ᤛᤢᤑᤥ 1 - LIFOTNT

ᤕᤢᤜᤢᤴᤏᤠᤖᤧ ᤁᤢᤒᤠ᤺ᤵᤔᤠ ᤐᤠᤴ ᤋᤠ᤺ᤴᤍᤡ

¹ ᤁᤴ ᤛᤠᤵᤐᤴᤏᤥ ᤕᤧᤛᤢ ᤂᤪᤡᤛ᤻ᤋᤖᤧ ᤀᤥᤛᤣ᤺ᤴᤍᤠᤱ ᤆᤥᤃᤢᤒᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤐᤳᤗᤥ॥ ᤂᤧᤴ ᤀᤥᤛᤣ᤺ᤴᤍᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗ ᤜᤠᤖᤠᤀᤣ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢ ᤛᤧᤘᤠᤖᤥᤒᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤐᤡᤖᤢᤖᤥ॥ ᤁᤴ ᤐᤠ᤺ᤴᤜᤠ᤹ ᤁᤢᤛᤧᤘᤠᤖᤥᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤛᤡᤱ ᤏᤡ᤺ᤳᤋᤢᤖ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤠᤱᤗᤠᤀᤡᤱᤒᤠᤴ ᤐᤠᤱᤄᤢᤖᤥ॥

² ᤕᤢᤜᤢᤴᤏᤠᤖᤧᤃ ᤂᤢᤏᤧ᤹ ᤂᤧᤵᤛᤢᤒᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤋᤢᤒᤠ ᤁᤠᤰ ᤛᤧᤰᤂᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢ᤹ᤖᤥ॥

³ ᤁᤵᤔᤥ ᤁᤧᤒᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤏᤡ᤺ᤵᤐᤧᤴ ᤔᤢ᤹ᤀᤡᤛᤠᤒᤠᤖᤥ. ᤜᤧᤰᤁᤩᤠᤱ ᤂᤧᤴ ᤁᤧᤄᤧᤶᤒᤠᤜᤠ᤹ ᤏᤢ ᤂᤧᤵᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤁᤴ ᤁᤠᤰ ᤐᤠ᤺ᤴᤜᤠ᤹ ᤐᤥᤱᤔᤠ ᤕᤧᤶ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥

ᤕᤢᤜᤢᤏᤠ᤺ᤸᤗᤧ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ ᤛᤧᤘᤠ ᤜᤠᤰᤋᤢᤛᤡ᤹

^4-5 ᤀᤡᤱᤃᤠ᤹ ᤕᤢᤜᤢᤴᤏᤠ᤺ᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤀᤣᤛᤡᤕᤠ ᤋᤧᤱᤃᤵᤐᤥ ᤁᤧᤏᤧᤒᤠ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ ᤜᤠᤰᤏᤡᤱᤗᤥ॥ ᤀᤠᤸᤗᤥ ᤁᤧᤘᤠ᤹ᤒᤠ. ᤀᤢᤏᤠᤜᤢᤖᤡᤀᤥᤀᤠᤱ ᤘᤕᤧ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤁᤧᤍᤠᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏᤢ ᤁᤢᤜᤠᤱᤕᤢᤰᤏᤠ ᤋᤃᤠᤱᤒᤠ ᤏᤢᤛᤡ ᤛᤠᤶᤜᤠ᤹ᤗᤠᤶ. ᤜᤧᤰᤁᤩᤠᤱ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤐᤠᤴ ᤁᤧᤒᤠ᤺ᤵᤐᤠ. ᤁᤧᤛᤡᤒᤠᤀᤥᤗᤠᤶ ᤕᤠᤶᤔᤥ ᤁᤧᤜᤡᤱᤒᤠᤜᤠ᤹ᤀᤥ ᤌᤡᤰᤛᤡᤃᤣᤰᤐᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤜᤠᤖᤠ᤹ ᤂᤡᤏᤡ᤹ᤀᤥ ᤘᤠ᤹ᤖᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤀᤠᤏᤡ᤹ ᤗᤠᤕᤥᤗᤠᤶ ᤁᤢᤔᤠᤰᤂᤡ᤹ᤀᤡᤸᤗᤧ ᤛᤧᤴᤗᤵ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥

⁶ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱ ᤏᤢ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤗᤳᤇᤠ ᤁᤢᤜᤠᤱᤈᤢᤶᤔᤥ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ॥ ᤜᤠᤖᤠ᤹ ᤕᤧᤛᤢ ᤂᤪᤡᤛ᤻ᤋᤀᤥ ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶ ᤛᤍᤠᤍᤡᤱ ᤛᤍᤠᤍᤡᤱ ᤐᤥᤱᤗᤖᤥ᥄ ᤀᤠᤔᤧᤴ॥

⁷ ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ᤃ ᤂᤠᤵᤔᤡ᤺ᤵᤐᤥ ᤕᤢ᤺ᤖ ᤐᤳᤗᤥ॥ ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤏᤢ ᤂᤢᤏᤧ᤹ ᤁᤧᤎᤢᤵᤐᤠᤜᤠ᤹ᤖᤧᤀᤠᤱ ᤔᤧᤏᤡᤛᤢ᤹ᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤆᤥᤃᤢᤸᤗᤧ ᤔᤧᤖᤡᤱ ᤔᤧᤎᤰᤗᤥ॥ ᤜᤠᤖᤠ᤹ ᤀᤰᤂᤣᤀᤣ ᤐᤥᤱᤗᤖᤥ᥄ ᤀᤠᤔᤧᤴ॥

⁸ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ. ᤀᤸᤑᤠ ᤏᤢ ᤀᤥᤔᤣᤃᤠ ᤀᤡᤱᤃᤠ᤹ᤀᤣᤖᤥ. ᤀᤠᤸᤗᤥ ᤁᤧᤘᤠ᤹ᤒᤠ. ᤀᤢᤏᤠᤜᤢᤖᤡᤀᤥᤀᤠᤱ ᤘᤕᤠᤱ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤁᤧᤍᤠᤒᤠ ᤔᤢᤰᤛᤠᤶᤍᤠᤱᤒᤠᤀᤠᤖᤥ ᤗ᤹ᤖᤡᤰ ᤐᤠ᤺ᤳᤋᤢ᤹॥

ᤔᤧᤴᤇᤠᤶᤛᤠᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤡᤱᤒᤠ

⁹ ᤀᤡᤱᤃᤠ᤹ ᤕᤢᤜᤢᤴᤏᤠᤴ ᤏᤛᤠ᤺ᤴᤏᤥ ᤂᤡᤏᤡ᤹ ᤑᤢ᤹ᤀᤠᤖᤥ॥ ᤂᤪᤡᤛ᤻ᤋ ᤕᤧᤛᤢᤴ ᤏᤛᤠᤴ ᤆᤥ᤺ᤰᤔᤧᤸᤗᤧ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤔᤧᤄᤥᤛᤢᤒᤠ ᤏᤡᤱᤄᤢᤶᤔᤡᤴ ᤂᤡᤏᤡ᤹ᤏᤢ ᤛᤥᤛᤥᤖᤡᤰ ᤏᤠᤛᤡ ᤌ᤺ᤳᤋᤢᤱᤗ ᤌᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤏᤢ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤀᤡᤱᤓᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤳᤔᤥᤛ ᤘᤠᤃᤵᤗᤠᤈᤣ᤹ᤀᤥ ᤛᤠᤰᤐᤠ ᤁᤧᤎᤠᤒᤠ ᤔᤧᤈᤥᤃᤠᤱ ᤔᤧᤍᤣ᤹ᤖᤠᤱᤅᤠᤱ ᤘᤕᤠᤱ॥

¹⁰ ᤍᤠᤱᤒᤠᤸᤗᤧ ᤁᤢᤕᤧᤴᤏᤥ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤠᤱᤅᤠᤱ ᤘᤕᤠᤱᤅᤡᤸᤗᤧ ᤀᤠᤀᤣᤃᤠᤱᤗᤠᤶ ᤌᤢᤳᤌᤢᤖᤡ᤺ᤵᤐᤠᤸᤗᤧ ᤐᤕᤶ ᤕᤶᤒᤠ ᤁᤢᤀᤡᤰᤗᤠ ᤜᤧᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ॥

¹¹ ᤂᤧᤴ ᤀᤡᤰᤗᤠ᤺ᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤁᤧᤏᤡᤛᤢᤒᤠ ᤐᤠ᤺ᤴᤜᤠ᤹ ᤛᤠᤵᤋᤧ᤹ᤀᤠᤱ ᤀᤣᤑᤡᤛᤛ. ᤀᤡᤛ᤻ᤔᤷᤏᤠ. ᤐᤷᤃᤠᤔᤔ. ᤌᤡᤕᤠᤋᤡᤖᤠ. ᤛᤠᤷᤍᤡᤛ. ᤑᤡᤗᤠᤍᤣᤸᤑᤡᤕᤠ ᤏᤢ ᤗᤠᤀᤥᤍᤡᤁᤡᤕᤠ ᤕᤧᤰᤕᤰᤜᤠ᤹ᤀᤥᤒᤠ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ ᤜᤠᤰᤋᤧᤛᤧ᤹ᤀᤥ॥”

¹² ᤀᤡᤱᤃᤠ᤹ᤏᤢ ᤁᤧᤒᤠ᤺ᤵᤐᤧᤴ ᤜᤠ᤺ᤳᤏᤡᤒᤣ ᤑᤠ᤹ᤀᤠᤱ ᤂᤡᤖᤡ ᤜᤡᤛᤡᤱᤅᤠᤱᤅᤡᤸᤗᤧ ᤂᤧᤵᤔᤥ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤜᤠ᤹ ᤏᤡᤛᤢᤱᤛᤡᤱ॥

¹³ ᤂᤧᤸᤗᤧ ᤁᤢᤗᤢᤶᤔᤥ ᤌᤥᤗᤠᤶᤒᤠ ᤕᤥ ᤗᤠᤱᤈᤰᤁᤥ ᤌᤠᤖᤡᤰ ᤋᤣᤳ ᤁᤧᤈᤠᤱᤒᤠ ᤜᤧᤰᤁᤩᤠᤱ ᤁᤢᤛᤱᤒᤣ᤹ᤀᤥ ᤛᤠᤶᤔᤩᤠᤱ ᤑᤕᤢᤶ ᤐᤧᤷᤄᤧᤰ ᤁᤧᤜᤣᤒᤠ “ᤔᤧᤴᤇᤠᤶᤛᤠ᤺ᤴ” ᤜᤧᤰᤋᤱᤒᤠᤎᤡᤰ ᤏᤡᤛᤢᤱᤗᤥ॥

¹⁴ ᤂᤧᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤏᤠ᤺ᤱᤅᤡᤴ ᤜᤧᤰᤁᤣ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤏᤢ ᤂᤡ᤺ ᤜᤧᤰᤁᤣ ᤑ ᤗ᤹ᤖᤧᤖᤥ॥ ᤂᤢᤏᤧ᤹ ᤁᤢᤔᤡᤰᤁᤡᤱᤃ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤆᤥᤃᤧᤖᤥ॥

¹⁵ ᤂᤢᤏᤧ᤹ ᤁᤢᤗᤠᤱᤜᤠ᤹ᤃ ᤌᤌᤏᤠᤒᤠᤴ ᤔᤡᤀᤥ ᤀᤥ᤹ᤔᤠᤸᤗᤧ ᤛᤧᤸᤗᤧᤱ ᤛᤧᤸᤗᤧᤱ ᤀᤥ᤺ᤵᤐᤠ ᤁᤢᤀᤡᤛᤡᤰ. ᤜᤧᤰᤁᤩᤠᤱ ᤁᤢᤀᤡᤰᤗᤠ᤺ᤱᤃ ᤐᤕᤶ ᤕᤶᤒᤠ ᤘᤎᤠ᤺ᤶᤔᤡᤴ ᤛ᤺ᤰᤐᤠ ᤁᤢᤀᤡᤛᤡᤰ ᤆᤥᤃᤧᤖᤥ॥

¹⁶ ᤂᤢᤏᤧ᤹ ᤁᤢᤈᤢᤵᤛᤠᤱ ᤜᤢᤰᤁᤡᤸᤗᤧ ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤋᤧᤶᤛᤢᤛᤡᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤁᤢᤔᤢᤖᤠᤀᤥᤗᤠᤶ ᤏᤧᤵᤈᤠᤱ ᤗᤧᤵᤔᤠᤱ ᤂᤠᤃᤧᤛᤢᤰᤐᤠ ᤁᤢᤕᤠ ᤁᤧᤒᤵᤐᤠ ᤋᤠᤓᤣᤴ ᤗ᤺ᤴᤍᤧᤀᤠᤱ ᤐᤳᤇᤧᤖᤥ॥ ᤜᤧᤰᤁᤩᤠᤱ ᤁᤢᤏᤠᤖᤠ᤺ᤱᤃ ᤗᤧᤴᤍᤡᤰ ᤁᤧᤀᤥ᤺ᤵᤐᤠ ᤏᤠᤶᤔᤡᤴ ᤜᤧᤰᤁᤣ ᤔᤡᤰ ᤁᤧᤈᤧᤶᤒᤠ ᤆᤥᤃᤧᤖᤥ॥

¹⁷ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤛᤢᤱᤅᤠᤱ ᤀᤡᤱᤃᤠ᤹ᤃ ᤛᤡᤔᤠᤗᤡᤱᤎᤥᤀᤥ ᤁᤧᤖᤠᤱᤅᤠᤱ ᤁᤢᤗᤠᤱᤈᤰᤐᤥ ᤜᤷᤃᤢᤵᤛᤠ ᤆᤥ᤺ᤴᤍᤠᤱᤗᤥ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤜᤢᤰᤁᤡᤴ ᤀᤠᤛᤶᤍᤠᤱ ᤏᤧᤛ᤻ᤛᤢᤀᤠᤱ ᤀᤰᤂᤣ ᤔᤧᤳᤋᤠᤱᤗᤥ. “ᤔᤧᤃᤡᤛᤧᤴᤏᤧ᤹ᤀᤥ ᤀᤡᤱᤃᤠ᤹ ᤋᤥᤗᤡᤱᤛᤥᤔᤢ ᤏᤢ ᤁᤢᤏᤢᤵᤔᤠᤀᤠᤖᤥ॥

¹⁸ ᤁᤢᤜᤡᤱᤘᤧᤳ ᤁᤧᤒᤥᤱᤒᤧᤱᤃ ᤀᤡᤱᤃᤠ᤹ᤀᤣᤖᤥ॥ ᤀᤡᤱᤃᤠ᤹ ᤛᤩᤠᤱᤅᤠᤱ ᤘᤕᤠᤱ. ᤁᤖ ᤀᤥᤔᤧᤳᤋᤧ᤹. ᤀᤡᤱᤃᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤕᤠᤶᤔᤥ ᤜᤡᤅᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤛᤡᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤸᤗᤧᤴ ᤋᤡᤔᤡᤰᤜᤠ᤹ ᤀᤡᤱᤃᤠ᤹ ᤁᤳᤋᤢᤱᤗᤥ॥

¹⁹ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤧᤏᤧ᤹ ᤁᤧᤏᤡᤛᤢᤒᤠ ᤀᤠᤸᤗᤥ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤏᤢ ᤋᤠ᤺ᤴᤍᤡ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤛᤠᤵᤋᤧ᤹ᤀᤥ॥

²⁰ ᤂᤧᤏᤧ᤹ ᤀᤡᤱᤃᤠ᤹ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤁᤧᤏᤡᤛᤢᤒᤠ ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤏᤢ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤜᤠ᤹ᤖᤧᤴ ᤛᤡᤒᤡ᤹ ᤐᤠ᤺ᤴᤜᤠ᤹ᤃ ᤒᤠ ᤁᤴᤗᤥ—ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ᤀᤥᤒᤠ ᤔᤠᤱᤗᤠᤀᤡᤱᤒᤠᤛᤡᤖᤥ. ᤜᤧᤰᤁᤩᤠᤱ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤜᤠ᤹ ᤏᤢᤛᤡ ᤛᤣᤛᤣᤜᤢᤵᤗᤰᤛᤡᤖᤥ॥”