ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 135 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤐᤕᤶᤒᤠ ᤁᤢᤕᤠ᤺ᤶᤒᤰᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤂᤡᤏᤡ᤹ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠᤛᤣ. ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ. 2 ᤂᤡᤏᤡ᤹ᤃ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤛᤧᤘᤠ ᤁᤧᤈᤥᤃᤡᤖᤥ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ. ᤂᤢᤏᤧ᤹ ᤁᤢᤔᤡᤱᤅᤥ ᤛᤠᤶᤗᤥᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰᤗᤥ॥ 4 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤁᤢᤒᤧᤴ ᤀᤠᤒᤠᤅᤣ ᤁᤢᤔᤏᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤀᤠᤒᤠᤅᤣ ᤁᤢᤕᤠᤱᤛᤠ ᤁᤢᤴᤎᤣ ᤆᤥ᤺ᤰᤔᤠᤖᤧ ᤗᤠᤃᤡ ᤛᤣᤃᤢᤀᤠᤱ ᤘᤠ᤹ᤖᤥ॥ 5 ᤕᤜᤘᤣ ᤍᤠᤱᤒᤠᤴ ᤐᤕᤶ ᤕᤶᤒᤠ ᤆᤥᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤕᤜᤘᤣ ᤍᤠᤱᤒᤠᤴ ᤁᤧᤖᤧᤰ ᤔᤠᤱ ᤛᤠᤶᤔᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤂᤢᤏᤧ᤹ ᤐᤕᤶ ᤕᤶᤒᤠ ᤆᤥᤰᤗᤥ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤆᤥᤃᤢᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ. ᤘᤖ᤺ᤱᤜᤠ᤹ᤀᤥ ᤏᤢ ᤛᤡᤃᤠᤱᤒᤠ ᤁᤢᤍᤡᤶᤒᤣ ᤁᤣ᤺ᤶᤒᤠ ᤋᤧᤴᤜᤠ᤹ᤀᤥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥᤃᤢᤖᤥ॥ 7 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤠᤀᤥᤗᤠᤶ ᤂᤠ᤹ᤔᤡ᤺ᤳᤋᤡᤴ ᤑᤥ᤺ᤰᤂᤢᤖᤥ॥ ᤘᤜᤡᤳ ᤛᤠᤶᤔᤡ᤺ᤳ ᤂᤀᤡᤰ ᤂᤀᤡᤰ ᤀᤡᤰᤛᤡᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤛᤠ᤺ᤶᤓᤣ ᤗᤧᤰᤗ ᤕᤠ᤺ᤴᤍᤢᤖᤥ. ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤕᤢᤰᤂᤢᤒᤠᤍᤧᤴᤏᤥᤗᤠᤶ ᤛᤢᤖᤡᤳ ᤁᤣᤈᤱ ᤐᤠᤱᤄᤢ ᤋᤠᤛᤢᤖᤥ॥ 8 ᤔᤡᤛᤪ ᤗᤠᤈᤣ᤹ᤀᤥ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤶᤒᤠ ᤛᤠᤜᤠ᤹ ᤛᤧᤖᤢᤛᤡᤖᤥ. ᤜᤧᤰᤁᤩᤠᤱ ᤋᤃᤡ ᤁᤧᤎᤠᤵᤐᤠ ᤌᤰᤛᤠᤜᤠ᤹ᤀᤠᤱ ᤔᤧᤰᤂᤢᤛᤡᤖᤥ॥ 9 ᤔᤡᤛᤪ ᤗᤠᤈᤣ᤹ᤀᤥ ᤂᤢᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤏᤢ ᤔᤡᤰᤛᤣᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤜᤧᤰᤁᤩᤠᤱ ᤑᤠᤖᤥᤴ ᤏᤢ ᤁᤧᤖᤧᤰ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖᤥ॥ 10 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤰᤂᤢᤛᤡᤖᤥ. ᤜᤧᤰᤁᤩᤠᤱ ᤕᤖᤡᤰ ᤔᤢᤰᤁᤧᤃᤢᤒᤠ ᤜᤠᤱᤜᤠ᤹ ᤛᤧᤖᤢᤛᤡᤖᤥ॥ 11 ᤂᤢᤏᤧ᤹ ᤀᤣᤔᤥᤖᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤛᤡᤜᤥᤏᤧᤴ ᤏᤢ ᤒᤠᤛᤠᤏᤒᤠ ᤜᤠᤱ ᤀᤥᤃᤧᤴ ᤛᤧᤖᤢᤛᤡᤖᤥ. ᤂᤧᤒᤩᤠᤱ ᤁᤏᤠᤏᤒᤠ ᤁᤧᤖᤧᤰ ᤜᤠᤱᤜᤠ᤹ᤀᤠᤱ ᤛᤧᤖᤢᤛᤡᤖᤥ॥ 12 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤜᤠ᤹ ᤂᤢᤏᤧ᤹ ᤁᤢᤔᤏᤠᤜᤠ᤹ ᤜᤢᤰᤛᤢᤵᤋᤢᤛᤡᤖᤥ. ᤂᤧᤴ ᤀᤠᤒᤠᤅᤣ ᤂᤢᤴᤇᤡ᤹ᤀᤡᤴ ᤐᤥᤱᤗ ᤑᤠ᤹ᤀᤠᤱ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤖᤥ॥ 13 ᤕᤜᤘᤣ ᤍᤠᤱᤒᤠᤀᤣ. ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤂᤧᤏᤧ᤹ ᤏᤡᤱᤘᤠ᤹ ᤁᤧᤶᤀᤡ᤺ᤳᤗᤥ. ᤜᤧᤰᤁᤩᤠᤱ ᤛᤠᤍᤠᤅᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤏᤧ ᤑᤠ᤹ᤀᤠᤱ ᤀᤡᤱᤓᤴ ᤔᤧᤈᤥᤃᤢᤖᤥ॥ 14 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤂᤢᤏᤡ᤹ ᤗᤧᤵᤔᤠᤱ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 15 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤏᤠᤘᤠᤀᤡᤳᤗᤠᤜᤠ᤹ᤃ ᤛᤠᤶᤔᤩᤠᤱ ᤕᤢᤵᤐᤠᤛᤡᤖᤰᤗᤥ. ᤂᤧᤱᤜᤠ᤹ ᤁᤧᤖᤧᤰ ᤔᤏᤠᤖᤧᤀᤣ ᤔᤧᤈᤥᤃᤢᤛᤡᤒᤠᤖᤥ॥ 16 ᤂᤧᤴ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠ ᤐᤳᤇᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤏᤧᤸᤗᤥ. ᤔᤡᤰ ᤐᤳᤇᤠᤱ ᤂᤠᤏᤡᤔᤠ ᤔᤧᤴᤇᤢᤰᤏᤧᤸᤗᤥ॥ 17 ᤂᤧᤴ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ ᤐᤳ ᤁᤖᤛᤠᤱ ᤂᤧᤶᤔᤠ ᤔᤧᤴᤇᤢᤰᤋᤢᤸᤗᤥ. ᤜᤧᤰᤁᤩᤠᤱ ᤂᤢᤏᤡ᤹ ᤔᤢᤖᤠ ᤐᤳ ᤁᤖᤛᤠᤱ ᤛᤰᤔᤠ ᤛᤥ᤺ᤶᤔᤠ ᤔᤧᤴᤇᤢᤰᤏᤧᤸᤗᤥ॥ 18 ᤂᤧᤴ ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤀᤠᤱ ᤜᤠᤒᤠ ᤂᤧᤴ ᤏᤠᤘᤠᤀᤡᤳᤗᤠ ᤜᤧᤰᤋᤱᤒᤠᤀᤣ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤴ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤀᤠᤶᤓᤠ ᤜᤧᤰᤋᤱᤒᤠᤀᤣ ᤔᤧᤒᤥᤱᤗᤥ॥ 19 ᤀᤡᤛᤪᤠᤀᤡᤗᤛᤔᤠ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ ᤜᤠᤖᤢᤏᤖᤧ ᤁᤢᤎᤠ᤺ᤰᤛᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ 20 ᤗᤧᤒᤡᤖᤧ ᤁᤢᤎᤠ᤺ᤰᤛᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ ᤕᤜᤘᤣ ᤍᤠᤱᤒᤠᤀᤥ ᤛᤧᤘᤠ ᤁᤧᤈᤥ᤺ᤰᤐᤠᤛᤣ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ 21 ᤛᤡᤕᤥᤏᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤸᤗᤧ ᤁᤢᤏᤠᤖᤠ ᤐᤥᤖᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.