ᤛᤢᤑᤥ 11 - LIFOTNT

ᤏᤧᤳᤇᤡ ᤋᤥ᤺ᤴᤍᤡ ᤁᤧᤒᤡᤒᤠᤜᤠ᤹

¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤢᤛᤡ᤺ᤰᤔᤠ ᤛᤡᤱ ᤁᤢᤀᤡᤛᤡᤰ ᤋᤰᤁᤠ᤺ᤳᤎᤡᤰ ᤔᤧᤒᤡᤖᤠᤱᤅᤠᤱ ᤀᤰᤂᤣ ᤔᤧᤔᤧᤳᤋᤠᤱ. “ᤐᤣᤃᤧ᤹ᤀᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤡ᤺ᤰᤋᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤏᤡᤖᤧᤛᤧ᤹ᤀᤥ॥

² ᤁᤖ ᤜᤡᤶᤔᤡᤸᤗᤧ ᤗᤰᤂᤢᤶᤔᤡᤴ ᤔᤧᤛᤡ᤺ᤰᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤁᤧᤖᤧᤰ ᤗᤠᤈᤣ᤹ᤒᤠ ᤛᤢᤘᤠᤱᤜᤠ᤹ ᤐᤡᤖᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤧ᤹ᤕᤥ ᤗᤠ ᤗᤡ-ᤏᤧᤳ (᥊᥈) ᤌᤠᤖᤡᤰ ᤛᤣᤛᤣ ᤕᤧᤰᤕᤰᤁᤡᤴ ᤔᤧᤛ᤹ᤖᤢ ᤔᤧᤗᤠ᤺ᤰᤋᤢ᤹ᤖᤥ॥

³ ᤜᤧᤰᤁᤩᤠᤱ ᤀᤡᤱᤃᤠ᤹ ᤏᤧᤳᤇᤡ ᤀᤠᤍᤥ᤺ᤴᤍᤡ ᤁᤧᤒᤡᤒᤠᤜᤠ᤹ ᤕᤢᤰ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤃᤡᤋᤣᤳ ᤆᤠᤱᤛᤢᤀᤠᤱ ᤜᤧᤴᤇᤡᤱ ᤌᤡᤰ ᤁᤡᤵ ᤏᤧᤳᤇᤡᤀᤠᤱ ᤋᤢᤰᤐᤥᤱ (᥇.᥈᥌᥆) ᤕᤧᤴ ᤌᤠᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤇᤡᤖᤥ॥”

⁴ ᤂᤢᤴᤇᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤍᤠᤱᤒᤠᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤏᤧᤳᤇᤡ ᤈᤤᤋᤢᤏ ᤛᤡᤱᤒᤢᤱ ᤏᤢ ᤏᤧᤳᤇᤡ ᤛᤣᤔᤡᤕᤢᤱᤍᤧᤴᤛᤡᤖᤥ॥

⁵ ᤀᤠᤳᤋᤡᤴᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤔᤡᤖᤠ᤺ᤰᤁᤡᤸᤗᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤗᤠᤒᤢ ᤛᤧᤖᤢᤛᤡ᤹ᤖᤥ॥ ᤀᤰᤂᤣᤗ᤹ᤖᤡᤰ ᤂᤢᤴᤇᤡ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ ᤛᤡᤔᤠᤀᤣ ᤐᤥᤱᤗᤥ॥

⁶ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤇᤢᤖ ᤌᤠᤖᤡᤰ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤋᤖ᤺ᤱᤃᤧᤴ ᤋᤠᤱᤛᤠᤰᤐᤧᤴ ᤛᤢᤵᤔᤠ ᤔᤢᤰᤛᤠᤶ ᤁᤳᤇᤢ᤹ᤖᤥ॥ ᤜᤧᤰᤁᤩᤠᤱ ᤕᤱᤄᤱ ᤏᤢ ᤘᤖ᤺ᤱᤅᤡᤴ ᤔᤠᤰᤂᤡ᤹ᤀᤥ ᤗᤧᤱᤔᤠ ᤔᤢᤰᤛᤠᤶᤔᤠᤱ ᤁᤳᤇᤢ᤹. ᤕᤠᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤴᤇᤡ᤹ ᤏᤡᤱᤘᤠ᤹ ᤜᤧᤰᤁᤣᤀᤣ ᤁᤠᤰ ᤐᤖᤡᤰᤗᤧᤴ ᤔᤡᤴᤍᤣ᤹ᤜᤠ᤹ᤀᤠᤱ ᤋᤠ᤺ᤵᤔᤠ ᤛᤢᤰᤛᤢ᤹ᤖᤥ॥

⁷ ᤂᤢᤴᤇᤡ᤹ ᤋᤥ᤺ᤴᤍᤡ ᤐᤡᤔᤠ ᤛᤢ᤺ᤳᤇᤢᤀᤠᤱ ᤂᤧᤴ ᤁᤢᤍᤪᤥ᤺ᤶ ᤔᤣ᤺ᤴᤏᤣᤒᤠ ᤗᤢᤶᤒᤠ᤺ᤳᤗᤠᤶ ᤁᤧᤗ᤺ᤶᤒᤠ ᤂᤧᤴ ᤌᤰᤛᤠ᤺ᤸᤗᤧ ᤂᤢᤴᤇᤡ᤹ᤏᤢ ᤌᤱ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤏᤧᤵᤔᤠᤱ ᤏᤠ᤺ᤴᤍᤢᤛᤡ᤹ᤀᤠᤱ ᤛᤧᤖᤢᤛᤡ᤹ᤖᤥ॥

⁸ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤱᤃ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤸᤗᤧ ᤁᤢᤔᤠᤖᤠᤶᤔᤥ ᤏᤧᤛᤡᤖᤥ॥ ᤂᤧᤵᤔᤥᤀᤣ ᤂᤢᤴᤇᤡ᤹ ᤍᤠᤱᤒᤠᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥᤴᤍᤢ ᤔᤧᤛᤧᤖᤢᤀᤠᤱ ᤘᤕᤧᤖᤥ॥ ᤂᤧᤴ ᤕᤧᤰᤕᤰᤁᤡᤱᤃ ᤛᤍᤥᤔ ᤕᤧᤰᤕᤰ ᤏᤢ ᤔᤡᤛᤪ ᤗᤠᤈᤣ᤹ ᤜᤧᤰᤋᤱᤒᤠᤖᤥ॥

⁹ ᤜᤧᤰᤁᤩᤠᤱ ᤕᤧᤴ ᤛᤢᤶᤛᤡᤀᤠᤱ ᤗᤧᤴᤈᤥ ᤌᤠᤖᤡᤰ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣ᤹ᤜᤠ᤹ᤗᤠᤶ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤀᤥᤔᤧᤔᤧᤳᤋᤢᤛᤠᤱ ᤀᤡ᤺ᤵᤐᤢᤱᤅᤥ ᤗᤢᤵᤔᤠᤃ ᤔᤧᤶᤒᤠᤱᤄᤢᤴᤇᤡᤴᤗᤥ॥

¹⁰ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤩᤧᤳᤇᤡᤒᤠᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ ᤌᤠᤱᤅᤠᤱ ᤔᤧᤛ᤺ᤳᤗᤥ. ᤜᤧᤰᤁᤩᤠᤱ ᤔᤡᤰᤋᤥᤰ ᤔᤧᤒᤡᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤧᤵᤑᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠᤜᤠ᤹ ᤛᤠ᤹ᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤆᤠ᤺ᤳᤋᤧᤳᤇᤢᤀᤠᤱ ᤘᤕᤧᤳᤇᤡᤖᤥ॥

¹¹ ᤁᤖ ᤕᤧᤴ ᤛᤢᤶᤛᤡᤀᤠᤱ ᤗᤧᤴᤈᤥ ᤀᤣᤃᤠᤱ ᤂᤧᤱᤜᤠ᤹ ᤏᤧᤵᤔᤠᤱᤅᤥ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠᤴ ᤗᤠᤛᤧᤀᤠᤱ ᤏᤧᤵᤔᤠᤱ ᤐᤥᤃᤧᤳᤇᤡᤀᤠᤱ ᤕᤧᤒᤧᤳᤇᤡᤖᤥ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤥᤃᤧᤔᤧᤵᤐᤠᤖ ᤁᤧᤒᤵᤐᤠ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥

¹² ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤳᤌᤥ ᤌᤠᤅᤧᤳᤇᤧ᤹ ᤁᤧᤗ᤹ᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤀᤠᤱ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤡᤖ ᤔᤧᤒᤳᤇᤧᤸᤗᤧᤛᤠ ᤌᤥ ᤂᤠᤵᤔᤡ᤺ᤳᤋᤥ ᤗᤠᤛᤧᤳᤇᤡᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣᤛᤧᤳᤇᤡᤖᤥ॥

¹³ ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤕᤧᤶᤔᤥ ᤐᤕᤶ ᤕᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤗᤢᤵᤗᤡ ᤌᤠᤅᤧᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤌᤡᤒᤥᤱᤗᤰ ᤕᤖᤧᤸᤗᤧ ᤜᤧᤴᤇᤡᤱ ᤏᤢᤛᤡ (᥍.᥆᥆᥆) ᤔᤏᤠᤜᤠ᤹ ᤜᤍ᤹ ᤔᤧᤛᤩᤧᤖᤥ॥ ᤜᤧᤰᤁᤩᤠᤱ ᤔᤧᤴᤇᤡ᤺ᤶᤏᤠ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤢᤰᤛᤠᤶᤍᤠᤱᤒᤠ ᤆᤥᤰ ᤑᤠ᤹ᤀᤠᤱ ᤔᤡᤔᤡᤍᤡᤱ ᤔᤧᤒᤡᤖᤢᤖᤥ॥

¹⁴ ᤂᤧᤴ ᤏᤡᤛᤡᤃᤣᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤱᤃ ᤐᤣ. ᤁᤖ ᤀᤥᤔᤧᤳᤋᤧᤶᤔᤧ᤹ᤀᤥ. ᤛᤢᤶᤛᤡᤃᤣᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤱᤃ ᤜᤠᤖᤠᤀᤣ ᤋᤠᤖ ᤐᤳᤗᤥ॥

ᤏᤢᤛᤡᤃᤣᤰᤐᤠ ᤌᤢᤳᤌᤢᤖᤡ᤺ᤵᤐᤠ

¹⁵ ᤜᤧᤰᤁᤩᤠᤱ ᤏᤢᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤶᤒᤠ ᤀᤡᤰᤗᤠᤜᤠ᤹ ᤀᤰᤂᤣᤗ᤹ᤖᤡᤰ ᤋᤩᤧᤖᤥ. “ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤠᤏᤡ᤹ ᤍᤠᤱᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤁᤢᤜᤠᤱᤈᤢᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤛᤍᤠᤍᤡᤱ ᤛᤍᤠᤍᤡᤱ ᤜᤠᤱ ᤆᤥᤃᤢ᤹ᤖᤥ॥”

¹⁶ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤒᤠᤅᤣ ᤂᤢᤏᤡ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥᤒᤠᤜᤠ᤹ ᤛᤠᤶᤒᤥᤴ ᤔᤧᤓᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤔᤧᤈᤥᤃᤢᤖ

¹⁷ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤢᤏᤠᤜᤢᤖᤡᤀᤠᤱᤎᤥᤏᤢ ᤀᤠᤸᤗᤥ ᤌᤠᤖᤡᤰ ᤁᤧᤘᤠ᤹ᤒᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤏᤠᤈᤶᤃᤧᤴ ᤏᤥᤃᤧᤴ ᤐᤡᤀᤠᤛᤡᤃᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤐᤕᤶ ᤕᤶᤒᤠ ᤁᤧᤔᤢᤰᤛᤠᤶᤔᤡᤴ ᤁᤧᤍᤠ᤺ᤰᤋᤢᤀᤠᤱ ᤁᤧᤘᤠ᤹ ᤜᤧᤰᤁᤩᤠᤱ ᤜᤠᤱᤕᤢᤰ ᤆᤥ᤺ᤰᤔᤠ ᤁᤧᤜᤣ᤺ᤰᤋᤢᤀᤠᤱ ᤁᤧᤘᤠ᤹ᤖᤥ॥

¹⁸ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ᤏᤢ ᤂᤢᤏᤡ᤹ ᤕᤠ᤺ᤰᤗᤧ᤹ᤖᤧᤀᤠᤱ ᤘᤠ᤹. ᤁᤖ ᤀᤠᤸᤗ ᤂᤧᤏᤧ᤹ ᤁᤧᤛᤡᤰ ᤐᤥ᤺ᤰᤔᤠ ᤕᤧᤶ ᤁᤧᤖᤧᤀᤠᤱ ᤘᤠ᤹॥ ᤁᤧᤛᤡᤒᤠᤜᤠ᤹ ᤂᤠᤛᤧᤴ ᤆᤥ᤺ᤰᤔᤠᤛᤡ ᤕᤧᤶ ᤋᤩᤧᤀᤠᤱ ᤘᤠ᤹॥ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤃᤡᤒᤠ ᤆᤢᤰᤛᤠ ᤏᤢ ᤕᤶᤒᤠ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤧᤛᤧᤘᤠᤖᤥᤒᤠᤜᤠ᤹ ᤜᤧᤰᤁᤩᤠᤱ ᤁᤧᤛᤣᤛᤣ ᤔᤏᤠᤜᤠ᤹ ᤜᤠᤱᤛᤧᤶ ᤐᤡᤔᤠᤛᤡ ᤛᤢᤕᤧᤶ ᤋᤩᤧᤀᤠᤱ ᤘᤠ᤹॥ ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤔᤧᤱᤒᤠᤜᤠ᤹ ᤔᤧᤱᤔᤠᤛᤡ ᤕᤧᤶᤔᤠᤱ ᤋᤩᤧᤀᤠᤱ ᤘᤠ᤹ᤖᤥ॥”

¹⁹ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤜᤖᤧᤀᤠᤱ ᤂᤧᤴ ᤛᤡᤃᤠᤱᤒᤠ ᤔᤠᤱᤜᤢᤵᤐᤡᤸᤗᤧᤴ ᤛᤴᤍᤥ᤺ᤰᤁᤡᤴᤏᤠᤱ ᤏᤡᤎᤠᤒᤧᤖᤥ॥ ᤜᤧᤰᤁᤩᤠᤱ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤗᤢᤵᤗᤡ ᤌᤠᤅᤧ. ᤜᤧᤰᤁᤩᤠᤱ ᤕᤶᤒᤕᤶᤒᤠ ᤑ᤺ᤴ ᤌᤩᤧᤖᤥ॥