ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 140 - LIFOTNT

ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤗᤠᤶᤒᤠ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ ᤀᤠᤜᤡᤵᤜᤡᤵᤐᤠ ᤀᤠᤎᤰᤎᤰᤐᤠ ᤔᤏᤠᤜᤠ᤹ᤗᤠᤶ ᤀᤠᤱᤃᤠ᤹ ᤏᤠᤅᤠᤱᤅᤧ᤹ᤀᤥ॥

² ᤂᤧᤱᤜᤠ᤹ᤖᤧ ᤀᤠᤓᤧᤸᤗᤧᤛᤠᤱ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰ ᤂᤧᤔᤠ᤹ ᤔᤧᤓᤥ᤺ᤰᤂᤢᤖᤥ॥

³ ᤀᤛᤣ᤺ᤰᤁᤡᤸᤗᤧ ᤔᤏᤠᤜᤠ᤹ ᤀᤃᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤐᤠ᤺ᤴᤏᤡᤸᤗᤧ ᤔᤏᤠᤜᤠ᤹ ᤔᤧᤀᤃᤢᤛᤡᤖᤥ. ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤏᤡᤱᤃ ᤀᤛᤣ᤺ᤰᤁᤡᤸᤗᤧ ᤁᤢᤏᤡᤱ ᤜᤧᤰᤋᤱᤒᤠ ᤆᤥᤰᤗᤥ॥ ᤛᤣᤗᤠ

⁴ ᤕᤜᤘᤣ ᤍᤠᤱᤒᤠᤀᤣ. ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤏᤢ ᤂᤧᤏᤧ᤹ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤀᤠᤜᤡᤵᤜᤡᤵᤐᤠ ᤀᤠᤎᤰᤎᤰᤐᤠ ᤔᤏᤠᤜᤠ᤹ᤗᤠᤶ ᤂᤧᤏᤧ᤹ ᤀᤠᤱᤃᤠ᤹ ᤏᤠᤅᤠᤱᤅᤧ᤹ᤀᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤑᤧᤳᤗᤠ᤹ᤛᤡᤖ ᤁᤧᤗ᤹ᤒᤠ ᤐᤠ᤺ᤴᤔᤧᤍᤱᤄᤢᤖᤥ॥

⁵ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧ ᤀᤡᤔᤧᤕᤢᤰᤋᤠᤱᤅᤠᤱ ᤏᤧᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡᤈᤥᤴ ᤔᤧᤃᤧᤛᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤧᤶᤔᤠᤖᤧ ᤗᤠᤃᤡ ᤀᤠᤗᤠᤶᤔᤥ ᤀᤡᤛᤪᤢᤵᤐᤠ ᤌᤠᤰᤐᤠᤴ ᤔᤧᤓᤳᤇᤢᤀᤠᤱ ᤐᤳᤗᤥ॥ ᤛᤣᤗᤠ

⁶ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤖᤥ. “ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥” ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤵᤛᤧ᤹ᤀᤥ॥

⁷ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ᤃ ᤔᤢᤰᤛᤠᤶᤍᤠᤱᤒᤠ ᤀᤠᤛᤧᤴᤗᤵᤍᤠᤱᤒᤠᤏᤧᤖᤥ. ᤋᤧᤴᤎᤱᤅᤥ ᤀᤠᤎ᤻ᤃᤣᤰᤁᤧᤴ ᤁᤶᤒᤪᤠᤱ ᤁᤧᤔᤧᤳᤋᤢ᤹ᤖᤥ॥

⁸ ᤕᤜᤘᤣ ᤍᤠᤱᤒᤠᤀᤣ. ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤵᤔᤠ ᤔᤧᤒᤠᤱᤄᤧᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠᤴ ᤐᤥᤱᤔᤠ ᤔᤧᤓᤠ᤺ᤰᤋᤧᤴᤏᤧ᤹ᤀᤥ ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤥ॥ ᤛᤣᤗᤠ

⁹ ᤀᤠᤏᤡᤱᤔᤡᤜᤠ᤹ ᤀᤠᤱᤃᤠ᤹ ᤏᤠ᤺ᤶᤔᤠ ᤔᤧᤓᤠ᤺ᤰᤋᤧᤛᤧᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ “ᤜᤡᤵᤐᤠ ᤛᤧᤳᤋᤠᤛᤡᤃᤧᤖᤥ” ᤔᤧᤔᤧᤳᤋᤠᤱᤒᤠ ᤐᤠ᤺ᤴᤜᤠ᤹ ᤂᤢᤏᤡ᤹ ᤛᤶᤎᤠᤱᤅᤣ ᤆᤢᤰᤗᤖᤥ॥

¹⁰ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡᤴ ᤂᤢᤏᤡ᤹ ᤌᤧᤃᤣ᤺ᤰᤁᤥ ᤆᤢᤰᤗᤖᤥ. ᤂᤧᤱᤜᤠ᤹ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤥ ᤗᤠᤵᤐᤢᤱ ᤔᤧᤒᤣ᤺ᤰᤗᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤥ᤺ᤰᤔᤠᤀᤣ ᤔᤧᤴᤇᤢᤰᤏᤧᤸᤗ ᤌᤠᤖᤡᤰ ᤆᤡᤶᤗᤡᤱ ᤆᤡᤶᤗᤡᤱ ᤁᤧᤗ᤹ᤒᤠ ᤘᤠᤈᤡᤶᤒᤣᤀᤥ ᤔᤧᤈᤢᤰᤗᤖᤥ॥

¹¹ ᤔᤏᤠ ᤀᤡᤱᤍᤥ ᤁᤧᤔᤧᤵᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤗᤡᤱᤍᤥ ᤔᤧᤱᤃᤧᤳᤏᤧᤸᤗᤖᤥ. ᤔᤏᤠ ᤁᤧᤜᤡᤵᤐᤠ ᤁᤧᤛᤧᤵᤐᤠᤜᤠ᤹ᤖᤧ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢᤀᤠᤱ ᤔᤧᤔᤧᤰᤗᤖᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡ ᤁᤧᤗ᤹ᤒᤠᤴ ᤀᤠᤱᤃᤠ᤹ ᤏᤡᤛᤢᤱᤗᤥ. ᤜᤧᤰᤁᤩᤠᤱ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥

¹³ ᤛᤧᤰᤂᤠᤀᤣ ᤛᤠᤶᤕᤥᤒᤠᤜᤠ᤹ᤖᤧ ᤁᤧᤏᤠᤖᤠ ᤔᤧᤓᤥᤛᤢᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤁᤧᤍᤃᤡ ᤔᤧᤘᤠ᤹ ᤔᤧᤒᤣ᤺ᤰᤗᤥ॥