ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 146 - LIFOTNT

ᤛᤧᤴᤗᤵᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥᤔᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤥᤏᤢᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ॥

² ᤀᤠᤱᤃᤠ᤹ᤃ ᤀᤠᤜᤡᤱᤜᤡᤱ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ॥ ᤀᤠᤱᤃᤠ᤹ ᤜᤡᤱᤅᤠᤖ ᤌᤠᤖᤡᤰ ᤛᤠᤶᤗᤥᤀᤠᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱᤗᤥ॥

³ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤒᤠ ᤜᤠᤱᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ᤀᤥ ᤂᤡᤏᤡ᤹ ᤏᤡᤱᤘᤠ᤹ ᤔᤧᤕᤢᤰᤂᤧᤶᤔᤡᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤛᤧ᤺ᤵᤔᤠ ᤁᤧᤔᤧᤴᤇᤢᤰᤏᤧᤸᤗᤥ॥

⁴ ᤂᤧᤱᤜᤠ᤹ ᤔᤧᤛᤡ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤁᤡᤴ ᤂᤠᤶᤔᤥᤀᤣ ᤏᤢ᤺ᤱ ᤐᤣ᤺ᤰᤗᤥ॥ ᤜᤠᤒᤠ ᤂᤧᤴ ᤕᤧᤶᤔᤥᤀᤣ ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤐᤠ᤺ᤵᤔᤠ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤀᤠᤱ ᤏᤢᤵᤗᤥ॥

⁵ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤖᤢᤒᤠ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ. ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤀᤥ ᤁᤢᤏᤡᤱᤘᤠ᤹ ᤁᤧᤕᤢᤱᤒᤠᤴ ᤛ᤺ᤳᤗᤥ॥

⁶ ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤁᤧᤈᤥ᤺ᤰᤐᤠᤖᤥ. ᤜᤧᤰᤁᤩᤠᤱ ᤘᤖ᤺ᤱ ᤏᤢ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤐᤠᤎᤢᤱ ᤗᤧ᤺ᤰᤅᤠᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤛᤡᤒᤠᤖᤥ. ᤕᤜᤘᤣ ᤍᤠᤱᤒᤠᤴ ᤛᤍᤠᤍᤡᤱ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥

⁷ ᤂᤢᤏᤧ᤹ᤃ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤛᤠᤰᤔᤧᤴᤈᤠ ᤁᤧᤘᤠ᤹ᤒᤠᤜᤠ᤹ ᤁᤢᤈᤠ ᤐᤡᤖᤢᤛᤡᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡᤖᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤰᤑ᤺ᤶᤒᤠᤜᤠ᤹ ᤂᤠᤃᤧᤏᤡᤒᤠ ᤆᤥᤃᤢᤛᤡᤖᤥ. ᤂᤢᤏᤧ᤹ ᤁᤧᤈᤥ᤺ᤶᤒᤠᤜᤠ᤹ ᤑᤥ᤺ᤰᤂᤢᤛᤡᤖᤥ. ᤂᤢᤏᤧ᤹ ᤛᤠᤶᤕᤥᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥

⁹ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤋᤠᤱᤛᤧ᤺ᤵᤋᤢᤛᤡᤖᤥ॥ ᤕᤧᤳᤇᤠᤒᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤐᤥᤱ ᤔᤧᤓᤠ᤺ᤰᤋᤢᤸᤗᤥ॥

¹⁰ ᤕᤜᤘᤣ ᤍᤠᤱᤒᤠᤱᤃ ᤛᤍᤠᤍᤡᤱᤗᤧ ᤗᤠᤃᤡ ᤜᤠᤱᤗᤥ. ᤛᤡᤕᤥ᤺ᤴᤏᤣ. ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤠ᤺ᤰ ᤌᤠ᤺ᤰ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄