ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 145 - LIFOTNTᤏᤠᤖᤠᤑᤥᤔᤠ ᤛᤠᤶᤗᤥ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤏᤡᤱᤘᤠ᤹ᤑᤢᤔᤠᤱ ᤀᤠᤜᤠᤱᤅᤣ. ᤐᤕᤶ ᤕᤶᤒᤠ ᤁᤧᤈᤥᤰ ᤑᤠ᤹ᤀᤠᤱ ᤁᤧᤔᤡᤱᤛᤥ ᤁᤧᤎᤠ᤺ᤱᤛᤥ ᤆᤥᤃᤢᤱᤗᤥ. ᤀᤠᤱᤃᤠ᤹ ᤛᤍᤠᤍᤡᤱ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤱᤗᤥ॥ 2 ᤌᤡᤰᤕᤠ᤺ᤴᤎᤰ ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠᤶᤗᤥᤀᤠᤖ ᤛᤍᤠᤍᤡᤱ ᤁᤧᤔᤡᤱᤛᤥ ᤁᤧᤎᤠ᤺ᤱᤛᤥ ᤆᤥᤃᤢᤱᤗᤥ॥ 3 ᤕᤜᤘᤣ ᤍᤠᤱᤒᤠᤴ ᤐᤕᤶ ᤕᤶᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤁᤢᤏᤠᤖᤠ ᤑᤥᤔᤠ ᤛᤠ᤹ᤖᤡᤰ ᤗᤠ᤹ᤖᤢᤖᤥ॥ ᤂᤢᤏᤧ᤹ ᤁᤶᤓᤩᤠᤖᤡᤰ ᤕᤶᤒᤠ ᤆᤥᤰ ᤑᤠ᤹ᤀᤠᤱ ᤜᤠ᤺ᤳᤗᤧᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤸᤗᤥ॥ 4 ᤌᤡᤰ ᤌᤠ᤺ᤰᤗᤠᤶ ᤁᤧᤍᤠᤒᤠᤜᤠ᤹ᤖᤧ ᤋᤠ᤺ᤴᤍᤡ ᤁᤧᤍᤠᤒᤠ ᤘᤣ᤹ᤛᤔᤠ ᤌᤠ᤺ᤰᤜᤠ᤹ ᤁᤧᤕᤠ᤺ᤶᤒᤰᤁᤡᤴ ᤏᤢᤒᤠ ᤆᤥᤰ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ. ᤂᤧᤱᤜᤠ᤹ᤖᤧ ᤔᤢᤰᤛᤠᤶᤛᤠᤒᤠ ᤁᤧᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤥ॥ 5 ᤂᤧᤱᤜᤠ᤹ᤖᤧ ᤁᤧᤔᤡᤔᤡᤍᤡᤱ ᤏᤢ ᤁᤧᤜᤠᤱᤘᤠ ᤁᤧᤔᤠᤱᤘᤠᤖᤧ ᤐᤠ᤺ᤴᤜᤠ᤹ ᤔᤧᤈᤧᤰᤂᤢ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤁᤧᤔᤠᤒᤠ ᤁᤧᤕᤠ᤺ᤶᤒᤰᤜᤠ᤹ ᤀᤠᤔᤡᤰᤁᤡᤴ ᤀᤡᤶ ᤔᤧᤳᤋᤢᤱᤅᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ 6 ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤢᤰᤛᤠᤶᤛᤠᤒᤠ ᤁᤧᤕᤠ᤺ᤶᤒᤰᤜᤠ᤹ ᤔᤧᤈᤧᤰᤂᤢ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤁᤧᤕᤠ᤺ᤶᤒᤰᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤐᤥᤎᤰ ᤆᤥᤃᤢᤱᤗᤥ॥ 7 ᤂᤧᤏᤧ᤹ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤛ᤺ᤳᤗ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤥ ᤂᤧᤱᤜᤠ᤹ ᤋᤡᤕᤠᤜᤠ ᤔᤧᤗ᤹ᤖ ᤛᤠᤶᤔᤧᤗᤥᤖᤥ॥ 8 ᤕᤜᤘᤣ ᤍᤠᤱᤒᤠᤴ ᤁᤧᤏᤢ᤹ᤒᤠ ᤏᤢ ᤗᤢᤱᤔᤠ᤹ ᤀᤠᤍᤢᤰᤍᤢᤰᤐᤠ ᤆᤥᤰᤗᤥ. ᤜᤠᤖᤠ ᤁᤢᤛᤠᤰᤁᤧᤴ ᤔᤧᤴᤈᤶᤔᤏᤠᤒᤠ ᤏᤢ ᤀᤠᤓᤧᤸᤗᤧᤛᤠᤱ ᤕᤠᤵᤔᤡ ᤔᤡ᤺ᤶᤈᤡ ᤀᤠᤔᤧᤵᤔᤧᤵᤐᤠ ᤆᤥᤰᤗᤥ॥ 9 ᤕᤜᤘᤣ ᤍᤠᤱᤒᤠᤴ ᤁᤧᤖᤧᤰ ᤛᤶᤎᤠᤱ ᤏᤢ᤹ᤔᤠᤍᤠᤔᤠ ᤁᤧᤍᤠ᤺ᤵᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤛᤡᤒᤠᤜᤠ᤹ ᤁᤧᤖᤧᤰ ᤁᤢᤗᤢᤱᤔᤠ᤹ ᤔᤧᤍᤢᤰᤗᤥ॥ 10 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤢᤛᤡᤒᤠ ᤁᤧᤖᤧᤰᤗᤧ ᤁᤧᤏᤠᤖᤠ ᤔᤧᤓᤥᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤣᤛᤣ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤥ॥ 11 ᤁᤧᤜᤠᤱᤈᤢᤶᤔᤥᤒᤠ ᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ᤖᤧ ᤔᤧᤈᤧᤰᤂᤢ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤁᤧᤔᤢᤰᤛᤠᤶᤔᤡᤴ ᤐᤥᤎᤰ ᤔᤧᤈᤥᤃᤢᤖᤥ॥ 12 ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤢᤰᤛᤠᤶᤛᤠᤒᤠ ᤁᤧᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤔᤧᤄᤥᤛᤢᤖᤥ. ᤜᤧᤰᤁᤩᤠᤱ ᤁᤧᤜᤠᤱᤈᤢᤶᤔᤥᤒᤠ ᤔᤡᤔᤡᤍᤡᤱᤃᤧᤴ ᤜᤠᤱᤘᤠ ᤔᤠᤱᤘᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥ 13 ᤂᤧᤏᤧ᤹ ᤁᤧᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤁᤧᤜᤠᤱᤕᤢᤰᤁᤡᤴ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤠᤴ ᤁᤢᤔᤠᤱᤜᤢᤵ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤛᤡᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 14 ᤕᤜᤘᤣ ᤍᤠᤱᤒᤧᤸᤗᤧ ᤋᤢᤰᤂᤣ ᤁᤧᤈᤠᤒᤠᤜᤠ᤹ ᤁᤧᤖᤧᤰ ᤑᤠ᤹ᤖᤢᤛᤡᤖᤥ. ᤁᤰᤁᤡᤸᤗᤧ ᤁᤧᤵᤋᤢᤛᤡᤒᤠᤜᤠ᤹ ᤁᤧᤖᤧᤰ ᤑᤥ᤺ᤰᤂᤢᤛᤡᤖᤥ॥ 15 ᤁᤢᤜᤡᤱᤘᤧᤳ ᤁᤧᤖᤧᤰᤗᤧ ᤂᤧᤏᤧ᤹ ᤀᤥᤃᤧᤶᤔᤧᤳᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤠᤜᤠᤒ᤻ ᤔᤧᤈᤥ᤺ᤰᤁᤡᤸᤗᤧ ᤂᤧᤏᤧ᤹ ᤁᤢᤈᤠ ᤁᤧᤒᤡᤖᤢᤛᤡᤖᤥ॥ 16 ᤂᤧᤏᤧ᤹ ᤁᤧᤜᤢᤰᤁᤡᤴ ᤁᤧᤓᤠ᤺ᤰᤂᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤄᤠ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤀᤣ᤺ᤵᤋᤢᤖᤥ॥ 17 ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤁᤢᤒᤠ᤺ᤴᤏᤥ ᤕᤜᤘᤣ ᤍᤠᤱᤒᤠᤴ ᤛᤠᤶᤕᤥᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤛᤡᤒᤠ ᤁᤧᤖᤧᤰ ᤏᤠᤘᤠᤃᤧᤴ ᤆᤀᤡ᤺ᤳᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 18 ᤕᤜᤘᤣ ᤍᤠᤱᤒᤠᤱᤃ ᤂᤢᤏᤧ᤹ ᤐᤣᤗᤡ ᤁᤧᤓᤠᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤣᤛᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠᤀᤠᤱ ᤂᤢᤏᤧ᤹ ᤁᤧᤀᤢ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤡ᤺ᤳᤋᤠᤱ ᤂᤢᤏᤧ᤹ ᤘᤠ᤹ᤖᤥ॥ 19 ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤋᤢ ᤐᤡᤖᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤣᤗᤡ ᤔᤧᤓᤠᤰᤋᤢᤒᤠᤴ ᤂᤧᤵᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤛᤧ᤺ᤵᤋᤢᤛᤡᤖᤥ॥ 20 ᤕᤜᤘᤣ ᤍᤠᤱᤒᤠᤴ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤔᤧᤰᤂᤢᤛᤡᤖᤥ॥ 21 ᤀᤠᤱᤃᤠ᤹ ᤀᤠᤵᤑᤠᤸᤗᤧᤛᤠᤱ ᤕᤜᤘᤣ ᤍᤠᤱᤒᤠᤴ ᤁᤢᤏᤠᤖᤠ ᤑᤥᤛᤢᤱᤗᤥ. ᤂᤢᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤛᤡᤒᤠ ᤁᤧᤖᤧᤰᤗᤧ ᤁᤢᤛᤣᤛᤣ ᤔᤡᤱᤅᤡᤴ ᤛᤍᤠᤍᤡᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.