ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 16 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣᤗᤡ ᤑᤠᤰᤔᤠ

ᤔᤡᤰᤋᤠᤶ ᤔᤧᤵᤔᤏᤠᤒᤠ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤏᤡᤱᤘᤠ᤹ᤑᤢᤔᤠᤱᤅᤣ. ᤛᤧ᤺ᤵᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤋᤠᤀᤠᤸᤗᤧ ᤁᤧᤏᤠᤱᤅᤠ ᤑᤠ᤹ᤀᤠᤱ ᤏᤡᤛᤢᤱᤗᤥ॥

² ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤔᤧᤳᤋᤢᤱᤅᤠᤱ ᤘᤠ᤹ᤀᤠᤖᤥ. “ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤍᤠᤱᤒᤠᤏᤧᤖᤥ. ᤀᤠᤱᤃᤠ᤹ ᤁᤳᤋᤢᤱᤒᤠ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ᤀᤣ ᤁᤧᤒᤡᤖᤠᤱᤒᤠᤖᤥ॥”

³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤃ ᤛᤠ᤹ᤖᤡᤰ ᤏᤢᤒᤠ ᤔᤧᤈᤥᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤘᤠ᤹ᤔᤠ ᤂᤥᤛᤢᤱᤅᤡᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤠᤖᤥ॥

⁴ ᤘᤣ᤹ ᤔᤠᤱᤛᤠᤶᤔᤠᤱᤜᤠ᤹ ᤔᤠᤱᤃᤧᤄᤒᤠᤜᤠ᤹ᤖᤧ ᤀᤠᤒᤠᤅᤣ ᤋᤢᤰᤂᤣ᤺ᤴᤗᤰ ᤔᤧᤓᤥᤛᤢᤖᤥ॥ ᤂᤧᤴ ᤔᤠᤱᤛᤠᤶᤔᤠᤱᤜᤠ᤹ ᤛᤠᤔᤠᤰᤂᤡ᤹ ᤛᤧᤛᤢᤱᤗ ᤔᤠᤱᤔᤧᤄᤀᤠᤛᤡᤱᤅᤡᤸᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤡᤱᤅᤠᤱ ᤔᤧᤗᤥ᤺ᤰᤂᤢᤱᤅᤡᤴᤗᤥ॥

⁵ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤒᤢᤴᤏᤧᤖᤥ॥ ᤜᤧᤰᤁᤩᤠᤱ ᤆᤠᤜᤠᤒ᤻ ᤆᤥ᤺ᤰᤁᤠᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤒᤡᤀᤠᤖᤥ. ᤋᤠᤕᤧᤶᤒᤠ ᤀᤠᤜᤡᤱᤔᤴ ᤁᤧᤜᤢᤰᤁᤥ ᤘᤠ᤹ᤖᤥ॥

⁶ ᤂᤧᤏᤧ᤹ ᤁᤧᤒᤡᤖᤠᤱᤒᤠ ᤗᤠᤈᤣᤴ ᤛᤠ᤹ᤖᤡᤰ ᤐᤏᤢᤏᤢᤒᤠ ᤆᤥᤰᤗᤥ. ᤛᤧᤰᤂᤠᤀᤣ. ᤀᤠᤱᤃᤠ᤹ ᤀᤠᤛᤡᤰ ᤐᤛᤶ ᤁᤧᤛᤶᤒᤠ ᤀᤠᤗᤰᤁᤡᤴ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥

⁷ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤢᤈᤠ ᤐᤡᤀᤠᤖᤥ॥ ᤜᤧᤰᤁᤩᤠᤱ ᤀᤠᤛᤡᤰᤗᤢᤱᤔᤠᤸᤗᤧ ᤛᤧᤴᤍᤡᤰᤁᤠᤱ ᤀᤠᤱᤃᤠ᤹ ᤂᤠᤜᤢᤴ ᤐᤡᤀᤠᤖᤥ॥

⁸ ᤛᤍᤠᤍᤡᤱ ᤀᤠᤴᤍᤠᤱᤒᤧᤱᤃ ᤀᤠᤍᤃᤠᤱ ᤏᤡᤛᤢᤱᤗᤥ॥ ᤂᤢᤏᤧ᤹ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤔᤧᤃᤡᤀᤠᤴᤗᤥ॥

⁹ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤱᤘᤠ᤹ ᤋᤠᤀᤠᤱ ᤛ᤺ᤳᤋᤠᤖᤥ. ᤀᤠᤎᤰᤁᤡᤴ ᤕᤥᤎᤥ ᤔᤧᤗ᤹ᤏᤧᤸᤗᤥ.

¹⁰ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤕᤠᤶᤛᤠᤶᤔᤡᤴ ᤂᤧᤔᤠ ᤕᤱᤛᤱᤅᤥ ᤐᤰᤁᤧᤴᤎᤏᤧᤴᤗᤥ॥ ᤜᤧᤰᤁᤩᤠᤱ ᤛᤣᤛᤣ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤎᤰᤁᤡᤴ ᤀᤡ᤺ᤵᤐᤢᤱᤅᤥ ᤁᤡᤔᤠ ᤕ᤺ᤵᤔᤠ ᤁᤧᤶᤒᤠᤱᤄᤢᤴᤗᤥ॥

¹¹ ᤂᤧᤏᤧ᤹ ᤜᤡᤱᤔᤴᤏᤥ ᤁᤧᤍᤣ᤹ᤒᤠ ᤗᤠᤶ ᤀᤥᤛᤣ᤺ᤴᤃᤧᤎᤠᤰᤋᤠᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤧᤍᤃᤠᤱ ᤕᤢᤱᤅᤠᤸᤗᤧ ᤛᤠ᤹ᤖᤡᤰ ᤛ᤺ᤳᤋᤠᤖᤥ. ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤘᤠ᤹ᤀᤠᤸᤗᤧ ᤛᤍᤠᤍᤡᤱ ᤀᤠᤏᤡᤱᤘᤠ᤹ ᤋᤠᤖᤥ॥