ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 143 - LIFOTNT

ᤁᤧᤛᤠᤰᤐᤥ ᤀᤠᤎᤠ᤺ᤸᤗᤧᤒᤠ ᤐᤣᤗᤡ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤀᤠᤒᤣᤗᤡᤃᤧᤴ ᤋᤢᤘᤠᤴ ᤂᤧᤵᤛᤧ᤹ᤀᤥ. ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤒᤠᤴ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤏᤢ ᤛᤠᤶᤕᤥᤒᤠ ᤁᤧᤈᤥ᤺ᤰᤐᤠ ᤁᤢᤀᤡᤛᤡᤰ ᤂᤧᤏᤧ᤹ ᤀᤠᤱᤃᤠ᤹ ᤏᤢᤃᤵ ᤐᤡᤖᤠᤱᤅᤧ᤹ᤀᤥ॥

² ᤀᤠᤒᤠᤅᤣ ᤁᤧᤛᤧᤘᤠᤖᤥᤒᤠᤴ ᤂᤠᤛᤧᤴᤏᤥ ᤔᤧᤎᤠᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤍᤃᤡ ᤛᤠᤶᤕᤥᤒᤠ ᤁᤧᤗᤠ᤹ᤒᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ॥

³ ᤀᤠᤏᤡᤱᤔᤡᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤺ᤳᤋᤠᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤂᤠᤶᤔᤥ ᤔᤧᤎᤠᤶᤔᤠᤀᤠᤱ ᤆᤡᤍᤥ᤹ ᤆᤡᤍᤥ᤹ ᤔᤧᤍᤥ᤹ᤀᤠᤖᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤡᤖᤡᤰ ᤕᤧᤶ ᤌᤠᤖᤡᤰ ᤂᤠᤃᤧᤔᤠᤰᤐᤠᤍᤧᤴᤏᤥ ᤁᤢᤛᤡᤘᤧᤳ ᤔᤏᤠᤴ ᤏᤧᤔᤏᤠᤒᤠ ᤜᤧᤰᤁᤣ ᤔᤧᤕᤢᤰᤂᤠᤱᤅᤠᤱ ᤕᤢᤱᤅᤠᤖᤥ॥

⁴ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤱᤘᤠ᤹ ᤛᤡᤃᤠᤱ ᤀᤠᤱᤃᤠ᤹ ᤀᤠᤛᤰᤔᤠ ᤐᤢ᤹ᤖᤥ. ᤜᤧᤰᤁᤩᤠᤱ ᤁᤡᤔᤠᤸᤗᤧ ᤀᤠᤛᤡᤰᤗᤢᤱᤔᤠᤴ ᤕᤱᤗᤥ॥

⁵ ᤀᤠᤱᤃᤠ᤹ ᤁᤧᤒᤣ᤺ᤰᤐᤠ ᤕᤧᤶᤔᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤗᤡᤱᤛᤢᤱᤗᤥ. ᤂᤧᤒᤩᤠᤱ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤠᤰ ᤁᤧᤕᤠ᤺ᤶᤒᤰᤜᤠ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤛᤢᤶᤗ᤹ᤖᤥ॥

⁶ ᤀᤠᤱᤃᤠ᤹ ᤐᤣᤗᤡ ᤑᤠᤰᤁᤠᤸᤗᤧ ᤀᤠᤜᤢᤰᤜᤠ᤹ ᤁᤧᤍᤃᤡ ᤛᤴᤇᤢᤱᤗᤥ. ᤁᤧᤜᤣᤒᤠᤀᤠᤱ ᤁᤧᤏᤧᤒᤠ ᤂᤠᤶᤒᤠᤱ ᤁᤢᤀᤡᤛᤡᤰ ᤀᤠᤏᤡᤱᤘᤠ᤹ᤛᤠᤶᤔᤡᤴ ᤂᤧᤏᤧ᤹ ᤁᤧᤔᤡ᤺ᤵᤔᤠᤸᤗᤧ ᤋᤖᤢᤖᤥ॥ ᤛᤣᤗᤠ

⁷ ᤕᤜᤘᤣ ᤍᤠᤱᤒᤠᤀᤣ. ᤀᤠᤸᤗᤥ ᤜᤠᤖᤠ ᤏᤢᤃᤵ ᤐᤡᤖᤠᤱᤅᤧ᤹ᤀᤥ. ᤀᤠᤱᤃᤠ᤹ ᤀᤠᤛᤰᤔᤠ ᤐᤢ᤹ᤖᤧᤀᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ᤃ ᤂᤧᤔᤠ ᤕᤱᤛᤱᤅᤥ ᤁᤧᤒᤣ᤺ᤰᤐᤠ ᤁᤢᤀᤡᤛᤡᤰ ᤐᤥᤱᤅᤠᤖᤥ॥

⁸ ᤌᤡᤰᤕᤠ᤺ᤴᤎᤰ ᤋᤠ᤺ᤴᤇᤥᤍᤡᤱ ᤋᤠᤏᤠᤶᤔᤥ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤴ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤛᤢᤶ ᤗ᤹ᤖ ᤕᤠ᤺ᤴᤍᤠᤱᤅᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤀᤠᤏᤡᤱᤘᤠ᤹ ᤕᤢᤰᤂᤢᤱᤅᤠᤱ ᤘᤠ᤹ᤀᤠᤖᤥ॥ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤡᤴ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤕᤠᤶᤛᤠᤶᤔᤡᤴ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤋᤥ᤺ᤴᤍᤢᤱᤗᤥ॥

⁹ ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤱᤔᤡᤜᤠ᤹ᤗᤠᤶ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤀᤠᤱᤃᤠ᤹ᤃ ᤂᤧᤏᤧ᤹ᤀᤥ ᤛᤧ᤺ᤵᤛᤡᤱᤛᤧ ᤋᤥ᤺ᤴᤇᤡᤱᤅᤠᤀᤠᤱ ᤘᤠ᤹ᤀᤠᤖᤥ॥

¹⁰ ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤂᤧᤏᤧ᤹ ᤁᤧᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥ᤺ᤰᤔᤠ ᤀᤠᤱᤃᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ ᤀᤠᤱᤃᤠ᤹ ᤛᤣᤛᤣ ᤁᤧᤔᤠᤱᤅᤡᤸᤗᤧ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤗᤠᤶᤔᤥ ᤗᤠᤶᤗᤥᤛᤠᤱᤅᤧ᤹ᤀᤥ॥

¹¹ ᤕᤜᤘᤣ ᤍᤠᤱᤒᤠᤀᤣ. ᤁᤧᤔᤡᤱᤛᤥ ᤀᤡᤱᤎᤠᤱᤗᤧ ᤗᤠᤃᤡ ᤛᤧ᤺ᤵᤋᤠᤱᤅᤧ᤹ᤀᤥ॥ ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤋᤢᤰᤂᤣ ᤗᤠᤰᤂᤣᤗᤠᤶᤒᤠ ᤆᤥ᤺ᤰᤕᤢᤶᤓᤥ ᤐᤡᤖᤠᤱᤅᤧ᤹ᤀᤥ॥

¹² ᤛᤧᤰᤂᤠ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤔᤧᤰᤂᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤏᤡᤱᤔᤡᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤃ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤀᤠᤖᤥ॥