ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 5 - LIFOTNT

ᤛᤧ᤺ᤵᤛᤡᤱᤔᤠ ᤐᤣᤗᤡ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤔᤢᤑᤪᤠᤔᤠ ᤔᤢᤰᤗᤠᤏᤢ ᤛᤠᤶᤔᤧᤵᤏᤠᤒᤠ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤐᤣᤗᤡᤃᤧᤴ ᤀᤠᤒᤠ᤺ᤴᤜᤠ᤹ ᤂᤧᤵᤛᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤕᤠ᤺ᤳᤋᤠᤀᤠᤸᤗᤧ ᤂᤧᤵᤛᤠᤱᤅᤧ᤹ᤀᤥ॥

² ᤀᤠᤜᤠᤱ ᤏᤢ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤆᤥᤃᤢᤱᤒᤠ ᤋᤢᤘᤠᤴ ᤂᤧᤵᤛᤠᤱ ᤐᤡᤖᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤖᤰ ᤋᤢᤘᤠ ᤆᤥ᤺ᤰᤏᤧᤖᤥ॥

³ ᤕᤜᤘᤣ ᤍᤠᤱᤒᤠᤀᤣ. ᤋᤠᤏᤠᤶᤛᤠ ᤀᤠᤀᤡᤰᤗᤠᤴ ᤂᤧᤵᤛᤧ᤹ᤀᤥ. ᤂᤠᤀᤥ᤺ᤳᤋᤡᤸᤗᤧᤛᤠ ᤂᤧᤏᤧ᤹ ᤁᤧᤍᤃᤠᤱ ᤀᤠᤍᤢᤘᤠᤴ ᤋᤥ᤺ᤴᤍᤢᤱᤗᤥ. ᤜᤧᤰᤁᤩᤠᤱ ᤏᤡᤱᤛᤠᤱ ᤆᤥᤃᤢᤱᤗ ᤜᤠᤱᤄᤢᤱᤗᤥ॥

⁴ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤥ ᤁᤧᤛ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤏᤧᤃ ᤔᤣ᤺ᤴᤗᤥ. ᤂᤧᤏᤧ᤹ᤏᤢ ᤋᤠᤵᤑᤧ᤺ᤶᤒᤠ ᤐᤠᤴ ᤘᤠ᤹ᤔᤠ ᤔᤧᤛᤢᤰᤏᤧᤸᤗᤥ॥

⁵ ᤁᤧᤜᤧᤴᤇᤡᤱᤒᤠ ᤔᤏᤠ᤺ᤱᤃ ᤂᤧᤏᤧ᤹ ᤁᤧᤍᤃᤡ ᤕᤧᤵᤔᤠ ᤔᤧᤛᤢᤰᤏᤧᤸᤗᤥ. ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ ᤂᤧᤏᤧ᤹ ᤁᤧᤈᤡ᤺ᤳᤋᤢᤛᤡᤖᤥ॥

⁶ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤃ ᤂᤧᤏᤧ᤹ ᤁᤧᤔᤧᤰᤂᤢᤛᤡᤖᤥ. ᤔᤏᤠ ᤁᤧᤛᤧᤵᤐᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤁᤧᤈᤡ᤺ᤳᤋᤢᤛᤡᤖᤥ॥

⁷ ᤁᤖ ᤂᤧᤏᤧ᤹ᤃ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤗᤥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤜᤡᤶᤔᤥ ᤗᤠ᤺ᤳᤋᤠ᤹ᤖᤥ. ᤛᤣᤛᤣ ᤁᤧᤜᤡᤶᤔᤥ ᤛᤠᤶᤒᤥᤴ ᤑᤴᤇᤡᤱᤅᤠᤀᤠᤱ ᤛᤧᤘᤠ ᤔᤧᤳᤏᤧᤖᤥ॥

⁸ ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤱᤔᤡᤜᤠ᤹ᤖᤧ ᤔᤧᤛᤢᤰᤁᤠᤖ ᤔᤧᤘᤠ᤹ᤖᤥ ᤂᤧᤸᤗᤧᤆᤥᤃᤢᤸᤗᤧ ᤁᤧᤛᤠᤶᤕᤥᤏᤡᤔᤠ ᤗᤠᤶᤔᤥ ᤗᤠᤶᤗᤥᤛᤠᤱᤅᤧ᤹ᤀᤥ. ᤁᤧᤔᤠᤖᤠᤶᤔᤡᤴ ᤀᤠᤍᤃᤡ ᤋᤥ᤺ᤴᤍᤥᤴ ᤆᤥᤃᤠᤱ ᤐᤡᤖᤠᤱᤅᤧ᤹ᤀᤥ॥

⁹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤀᤥ ᤛᤧᤰᤂᤠᤴ ᤜᤥᤵᤗᤥ. ᤜᤧᤰᤁᤩᤠᤱ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤍᤡᤶᤒᤠ ᤆᤥᤰᤗᤥ. ᤂᤢᤏᤡ᤹ ᤔᤢᤖᤠᤴ ᤜᤸᤗᤧᤰ ᤁᤧᤏᤧᤒᤠ ᤀᤡᤐᤢᤱ ᤁᤢᤀᤡᤛᤡᤰ ᤆᤥᤰᤗᤥ. ᤂᤧᤱᤜᤠ᤹ᤃ ᤀᤡᤱᤗᤧᤰᤗᤰ ᤔᤧᤒᤠ᤺ᤳᤗᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤱᤜᤠ᤹ ᤀᤠᤵᤋᤡᤰ ᤁᤢ᤺ᤳᤋᤧᤛᤧ᤹ᤀᤥ ᤜᤧᤰᤁᤩᤠᤱ ᤂᤢᤶᤍᤡᤱ ᤐᤡᤖᤧᤛᤧ᤹ᤀᤥ. ᤂᤢᤏᤡ᤹ ᤆᤧᤶᤓᤴᤏᤡᤸᤗᤧ ᤀᤠᤒᤠᤅᤣ ᤔᤧᤔᤧᤰᤏᤡᤖᤥ॥ ᤂᤧᤱᤜᤠ᤹ ᤕᤖᤡᤰ ᤂᤢᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤗᤠᤵᤑᤢᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤍᤰᤗᤧᤱᤘᤠᤀᤥ ᤔᤧᤒᤥᤃᤧᤀᤠᤱ ᤔᤧᤘᤠ᤹ᤖᤥ॥

¹¹ ᤁᤖ ᤂᤧᤏᤧ᤹ᤀᤥ ᤋᤠᤱᤛᤧ᤺ᤵᤛᤡᤱᤛᤧ ᤁᤧᤀᤡ᤺ᤶᤛᤡᤱᤒᤠᤜᤠ᤹ ᤁᤧᤖᤧᤰ ᤔᤧᤛ᤺ᤳᤗᤖᤥ. ᤜᤧᤰᤁᤩᤠᤱ ᤛᤍᤠᤍᤡᤱ ᤂᤢᤴᤇᤡ᤹ ᤛᤡᤰᤛᤶᤔᤠᤱ ᤛᤠᤶᤔᤧᤗᤥᤖᤖᤥ॥ ᤂᤧᤏᤧ᤹ ᤀᤠᤒᤠᤅᤣ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤧᤛᤧ᤹ᤀᤥ. ᤁᤧᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ ᤂᤧᤏᤧ᤹ᤀᤥ ᤔᤧᤛ᤺ᤳᤗᤖᤥ॥

¹² ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤀᤣ. ᤛᤠᤶᤕᤥᤒᤠᤜᤠ᤹ ᤜᤠᤱᤘᤠᤔᤢ᤹ᤀᤡ ᤁᤧᤎᤠᤛᤢ ᤁᤧᤒᤡᤖᤢᤛᤡᤖᤥ. ᤂᤥ᤺ᤸᤗᤧ ᤀᤠᤎᤣ᤺ᤰᤐᤠ ᤁᤢᤀᤡᤛᤡᤰ ᤁᤧᤔᤡ᤺ᤶᤈᤡ᤺ᤸᤗᤧ ᤂᤧᤱᤜᤠ᤹ ᤁᤧᤛᤧ᤺ᤵᤋᤢᤛᤡᤖᤥ॥