤴᤏᤡᤱᤃ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤢᤔᤡᤱ ᤀᤡᤃᤪ ᤁᤢᤔᤡᤱᤅᤡᤸᤗᤧ ᤁᤢᤄᤠᤏᤡ᤺ᤳ ᤐᤥᤱᤗᤥ॥

¹⁸ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤆᤥᤰᤗᤥ॥ ᤀᤠᤳᤋᤡᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤛᤠᤒᤠ ᤆᤥᤰ ᤜᤠᤖᤠ᤹ ᤂᤧᤸᤗᤧ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤢᤄᤠᤏᤡ᤺ᤳᤋᤡᤸᤗᤧ ᤁᤢᤒᤣᤴ ᤑᤠ᤺ᤰᤂᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤳᤇᤠ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤄᤠᤏᤡ᤺ᤳᤗᤥ॥ ᤂᤧᤴ ᤂᤠᤏᤡ᤺ᤳᤋᤡᤱᤃ ᥌᥌᥌ ᤖᤥ॥