ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 122 - LIFOTNTᤕᤖᤢᤛᤗᤧ᤺ᤶᤔᤥ ᤛᤏᤠᤖᤢᤱ ᤐᤥᤱᤗ ᤐᤣᤗᤡ ᤗᤠᤶᤍᤡᤰ ᤆᤥ᤺ᤰᤔᤠᤖᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤔᤧᤳᤋᤠᤱᤗᤥ. “ᤀᤠᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤣᤃᤡᤖᤥ” ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤛ᤺ᤳᤋᤠᤱᤗᤥ॥ 2 ᤜᤧᤰᤁᤩᤠᤱ ᤀᤠᤸᤗᤥ ᤀᤠᤏᤡ᤹ ᤁᤵᤔᤥ ᤀᤠᤘᤠ᤹ᤖᤥ. ᤕᤖᤢᤛᤗᤧ᤺ᤶᤒᤠ ᤋᤠ᤺ᤰᤜᤴ ᤗᤠᤶᤎᤣ᤺ᤵᤐᤠ ᤛᤡᤃᤠᤱ ᤀᤠᤏᤡ᤹ ᤀᤠᤕᤧᤵᤗᤥ॥ 3 ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤏᤢᤖᤡᤰ ᤔᤧᤃᤠᤶᤛᤢᤀᤠᤱ ᤔᤧᤈᤥᤃᤢᤒᤠ ᤆᤥᤰᤗᤥ. ᤁᤴ ᤔᤧᤃᤠᤶᤛᤢᤒᤠ ᤗᤢᤱᤎᤠᤰᤜᤠ᤹ ᤗᤢ᤺ᤶᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤰᤗᤥ॥ 4 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᤛᤧᤘᤠ ᤆᤥ᤺ᤰᤛᤧ ᤁᤵᤔᤥ ᤔᤧᤍᤠᤖᤥ. ᤁᤢᤀᤡᤱᤈᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤏᤢᤃᤧᤴ ᤔᤧᤒᤡᤖᤢᤖᤥ॥ 5 ᤁᤵᤔᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤶᤔᤠᤍᤧᤴᤜᤠ᤹ ᤏᤧᤖᤥ. ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤏᤡ᤹ ᤜᤠᤱᤕᤢᤰᤏᤠᤜᤠ᤹ ᤁᤵᤔᤥᤀᤣ ᤕᤢᤱᤗᤥ॥ 6 ᤕᤖᤢᤛᤗᤧᤔ ᤕᤧᤰᤕᤰᤁᤥ ᤛᤏᤠᤖᤢᤱ ᤐᤥᤱᤗ ᤑᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤧᤶᤔᤧ᤹ᤀᤥ. “ᤁᤴ ᤕᤧᤰᤕᤰᤁᤡᤴ ᤔᤡ᤺ᤶ ᤁᤧᤔᤧᤵᤐᤠᤜᤠ᤹ ᤔᤧᤏᤢ᤹ᤔᤧᤍᤠᤖᤖᤥ॥ 7 ᤕᤧᤰᤕᤰᤁᤥᤒᤠ ᤗᤢᤱᤎᤠᤰ ᤛᤡᤃᤠᤱ ᤛᤏᤠᤖᤢᤱ ᤋᤠᤖᤖᤥ. ᤜᤧᤰᤁᤩᤠᤱ ᤜᤠᤱᤕᤰ ᤁᤒᤪᤡᤱ ᤏᤢ᤹ᤔᤠ ᤋᤠᤔᤠ ᤐᤥᤱᤗᤖᤥ॥” 8 ᤀᤠᤴᤈᤢᤶ ᤀᤠᤴᤍᤣᤱ ᤏᤢ ᤀᤠᤃᤠ᤹ᤀᤡᤜᤠ᤹ᤖᤧ ᤗᤠᤃᤡ ᤕᤖᤢᤛᤗᤧ᤺ᤶᤔᤡᤴ ᤔᤧᤳᤋᤢᤱᤗᤥ. “ᤂᤧᤏᤧ᤹ᤀᤥ ᤛᤏᤠᤖᤢᤱ ᤋᤠᤖᤖᤥ॥” 9 ᤁᤱᤃ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡᤖᤥ. ᤕᤧᤰᤕᤰᤁᤥ ᤏᤢ᤹ᤔᤠᤍᤠᤔᤠ ᤐᤥᤱᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤣᤗᤡ ᤑᤠᤰᤋᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.