ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 29 - LIFOTNTᤛᤢᤖᤡᤳ ᤁᤣᤈᤱᤅᤥ ᤍᤠᤱᤒᤧᤸᤗᤧ ᤁᤢᤀᤡᤰᤗᤠ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤔᤠᤱᤗᤠᤀᤡᤱᤒᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤠᤴ ᤁᤢᤔᤡᤔᤡᤍᤡᤱ ᤏᤢ ᤁᤢᤔᤢᤰᤛᤠᤶᤔᤡᤸᤗᤧ ᤗᤠᤃᤡ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ॥ 2 ᤔᤡᤔᤡᤍᤡᤱ ᤐᤡᤔᤠ ᤕᤠᤖᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤂᤡᤏᤡ᤹ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ॥ ᤛᤣᤛᤣᤒᤠ ᤁᤢᤛᤢᤳᤏᤠ᤺ᤸᤗᤧ ᤁᤠᤵᤐᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤔᤧᤳᤋᤧᤶᤔᤧ᤹ᤀᤥ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠᤴ ᤆᤫᤠ᤺ᤳ ᤛᤶᤎᤠᤱ ᤂᤧᤶᤍᤧᤳᤗᤥ. ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤖᤧᤱᤄᤢᤖᤢᤱ ᤗ᤹ᤖᤥ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤖᤧᤱᤄᤢᤖᤢᤱ ᤁᤧᤗ᤹ᤒᤠ ᤁᤢᤀᤡᤰᤗᤠ᤺ᤸᤗᤧ ᤘᤖ᤺ᤱᤜᤠ᤹ᤀᤠᤱ ᤗᤥ᤺ᤰᤂᤢᤖᤥ॥ 4 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠᤴ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ. ᤕᤜᤘᤣ ᤍᤠᤱᤒᤠᤴ ᤐᤠ᤺ᤳᤋᤡᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤕᤠᤰᤗᤥ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤛᤠᤶᤔᤠᤱᤛᤡᤱᤜᤠ᤹ ᤜᤷᤃᤧ᤹ ᤜᤷᤃᤧ᤹ ᤂᤧᤖᤢᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤗᤣᤒᤏᤠᤏ ᤁᤥ᤺ᤰᤔᤠᤀᤥᤒᤠ ᤛᤠᤶᤔᤠᤱᤛᤡᤱᤜᤠ᤹ ᤑᤸᤗᤠᤰ ᤑᤸᤗᤠᤰ ᤀᤧᤰᤂᤢᤖᤥ॥ 6 ᤂᤢᤏᤧ᤹ᤃ ᤗᤧᤒᤏᤠᤏᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤐᤡᤳᤛᤠᤳ ᤐᤡᤶᤒᤠ ᤁᤢᤀᤡᤛᤡᤰ ᤔᤢᤴᤍᤢᤖᤥ. ᤜᤧᤰᤁᤩᤠᤱ ᤜᤣᤷᤔᤥᤏ ᤌᤧᤃᤢᤴ ᤁᤢᤶᤒᤠᤒᤠ ᤛᤠᤶᤒᤡᤳᤋᤡᤴ ᤐᤡᤶᤒᤠ ᤁᤢᤀᤡᤛᤡᤰ ᤔᤢᤴᤍᤢᤖᤥ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤛᤠ᤺ᤶᤓᤣ ᤗᤧᤰᤗᤥ॥ 8 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤡᤴ ᤕᤰᤂᤢᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤠᤍᤣᤛ ᤗᤠᤈᤣ᤹ᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤡᤴ ᤕᤰᤂᤢᤖᤥ॥ 9 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤕᤜᤡᤒᤠ ᤛᤡᤱᤜᤠ᤹ ᤌᤢ᤺ᤰᤂᤢᤖᤥ. ᤜᤧᤰᤁᤩᤠᤱ ᤋᤠᤶᤓᤢᤱ ᤛᤡᤱᤗᤠᤜᤠ᤹ ᤛᤡᤔᤢᤰ ᤛᤡᤔᤢᤰ ᤔᤢᤰᤂᤢᤀᤠᤱ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤖᤥ॥ ᤁᤢᤜᤡᤶᤔᤥ ᤁᤧᤘᤠ᤹ᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤖᤥ ᤗ᤹ᤖᤡᤰ ᤁᤧᤖᤧᤰ ᤔᤧᤀ᤺ᤰᤗᤥ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤘᤍᤵᤔᤠ ᤛᤶᤎᤠᤱ ᤕᤢᤰ ᤆᤥᤃᤢᤖᤥ. ᤕᤜᤘᤣ ᤍᤠᤱᤒᤠᤴ ᤛᤍᤠᤍᤡᤱ ᤜᤠᤱᤆᤥᤰᤗᤥ॥ 11 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤔᤢᤰᤛᤠᤶ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤛᤏᤠᤖᤢᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.