ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 147 - LIFOTNTᤔᤢᤰᤛᤠᤶᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥᤔᤠ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠᤖ ᤛᤠᤶᤗᤥᤔᤠ ᤛᤠ᤹ᤖᤡᤰ ᤏᤢᤒᤠ ᤐᤠ᤺ᤴᤗᤥ. ᤂᤢᤏᤧ᤹ ᤁᤢᤏᤠᤖᤠ ᤑᤥᤔᤠᤃ ᤆᤠ᤹ᤖᤡᤰ ᤂᤧᤶᤍᤢᤗᤠ᤹ᤖᤢᤖᤥ ᤜᤧᤰᤁᤩᤠᤱ ᤏᤡᤱᤘᤠ᤹ ᤁᤧᤍᤠᤒᤠ ᤆᤥᤰᤗᤥ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤕᤠᤶᤔᤥ ᤆᤥᤃᤢᤖᤥ. ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤀᤥ ᤐᤢᤱᤗᤠᤎᤠᤒᤠ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠᤜᤠ᤹ ᤛᤢᤵᤛᤢ ᤋᤠᤖᤢᤛᤡᤖᤥ॥ 3 ᤂᤢᤏᤧ᤹ᤃ ᤁᤢᤏᤡᤱᤘᤠ᤹ ᤁᤧᤍᤢᤰᤐᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤛᤢ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠᤱᤄᤣ᤺ᤰᤜᤠ᤹ ᤛᤡᤍᤠ᤹ᤐᤠᤱᤍᤠ᤹ ᤔᤧᤳᤋᤢ ᤐᤡᤖᤢᤛᤡᤖᤥ॥ 4 ᤂᤢᤏᤧ᤹ᤃ ᤂᤣ᤺ᤶᤛᤡᤰᤐᤠᤜᤠ᤹ ᤀᤠᤰᤂᤩᤠᤖᤡᤰ ᤔᤧᤒᤳ ᤑᤠ᤹ᤀᤠᤱ ᤏᤡᤖᤢᤛᤡᤖᤥ. ᤜᤧᤰᤁᤩᤠᤱ ᤌᤡᤰᤁᤠᤱ ᤔᤣ᤺ᤴᤏᤣ ᤁᤧᤖᤧᤰ ᤔᤡᤱ ᤘᤠ᤺ᤳᤋᤢᤛᤡᤖᤥ॥ 5 ᤀᤠᤏᤡ᤹ ᤕᤜᤘᤣ ᤍᤠᤱᤒᤠᤴ ᤐᤕᤶ ᤕᤶᤒᤠ ᤆᤥᤰᤗᤥ. ᤂᤢᤏᤧ᤹ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤶᤓᤩᤠᤖᤡᤰ ᤛᤡᤰᤁᤢᤶᤛᤠᤒᤠ ᤆᤥᤰ ᤑᤠ᤹ᤀᤠᤱ ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤸᤗᤥ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤏ᤺ᤶᤏ᤺ᤶᤒᤠᤜᤠ᤹ ᤌᤠ᤺ᤱ ᤑᤥ᤺ᤰᤂᤢᤛᤡᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ ᤂᤠᤶᤒᤠᤱᤅᤥ ᤗᤠᤵᤑᤢᤛᤢᤛᤡᤖᤥ॥ 7 ᤛᤠᤶᤗᤥᤖᤧᤶᤔᤧ᤹ᤖ ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ. ᤋᤢ᤺ᤱᤃᤣ ᤔᤢᤰᤂᤧᤶᤔᤧ᤹ᤖ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ 8 ᤂᤢᤏᤧ᤹ᤃ ᤋᤠᤱᤛᤠᤰᤐᤠᤴ ᤂᤠ᤹ᤔᤡ᤺ᤳᤋᤡᤸᤗᤧ ᤋᤧᤵᤋᤢᤖᤥ. ᤜᤧᤰᤁᤩᤠᤱ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤘᤜᤡᤳ ᤌᤠᤛᤢᤖᤥ. ᤜᤧᤰᤁᤩᤠᤱ ᤌᤧᤃᤢᤜᤠ᤹ᤀᤥ ᤂᤢᤏᤧ᤹ ᤕᤠ᤺ᤴᤛᤢᤱ ᤗᤡᤱᤗ ᤕᤠ᤺ᤴᤍᤢᤖᤥ॥ 9 ᤂᤢᤏᤧ᤹ ᤌᤰᤛᤠᤜᤠ᤹ ᤁᤢᤈᤠ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤛᤠᤰᤔᤧᤴᤈᤠ ᤁᤧᤕᤢᤱᤒᤠ ᤁᤠ᤺ᤰᤘᤠ᤺ᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤔᤧᤀᤢ᤺ᤳᤋᤢᤸᤗᤧ ᤂᤢᤏᤧ᤹ ᤆᤠᤀᤢᤵᤋᤢᤖᤢᤛᤡᤖᤥ॥ 10 ᤂᤢᤏᤧ᤹ᤃ ᤁᤧᤎᤢᤶᤒᤠ ᤀᤴᤜᤠ᤹ᤖᤧ ᤁᤢᤏᤡᤱᤘᤠ᤹ ᤔᤧᤴᤍᤠᤛᤢᤸᤗᤥ. ᤜᤧᤰᤁᤩᤠᤱ ᤔᤢᤰᤁᤧᤃᤢᤒᤠ ᤔᤏᤠᤜᤠ᤹ᤀᤠᤱ ᤁᤢᤛᤡᤖᤠ᤹ ᤔᤧᤴᤎᤠᤱᤏᤧᤸᤗᤥ॥ 11 ᤁᤖ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤏᤢ ᤁᤢᤏᤡᤱᤘᤠ᤹ ᤋᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤁᤧᤕᤢᤱᤒᤠᤜᤠ᤹ᤏᤢ ᤛ᤺ᤳᤗᤥ॥ 12 ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤛᤣ. ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ᥄ ᤛᤡᤕᤥᤏᤀᤥ ᤁᤧᤕᤢᤱᤒᤠᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ 13 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤧᤰᤕᤰᤁᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢ ᤁᤧᤒᤡᤖᤡᤖᤥ. ᤜᤧᤰᤁᤩᤠᤱ ᤛᤡᤕᤥᤏ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤂᤢᤏᤧ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤛᤡᤖᤥ॥ 14 ᤂᤢᤏᤧ᤹ ᤁᤧᤀᤡ᤺ᤴᤍᤥᤜᤠ᤹ ᤁᤶᤒᤪᤠᤱ ᤔᤧᤳᤋᤢ ᤁᤧᤒᤡᤖᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤔᤠᤛᤡ᤺ᤸᤗᤧ ᤂᤧᤏᤧ᤹ ᤁᤧᤏᤡᤱᤘᤠ᤹ ᤋᤠᤛᤢ ᤁᤧᤒᤡᤖᤥ॥ 15 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤡᤱᤈᤠᤱ ᤐᤡᤖᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤂᤡᤔᤥ ᤕᤠ᤺ᤶᤒᤰ ᤆᤥᤃᤢᤖᤥ॥ 16 ᤂᤢᤏᤧ᤹ᤃ ᤁᤢᤓᤖᤠ ᤂᤠᤶᤍᤣ᤺ᤳᤋᤡᤸᤗᤧ ᤂᤠᤶᤔᤡᤴ ᤋᤧᤵᤋᤢᤒᤠ ᤁᤢᤀᤡᤛᤡᤰ ᤏᤠ᤺ᤱ ᤌᤠᤖ ᤕᤠ᤺ᤴᤍᤢᤖᤥ. ᤜᤧᤰᤁᤩᤠᤱ ᤛᤣ᤺ᤰᤘᤠᤴ ᤂᤠᤵᤐᤢ ᤁᤢᤀᤡᤛᤡᤰ ᤛᤧᤛᤢᤖᤥ॥ 17 ᤂᤢᤏᤧ᤹ ᤘᤄᤥᤖᤢᤱ ᤜᤧᤰᤋᤱᤒᤠ ᤑ᤺ᤴ ᤌᤠᤖ ᤕᤠ᤺ᤴᤍᤢᤖᤥ. ᤂᤢᤏᤧ᤹ ᤐᤠᤱᤄᤢ ᤋᤠᤛᤢᤒᤠ ᤆᤢᤱᤅᤡᤴ ᤜᤠ᤺ᤳᤗᤧᤀᤠᤱ ᤌᤶᤔᤠ ᤔᤧᤛᤢᤰᤋᤢᤸᤗᤥ॥ 18 ᤂᤢᤏᤧ᤹ ᤂᤧᤴ ᤏᤠᤱ. ᤛᤣ᤺ᤰᤘᤠᤜᤠ᤹ ᤕᤥ᤺ᤴᤍᤧ᤹ ᤔᤧᤳᤋᤢᤸᤗᤧ ᤕᤥ᤺ᤴᤗᤥ. ᤂᤢᤏᤧ᤹ ᤛᤢᤖᤡᤳ ᤁᤣᤈᤱ ᤜᤢᤖ ᤕᤠ᤺ᤴᤍᤢᤀᤠᤱ ᤆᤫᤠ᤺ᤳ ᤘᤃᤢᤔᤠ ᤜᤣ᤺ᤰᤗᤥ॥ 19 ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤕᤠᤁᤢᤒᤧᤴ ᤐᤡᤖᤢᤖᤥ. ᤜᤧᤰᤁᤩᤠᤱ ᤁᤢᤀᤡᤱᤈᤠᤱ ᤏᤢ ᤁᤢᤎᤡᤶᤜᤠ᤹ ᤀᤡᤛᤪᤠᤀᤡᤗᤧᤴ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤠ᤹ᤖᤥ॥ 20 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡᤃ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤎᤡᤶᤜᤠ᤹ ᤔᤧᤸᤗᤧᤛᤢᤸᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.