ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 141 - LIFOTNT

ᤛᤢᤳᤌᤥ ᤐᤥᤱᤔᤠᤖᤧᤴ ᤕᤢ᤺ᤴᤇᤡᤰᤐᤠ ᤐᤣᤗᤡ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤜᤠᤖᤠᤀᤣ ᤋᤩᤧ᤹ᤀᤥ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤢ᤺ᤳᤏᤧᤖᤥ॥ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤵᤛᤧ᤹ᤀᤥ॥

² ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤒᤠᤴ ᤁᤧᤍᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤛᤠᤱᤛᤡᤱ ᤁᤢᤀᤡᤛᤡᤰ ᤐᤥᤱᤗᤖᤥ. ᤜᤧᤰᤁᤩᤠᤱ ᤀᤠᤜᤢᤰᤜᤠ᤹ ᤑᤥ᤺ᤰᤂᤢᤱᤅᤡᤸᤗᤧ ᤕᤢᤴᤎᤥ᤺ᤰᤐᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤜᤧᤰᤁᤣ ᤐᤥᤱᤗᤖᤥ॥

³ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤑᤧᤴᤐᤠᤴ ᤐᤠ᤺ᤵᤔᤠ ᤔᤧᤒᤠᤱᤄᤠᤱᤅᤡᤴᤏᤧ᤹ᤀᤥ. ᤀᤠᤱᤃᤠ᤹ ᤀᤠᤶᤒᤪᤠᤀᤥᤗᤠᤶ ᤋᤠᤵᤑᤧ᤺ᤶᤒᤠ ᤐᤠᤴ ᤗ᤺ᤶᤔᤠ ᤔᤧᤓᤠ᤺ᤰᤋᤧᤴᤏᤧ᤹ᤀᤥ॥

⁴ ᤑᤧᤴᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤠᤖᤧ ᤗᤠᤃᤡ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤍᤱᤏᤧᤸᤗᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤒᤠ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠᤴ ᤀᤠᤱᤃᤠ᤹ ᤆᤠᤔᤠ ᤔᤧᤒᤥᤱᤏᤧᤸᤗᤖᤥ॥

⁵ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤜᤡᤵᤐᤠᤖᤖᤥ. ᤂᤧᤱᤃ ᤀᤠᤗᤠᤃᤡ ᤗᤢᤱᤔᤠ᤹ ᤔᤧᤍᤢᤰᤁᤠᤒᤠ ᤐᤥᤱᤗᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤓᤧ᤺ᤰᤁᤠᤖᤖᤥ. ᤂᤧᤱᤃ ᤀᤠᤱᤃᤠ᤹ ᤀᤠᤗᤠᤃᤡ ᤀᤠᤎ᤻ᤃᤣᤰᤀᤥ ᤏᤡ᤺ᤱᤃᤣ᤹ ᤜᤢ᤺ᤵᤔᤏᤠᤒᤠ ᤐᤥᤱᤗᤥ॥ ᤂᤧᤴ ᤀᤠᤱᤃᤠ᤹ ᤔᤧᤀᤳᤋᤠᤸᤗᤥ॥ ᤜᤧᤰᤁᤣᤛᤠᤱ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤛᤍᤠᤍᤡᤱ ᤋᤢᤘᤠ ᤆᤥ᤺ᤰᤁᤠᤖᤥ॥

⁶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤛᤠᤒᤠᤜᤠ᤹ ᤕᤠᤰᤐᤣᤀᤥᤗᤠᤶᤒᤠ ᤕᤥ ᤗᤠᤵᤔᤧᤓᤢᤛᤢᤛᤡᤸᤗᤧ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤛᤧᤰᤂᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

⁷ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤁᤧᤰᤆᤢ ᤌᤥᤱᤔᤠᤸᤗᤧ ᤗᤢᤱᤜᤠ᤹ ᤗᤧᤱᤗ᤺ᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤕᤧᤵᤐᤠᤜᤠ᤹ ᤀᤡᤐᤢᤱᤅᤥ ᤛᤧᤖᤧᤀᤠᤱ ᤏᤧᤖᤥ॥”

⁸ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤂᤧᤏᤧ᤹ ᤋᤰᤐᤧᤳ ᤀᤥᤔᤧᤳᤏᤧᤖᤥ. ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤀᤡ᤺ᤶᤛᤡᤱᤔᤠᤍᤧᤴᤏᤧᤖᤥ. ᤀᤠᤱᤃᤠ᤹ ᤀᤠᤛᤰᤔᤠ ᤐᤣᤰ ᤔᤧᤒᤠᤱᤄᤧᤴᤏᤧ᤹ᤀᤥ॥

⁹ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤡᤕᤢᤰᤔᤠ ᤔᤧᤃᤥ᤺ᤳᤋᤠᤱᤗᤥ. ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤃᤧᤛᤢᤒᤠ ᤆᤧᤴᤏᤥᤗᤠᤶ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥

¹⁰ ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤔᤧᤃᤧᤛᤢᤒᤠ ᤆᤧᤴᤏᤥ ᤀᤠᤒᤠᤅᤣ ᤂᤢᤴᤇᤡ᤹ ᤔᤧᤎᤠᤖᤖᤥ. ᤁᤖ ᤀᤠᤱᤃᤠ᤹ᤃ ᤌᤣᤀᤠᤱ ᤔᤧᤸᤗ᤹ᤀᤣ ᤐᤣ᤺ᤰᤁᤠᤖᤥ॥