ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 139 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤁᤧᤛᤠ᤹ᤖᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤠᤖᤥ॥ 2 ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤧᤖᤧᤰ ᤀᤠᤕᤠ᤺ᤶᤒᤰᤜᤠ᤹ ᤂᤧᤏᤧ᤹ ᤁᤧᤏᤡᤛᤢᤖᤥ. ᤔᤠ᤺ᤱᤄᤠ ᤗᤠᤶᤒᤠᤀᤣ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥ 3 ᤀᤠᤱᤃᤠ᤹ ᤕᤠ᤺ᤶᤒᤰ ᤆᤥ᤺ᤰᤁᤠᤛᤠᤱ ᤏᤠ᤺ᤶᤛᤡᤱᤅᤠᤛᤠᤱ ᤂᤧᤏᤧ᤹ ᤏᤢᤖᤡᤰᤁᤠᤱ ᤁᤧᤏᤡᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱ ᤐᤠ᤺ᤳᤋᤢᤱᤒᤠᤜᤠ᤹ ᤁᤧᤖᤧᤰ ᤂᤧᤏᤧ᤹ ᤁᤧᤏᤡᤛᤢᤖᤥ॥ 4 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤐᤠ᤺ᤵᤔᤠ ᤀᤡ᤺ᤳᤋᤢᤱᤒᤠᤴ ᤋᤃᤡᤛᤠ ᤏᤡᤱᤘᤠ᤹ ᤁᤧᤄᤥᤛᤢᤖᤥ. ᤂᤧᤴ ᤌᤡᤰᤁᤠᤱ ᤔᤣ᤺ᤴᤏᤣ ᤀᤠᤱᤃᤠ᤹ ᤐᤠ᤺ᤵᤔᤠᤏᤢ᤺ᤸᤗᤧ ᤋᤃᤡᤛᤠ ᤛᤖᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥ 5 ᤀᤠᤱᤃᤠ᤹ ᤀᤠᤀᤣᤃᤠᤱ ᤀᤠᤍᤃᤠᤱ ᤀᤠᤳᤋᤡᤛᤠᤱ ᤂᤧᤏᤧ᤹ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤔᤢᤰᤛᤠᤶᤔᤡᤸᤗᤧ ᤀᤠᤱᤃᤠ᤹ ᤁᤶᤒᤪᤠᤱ ᤁᤧᤔᤧᤳᤋᤠᤖᤥ॥ 6 ᤀᤰᤋᤱᤒᤠ ᤛᤡᤰᤁᤢᤶ ᤏᤡᤱᤘᤠ᤹ᤃ ᤀᤠᤗᤠᤃᤡ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ. ᤁᤴ ᤁᤢᤛᤡᤱ ᤏᤡ᤺ᤵᤔᤠ ᤀᤠᤗᤠᤃᤡ ᤆᤠ᤹ᤖᤡᤰ ᤁᤧᤛᤠᤰᤐᤠ ᤆᤥᤰᤗᤥ॥ 7 ᤂᤧᤏᤧ᤹ ᤁᤧᤕᤠᤶᤛᤠᤶᤗᤠᤶᤒᤠ ᤀᤠᤱᤃᤠ᤹ ᤂᤧᤳᤇᤡᤱᤔᤠ ᤔᤧᤛᤢᤰᤁᤠᤸᤗᤥ. ᤁᤧᤍᤃᤡᤗᤠᤶᤒᤠ ᤀᤠᤳᤋᤥᤀᤠᤱ ᤀᤠᤱᤃᤠ᤹ ᤐᤣ᤺ᤰᤔᤠ ᤔᤧᤛᤢᤰᤁᤠᤸᤗᤥ॥ 8 ᤀᤠᤱᤃᤠ᤹ ᤋᤠᤱᤛᤠᤰᤐᤥ ᤐᤣ᤺ᤰᤁᤠᤛᤠᤱ ᤂᤧᤏᤧ᤹ ᤂᤧᤳᤌᤥ ᤁᤧᤘᤠ᤹ᤖᤥ. ᤀᤠᤱᤃᤠ᤹ ᤂᤧᤔᤠ ᤕᤱᤛᤱᤅᤥ ᤐᤣ᤺ᤰᤁᤠᤛᤠᤱ ᤂᤧᤏᤧ᤹ᤃ ᤂᤧᤵᤔᤥᤀᤠᤱ ᤁᤧᤘᤠ᤹ᤖᤥ॥ 9 ᤏᤠᤱᤃᤧᤴ ᤐᤡᤛᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤔᤠ᤺ᤱᤄᤠ ᤐᤧᤀᤠ ᤐᤣ᤺ᤰᤁᤠᤛᤠᤱ. ᤀᤡᤃᤪ ᤏᤠᤶᤎᤠ ᤗᤧᤵᤛᤠᤱ ᤁᤧᤖᤧᤰᤏᤢ᤺ᤸᤗᤧ ᤔᤠ᤺ᤱᤄᤠ ᤐᤣ᤺ᤰᤁᤠᤀᤠᤱ ᤕᤠᤱᤎᤥ᤺ᤰᤁᤠᤛᤠᤱ. 10 ᤀᤠᤱᤃᤠ᤹ ᤗᤠᤶᤗᤥᤔᤠᤖᤧ ᤗᤠᤃᤡ ᤂᤧᤵᤔᤥ ᤁᤧᤘᤠ᤹ᤖᤥ. ᤀᤠᤱᤃᤠ᤹ ᤑᤠ᤹ᤔᤠᤖᤧ ᤗᤠᤃᤡ ᤂᤧᤵᤔᤥᤀᤠᤱ ᤁᤧᤍᤧᤶᤔᤠᤖᤥ॥ 11 ᤀᤠᤱᤃᤠ᤹ ᤀᤰᤂᤣ ᤐᤠ᤺ᤵᤔᤠ ᤛᤢᤰᤋᤢᤱᤒᤡᤗᤠ. “ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤛᤢ᤺ᤵᤋᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤂᤠᤀᤥ᤺ᤵᤔᤠᤴ ᤀᤠᤱᤃᤠ᤹ ᤀᤠᤄᤡᤖᤡ ᤛᤧᤴᤍᤡᤰ ᤐᤥ᤺ᤰᤂᤧ᤹ᤀᤥ॥” 12 ᤁᤖᤛᤠᤱ ᤔᤠᤰᤆᤡᤃᤧᤴ ᤂᤠᤍᤠᤶᤔᤧᤴ ᤂᤧᤏᤧ᤹ ᤁᤧᤗᤠᤃᤡ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤔᤧᤒᤥᤱᤏᤧᤸᤗᤥ. ᤜᤧᤰᤁᤩᤠᤱ ᤛᤧᤴᤍᤡᤰᤁᤡᤴ ᤗᤧᤴᤍᤡᤰ ᤜᤧᤰᤁᤣ ᤂᤠᤀᤥ᤺ᤳᤗᤥ. ᤂᤧᤏᤧ᤹ ᤁᤧᤗᤠᤃᤡ ᤛᤧᤴᤍᤡᤰ ᤏᤢ ᤗᤧᤴᤍᤡᤰ ᤗᤳᤇᤠᤖᤥ॥ 13 ᤂᤧᤏᤧ᤹ ᤀᤠᤎᤰᤗᤠ ᤀᤠᤗᤡᤱᤃᤧᤴ ᤁᤧᤖᤧᤰ ᤁᤧᤈᤥᤃᤢᤖᤥ. ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤁᤧᤈᤥᤃᤠᤱᤗᤥ॥ 14 ᤀᤠᤱᤃᤠ᤹ ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤐᤣ ᤁᤧᤈᤥᤃᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤏᤠᤖᤠ ᤑᤥᤛᤢᤱᤗᤥ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤏᤡᤱᤘᤠ᤹ ᤛᤡᤃᤠᤱᤗᤠᤶ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ 15 ᤀᤠᤱᤃᤠ᤹ ᤀᤠᤗᤢᤱᤛᤡᤜᤠ᤹ ᤐᤥ᤺ᤰᤂᤧᤖ ᤐᤳᤇᤧᤸᤗᤧ. ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤂᤧᤱᤜᤠ᤹ ᤆᤰᤛᤡᤱᤗ ᤐᤳᤇᤧᤖᤥ॥ ᤜᤧᤰᤁᤩᤠᤱ ᤔᤧᤴᤏᤡᤀᤣ ᤔᤧᤴᤎᤠᤀᤣ ᤀᤠᤱᤃᤠ᤹ ᤂᤧᤵᤔᤥ ᤐᤥᤖᤠᤱᤗ ᤐᤳᤇᤠᤱᤗᤥ. ᤂᤧᤶᤓᤧᤸᤗᤧ ᤀᤠᤱᤃᤠ᤹ ᤂᤧᤵᤔᤥ ᤘᤕᤠᤱᤒᤠᤴᤏᤠᤱ ᤂᤧᤏᤧ᤹ ᤁᤧᤏᤡᤛᤢᤖᤥ॥ 16 ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥᤗᤠᤶ ᤗ᤺ᤶᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤁᤧᤏᤡᤛᤠᤱᤒᤠᤖᤥ. ᤀᤠᤱᤃᤠ᤹ ᤀᤠᤜᤡᤱᤔᤴᤏᤡᤸᤗᤧ ᤁᤢᤜᤣ᤺ᤰᤛᤡᤱᤔᤥ ᤁᤶᤓᤩᤠᤖᤡᤰ ᤕᤧᤶ ᤜᤡᤱᤅᤠ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤋᤃᤡᤀᤣ ᤂᤧᤏᤧ᤹ ᤁᤧᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤇᤧᤖᤥ॥ 17 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤗᤠᤃᤡ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤏᤡ᤺ᤵᤔᤠ ᤔᤧᤛᤢᤰᤁᤠᤴᤗᤥ॥ 18 ᤂᤧᤴ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤏᤡ᤺ᤵᤔᤠ ᤁᤥ᤺ᤳᤋᤢᤱᤛᤠᤱ. ᤂᤧᤴ ᤕᤧ᤺ᤱᤄᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤆᤥᤰᤗᤥ॥ ᤀᤠᤱᤃᤠ᤹ ᤀᤠᤔᤡᤰᤕᤢᤔᤠᤗᤠᤶ ᤛᤥᤀᤠᤎᤠᤱᤅᤠᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢᤀᤣ ᤘᤠ᤹ᤀᤠᤖᤥ॥ 19 ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ ᤂᤧᤏᤧ᤹ ᤁᤧᤜᤢᤰᤗᤠᤶ ᤔᤧᤔᤧᤰᤗᤖᤥ॥ ᤔᤏᤠ ᤁᤧᤛᤧᤵᤐᤠᤜᤠ᤹ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤒᤥᤱᤗᤖᤥ॥ 20 ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤒᤠ᤺ᤳᤋᤢᤖᤥ. ᤂᤧᤏᤧ᤹ ᤁᤧᤔᤡᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤴᤘᤠ᤹ᤔᤏᤠ ᤐᤠᤴ ᤔᤧᤒᤠ᤺ᤳᤋᤢᤖᤥ॥ 21 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤈᤡ᤺ᤵᤐᤠ ᤔᤏᤠᤜᤠ᤹ ᤀᤠᤱᤃᤠ᤹ ᤛᤠ᤹ᤖᤡᤰ ᤆᤡ᤺ᤳᤋᤢᤱᤛᤡᤱᤗᤥ. ᤂᤧᤏᤧ᤹ ᤁᤧᤀᤵᤐᤠᤜᤠ᤹. ᤆᤠ᤹ᤖᤡᤰ ᤀᤠᤛᤡᤰᤔᤧᤗᤧ᤺ᤱᤗᤥ॥ 22 ᤀᤠᤱᤃᤠ᤹ ᤂᤧᤱᤜᤠ᤹ ᤛᤠ᤹ᤖᤡᤰ ᤆᤡ᤺ᤳᤋᤢᤱᤛᤡᤱᤗᤥ. ᤂᤧᤱᤜᤠ᤹ ᤀᤠᤏᤡᤱᤔᤡ ᤗᤣ᤺ᤳᤋᤢᤱᤛᤡᤱᤗᤥ॥ 23 ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤱᤘᤠ᤹ ᤁᤥ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤳᤋᤧ᤹ᤀᤥ. ᤀᤠᤏᤡᤱᤘᤠ᤹ ᤐᤠ᤺ᤴᤜᤠ᤹ ᤜᤰᤛᤧ᤹ᤀᤥ ᤜᤧᤰᤁᤩᤠᤱ ᤀᤡ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤏᤡᤛᤧ᤹ᤀᤥ॥ 24 ᤀᤠᤱᤃᤠ᤹ᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤘᤠ᤹ᤒᤡ. ᤁᤥ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧ ᤗᤠᤶᤔᤥ ᤗᤠᤶᤗᤥᤛᤠᤱᤅᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.