ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 21 - LIFOTNT

ᤌᤱ ᤌᤰᤔᤠ ᤏᤠ᤺ᤶᤔᤧᤸᤗᤧᤒᤠ ᤏᤥᤃᤧᤴ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤔᤢᤰᤛᤠᤶ ᤁᤧᤒᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤜᤠᤱᤅᤡᤴ ᤛ᤺ᤳᤋᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤁᤧᤏᤠ᤺ᤶᤒᤠ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹ᤖᤥ॥

² ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤁᤧᤃᤧᤳᤋᤢ ᤁᤧᤒᤡᤖᤢᤀᤠᤱ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤐᤣᤗᤡᤃᤧᤴ ᤋᤢᤘᤠᤴ ᤁᤧᤄᤧᤵᤛᤢ ᤁᤧᤒᤡᤖᤢᤀᤠᤱ ᤘᤠ᤹ᤖᤥ॥ ᤛᤣᤗᤠ

³ ᤛᤠ᤹ᤖᤡᤰ ᤏᤢᤒᤠ ᤔᤢ᤹ᤀᤡᤛᤠᤶ ᤁᤧᤒᤡᤖᤢᤀᤠᤱ ᤗᤠᤶᤃᤧᤍᤠ᤺ᤰᤋᤢᤖᤥ. ᤜᤧᤰᤁᤩᤠᤱ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤋᤡᤆ᤺ᤴ ᤁᤧᤄᤢ᤺ᤰᤋᤢᤖᤥ॥

⁴ ᤂᤧᤸᤗᤧ ᤂᤧᤏᤧ᤹ ᤀᤡᤖᤡᤰ ᤜᤡᤱᤔᤠ ᤁᤧᤏᤠ᤺ᤰᤋᤧᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤖᤢᤖᤥ॥

⁵ ᤁᤢᤏᤡᤱᤔᤡᤜᤠ᤹ ᤁᤧᤏᤠ᤺ᤶᤒᤠ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤔᤡᤱ ᤀᤡᤅᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤢᤔᤡᤱ ᤁᤧᤍᤡ᤺ᤵᤐᤠ ᤁᤧᤈᤥᤃᤢᤀᤠᤱ ᤔᤡᤱᤛᤥᤀᤡᤱᤎᤠ᤺ᤱ ᤁᤧᤒᤡᤖᤢᤀᤠᤱ ᤘᤠ᤹ᤖᤥ॥

⁶ ᤛᤧᤰᤂᤠᤀᤣ ᤛᤍᤠᤍᤡᤱ ᤔᤢ᤹ᤀᤡᤛᤠᤶ ᤁᤧᤒᤡᤖᤢᤀᤠᤱ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤀᤠᤱ ᤁᤢᤏᤡᤱᤘᤠ᤹ ᤋᤩᤧᤖ ᤁᤧᤈᤥᤃᤢᤖᤥ॥

⁷ ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤠᤴ ᤋᤠ᤺ᤰᤐᤥ ᤆᤥᤃᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤖᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤓᤧᤸᤗᤧᤀᤠᤱ ᤀᤕᤠᤰ ᤔᤧᤗ᤹ᤏᤧᤴᤗᤥ॥

⁸ ᤜᤠᤒᤠ ᤁᤧᤜᤢᤰᤗᤠᤶᤒᤠᤀᤣ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ ᤂᤧᤏᤧ᤹ ᤁᤧᤃᤥ᤺ᤳᤋᤢ ᤁᤧᤗ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤈᤡ᤺ᤵᤐᤠ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ ᤁᤧᤈᤢᤵᤛᤠᤱ ᤜᤢᤰᤁᤡᤸᤗᤧ ᤋᤧᤶᤛᤢᤛᤡᤖᤥ॥

⁹ ᤂᤧᤏᤧ᤹ ᤁᤧᤎᤠ᤺ᤴᤇᤡᤱᤅᤡᤸᤗᤧ ᤂᤧᤱᤜᤠ᤹ ᤁᤧᤍᤡ᤺ᤵᤐᤠ ᤔᤡᤜᤠᤵᤐᤥ ᤗᤠᤵᤁᤧᤓᤢᤛᤢᤛᤡᤖᤥ॥ ᤁᤢᤛᤡᤰ ᤐᤥ᤺ᤰᤁᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤧᤰᤂᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤗᤧ ᤌᤩ᤺ᤱ ᤆᤥᤃᤢᤛᤡᤖᤥ॥

¹⁰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤔᤧᤴᤇᤠ᤹ᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤂᤧᤏᤧ᤹ ᤁᤧᤔᤠᤛᤢᤛᤡᤖᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥᤏᤢ ᤂᤢᤏᤡ᤹ ᤌᤠ᤺ᤰᤜᤠ᤹ ᤁᤧᤍᤢᤃᤢ ᤁᤧᤍᤣᤛᤢᤛᤡᤖᤥ॥

¹¹ ᤂᤧᤱᤜᤠ᤹ᤖᤧ ᤁᤧᤍᤰᤗᤧᤱᤘᤠᤀᤥ ᤑᤧᤴᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ. ᤋᤠᤵᤑᤧ᤺ᤶᤒᤠ ᤆᤧᤶᤓᤴ ᤔᤧᤈᤥᤃᤢ ᤁᤖᤛᤠᤱ ᤂᤧᤱᤜᤠ᤹ ᤁᤢᤗᤡᤱᤍᤥ ᤔᤧᤱᤃᤧᤳᤏᤧᤴᤗᤥ॥

¹² ᤂᤧᤱᤜᤠ᤹ ᤁᤧᤄᤧᤳᤇᤡᤱ ᤁᤧᤒᤣ᤺ᤰᤐᤠ ᤁᤧᤈᤥᤃᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤋᤥ᤺ᤱᤅᤡᤴ ᤗᤡᤀᤥ ᤁᤧᤓᤳᤇᤢᤀᤠᤱ ᤂᤧᤏᤧ᤹ ᤂᤧᤱᤜᤠ᤹ ᤁᤧᤛᤥ᤺ᤰᤋᤢᤛᤡᤖᤥ॥

¹³ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤎᤢᤶᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤧ᤹ᤀᤥ. ᤀᤠᤏᤡᤃᤧᤃ ᤂᤧᤏᤧ᤹ ᤁᤧᤔᤢᤰᤛᤠᤶᤃᤧᤴ ᤕᤠ᤺ᤶᤒᤰᤁᤡᤴ ᤛᤧᤘᤠᤛᤠᤶᤗᤥ ᤛᤠᤶᤔᤧᤳᤏᤢ ᤀᤡᤱᤎᤠᤱ ᤐᤡᤖᤢᤶᤒᤧᤖᤥ॥