ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 132 - LIFOTNT

ᤔᤠᤱᤜᤡᤶᤗᤧ ᤗᤠᤃᤡ ᤐᤣᤗᤡ ᤑᤠᤰᤔᤠ

ᤗᤠᤶᤍᤡᤰ ᤆᤥ᤺ᤰᤔᤠ ᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤍᤠᤀᤢᤍᤧᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤔᤢᤒᤠ ᤁᤧᤖᤧᤰ ᤕᤧᤳᤋᤢᤰᤂᤣᤜᤠ᤹ ᤏᤡᤱᤘᤠ᤹ ᤗᤡᤱᤛᤧ᤹ᤀᤥ॥

² ᤂᤢᤏᤧ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤠᤱᤜᤢᤵ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤛᤔᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤠᤱᤜᤧᤰᤛᤡᤱᤗᤥ.

³ “ᤀᤠᤱᤃᤠ᤹ ᤀᤠᤜᤡᤶᤔᤥ ᤔᤧᤗᤠ᤺ᤳᤋᤠᤴᤗᤥ. ᤜᤧᤰᤁᤩᤠᤱ ᤀᤠᤏᤧᤳᤏᤠᤀᤥᤀᤠᤱ ᤔᤧᤒᤣ᤺ᤰᤁᤠᤴᤗᤥ॥

^4-5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤘᤠ᤹ᤔᤠᤍᤧᤴ ᤔᤧᤱᤄᤥᤀᤣ ᤌᤠᤖᤡᤰ ᤀᤠᤱᤃᤠ᤹ ᤀᤠᤔᤡᤰᤕᤢᤔᤠ ᤋᤠᤔᤧᤓᤠ᤺ᤰᤁᤠᤸᤗᤥ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤛᤔᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤍᤧᤴ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤀᤠᤱᤃᤠ᤹ ᤀᤠᤔᤡᤰᤁᤡᤴ ᤆᤡᤄᤡᤶᤔᤠᤱ ᤔᤧᤔᤧᤳᤋᤠᤸᤗᤥ॥”

⁶ ᤀᤠᤏᤡᤃᤧᤃ ᤒᤣᤌᤗᤧᤜᤧᤶᤔᤥ ᤘᤕᤡᤃᤧᤸᤗᤧ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤶᤒᤧᤖᤥ. ᤜᤧᤰᤁᤩᤠᤱ ᤕᤠᤀᤠᤖᤒᤠ ᤋᤧᤶᤒᤣ᤹ᤀᤥ ᤂᤧᤴ ᤂᤥᤛᤢᤶᤒᤧᤖᤥ॥

⁷ ᤀᤠᤏᤡᤃᤣ ᤀᤰᤂᤣ ᤐᤠ᤺ᤳᤋᤢᤶᤒᤧᤖᤥ. “ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤀᤠᤏᤡ᤹ ᤐᤣᤃᤡᤖᤥ. ᤂᤢᤏᤧ᤹ ᤁᤢᤕᤢᤱᤔᤠᤍᤧᤴ ᤋᤃᤡ ᤂᤢᤏᤧ᤹ ᤛᤧᤘᤠ ᤔᤧᤳᤋᤢᤶᤗᤥ॥”

⁸ ᤕᤜᤘᤣ ᤍᤠᤱᤒᤠᤀᤣ. ᤔᤢᤰᤛᤠᤶᤃᤧᤴ ᤔᤡᤰᤛᤣ᤺ᤴᤏᤡᤸᤗᤧ ᤛᤴᤍᤥᤰᤁᤡᤴ ᤕᤠᤱᤛᤡᤱᤅᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤠ᤺ᤶᤛᤡᤱᤔᤠᤍᤧᤴᤏᤥ ᤋᤩᤧ᤹ᤀᤥ॥

⁹ ᤂᤧᤏᤧ᤹ᤀᤥ ᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤠᤓᤧᤸᤗᤧᤛᤠᤱ ᤛᤠᤶᤕᤥᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤖᤖᤥ. ᤜᤧᤰᤁᤩᤠᤱ ᤛᤣᤛᤣ ᤁᤧᤔᤏᤠᤜᤠ᤹ ᤔᤧᤛ᤺ᤳᤋᤠᤱ ᤁᤧᤏᤠᤖᤠ ᤔᤧᤓᤥᤛᤢᤖᤖᤥ॥

¹⁰ ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤧᤴᤏᤢ ᤔᤠᤱᤜᤢᤵ ᤁᤧᤈᤥᤃᤢᤖᤥ. ᤂᤧᤏᤧ᤹ ᤁᤧᤛᤣᤃᤢᤒᤠ ᤜᤠᤱᤅᤡᤴ ᤔᤧᤏᤠ᤹ᤖᤧᤴᤏᤧ᤹ᤀᤥ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴᤏᤢ ᤗᤳᤇᤠ ᤔᤠᤱᤜᤢᤵ ᤆᤥᤃᤢᤖᤥ. ᤂᤧᤴ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤁᤧᤳᤋᤢᤀᤣᤖᤥ. “ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤀᤥ ᤌᤡᤰᤐᤠ ᤜᤠᤱ ᤆᤥᤃᤢᤱᤗᤥ. ᤂᤧᤏᤧ᤹ ᤁᤧᤀᤣᤃᤠᤱ ᤂᤧᤴ ᤜᤠᤱ ᤐᤥᤱᤗᤥ॥

¹² ᤁᤧᤛ᤻ᤛᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤏᤢ ᤜᤢ᤹ᤖᤢᤱᤛᤡᤱᤒᤠ ᤀᤠᤱᤃᤠ᤹ ᤀᤠᤏᤡᤛᤠᤶᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ ᤐᤥᤱᤗᤥ. ᤜᤧᤰᤁᤣᤗ᤹ᤖᤡᤰ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤔᤧᤴᤇᤠ᤹ᤜᤠ᤹ᤀᤠᤱ ᤛᤍᤠᤍᤡᤱ ᤛᤍᤠᤍᤡᤱ ᤜᤠᤱ ᤔᤧᤒᤥᤱᤗᤥ॥”

¹³ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤛᤡᤕᤥᤏᤧᤴ ᤛᤣᤃᤢᤀᤠᤱ ᤘᤠ᤹ᤖᤥ. ᤁᤱᤃ ᤁᤢᤘᤠ᤹ᤔᤠᤍᤧᤴ ᤆᤥ᤺ᤰᤔᤠ ᤁᤢᤏᤡᤱᤘᤠ᤹ ᤘᤠ᤹ᤖᤥ॥

¹⁴ ᤂᤢᤏᤧ᤹ ᤐᤠ᤺ᤳᤋᤢ. “ᤁᤱᤃ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤏᤠ᤺ᤶᤛᤡᤱᤔᤠᤍᤧᤴᤗᤥ. ᤀᤠᤱᤃᤠ᤹ ᤀᤠᤶᤓᤠ ᤁᤵᤔᤥ ᤕᤢᤱᤔᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥

¹⁵ ᤛᤡᤕᤥᤏᤀᤥ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤁᤧᤖᤧᤰ ᤁᤢᤈᤠᤜᤠ᤹ ᤀᤠᤱᤃᤠ᤹ ᤁᤧᤰᤁᤢᤱᤗ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤄᤠ ᤔᤧᤄᤠᤖ ᤁᤢᤈᤠ ᤐᤡᤖᤢᤱᤛᤡᤱᤗᤥ॥

¹⁶ ᤂᤧᤵᤔᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤥ ᤀᤠᤱᤃᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤛᤣᤛᤣ ᤔᤏᤠᤜᤠ᤹ ᤔᤧᤛ᤺ᤳᤋᤠᤱ ᤛᤠᤶᤔᤧᤗᤥᤖᤥ॥

¹⁷ ᤁᤵᤔᤥ ᤀᤠᤱᤃᤠ᤹ ᤍᤠᤀᤢᤍᤖᤧ ᤁᤢᤛ᤻ᤛᤠᤜᤠ᤹ᤀᤥ ᤗᤳᤇᤠ ᤐᤕᤶ ᤕᤶᤒᤠ ᤜᤠᤱ ᤆᤥᤃᤢᤱᤗᤥ. ᤜᤠᤒᤠ ᤂᤧᤵᤔᤥ ᤀᤠᤱᤃᤠ᤹ ᤛᤣᤃᤢᤱᤒᤠ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰ ᤐᤥᤱᤗ ᤆᤥᤃᤢᤱᤗᤥ॥

¹⁸ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤋᤧᤴᤏᤥ ᤏᤢ᤹ᤔᤠ ᤋᤠᤔᤠ ᤐᤥᤱᤗᤥ. ᤁᤖ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤀᤠᤱᤃᤠ᤹ ᤂᤢᤴᤇᤡ᤹ ᤏᤠᤎᤠᤖ ᤕᤠ᤺ᤴᤍᤢᤱᤛᤡᤱᤗᤥ॥”