ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 4 - LIFOTNTᤕᤢ᤺ᤴᤇᤡᤰᤐᤠ ᤐᤣᤗᤡ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤀᤴᤔᤣ ᤔᤢᤰᤗᤠᤀᤥ ᤛᤠᤶᤔᤧᤵᤏᤠᤒᤠ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤠᤵᤔᤡ ᤁᤧᤏᤠᤱᤒᤠ ᤁᤧᤎᤣ᤺ᤰᤐᤠ ᤛᤠᤶᤕᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤋᤢᤘᤠᤀᤥ ᤐᤣᤗᤡ ᤑᤠᤰᤏᤧᤸᤗᤧ ᤏᤢᤃᤵ ᤐᤡᤖᤠᤱᤅᤧ᤹ᤀᤥ. ᤋᤢᤰᤂᤣ ᤆᤠᤀᤠᤸᤗᤧ ᤑᤠ᤹ᤖᤠᤱᤅᤧ᤹ᤀᤥ. ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤆᤥᤃᤢᤱᤒᤠ ᤋᤢᤘᤠᤴ ᤂᤧᤵᤛᤠᤱ ᤐᤡᤖᤠᤱᤅᤧ᤹ᤀᤥ॥ 2 ᤔᤧᤴᤇᤠᤶᤛᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤠᤈᤠ᤺ᤳᤌᤡ ᤁᤧᤍᤣᤛᤢᤶᤒᤠᤒᤣ᥅ ᤀᤠᤵᤑᤠᤸᤗᤧ ᤌᤠᤖᤡᤰ ᤜᤏᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤛᤡᤖᤠ᤹ᤌᤠᤱᤒᤠᤒᤣ᥅ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤗᤧᤰᤐᤠ ᤔᤠᤱᤛᤠᤶᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤒᤠᤒᤣ᥅ ᤛᤣᤗᤠ 3 ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤠ᤺ᤳᤋᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤀᤠᤒᤠᤅᤣ ᤁᤢᤗᤠᤃᤡ ᤛᤣ᤺ᤴᤍᤢᤛᤡᤖᤥ. ᤀᤠᤱᤃᤠ᤹ ᤋᤢᤘᤠ ᤆᤥ᤺ᤰᤁᤠᤸᤗᤧ ᤍᤠᤱᤒᤧᤸᤗᤧ ᤂᤧᤵᤛᤢᤖᤥ॥ 4 ᤂᤡᤏᤡ᤹ ᤛᤡᤰ ᤐᤥ᤺ᤰᤁᤡᤸᤗᤧ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤛᤧᤴᤍᤡᤰ ᤏᤧᤳᤏᤠᤀᤥ ᤁᤧᤏᤧᤛ᤻ᤛᤡᤸᤗᤧ ᤛᤡᤰᤗᤢᤱᤔᤠᤴ ᤛᤠ᤹ᤖᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤛᤡᤰ ᤋᤠᤶᤍᤠᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥ ᤛᤣᤗᤠ 5 ᤕᤜᤘᤣ ᤍᤠᤱᤒᤠᤀᤥ ᤗᤠ᤹ᤖᤢᤒᤠ ᤗᤧᤳᤋᤡᤱ ᤋᤥ᤺ᤴᤍᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤥᤀᤣ ᤋᤠ᤺ᤰᤐᤥ ᤆᤥᤃᤧᤶᤔᤧ᤹ᤀᤥ॥ 6 ᤕᤖᤡᤰᤗᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤜᤠ᤺ᤳᤗᤧ ᤀᤠᤏᤡᤃᤣ ᤏᤢᤒᤠ ᤐᤠ᤺ᤴᤜᤠ᤹ ᤐᤡᤔᤠ ᤛᤢᤰᤋᤡᤃᤧᤒᤣ᥅” ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤏᤠᤖᤠᤀᤥᤒᤠ ᤀᤥ᤺ᤳᤋᤡ᤺ᤴ ᤀᤠᤏᤡᤃᤣ ᤛᤶᤎᤠᤱ ᤀᤥ᤺ᤳᤗᤖᤥ॥ 7 ᤕᤖᤡᤰ ᤐᤃᤢᤃᤧᤴ ᤁᤢᤈᤠ ᤏᤢ ᤁᤢᤈᤠᤃᤧᤏᤢ᤹ᤒᤠ ᤆᤧᤸᤗᤧᤰᤛᤣ᤹ ᤌᤡ ᤁᤧᤃᤵᤐᤠ ᤜᤧᤰᤁᤩᤠᤱ ᤁᤧᤛ᤺ᤵᤐᤠᤜᤠ᤹ᤏᤢ᤺ᤸᤗᤧᤀᤠᤱ ᤂᤧᤏᤧ᤹ ᤀᤠᤛᤡᤰᤗᤢᤱᤔᤥ ᤛᤠ᤹ᤖᤡᤰ ᤛ᤺ᤳᤋᤠᤖ ᤁᤧᤕᤠ᤺ᤴᤏᤠᤖᤥ॥ 8 ᤀᤠᤱᤃᤠ᤹ ᤏᤧᤛᤡᤱᤅᤠ ᤜᤧᤰᤁᤩᤠᤱ ᤁᤢᤛᤠᤏᤢ᤹ᤖ ᤀᤡᤶᤔᤠᤗᤠ᤺ᤳᤋᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤖᤰ ᤀᤠᤏᤡᤱᤔᤡᤜᤠ᤹ᤖᤧ ᤌᤣᤀᤠᤱ ᤔᤧᤶᤔᤧᤳᤋᤣ ᤁᤧᤃᤳᤋᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.