ᤛᤢᤑᤥ 10 - LIFOTNT

ᤔᤠᤱᤗᤠᤀᤡᤱᤒᤠ ᤏᤢ ᤆᤢᤰᤛᤠ ᤛᤠᤵᤁᤡᤳᤋᤡᤴ

¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤘᤣ᤹ ᤔᤢᤰᤛᤠᤶᤍᤠᤱᤒᤠ ᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤧᤖ ᤐᤳᤇᤧᤒᤠ ᤏᤡᤛᤢᤱ॥ ᤂᤧᤴ ᤂᤠᤵᤔᤡ᤺ᤳᤋᤡᤸᤗᤧ ᤐᤴᤇᤡᤱᤅᤠᤱ ᤘᤕᤧ. ᤁᤢᤎᤧᤃᤣᤰ ᤛᤶᤍᤠᤱᤃ ᤏᤠᤶᤎᤡᤱᤃᤥᤴ ᤐᤳᤇᤧ. ᤂᤢᤏᤧ᤹ ᤁᤢᤏᤠᤖᤠ᤺ᤱᤃ ᤏᤠᤶᤔᤡᤴ ᤜᤧᤰᤁᤣ ᤔᤡᤰ ᤁᤧᤈᤧᤶᤒᤠ ᤆᤥᤃᤧ. ᤜᤧᤰᤁᤩᤠᤱ ᤁᤢᤗᤠᤱᤜᤠ᤹ᤃ ᤔᤡ ᤁᤧᤍᤡ᤺ᤵᤐᤠ ᤛᤡᤳᤗᤠᤱ ᤁᤢᤀᤡᤛᤡᤰ ᤆᤥᤃᤧᤖᤥ॥

² ᤂᤧᤸᤗᤧ ᤁᤢᤜᤢᤰᤁᤥ ᤆᤢᤰᤛᤠ ᤑᤠ᤺ᤱᤔᤏᤠᤒᤠ ᤛᤠᤵᤁᤡᤳᤌᤡᤰ ᤁᤳᤋᤢ॥ ᤂᤧᤸᤗᤧ ᤁᤢᤈᤢᤵᤛᤠᤱ ᤗᤠᤱᤅᤡᤸᤗᤧ ᤘᤖ᤺ᤱᤅᤥ ᤏᤢ ᤁᤢᤓᤧᤴᤇᤠᤱ ᤗᤠᤱᤅᤡᤸᤗᤧ ᤂᤠᤶᤒᤣ᤺ᤰᤔᤥ ᤋᤥ᤹ᤖᤢᤀᤠᤱ ᤕᤧᤒᤧᤖᤥ॥

³ ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤴ ᤂᤡᤖᤡᤱᤒᤠᤴ ᤜᤢ᤺ᤰᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖᤥ॥ ᤂᤢᤏᤧ᤹ ᤀ᤺ᤰᤋᤧᤸᤗᤧ ᤋᤠᤱᤛᤠᤰᤐᤧᤴ ᤏᤢᤛᤡᤗᤧᤱ ᤗᤥ᤺ᤰᤂᤢᤖᤥ॥

⁴ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤋᤠᤱᤛᤠᤰᤐᤠ ᤁᤧᤗᤥᤱᤒᤠᤸᤗᤧ ᤁᤢᤒᤠ᤺ᤴᤏᤡᤴ ᤛᤠᤵᤔᤠᤀᤣ ᤀᤡ᤺ᤳᤋᤢᤱᤅᤠᤱ ᤐᤳᤇᤠᤱ. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤴ ᤏᤢᤛᤡ ᤂᤧᤖᤧᤱᤄᤢᤖᤢᤱ ᤁᤧᤗ᤹ᤒᤠᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤛᤠᤵᤋᤧᤴᤏᤧ᤹. ᤁᤖ ᤂᤧᤱᤜᤠ᤹ ᤔᤠ᤹ᤖᤧᤀᤠᤱ ᤁᤳᤋᤧ᤹ᤀᤥ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ॥

⁵ ᤜᤧᤰᤁᤩᤠᤱ ᤀᤡᤱᤃᤠ᤹ ᤏᤡᤛᤢᤱᤒᤠ ᤂᤧᤴ ᤘᤖ᤺ᤱᤅᤥ ᤏᤢ ᤂᤠᤶᤒᤣ᤺ᤰᤔᤥ ᤁᤧᤕᤧᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤡᤴ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤑᤥ᤺ᤰᤂᤢᤖ

⁶ ᤛᤠᤱᤃᤪᤠᤶᤐᤣᤍᤠᤱ. ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤢ ᤘᤖ᤺ᤱ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤗᤥ॥ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤐᤠ᤺ᤳᤋᤢ. “ᤀᤠᤸᤗ ᤂᤧᤴ ᤕᤧᤶᤔᤡᤴ ᤋᤠᤔᤠ ᤕᤖᤡᤰ ᤜᤥᤵᤗᤥ.

⁷ ᤁᤖ ᤏᤢᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤢᤛᤧᤘᤠᤖᤥᤒᤠᤜᤠ᤹ ᤋᤃᤡ ᤀᤡᤱᤓᤴ ᤆᤥᤃᤢᤛᤡᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴᤜᤠ᤹ ᤁᤧᤳᤗᤥ॥”

⁸ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤢᤱᤒᤠ ᤀᤡᤰᤗᤠ᤺ᤸᤗᤧ ᤕᤠᤶᤔᤥ ᤀᤰᤂᤣ ᤔᤧᤳᤋᤠᤱ. “ᤐᤣᤃᤧ᤹ᤀᤠᤱ ᤂᤧᤴ ᤘᤖ᤺ᤱᤅᤥ ᤏᤢ ᤂᤠᤶᤒᤣ᤺ᤰᤔᤥ ᤁᤧᤕᤧᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤂᤧᤴ ᤁᤧᤒᤠ᤺ᤱᤒᤠ ᤛᤠᤵᤁᤡᤳᤋᤡᤴ ᤋᤠ᤺ᤰᤋᤧ᤹॥”

⁹ ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤥ ᤐᤣᤃᤠᤱᤅᤠᤱ ᤂᤧᤴ ᤆᤢᤰᤛᤠ ᤛᤠᤵᤁᤡᤳᤋᤡᤴ ᤏᤠ᤺ᤰᤋᤢᤱ॥ ᤂᤧᤸᤗᤧ ᤔᤧᤳᤋᤠᤱ. “ᤁᤫᤧ᥄ ᤁᤴ ᤋᤠ᤺ᤰᤋᤧ᤹ᤀᤠᤱ ᤆᤩᤧ᤹. ᤁᤴ ᤁᤧᤈ᤺ᤸᤗᤧ ᤁᤧᤔᤢᤖᤠᤀᤥ ᤛᤰᤘᤠᤄᤢ ᤜᤧᤰᤁᤣ ᤐᤗᤡᤶᤗᤡᤶᤛᤠᤱ ᤁᤧᤛᤠᤵᤐᤥ᤺ᤰᤐᤥ ᤗᤠ᤺ᤳᤋᤠᤱ ᤐᤄᤡ᤺ᤰᤂᤡ᤺ᤰᤗᤥ॥”

¹⁰ ᤜᤧᤰᤁᤩᤠᤱ ᤂᤧᤴ ᤆᤢᤰᤛᤠ ᤛᤠᤵᤁᤡᤳᤋᤡᤴ ᤁᤢᤜᤢᤰᤁᤥᤗᤠᤶ ᤋᤠ᤺ᤰᤋᤢᤱᤅᤠᤱ ᤀᤡᤱᤃᤠ᤹ ᤆᤠᤱ॥ ᤂᤧᤴ ᤆᤠᤱᤅᤡᤸᤗᤧ ᤀᤠᤔᤢᤖᤠᤀᤥ ᤐᤗᤡᤶᤗᤡᤶᤍᤧ. ᤁᤖ ᤀᤠᤛᤠᤵᤐᤥ᤺ᤰᤐᤥ ᤗᤠᤛᤧᤀᤠᤱ ᤐᤄᤡ᤺ᤰᤂᤡ᤺ᤰᤋᤧᤖᤥ॥

¹¹ ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤕᤖᤡᤰ ᤔᤏᤠᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤕᤖᤡᤰ ᤐᤠ᤺ᤴᤍᤠᤱᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤕᤠᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤳᤋᤢᤖᤀᤣ ᤐᤥᤱᤗᤥ॥”