ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 144 - LIFOTNT

ᤌᤱ ᤏᤠ᤺ᤶᤔᤠᤖᤧ ᤗᤠᤃᤡ ᤐᤣᤗᤡ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤀᤠᤱᤃᤠ᤹ ᤕᤠᤵᤔᤡ ᤁᤶᤒᤪᤠᤱ ᤁᤧᤔᤧᤵᤐᤠ ᤕᤠᤰᤐᤣ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤢᤏᤧ᤹ᤀᤣ ᤜᤢ᤹ᤀᤠᤖᤥ. ᤜᤧᤰᤁᤩᤠᤱ ᤌᤱ ᤌᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤆᤥ᤺ᤰᤁᤠᤖᤥ॥

² ᤂᤢᤏᤧ᤹ᤃ ᤀᤠᤱᤃᤠ᤹ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤀᤠᤏᤡᤱᤘᤠ᤹ᤑᤢᤔᤠᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡ᤺ᤶᤛᤡᤱᤔᤠᤍᤧᤴ ᤀᤠᤔᤠᤱᤃᤧᤴᤏᤠ ᤕᤰ ᤏᤢ ᤀᤠᤛᤧᤴᤗᤵᤍᤠᤱᤒᤠᤖᤥ॥ ᤂᤧᤒᤩᤠᤱ ᤂᤢᤏᤧ᤹ᤃ ᤀᤠᤱᤃᤠ᤹ ᤕᤠᤵᤔᤡ ᤁᤧᤛᤧ᤺ᤵᤐᤠ ᤀᤠᤄᤥᤖᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤕᤢᤰᤁᤥ ᤋᤠᤖᤢᤛᤡᤖᤥ॥

³ ᤕᤜᤘᤣ ᤍᤠᤱᤒᤠᤀᤣ. ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤌᤣᤛᤡᤀᤠᤱ ᤂᤧᤱᤜᤠ᤹ ᤁᤶᤒᤪᤠᤱ ᤁᤧᤔᤧᤳᤋᤢᤛᤡᤖ ᤐᤥᤱᤒᤠᤒᤣ᥅ ᤏᤠᤛᤡᤱᤃᤧᤴ ᤌᤰᤗᤠᤀᤥ ᤁᤧᤘᤠ᤹ᤒᤠ ᤔᤧᤴᤇᤠᤶᤛᤠᤜᤠ᤹ ᤜᤠ᤺ᤳᤇᤡᤀᤠᤱ ᤂᤧᤱᤜᤠ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤛᤡᤖ ᤐᤥᤱᤒᤠᤒᤣ᥅

⁴ ᤔᤏᤠᤜᤠ᤹ᤃ ᤜᤧᤱᤃᤧ᤺ᤰᤐᤠ ᤛᤰᤔᤠ ᤜᤧᤰᤋᤱᤒᤠᤛᤡᤖᤰᤗᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤶᤔᤡᤱᤃ ᤁᤧᤔᤠᤒᤠ ᤁᤧᤒᤣ᤺ᤰᤐᤠ ᤛᤠᤶᤔᤪᤡ᤺ᤵᤐᤠ ᤜᤧᤰᤁᤣᤖᤰ ᤗ᤹ᤖᤥ॥

⁵ ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤴᤍᤧ᤹ᤀᤠᤱ ᤕᤥ ᤌᤩᤧ᤹ᤀᤥ. ᤌᤧᤃᤢᤜᤠ᤹ ᤛᤢᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶᤒᤠ ᤔᤡ᤺ᤰᤂᤥ᤹ ᤗ᤺ᤴᤎᤠᤱᤗᤖᤥ॥

⁶ ᤂᤧᤏᤧ᤹ ᤛᤠ᤺ᤶᤓᤣ ᤗᤧᤰᤗ ᤕᤠ᤺ᤴᤍᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤑᤢᤸᤗᤢᤶ ᤌᤩ᤺ᤱ ᤛᤧᤛᤧᤍᤣᤛᤧᤛᤧ᤹ᤀᤥ॥ ᤂᤧᤏᤧ᤹ ᤁᤧᤍᤥ᤺ᤱᤅᤡᤸᤗᤧ ᤂᤧᤱᤜᤠ᤹ ᤀᤠᤒᤧᤛᤧ᤹ᤀᤠᤱ ᤐᤢᤒᤣᤗᤠᤵᤛᤠ ᤏᤠ᤺ᤳᤋᤧᤛᤧ᤹॥

⁷ ᤌᤥᤗᤠᤶᤒᤠ ᤂᤧᤏᤧ᤹ ᤁᤧᤜᤢᤰᤁᤡᤴ ᤛ᤺ᤴᤇᤧ᤹ᤀᤥ. ᤜᤧᤰᤁᤩᤠᤱ ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤫᤠ᤺ᤳᤋᤥᤏᤢ ᤀᤢ᤺ᤰᤂᤠᤱ ᤗ᤺ᤳᤋᤠᤱᤅᤧ᤹ᤀᤠᤱ ᤛᤧ᤺ᤵᤋᤠᤱᤅᤧ᤹ᤀᤥ. ᤘᤣ᤹ ᤗᤠᤈᤣ᤹ᤒᤠ ᤀᤠᤏᤡᤱᤔᤡᤜᤠ᤹ᤗᤠᤶᤒᤠ ᤛᤧᤴᤍᤠᤱᤅᤧ᤹ᤀᤥ॥

⁸ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠᤒᤠ ᤐᤠᤴ ᤔᤧᤶᤒᤠ᤺ᤳᤏᤧᤸᤗᤥ. ᤔᤠᤱᤔᤧᤜᤧᤰᤛᤡᤱᤅᤠᤱᤛᤠᤱ ᤀᤡᤱᤗᤧᤰ ᤔᤧᤒᤠ᤺ᤳᤗᤥ॥

⁹ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ᤀᤥ ᤀᤠᤱᤃᤠ᤹ ᤗᤳᤇᤠ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤳᤋᤢᤱᤗᤥ. ᤀᤴᤔᤣ ᤂᤡᤱᤔᤏᤠᤒᤠ ᤔᤢᤰᤗᤠ᤺ᤴ ᤜᤡᤵᤋᤢᤱᤗ ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ॥

¹⁰ ᤂᤧᤏᤧ᤹ ᤜᤠᤱᤜᤠ᤹ ᤌᤱ ᤁᤧᤏᤠ᤺ᤶᤒᤠ ᤁᤧᤈᤥᤃᤢᤛᤡᤖᤥ. ᤜᤧᤰᤁᤩᤠᤱ ᤁᤧᤛᤧᤘᤠᤖᤥᤒᤠ ᤍᤠᤀᤢᤍ ᤜᤠᤱᤅᤡᤴ ᤁᤡᤵᤔᤠ ᤁᤧᤄᤢᤒᤠ ᤋᤠᤓᤣᤗᤠᤶᤒᤠ ᤁᤧᤛᤧ᤺ᤵᤋᤢᤖᤥ॥

¹¹ ᤀᤠᤈᤧ᤺ᤳᤇᤡᤰᤁᤠᤱ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠᤒᤠ ᤘᤣ᤹ ᤗᤠᤈᤣ᤹ᤒᤠ ᤀᤠᤏᤡᤱᤔᤡᤜᤠ᤹ᤗᤠᤶᤒᤠ ᤛᤧᤴᤍᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤔᤠᤱᤔᤧᤜᤧᤰᤛᤡᤱᤅᤠᤱᤛᤠᤱ ᤂᤧᤱᤜᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤗᤥ॥

¹² ᤜᤧᤰᤁᤣ᤺ᤸᤗᤧ ᤁᤧᤒᤥᤒᤠᤖ ᤁᤧᤒᤵᤐᤠ ᤀᤠᤏᤡᤃᤣ ᤕᤧᤶᤒᤡᤳᤇᤠᤛᤠᤜᤠ᤹ ᤁᤧᤜᤢ᤺ᤰᤐᤠ ᤁᤧᤎᤠᤱᤒᤠ ᤛᤡᤱᤒᤢᤱ ᤁᤢᤀᤡᤛᤡᤰ ᤔᤧᤒᤥᤔᤧᤎᤠᤱᤗᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤔᤧᤴᤇᤢᤔᤠ ᤛᤠᤜᤠ᤹ ᤜᤠᤱᤜᤡᤶᤔᤥ ᤑᤢᤱᤗᤰᤔᤠᤏᤠᤒᤠ ᤁᤧᤄᤧᤶᤛᤡᤱᤒᤠ ᤛᤡᤳᤗᤠᤱ ᤁᤢᤀᤡᤛᤡᤰ ᤔᤧᤒᤥᤱᤗᤥ॥

¹³ ᤀᤠᤏᤡᤃᤣ ᤆᤠᤕᤠᤱᤔᤠ ᤌᤠ᤺ᤱᤜᤠ᤹ ᤁᤧᤖᤧᤰ ᤐᤖᤡᤰᤐᤠ ᤆᤠᤜᤠ᤹ᤖᤧ ᤋᤡᤶᤗᤥ. ᤀᤠᤏᤡᤃᤣ ᤔᤧᤸᤗᤢᤰᤜᤠ᤹ ᤜᤧᤴᤇᤡᤱ ᤜᤧᤴᤇᤡᤱ ᤕᤠᤖᤡᤰ ᤔᤧᤒᤥᤱᤗᤥ ᤜᤧᤰᤁᤩᤠᤱ ᤀᤠᤏᤡᤃᤣ ᤀᤡᤰᤋᤠᤵᤜᤠ᤹ᤀᤥ ᤔᤧᤘᤠ᤹ᤖᤥ॥

¹⁴ ᤀᤠᤏᤡᤃᤣ ᤐᤡᤳᤜᤠ᤹ᤖᤧ ᤛᤠᤔᤧᤸᤗᤧᤶᤔᤣ ᤕᤖᤡᤰ ᤔᤧᤎᤠᤵᤋᤢᤛᤡᤖᤥ॥ ᤀᤠᤏᤡᤃᤣ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ ᤔᤧᤎᤢᤵᤏᤧᤸᤗᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤐᤢᤱᤗᤠᤎᤠᤒᤠ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤔᤧᤒᤥᤱᤏᤧᤸᤗᤥ. ᤀᤠᤏᤡᤃᤣ ᤔᤠᤖᤠᤶᤜᤠ᤹ᤀᤥ ᤁᤧᤜᤠ᤺ᤵᤐᤠ ᤁᤧᤈᤡᤱᤒᤠᤀᤠᤱ ᤂᤧᤶᤔᤧᤴᤍᤧᤳᤏᤧᤸᤗᤥ॥

¹⁵ ᤜᤧᤰᤋᤱᤒᤠ ᤔᤏᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥ ᤕᤜᤘᤣ ᤍᤠᤱᤒᤠᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ. ᤂᤧᤱᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥