ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 7 - LIFOTNT

ᤂᤠᤛᤧᤴ ᤂᤥᤔᤠᤖᤧ ᤗᤠᤃᤡ ᤐᤣᤗᤡ

ᤒᤧᤴᤈᤠᤔᤡᤏᤡ. ᤁᤢᤛᤖᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤍᤠᤀᤢᤍᤖᤧ ᤛᤠᤶᤔᤧᤳᤋᤢᤒᤠ ᤛᤡᤃ᤻ᤃᤡᤕᤥᤴ ᤔᤧᤵᤔᤏᤠᤒᤠ ᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ᤃ ᤂᤧᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤋᤠᤀᤠᤖᤥ॥ ᤕᤠᤵᤔᤡ ᤏᤡᤱᤄᤧᤶ ᤁᤧᤔᤧᤵᤐᤠᤜᤠ᤹ᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤏᤢᤖᤡᤰᤁᤠᤱ ᤁᤳᤋᤠᤱᤅᤧ᤹ᤀᤥ॥

² ᤔᤣ᤺ᤴᤏᤧᤓᤃᤪ ᤂᤡᤖᤡᤱᤒᤠᤸᤗᤧ ᤁᤢᤀᤡᤛᤡᤰ ᤔᤧᤎᤧ᤺ᤱᤅᤠᤖᤥ. ᤕᤠᤵᤔᤡ ᤁᤧᤏᤠᤱᤒᤠ ᤔᤣ᤺ᤴᤏᤣ ᤘᤠ᤹ᤀᤠᤸᤗᤧ ᤔᤧᤎᤧ᤺ᤱᤅᤠ᤹ ᤔᤧᤔᤧᤳᤋᤠᤖᤥ॥

³ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤕᤠ᤺ᤶᤒᤰ ᤑᤣ᤺ᤴᤍᤢᤱᤅᤠᤱ ᤀᤠᤜᤢᤰᤁᤥᤗᤠᤶᤒᤠ ᤗᤠᤕᤥ ᤐᤥ᤺ᤰᤂᤧᤀᤠᤱ ᤘᤠ᤹ᤏᤧᤓᤃᤪ.

⁴ ᤀᤠᤱᤃᤠ᤹ᤏᤢ ᤛᤏᤠᤖᤢᤱᤅᤥ ᤁᤧᤘᤠ᤹ᤒᤠᤴ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤱᤅᤠᤱ ᤘᤠ᤹ᤀᤠᤏᤧᤓᤃᤪ. ᤀᤡᤃᤪ ᤀᤠᤏᤡᤱᤔᤡ᤺ᤸᤗᤧ ᤌᤣᤀᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤁᤢᤈᤡᤃ᤺ᤰᤘᤠᤜᤠ᤹ ᤏᤠᤵᤋᤢᤱᤅᤠᤱ ᤘᤠ᤹ᤀᤠᤏᤧᤓᤃᤪ.

⁵ ᤀᤠᤏᤡᤱᤔᤡ᤺ᤸᤗᤧ ᤏᤠ᤺ᤳᤋᤠᤀᤠᤱ ᤛᤡ᤹ᤀᤠᤖᤖᤥ॥ ᤂᤧᤸᤗᤧ ᤀᤠᤱᤃᤠ᤹ ᤆᤧᤵᤐᤠᤀᤠᤱ ᤛᤧᤳᤋᤠᤖᤖᤥ ᤜᤧᤰᤁᤩᤠᤱ ᤀᤠᤎᤰᤁᤡᤴ ᤂᤠᤶᤔᤥ ᤗᤠᤵᤑᤢᤛᤢᤖᤖᤥ॥ ᤛᤣᤗᤠ

⁶ ᤕᤜᤘᤣ ᤍᤠᤱᤒᤠᤀᤣ. ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰᤁᤧᤒᤥ᤺ᤰᤐᤠ ᤀᤠᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤛᤠᤰᤁᤧᤴ ᤑᤥ᤺ᤰᤂᤧ᤹ᤀᤠᤱ ᤑᤠ᤹ᤖᤠᤱᤅᤧ᤹ᤀᤥ᥄ ᤜᤧᤰᤁᤩᤠᤱ ᤐᤥᤃᤧ᤹ᤀᤠᤱ ᤂᤧᤱᤜᤠ᤹ ᤂᤠᤛᤧᤴ ᤆᤥᤃᤧᤛᤧ᤹ᤀᤥ॥

⁷ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤄᤡᤖᤡ ᤛᤢᤵᤛᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤥᤗᤠᤶᤒᤠ ᤜᤠᤱᤕᤢᤰ ᤆᤥᤃᤧᤛᤧ᤹ᤀᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤠᤛᤧᤴ ᤗᤥ᤺ᤴᤍᤢᤛᤡᤖᤥ. ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤆᤥ᤺ᤰᤁᤠᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤗᤧᤵᤔᤠᤱ ᤂᤠᤛᤧᤴ ᤗᤥ᤺ᤴᤍᤧ᤹ᤀᤥ॥

⁹ ᤛᤠᤶᤕᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤏᤡᤱᤘᤠ᤹ ᤏᤢ ᤛᤡᤰᤗᤢᤱᤔᤠᤴ ᤁᤧᤛᤠ᤹ᤖᤢᤖᤥ॥ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤏᤢᤵᤛᤧ᤹ᤀᤥ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤔᤏᤠᤜᤠ᤹ ᤜᤠᤱᤛᤧᤶ ᤐᤡᤖᤧᤛᤧ᤹ᤀᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤠᤵᤔᤡ ᤋᤠᤱᤃᤧᤛᤧ᤺ᤵᤐᤠ ᤂᤥᤖᤥ. ᤜᤧᤰᤁᤩᤠᤱ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤛᤧ᤺ᤵᤋᤢᤛᤡᤖᤥ॥

¹¹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤒᤠ ᤂᤠᤛᤧᤴᤍᤠᤱᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰ ᤋᤠᤰᤁᤧᤓᤧ᤹ᤒᤠᤜᤠ᤹ ᤐᤠ᤺ᤴᤎᤡᤰᤋᤢᤛᤡᤖᤥ॥

¹² ᤂᤧᤱᤜᤠ᤹ᤖᤧ ᤗᤠᤕᤥ ᤆᤥ᤺ᤰᤔᤠ ᤔᤧᤴᤗᤧᤖᤢᤴᤏᤧᤓᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤠᤓᤣᤴ ᤕᤠᤖᤠᤵᤋᤢᤖᤥ. ᤜᤧᤰᤁᤩᤠᤱ ᤀᤠᤵᤔᤠ ᤑᤠ᤹ᤀᤠᤱ ᤋᤥᤱ ᤗᤡᤴ ᤕᤠᤱᤛᤡᤱᤗᤥ॥

¹³ ᤂᤢᤏᤧ᤹ ᤀᤠᤛᤧᤳᤛᤧᤵᤐᤠ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤕᤠᤱᤛᤡᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤥ᤺ᤱᤜᤠ᤹ ᤀᤠᤵᤔᤠᤖᤧ ᤗᤠᤃᤡ ᤔᤡᤃᤧᤍᤡ᤺ᤵᤐᤠ ᤆᤥᤃᤢᤀᤠᤱ ᤕᤠᤱᤛᤡᤱᤗᤥ॥

¹⁴ ᤀᤠᤳᤋᤡᤴᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤔᤧᤀᤡ᤺ᤳᤋᤢᤀᤠᤱ ᤏᤡᤱᤘᤠ᤹ᤀᤥ ᤔᤧᤕᤢᤰᤂᤢ᤹. ᤂᤧᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥

¹⁵ ᤂᤧᤱᤜᤠ᤹ᤖᤧ ᤕᤠᤵᤔᤡᤜᤠ᤹ ᤌᤠᤔᤠᤛᤡ ᤑᤠ᤹ᤀᤠᤱ ᤔᤧᤓᤠ᤺ᤴᤍᤢᤒᤠ ᤗᤢᤶᤒᤠ᤺ᤳᤋᤥ ᤀᤠᤒᤠᤅᤣ ᤔᤧᤎᤠᤖᤥ॥

¹⁶ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤀᤠᤒᤠᤅᤣ ᤂᤢᤏᤡ᤹ ᤌᤧᤃᤣ᤺ᤰᤐᤥ ᤌᤠᤖᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤂᤠ᤺ᤶᤔᤠᤛᤡ ᤔᤧᤗ᤹ᤖᤥ ᤁᤖ ᤀᤠᤒᤠᤅᤣ ᤔᤧᤄᤠ᤺ᤴᤇᤡᤱᤗᤥ॥

¹⁷ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢᤃᤧᤴ ᤐᤡᤖᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ॥