ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 9 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤥ᤺ᤵᤔᤠ ᤁᤢᤄᤠᤛᤧᤴ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ “ᤛᤠ ᤛᤡᤔᤠ” ᤀᤡᤰᤗᤠᤀᤥ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤀᤣ. ᤁᤠᤰ ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤂᤧᤏᤧ᤹ ᤏᤧᤶᤓᤥᤃᤧᤴ ᤁᤧᤏᤠᤖᤠ ᤑᤥᤛᤢᤱᤗᤥ. ᤁᤧᤈᤥᤃᤢᤒᤠ ᤁᤧᤖᤧᤰ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ॥ 2 ᤂᤧᤏᤧ᤹ ᤁᤧᤈᤥᤃᤢᤸᤗᤧ ᤀᤠᤱᤃᤠ᤹ ᤛ᤺ᤳᤋᤠᤀᤠᤱ ᤀᤥᤔᤢ ᤗ᤹ᤀᤠᤖᤥ. ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤛᤠᤶᤗᤥᤀᤠᤖ ᤁᤧᤏᤠᤖᤠ ᤑᤥᤛᤢᤱᤗᤥ॥ 3 ᤂᤧᤏᤧ᤹ ᤁᤧᤎᤠ᤺ᤶᤛᤡᤱᤅᤡᤸᤗᤧ ᤀᤠᤏᤡᤱᤔᤡᤜᤠ᤹ ᤂᤡᤖᤡ ᤔᤧᤜᤡᤛᤡᤱᤗᤥ ᤜᤧᤰᤁᤩᤠᤱ ᤕᤠᤱᤏᤠ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤈᤥ᤺ᤴᤏᤠᤱ ᤔᤧᤛᤡᤖᤥ॥ 4 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤁᤧᤏᤠᤅᤠᤱᤗᤥ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤗᤥ᤺ᤴᤍᤠᤱ ᤁᤧᤒᤡᤖᤠᤱᤗᤥ॥ ᤁᤧᤜᤠᤱᤕᤢᤰᤏᤠᤀᤥᤗᤠᤶᤒᤠ ᤀᤣ᤺ᤰᤐᤀᤣ᤺ᤰ ᤔᤧᤴᤈᤥ᤺ᤰᤁᤣ ᤀᤠᤱᤃᤠ᤹ ᤀᤠᤗᤠᤃᤡ ᤂᤠᤛᤧᤴ ᤁᤣᤗᤥ᤺ᤴᤍᤢᤀᤠᤱ ᤘᤠ᤹ᤖᤥ॥ 5 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ ᤁᤧᤓᤧ᤺ᤰᤋᤢᤛᤡᤖᤥ ᤜᤧᤰᤁᤩᤠᤱ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤧᤏᤧ᤹ ᤔᤧᤶᤓᤤ ᤁᤧᤈᤥᤃᤢᤛᤡᤀᤠᤱ ᤁᤧᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤂᤧᤏᤧ᤹ ᤁᤧᤔᤠᤛᤢᤀᤠᤱ ᤁᤧᤘᤠ᤹ᤖᤥ॥ 6 ᤛᤍᤠᤍᤡᤱᤗᤧ ᤗᤠᤃᤡ ᤀᤠᤏᤡ᤹ ᤏᤡᤱᤔᤡᤜᤠ᤹ ᤔᤧᤔᤧᤃᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰᤜᤠ᤹ ᤗᤢ᤺ᤴᤍᤧᤖᤥ. ᤂᤧᤱᤜᤠ᤹ᤃ ᤔᤏᤠ ᤏᤡᤱᤘᤠ᤹ᤛᤢᤶ ᤗᤠᤶᤒᤠᤀᤣ ᤔᤧᤔᤀᤣ ᤔᤧᤒᤣᤖᤥ॥ 7 ᤕᤜᤘᤣ ᤍᤠᤱᤒᤠᤴ ᤛᤍᤠᤍᤡᤱ ᤜᤠᤱᤆᤥᤰᤗᤥ. ᤂᤠᤛᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤁᤢᤜᤠᤱᤕᤢᤰᤏᤠᤴ ᤂᤢᤏᤧ᤹ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ॥ 8 ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ ᤛᤠᤶᤕᤥᤒᤠ ᤂᤠᤛᤧᤴ ᤆᤥᤃᤢᤖᤥ. ᤂᤢᤏᤧ᤹ᤃ ᤀᤣ᤺ᤰᤐᤀᤣ᤺ᤰ ᤔᤧᤴᤈᤥ᤺ᤰᤛᤣ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥᤃᤢᤛᤡᤖᤥ॥ 9 ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤏᤠᤅᤢᤛᤡᤖᤥ. ᤂᤧᤱᤜᤠ᤹ ᤋᤢᤰᤂᤣᤀᤥ ᤔᤧᤎᤠ᤺ᤸᤗᤧ ᤛᤧ᤺ᤵᤋᤢᤛᤡᤖᤥ॥ 10 ᤀᤠᤳᤋᤡᤴᤜᤠ᤹ᤖᤧ ᤂᤧᤏᤧ᤹ ᤁᤢᤛᤡᤱ ᤁᤧᤶᤏᤡ᤺ᤳ ᤂᤧᤱᤜᤠ᤹ᤖᤧ ᤋᤠ᤺ᤰᤐᤥ ᤁᤧᤶᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤣ. ᤂᤧᤏᤧ᤹ ᤁᤧᤃᤥ᤺ᤵᤐᤠᤜᤠ᤹ ᤁᤧᤴᤗᤧᤖᤢᤴᤇᤡᤸᤗᤥ॥ 11 ᤛᤠᤶᤗᤥᤖᤧᤶᤔᤧ᤹ᤀᤠᤱ ᤛᤡᤕᤥᤏᤀᤥ ᤜᤠᤱ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤜᤠ᤹ ᤁᤧᤖᤧᤰ ᤔᤏᤠᤜᤠ᤹ ᤆᤧᤰᤋᤧᤶᤛᤡᤶᤔᤧ᤹ᤀᤥ॥ 12 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤢᤰᤂᤣ ᤗᤠᤰᤂᤣ ᤁᤧᤍᤢᤶᤒᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤛᤡᤖᤥ. ᤂᤧᤱᤜᤠ᤹ᤖᤧ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤔᤧᤱᤄᤧᤶᤏᤠ ᤔᤧᤗᤧᤱᤛᤡᤱᤅᤡᤴᤗᤥ. ᤜᤧᤰᤁᤩᤠᤱ ᤁᤢᤔᤏᤠ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖᤥ॥ 13 ᤕᤜᤘᤣ ᤍᤠᤱᤒᤠᤀᤣ. ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄ ᤀᤠᤏᤡᤱᤔᤡᤜᤠ᤹ᤖᤧ ᤛᤠ᤹ᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤠᤒᤠᤴ ᤀᤥᤔᤧᤳᤋᤧ᤹ᤀᤥ. ᤀᤠᤱᤃᤠ᤹ ᤛᤡᤔᤧᤸᤗᤧ ᤋᤣ᤹ᤔᤠ ᤆᤥ᤺ᤰᤁᤠ ᤛᤧ᤺ᤵᤋᤠᤱᤅᤧ᤹ᤀᤥ॥ 14 ᤀᤠᤱᤃᤠ᤹ ᤋᤠᤱᤛᤧ᤺ᤵᤋᤠᤱᤅᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤕᤖᤢᤛᤗᤧ᤺ᤶᤒᤠ ᤋᤠ᤺ᤰᤜᤴ ᤋᤃᤡ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤖ ᤁᤧᤏᤠᤖᤠ ᤑᤥᤔᤠ ᤛᤢᤰᤋᤢᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤧ᤺ᤵᤋᤠᤱ ᤑᤠ᤹ᤀᤠᤱ ᤛ᤺ᤵᤔᤠ ᤛᤢᤰᤁᤠᤖᤥ॥ 15 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤒᤠᤅᤣ ᤔᤧᤍᤕᤢᤒᤠ ᤗᤢᤶᤒᤠ᤺ᤳᤋᤥ ᤀᤠᤒᤠᤅᤣ ᤔᤧᤎᤠᤖᤥ. ᤂᤧᤱᤜᤠ᤹ᤖᤧ ᤔᤧᤈᤡᤰᤂᤢᤀᤠᤱ ᤔᤧᤍᤠ᤺ᤰᤋᤢᤒᤠ ᤀᤡᤀᤥ ᤀᤠᤒᤠᤅᤣ ᤔᤧᤎᤠᤖᤥ॥ 16 ᤕᤜᤘᤣ ᤍᤠᤱᤒᤠᤱᤃ ᤂᤢᤏᤧ᤹ ᤆᤥᤃᤢᤒᤠ ᤂᤠᤛᤧᤴᤗᤠᤶᤒᤠᤀᤣ ᤁᤢᤛᤡᤱ ᤏᤡ᤺ᤳᤋᤧᤳᤗᤥ. ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤀᤠᤒᤠᤅᤣ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ॥ ᤛᤣᤗᤠ 17 ᤏᤡᤱᤘᤠ᤹ᤑᤢᤔᤠᤱ ᤔᤧᤴᤀᤡ᤺ᤵᤔᤏᤠ ᤋᤠᤰᤁᤧᤓᤧ᤹ᤒᤠ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤔᤠᤍᤡᤱ ᤕᤱᤛᤱᤅᤥ ᤔᤧᤒᤣ᤺ᤰᤗᤥ॥ 18 ᤁᤖ ᤕᤠᤱᤃᤧᤛᤠ᤹ᤒᤠᤜᤠ᤹ ᤛᤍᤠᤍᤡᤱ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤧᤴᤗᤥ. ᤋᤢᤰᤂᤣ ᤁᤧᤈᤠᤒᤠᤜᤠ᤹ᤖᤧ ᤛᤍᤠᤍᤡᤱᤃ ᤂᤢᤏᤡ᤹ ᤏᤡᤱᤛᤠᤱ ᤔᤧᤒᤢᤰᤏᤧᤸᤗᤧ॥ 19 ᤕᤜᤘᤣ ᤍᤠᤱᤒᤠᤀᤣ. ᤐᤥᤃᤧ᤹ᤀᤥ. ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤁᤧᤔᤧᤱᤄᤥᤏᤧᤸᤗᤖᤥ. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤠᤛᤧᤴ ᤆᤥᤃᤧᤛᤧ᤹ᤀᤥ॥ 20 ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ ᤁᤡᤔᤠᤸᤗᤧ ᤕᤢᤶᤛᤢᤱᤔᤠ ᤆᤥᤃᤧᤛᤧ᤹ᤀᤥ. ᤀᤠᤒᤠᤅᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤛᤡᤃᤧᤖᤰᤗᤥ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤏᤡᤖᤥ॥ ᤛᤣᤗᤠ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.