ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 119 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤏᤢᤒᤠ ᤕᤧᤵᤗᤧᤰ ᤁᤧᤃᤵᤐᤠ ᤔᤏᤠᤛᤡᤖᤥ. ᤂᤧᤱᤜᤠ᤹ᤃ ᤛᤍᤠᤍᤡᤱ ᤔᤧᤛ᤺ᤳᤋᤠᤱ ᤔᤧᤘᤠ᤹ᤖᤥ॥ 2 ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤂᤧᤱᤜᤠ᤹ᤖᤧᤃ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤂᤢᤏᤧ᤹ ᤔᤧᤃᤥ᤺ᤳᤋᤢᤖᤥ॥ 3 ᤂᤧᤱᤜᤠ᤹ᤖᤧ ᤀᤠᤓᤧᤸᤗᤧᤀᤠᤱ ᤑᤧᤴᤕᤠ᤺ᤶᤒᤰ ᤔᤧᤴᤈᤥᤃᤢᤴᤗᤥ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤥ ᤗᤠᤱᤔᤧᤄᤣ᤺ᤰᤗᤥ॥ 4 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤁᤧᤛᤠᤶᤕᤥ ᤀᤡᤱᤈᤠᤱᤜᤠ᤹ ᤀᤠᤏᤡᤃᤣ ᤀᤠᤃᤧᤒᤡᤖᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤏᤢᤖᤡᤰᤁᤠᤱ ᤀᤡ᤺ᤳᤋᤧᤶᤔᤧ᤹ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤧᤀᤠᤱ ᤘᤠ᤹ᤖᤥ॥ 5 ᤁᤧᤜᤢ᤹ᤖᤠᤱᤒᤠ ᤏᤡᤛᤠᤶᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤡᤸᤗᤧᤃ ᤀᤠᤰᤂᤧᤴ ᤏᤛᤠ᤺ᤴᤛᤠᤒᤠ ᤐᤥᤱᤔᤠᤒᤣ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ 6 ᤂᤧᤏᤧ᤹ ᤁᤧᤖᤧᤰ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤜᤧᤰᤁᤣ᤺ᤸᤗᤧ ᤀᤠᤓᤧᤸᤗᤧᤀᤠᤱ ᤀᤠᤱᤃᤠ᤹ ᤛᤡᤖᤡᤱᤔᤔᤥ ᤔᤧᤎᤠᤀᤠᤴᤗᤥ॥ 7 ᤛᤠᤶᤕᤥᤒᤠ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤜᤢ᤹ᤛᤡᤱᤅᤠᤖᤥ. ᤜᤧᤰᤁᤣᤗ᤹ᤖᤡᤰ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤖᤧ ᤁᤧᤏᤠᤖᤠ ᤑᤥᤛᤢᤱᤗᤥ॥ 8 ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤀᤠᤑᤠᤸᤗᤧᤀᤠᤱ ᤔᤧᤗᤧᤖᤠᤱᤅᤡᤴ ᤔᤧᤍᤣᤛᤠᤱᤅᤡᤴᤏᤧ᤹ᤀᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ 9 ᤀᤠᤰᤂᤣᤗ᤹ᤖᤡᤰ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤛᤣᤛᤣ ᤑᤢᤱᤓᤢᤱ ᤘᤠ᤹ᤔᤠ ᤔᤧᤛᤢᤰᤐᤣ᥅ ᤂᤧᤱᤃ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱᤅᤣᤖᤥ॥ 10 ᤁᤧᤖᤧᤰ ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤀᤠᤱᤃᤠ᤹ ᤂᤧᤏᤧ᤹ ᤁᤥ᤺ᤳᤏᤧᤖᤥ. ᤀᤠᤱᤃᤠ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤔᤧᤶᤓᤣ᤺ᤶᤔᤏᤠᤒᤠ ᤆᤥᤃᤠᤱᤅᤧ᤹ᤀᤥ॥ 11 ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥ᤺ᤰᤁᤠᤸᤗᤥ. ᤂᤧᤸᤗᤧᤆᤥᤃᤢᤸᤗᤧ ᤁᤧᤒᤠ᤺ᤴᤈᤠ᤺ᤰᤁᤡᤴ ᤀᤠᤛᤡᤰᤗᤢᤱᤔᤥ ᤕᤢᤰᤂᤢᤱᤗᤥ॥ 12 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ. ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ 13 ᤕᤧᤳᤗᤧᤱ ᤕᤧᤳᤗᤧᤱ ᤕᤶᤒᤠ ᤀᤡᤰᤗᤠᤀᤥ. ᤁᤧᤖᤧᤰ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤐᤥᤎᤰ ᤆᤥᤃᤢᤱᤗᤥ॥ 14 ᤕᤖᤡᤰ ᤕᤠᤱᤛᤠᤁᤢᤴᤎᤣ ᤂᤥᤔᤠᤸᤗᤧ ᤛᤡᤰᤛᤶᤗᤥ. ᤂᤧᤴᤏᤢ᤺ᤸᤗᤧᤀᤠᤱ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤀᤥ ᤀᤠᤱᤃᤠ᤹ ᤀᤠᤛᤡᤰᤛᤶᤗᤥ॥ 15 ᤀᤠᤱᤃᤠ᤹ ᤁᤧᤄᤠᤜᤢᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤧᤜᤢ᤹ᤖᤠᤱᤒᤠ ᤏᤡᤛᤠᤶᤜᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ 16 ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ᤀᤥ ᤀᤠᤱᤃᤠ᤹ ᤛ᤺ᤳᤋᤠᤖᤥ. ᤁᤧᤒᤠ᤺ᤴᤈᤠ᤺ᤰᤜᤠ᤹ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤓᤣ᤺ᤴᤏᤠᤸᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤛ᤺ᤵᤔᤠ 17 ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤀᤠᤱ ᤁᤧᤜᤢ᤹ᤖᤠᤱᤒᤠ ᤏᤡᤛᤠᤶᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 18 ᤀᤠᤔᤡᤰᤁᤡᤴ ᤜᤴᤍᤠᤱ ᤐᤡᤖᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤁᤧᤀᤡᤱᤈᤠᤱᤅᤥᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤛᤧᤰᤂᤠᤴ ᤏᤡᤔᤠ ᤛᤢᤰᤋᤢᤱᤗᤖᤥ॥ 19 ᤀᤠᤱᤃᤠ᤹ᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤵᤔᤠᤖᤧ ᤗᤠᤃᤡᤖᤰ ᤘᤠ᤹ᤀᤠᤖᤥ. ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤔᤧᤈᤥᤃᤧᤴᤏᤧ᤹ᤀᤥ॥ 20 ᤁᤧᤖᤧᤰ ᤕᤧᤶᤔᤥ ᤂᤧᤏᤧ᤹ ᤁᤧᤄᤠᤛᤧᤴᤜᤠ᤹ ᤀᤠᤱᤃᤠ᤹ ᤗᤧᤔᤠ ᤀᤠᤛᤡᤖᤠ᤹ ᤌᤠᤱᤗᤥ. ᤂᤧᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤀᤠᤛᤡᤰᤛᤶᤗᤥ॥ 21 ᤂᤧᤏᤧ᤹ᤃ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤁᤧᤓᤧ᤺ᤰᤋᤢᤛᤡᤖᤥ. ᤁᤧᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤒᤠᤜᤠ᤹ ᤔᤠᤱᤍᤣ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤖᤥ॥ 22 ᤀᤠᤏᤠᤎᤠᤔᤠ ᤏᤢ ᤀᤠᤏᤠᤔᤧᤴᤇᤠ᤹ ᤔᤧᤵᤔᤠ ᤂᤧᤱᤜᤠ᤹ ᤔᤧᤓᤠ᤺ᤰᤋᤧᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥ 23 ᤜᤠᤱᤕᤢᤰᤐᤠᤜᤠ᤹ ᤆᤢᤶᤗᤢᤱ ᤔᤧᤈᤥ᤺ᤰᤁᤠᤱ ᤀᤠᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤰᤗᤥ. ᤁᤖ ᤀᤠᤱᤃᤠ᤹ᤃ ᤁᤧᤜᤢ᤹ᤖᤠᤱᤒᤠ ᤏᤡᤛᤠᤶᤜᤠ᤹ᤀᤥᤀᤣ ᤏᤡᤱᤘᤠ᤹ ᤐᤡᤖᤢᤱᤗᤥ॥ 24 ᤂᤧᤏᤧ᤹ ᤁᤧᤄᤠᤜᤢᤴ ᤐᤠ᤺ᤴᤜᤠ᤹ᤀᤥ ᤀᤠᤛᤡᤰᤛᤶᤗᤥ. ᤂᤧᤵᤔᤥ ᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤛᤢᤈᤠᤜᤠ᤹ ᤂᤥᤛᤢᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡ᤺ᤴᤎᤥ 25 ᤀᤠᤱᤃᤠ᤹ᤃ ᤛᤡᤔᤠᤗᤡᤱᤎᤥ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ. ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤕᤠᤶᤔᤥ ᤑᤥ᤺ᤰᤂᤠᤱᤅᤧ᤹ᤀᤥ॥ 26 ᤆᤥᤃᤢᤱᤒᤠ ᤁᤧᤖᤧᤰ ᤐᤠ᤺ᤴᤏᤥ ᤜᤡᤴᤍᤠᤱᤗᤥ. ᤜᤧᤰᤁᤩᤠᤱ ᤏᤢᤃᤵ ᤁᤧᤒᤡᤖᤠᤱᤗᤥ. ᤀᤠᤱᤃᤠ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤗᤠᤱᤄᤣ᤺ᤰᤔᤠ ᤜᤢ᤹ᤖᤠᤅᤧ᤹ᤀᤥ॥ 27 ᤀᤠᤱᤃᤠ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤑᤠ᤹ᤖᤠᤱᤅᤧ᤹ᤀᤥ. ᤂᤧᤒᤩᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤁᤧᤕᤠ᤺ᤶᤒᤰᤜᤠ᤹ᤀᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ 28 ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤖᤧ ᤀᤠᤱᤃᤠ᤹ ᤕᤥ᤺ᤴᤍᤠᤱᤅᤠᤱ ᤘᤠ᤹ᤀᤠᤖᤥ. ᤔᤠᤱᤜᤢᤵ ᤁᤧᤈᤥᤃᤢᤒᤠ ᤜᤧᤰᤁᤣ ᤁᤧᤎᤢᤶᤒᤠ ᤆᤥᤃᤠᤱᤅᤧ᤹ᤀᤥ॥ 29 ᤀᤡᤱᤗᤧᤰᤐᤠ ᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤔᤧᤶᤒᤥᤱᤅᤣ ᤀᤠᤱᤃᤠ᤹ ᤗᤠ᤺ᤳᤗᤠ᤺ᤳ ᤁᤳᤋᤠᤱᤅᤧ᤹ᤀᤥ. ᤂᤧᤏᤧ᤹ ᤁᤧᤀᤡᤱᤈᤠᤱᤗᤠᤶᤒᤠ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ॥ 30 ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤅᤠᤱ ᤘᤠ᤹ᤀᤠᤖᤥ॥ 31 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤄᤠᤜᤢᤴᤜᤠ᤹ ᤌᤎᤵ ᤔᤧᤸᤗ᤹ᤀᤣ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ. ᤛᤡᤖᤡᤱᤔᤔᤥ ᤔᤧᤎᤠᤛᤠᤱᤅᤡᤴᤏᤧ᤹ᤀᤥ॥ 32 ᤀᤠᤱᤃᤠ᤹ ᤀᤠᤛᤡᤰ ᤐᤛᤶᤛᤶᤗ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤸᤗᤛᤠᤱ ᤕᤖᤡᤰ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤁᤧᤒᤡᤖᤠᤱᤅᤠᤱ ᤘᤠ᤹ᤖᤥ॥ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ 33 ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤜᤢ᤹ᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤛᤍᤠᤍᤡᤱ ᤂᤧᤴ ᤋᤡᤶᤍᤢᤱ ᤏᤠ᤺ᤳᤋᤢᤱᤗᤥ॥ 34 ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤜᤴᤍᤠᤱ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤂᤧᤴ ᤁᤧᤖᤧᤰ ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤀᤠᤱᤃᤠ᤹ ᤋᤡᤶᤍᤢᤱ ᤏᤠ᤺ᤳᤋᤢᤱᤗᤥ॥ 35 ᤁᤧᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤆᤥᤃᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤵᤔᤥ ᤛ᤺ᤵᤔᤠ ᤂᤥᤀᤠᤖᤥ॥ 36 ᤀᤠᤏᤡᤱᤘᤠᤴ ᤁᤧᤀᤡᤱᤈᤠᤱ ᤗᤧᤵᤔᤠᤱ ᤜᤡᤛᤧ᤹ᤀᤥ. ᤕᤠᤱᤛᤠᤁᤢᤴᤎᤣ ᤗᤧᤵᤔᤠᤱ ᤔᤣ᤺ᤸᤗᤥ॥ 37 ᤜᤏᤧᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤔᤠᤗᤠᤶ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤥ॥ 38 ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤁᤧᤒᤡᤖᤠᤱᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤧᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤖᤥ॥ 39 ᤀᤠᤱᤃᤠ᤹ ᤁᤡᤖᤢᤱᤒᤠ ᤀᤠᤏᤠᤎᤠᤔᤠ ᤐᤠ᤺ᤴᤏᤡᤴ ᤂᤧᤳᤋᤠᤱᤍᤣᤛᤠᤱ ᤐᤡᤖᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤎᤡᤶᤜᤠ᤹ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ॥ 40 ᤀᤥᤔᤧᤳᤋᤧ᤹ᤀᤥ. ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ. ᤀᤠᤱᤃᤠ᤹ ᤁᤢᤛᤱ ᤜᤡᤱᤔᤴ ᤐᤡᤖᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤠᤶᤕᤥᤒᤠ ᤁᤧᤈᤥ᤺ᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤏᤡᤱᤘᤠ᤹ ᤐᤡᤔᤠ 41 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤰᤂᤧᤴ ᤗᤢᤱᤔᤠ᤹ ᤁᤧᤍᤢᤰᤁᤠ. ᤀᤥᤛᤣ᤺ᤴᤎᤠᤰᤋᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 42 ᤜᤧᤰᤁᤩᤠᤱᤗᤰ ᤀᤠᤈᤠ᤺ᤳᤌᤡ ᤁᤧᤍᤣᤒᤠᤜᤠ᤹ ᤀᤠᤱᤃᤠ᤹ ᤏᤢᤃᤵ ᤐᤡᤔᤠ ᤛᤢᤰᤋᤢᤱᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤁᤧᤒᤠ᤺ᤴᤈᤠ᤺ᤰᤁᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ 43 ᤀᤠᤓᤧᤸᤗᤧᤛᤠᤱ ᤛᤧᤰᤂᤠ ᤐᤠ᤺ᤵᤔᤠ ᤔᤢᤰᤛᤠᤶ ᤐᤡᤖᤠᤱᤅᤧ᤹ᤀᤥ. ᤁᤧᤄᤠᤛᤧᤴᤜᤠ᤹ᤀᤥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ 44 ᤛᤍᤠᤍᤡᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 45 ᤀᤠᤱᤃᤠ᤹ ᤆᤥ᤺ᤰᤕᤢᤶᤓᤥᤒᤠ ᤐᤥᤱᤅᤠᤀᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤃ ᤁᤧᤏᤡᤛᤠᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 46 ᤁᤧᤀᤡᤱᤈᤠᤱᤜᤠ᤹ ᤜᤠᤱᤜᤠ᤹ ᤆᤧᤰᤋᤢᤱᤛᤡᤱᤗᤥ. ᤜᤧᤰᤁᤣ ᤆᤥ᤺ᤰᤔᤠ ᤀᤠᤱᤃᤠ᤹ ᤔᤧᤏᤢ᤺ᤴᤏᤠᤸᤗᤥ॥ 47 ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤡᤸᤗᤧ ᤀᤠᤱᤃᤠ᤹ ᤀᤠᤛᤡᤰᤛᤶᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤠᤛᤡᤖᤠ᤹ ᤌᤠᤱᤗᤥ॥ 48 ᤁᤧᤀᤡᤱᤈᤠᤱᤜᤠ᤹ ᤀᤠᤛᤡᤖᤠ᤹ᤎᤠᤱᤅᤠᤱ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱᤗᤥ. ᤁᤧᤄᤠᤜᤢᤴᤜᤠ᤹ᤀᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤥ ᤏᤡᤱᤘᤠ᤹ ᤕᤢᤱᤔᤠ 49 ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴᤏᤢ ᤔᤠᤱᤜᤢᤵ ᤁᤧᤈᤥᤃᤢᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤂᤧᤸᤗᤧ ᤀᤠᤱᤃᤠ᤹ ᤜᤠᤱᤜᤠᤱ ᤔᤧᤳᤋᤠᤱᤅᤠᤱ ᤘᤠ᤹ᤖᤥ॥ 50 ᤀᤠᤱᤃᤠ᤹ ᤀᤠᤍᤢᤰᤂᤣ ᤀᤠᤗᤠᤰᤂᤣᤀᤥᤀᤠᤱ ᤀᤠ᤺ᤴᤇᤡᤱᤔᤠ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤔᤠᤱᤜᤢᤵᤐᤡᤸᤗᤧ ᤀᤠᤱᤃᤠ᤹ ᤜᤡᤱᤔᤴ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥ 51 ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ᤖᤧ ᤛᤍᤠᤍᤡᤱ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖᤥ. ᤁᤖ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤧᤗᤧᤳᤋᤠᤴᤗᤥ॥ 52 ᤕᤜᤘᤣ ᤍᤠᤱᤒᤠᤀᤣ. ᤋᤃᤡᤒᤠ ᤁᤧᤄᤠᤛᤧᤴᤜᤠ᤹ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ. ᤂᤧᤴ ᤁᤧᤄᤠᤛᤧᤴᤜᤠ᤹ᤖᤧ ᤜᤠᤱᤜᤠᤱ ᤔᤧᤳᤋᤠᤖᤥ॥ 53 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤔᤧᤓᤣ᤺ᤴᤍᤢᤖᤥ. ᤂᤧᤴ ᤏᤡᤛᤢᤱᤅᤠᤱ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤗᤥ॥ 54 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡ ᤘᤠ᤹ᤀᤠᤛᤠᤱ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤛᤠᤶᤗᤥᤜᤠ᤹ ᤛᤠᤵᤋᤢᤱᤗᤥ॥ 55 ᤕᤜᤘᤣ ᤍᤠᤱᤒᤠᤀᤣ. ᤛᤧᤴᤍᤡᤰ ᤂᤧᤏᤧ᤹ ᤁᤧᤔᤡᤱᤅᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤗᤡᤱᤛᤢᤱᤗᤥ॥ 56 ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤛ᤺ᤳᤋᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤏᤡᤱᤘᤠ᤹ ᤐᤡᤔᤠ 57 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ᤀᤡᤴᤏᤣᤖᤥ. ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤠᤱᤜᤢᤵ ᤆᤥᤃᤢᤱᤗᤥ॥ 58 ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤖᤥ. ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ॥ 59 ᤀᤠᤕᤧᤵᤗᤧᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤁᤧᤄᤠᤜᤢᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 60 ᤀᤠᤱᤃᤠ᤹ᤃ ᤆᤠᤳᤋᤠᤖᤥ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤛᤢᤀᤠᤴᤗᤥ॥ 61 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤀᤡᤔᤧᤕᤢᤰᤋᤠᤱᤗᤥ. ᤜᤧᤰᤁᤣᤛᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤱᤅᤡᤴᤗᤥ॥ 62 ᤛᤧᤴᤍᤡᤰ ᤛᤧᤳᤗᤢᤶᤓᤰᤁᤡᤸᤗᤧ ᤐᤥ᤺ᤰᤁᤠᤖᤥ. ᤛᤠᤶᤕᤥᤒᤠ ᤁᤧᤄᤠᤛᤧᤴᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ॥ 63 ᤀᤠᤱᤃᤠ᤹ᤃ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤀᤠᤖᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤀᤠᤖᤥ॥ 64 ᤕᤜᤘᤣ ᤍᤠᤱᤒᤠᤀᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤏᤡᤖᤡᤰᤁᤠᤱ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤖᤥ. ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤁᤢᤔᤧᤴ 65 ᤕᤜᤘᤣ ᤍᤠᤱᤒᤠᤀᤣ. ᤔᤠᤱᤜᤢᤵ ᤁᤧᤈᤥᤃᤢᤒᤠᤴ ᤂᤧᤏᤧ᤹ ᤁᤧᤃᤧᤳᤋᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤏᤢᤖᤡᤰ ᤁᤧᤔᤧᤳᤋᤠᤱᤅᤠᤱ ᤘᤠ᤹ᤖᤥ॥ 66 ᤀᤠᤱᤃᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤐᤡᤖᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤏᤛᤠᤴ ᤆᤥᤃᤢᤱᤗᤥ॥ 67 ᤂᤧᤏᤧ᤹ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤔᤠᤏᤢ᤺ᤸᤗᤧ ᤋᤃᤡ ᤋᤠᤵᤐᤧ᤹ᤖᤠᤱᤅᤠᤱ ᤘᤕᤠᤱᤗᤥ. ᤁᤖ ᤀᤠᤸᤗᤃ ᤁᤧᤒᤠ᤺ᤴᤈᤠ᤺ᤰᤁᤡᤴ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 68 ᤂᤧᤏᤧ᤹ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤏᤢ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤈᤥ᤺ᤰᤗᤥ. ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ 69 ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧ ᤀᤠᤕᤠ᤺ᤶᤒᤣᤀᤥ ᤀᤡᤱᤗᤧᤰ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ. ᤁᤖ ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤁᤧᤒᤡᤀᤠᤒᤠ ᤂᤠᤜᤢᤴᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 70 ᤂᤧᤴ ᤔᤏᤠᤜᤠ᤹ᤖᤧ ᤌᤣᤀᤠᤱ ᤂᤠᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤔᤧᤱᤃᤳᤋᤢᤸᤗᤥ. ᤁᤖ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤀᤥ ᤀᤠᤱᤃᤠ᤹ ᤀᤠᤛᤡᤰᤛᤶᤗᤥ॥ 71 ᤋᤢᤰᤂᤣ ᤗᤠᤰᤂᤣ ᤋᤢᤔᤢᤱᤒᤠᤴ ᤏᤢᤒᤤ ᤐᤥ᤺ᤰᤂᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤜᤢ᤹ᤛᤡᤱᤔᤠ ᤐᤠᤱᤄᤠᤱᤗᤥ॥ 72 ᤀᤠᤱᤃᤠ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤒᤡᤖᤠᤱᤗᤥ. ᤂᤧᤴ ᤁᤧᤒᤡᤖᤠᤱᤒᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤕᤠᤱᤛᤠ ᤁᤢᤴᤎᤣ᤺ᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤥ ᤁᤧᤘᤠ᤹ᤒᤠ ᤂᤠᤛᤧᤴ 73 ᤂᤧᤏᤧ᤹ᤃ ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤠᤱᤗᤥ. ᤂᤠᤛᤡᤱᤏᤡ᤺ᤵᤔᤠ ᤛᤡᤰᤁᤢᤶ ᤏᤡᤱᤘᤠ᤹ ᤐᤡᤖᤠᤱᤅᤧ᤹ᤀᤥ ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤁᤧᤛᤠᤶᤕᤥ ᤀᤡᤱᤈᤠᤱᤜᤠ᤹ ᤜᤢ᤹ᤛᤡᤱᤔᤠ ᤛᤢᤰᤁᤠᤖᤖᤥ॥ 74 ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤡᤀᤠᤀᤠᤱ ᤔᤧᤛ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤁᤧᤔᤠᤱᤜᤢᤵᤐᤥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ 75 ᤕᤜᤘᤣ ᤍᤠᤱᤒᤠᤀᤣ. ᤁᤧᤄᤠᤛᤧᤴᤜᤠ᤹ ᤛᤠᤶᤕᤥᤒᤠ ᤆᤥᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱᤗᤥ. ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧᤀᤣ ᤁᤧᤄᤢᤶᤛᤠᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ 76 ᤆᤰᤔᤧᤸᤗ᤹ᤀᤣ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤴ ᤀᤠᤗᤠᤃᤡ ᤀᤠᤀᤠ᤺ᤴᤇᤡᤱᤔᤠ ᤐᤥᤱᤗᤖᤥ. ᤁᤧᤛᤧᤘᤠᤖᤥᤒᤠᤴ ᤁᤧᤒᤡᤖᤢᤒᤠ ᤔᤠᤱᤜᤢᤵ ᤁᤢᤀᤡᤛᤡᤰ ᤁᤴ ᤁᤧᤳᤗᤖᤥ॥ 77 ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤜᤡᤱᤅᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤅᤥ ᤛ᤺ᤳᤋᤠᤖᤥ॥ 78 ᤀᤠᤱᤃᤠ᤹ ᤀᤡᤱᤗᤧᤰᤁᤣ ᤑᤥᤋᤩᤠ ᤁᤧᤃᤢ᤺ᤵᤐᤠ ᤁᤧᤜᤧᤴᤇᤡᤱᤒᤠᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤖᤥ. ᤁᤖ ᤀᤠᤱᤃᤠ᤹ᤃ ᤁᤧᤀᤡᤱᤈᤠᤱᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤢᤱᤗᤥ॥ 79 ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ ᤀᤠᤱᤃᤠ᤹ᤀᤥ ᤔᤧᤍᤠᤖᤖᤥ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤐᤠ ᤔᤧᤜᤢ᤹ᤛᤡᤱᤗᤖᤥ॥ 80 ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤏᤡᤖᤡᤰᤁᤠᤱ ᤀᤠᤱᤃᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤢᤰᤋᤢᤱᤗᤖᤥ. ᤜᤧᤰᤁᤣᤗ᤹ᤖᤡᤰ ᤜᤠᤖᤡ ᤋᤠᤔᤠᤗᤠᤶ ᤀᤠᤱᤃᤠ᤹ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤸᤗᤖᤥ॥ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ 81 ᤕᤜᤘᤣ ᤍᤠᤱᤒᤠᤀᤣ. ᤀᤠᤵᤑᤠᤸᤗᤧ ᤋᤠᤱᤃᤧᤛᤧ᤺ᤵᤐᤠᤒᤣ ᤑᤠ᤹ᤀᤠᤱ ᤁᤧᤗᤠᤶ ᤀᤥᤔᤧᤵᤔᤠᤖᤧ ᤏᤠᤛᤠᤱᤗᤥ. ᤁᤧᤒᤠ᤺ᤴᤈᤠ᤺ᤰᤁᤥ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ 82 ᤂᤧᤏᤧ᤹ ᤁᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤳ ᤑᤠ᤹ᤀᤠᤱ ᤁᤧᤗᤠᤶ ᤀᤥᤔᤧᤵᤔᤠᤖᤧ ᤀᤠᤱᤃᤠ᤹ ᤀᤠᤔᤡᤰᤜᤠ᤹ ᤂᤠᤔᤧᤴᤏᤡᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ. “ᤂᤧᤏᤧ᤹ ᤀᤠᤓᤧᤸᤗᤧ ᤁᤧᤓᤠ᤹ᤀᤠᤒᤠᤒᤣ॥” 83 ᤆᤧᤸᤗᤧᤰᤛᤣᤸᤗᤧ ᤁᤢᤘᤠ ᤕᤠᤱᤔᤠ ᤗᤠᤵᤑᤢᤔᤏᤠᤒᤠ ᤛᤡᤜᤥᤒ᤻ ᤛᤢᤰᤘᤠ ᤁᤢᤀᤡᤛᤡᤰ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤏᤡᤱᤘᤠ᤹ ᤔᤧᤴᤓᤣ᤺ᤴᤏᤣ ᤘᤠ᤹ᤀᤠᤖᤥ॥ 84 ᤀᤠᤸᤗᤛᤠᤱ ᤀᤠᤵᤑᤠᤸᤗᤧ ᤌᤠᤖᤡᤰ ᤜᤠᤱᤄᤢᤱᤒᤠᤒᤣ᥅ ᤀᤠᤱᤃᤠ᤹ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤀᤠᤵᤑᤠᤸᤗᤧ ᤂᤢᤶᤍᤡᤱ ᤁᤧᤒᤡᤖᤢᤛᤡᤒᤠᤒᤣ᥅ 85 ᤁᤧᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ ᤔᤧᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤌᤠᤀᤠᤖ ᤑᤠ᤹ᤀᤠᤱ ᤗᤢᤶᤒᤠᤳ ᤔᤧᤍᤕᤢᤀᤠᤱ ᤏᤧᤖᤥ॥ 86 ᤁᤧᤀᤡᤱᤈᤠᤱᤜᤠ᤹ ᤁᤧᤖᤧᤰ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤆᤥᤰᤗᤥ. ᤔᤏᤠᤜᤠ᤹ᤖᤧ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤔᤧᤒᤠ᤺ᤳᤋᤢᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤠᤖᤥ. ᤂᤧᤏᤧ᤹ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ᤀᤥ॥ 87 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤂᤵᤔᤧᤴ ᤔᤧᤛᤧᤖᤠᤱᤗᤥ. ᤁᤖ ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤏᤡᤱᤘᤠ᤹ ᤔᤧᤴᤓᤣ᤺ᤴᤏᤣ ᤁᤳᤋᤢᤱᤗᤥ॥ 88 ᤂᤧᤏᤧ᤹ ᤛᤍᤠᤍᤡᤱ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤜᤡᤱᤅᤠᤖᤖᤥ. ᤜᤧᤰᤁᤣ᤺ᤸᤗᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤏᤡᤱᤘᤠ᤹ ᤕᤢᤱᤔᤠ 89 ᤕᤜᤘᤣ ᤍᤠᤱᤒᤠᤀᤣ. ᤁᤧᤒᤠ᤺ᤴᤈᤠ᤺ᤰᤁᤡᤴ ᤛᤍᤠᤍᤡᤱ ᤘᤠ᤹ᤖᤥ. ᤁᤱᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ॥ 90 ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤁᤧᤈᤥᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤘᤠ᤹ᤖᤥ. ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤕᤢᤰᤂᤢᤀᤠᤱ ᤂᤧᤴ ᤔᤧᤶᤔᤢᤴᤏᤣ ᤕᤢᤱᤗᤥ॥ 91 ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤀᤡᤴ ᤌᤠᤖᤡᤰ ᤔᤧᤶᤔᤢᤴᤏᤣ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤁᤧᤛᤧᤘᤠ ᤔᤧᤈᤥᤃᤢᤖᤥ॥ 92 ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤛ᤺ᤵᤔᤠᤸᤗᤧ ᤁᤢᤒᤢᤴᤗᤥ. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ᤃ ᤋᤢᤰᤂᤣ ᤆᤩᤠᤱᤅᤠᤱ ᤛᤩᤠᤱᤒᤠ ᤔᤧᤴᤗᤥ॥ 93 ᤀᤠᤱᤃᤠ᤹ᤃ ᤁᤧᤄᤠᤜᤢᤴᤜᤠ᤹ ᤀᤠᤓᤧᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤴᤏᤠᤸᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴᤗᤠᤶᤒᤠ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤁᤧᤃᤳᤋᤠᤖᤥ॥ 94 ᤀᤠᤱᤃᤠ᤹ᤃ ᤂᤧᤏᤧ᤹ ᤁᤧᤔᤏᤠᤀᤠ. ᤛᤧ᤺ᤵᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 95 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤛᤧᤵᤔᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤛᤢᤰᤁᤠᤀᤠᤱ ᤔᤧᤕᤢᤱᤗᤥ. ᤁᤖ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤀᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ 96 ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤗᤡᤱᤍᤥ ᤔᤧᤃᤧᤳᤏᤧᤴ ᤑᤠ᤹ᤀᤠᤱ ᤏᤡᤛᤢᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤛᤡᤖᤠ᤹ᤌᤠᤱᤔᤠ 97 ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤌᤠᤱᤗᤥ. ᤗᤧᤴᤍᤡᤰ ᤏᤠᤶᤎᤠᤎᤠ ᤂᤧ᤹ᤕᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ 98 ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤀᤠᤓᤧᤸᤗᤧᤛᤠᤱ ᤁᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤏᤡᤱᤔᤡᤜᤠ᤹ᤏᤢ᤺ᤸᤗᤧᤀᤠᤱ ᤀᤠᤱᤃᤠ᤹ ᤆᤠ᤺ᤵᤐᤠ ᤆᤥ᤺ᤰᤁᤠᤖᤥ॥ 99 ᤀᤠᤛᤡᤰᤛᤠᤶᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤱᤃᤠ᤹ ᤐᤠᤴ ᤁᤢᤛᤡᤱᤏᤡ᤺ᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤜᤠ᤹ᤀᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤖᤢᤱᤗᤥ॥ 100 ᤂᤍᤠᤰᤔᤡᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤱᤃᤠ᤹ ᤛᤡᤰᤁᤢᤶᤛᤠᤒᤠ ᤆᤥ᤺ᤰᤁᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 101 ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤗᤠᤱᤔᤧᤄᤣ᤺ᤰᤁᤠᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤒᤠ᤺ᤴᤈᤠ᤺ᤰᤁᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ 102 ᤂᤧᤏᤧ᤹ ᤁᤧᤄᤠᤜᤢᤴᤜᤠ᤹ᤗᤠᤶ ᤀᤠᤱᤃᤠ᤹ ᤔᤠ᤺ᤱᤄᤠ ᤔᤧᤶᤒᤥᤱᤅᤣ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤣ ᤁᤧᤜᤢ᤹ᤖᤠᤱᤅᤠᤱ ᤘᤠ᤹ᤖᤥ॥ 103 ᤂᤧᤏᤧ᤹ ᤁᤧᤄᤠᤜᤢᤴ ᤐᤠ᤺ᤴᤜᤠ᤹ ᤛᤠ᤹ᤖᤡᤰ ᤁᤢᤈᤠ ᤁᤧᤏᤢ᤹ᤒᤠ ᤆᤥᤰᤗᤥ. ᤂᤧᤱᤜᤠ᤹ᤃ ᤛᤰᤘᤠᤄᤢᤏᤢ᤺ᤸᤗᤧ ᤗᤡᤶᤗᤥ॥ 104 ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤀᤥᤗᤠᤶ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤛᤢᤱᤗᤥ. ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤆᤡ᤺ᤳᤋᤢᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤀᤥ᤺ᤳᤋᤡ 105 ᤂᤧᤏᤧ᤹ ᤁᤧᤒᤠ᤺ᤴᤈᤠ᤺ᤰᤁᤡᤱᤃ ᤀᤠᤱᤃᤠ᤹ ᤕᤠᤵᤔᤡ ᤗᤠᤶᤃᤧᤗᤥᤒᤠ ᤛᤣᤔᤡᤖᤥ. ᤜᤧᤰᤁᤩᤠᤱ ᤀᤠᤗᤠᤃᤡ ᤗᤠᤶ ᤁᤧᤎᤥ᤹ᤒᤠ ᤀᤥ᤺ᤳᤋᤡᤖᤥ॥ 106 ᤀᤠᤱᤃᤠ᤹ ᤔᤠᤱᤜᤧᤰᤛᤡᤅᤠᤀᤠᤱ ᤛᤠᤶᤕᤥᤒᤠ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 107 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣᤜᤠ᤹ ᤋᤢᤔᤢᤱᤅᤠᤱ ᤘᤠ᤹ᤀᤠᤖᤥ. ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤁᤳᤋᤠᤱᤅᤧ᤹ᤀᤥ॥ 108 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤏᤢᤃᤧᤴ ᤐᤡᤏᤧᤒᤠ ᤐᤣᤗᤡᤃᤧᤴ ᤋᤢᤘᤠᤴ ᤋᤠ᤺ᤰᤋᤧ᤹ᤀᤥ. ᤜᤧᤰᤁᤩᤠᤱ ᤁᤧᤀᤡᤱᤈᤠᤱᤜᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ 109 ᤀᤠᤓᤧᤸᤗᤧᤛᤠᤱ ᤛᤡᤔᤠᤗᤡᤱᤎᤥᤀᤥ ᤀᤠᤱᤃᤠ᤹ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤣ ᤁᤳᤋᤢᤱᤗᤥ 110 ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤀᤡᤕᤢᤰᤔᤠ ᤔᤧᤃᤥ᤺ᤳᤋᤠᤖᤥ. ᤁᤖ ᤀᤠᤱᤃᤠ᤹ᤃ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤣ ᤘᤠ᤹ᤀᤠᤖᤥ॥ 111 ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤛᤍᤠᤍᤡᤱᤒᤠ ᤀᤠᤕᤠᤱᤛᤠ ᤁᤢᤴᤎᤣ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤧᤴ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤀᤠᤱᤃᤠ᤹ ᤛ᤺ᤳᤋᤠᤖ ᤕᤠ᤺ᤴᤏᤠᤖᤥ॥ 112 ᤀᤠᤱᤃᤠ᤹ ᤔᤧᤴᤇᤡᤀᤣ ᤌᤠᤖᤡᤰ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤱᤀᤠᤱ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤧ᤺ᤵᤛᤡᤱᤔᤠ 113 ᤏᤡᤖᤡᤰᤁᤠᤱ ᤂᤧᤏᤧ᤹ᤀᤥ ᤏᤡᤱᤘᤠ᤹ ᤔᤧᤶᤒᤡᤔᤏᤠᤒᤠᤜᤠ᤹ ᤆᤡ᤺ᤳᤋᤢᤱᤛᤡᤱᤗᤥ. ᤁᤖ ᤀᤠᤱᤃᤠ᤹ᤃ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤠᤛᤡᤖᤠ᤹ ᤌᤠᤱᤗᤥ॥ 114 ᤂᤧᤏᤧ᤹ᤀᤣ ᤀᤠᤀᤡ᤺ᤶᤛᤡᤱᤔᤠᤍᤧᤴ ᤏᤢ ᤀᤠᤱᤃᤠ᤹ ᤕᤠᤵᤔᤡ ᤁᤧᤎᤣ᤺ᤰᤐᤠ ᤂᤥᤏᤧᤖᤥ. ᤁᤧᤔᤠᤱᤜᤢᤵᤐᤥ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ 115 ᤗᤠᤕᤥ ᤁᤧᤈᤥ᤺ᤰᤐᤠᤛᤣ. ᤀᤠᤱᤃᤠ᤹ᤗᤠᤶ ᤂᤡᤏᤡ᤹ ᤔᤠ᤺ᤱᤄᤠ ᤐᤣᤃᤡᤴᤏᤧ᤹ᤀᤥ. ᤀᤠᤱᤃᤠ᤹ᤃ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 116 ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤧᤎᤢᤶᤒᤠ ᤆᤥᤃᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤜᤡᤱᤅᤠᤖᤥ. ᤀᤠᤏᤡᤱᤛᤠᤱ ᤐᤢᤰᤗ ᤔᤧᤕᤠ᤺ᤴᤍᤠᤱᤅᤡᤴᤏᤧ᤹ᤀᤥ॥ 117 ᤀᤠᤜᤢᤰᤁᤥ ᤋᤧᤶᤛᤠᤱᤅᤧ᤹ᤀᤠᤱ ᤀᤠᤱᤃᤠ᤹ ᤔᤧᤴᤈᤥ᤺ᤴᤏᤣ ᤋᤰᤋᤠᤱᤅᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤛᤍᤠᤍᤡᤱ ᤁᤧᤀᤡᤱᤈᤠᤱᤜᤠ᤹ᤀᤥ ᤀᤠᤱᤃᤠ᤹ ᤏᤡᤱᤘᤠ᤹ ᤐᤡᤔᤠ ᤛᤢᤰᤋᤢᤱᤗᤥ॥ 118 ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤒᤠᤜᤠ᤹ ᤁᤧᤖᤧᤰ ᤁᤧᤏᤠ᤹ᤖᤢᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡᤱᤗᤧᤰᤜᤠ᤹ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤰᤗᤥ॥ 119 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤁᤢᤀᤡᤃᤧᤓᤧᤶᤒᤠᤜᤠ᤹ ᤋᤠᤶᤈᤡ᤹ ᤜᤧᤰᤁᤣ ᤁᤧᤍᤢᤃᤢ ᤁᤧᤍᤣᤛᤢᤛᤡᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤏᤡᤛᤠᤶᤜᤠ᤹ ᤀᤠᤱᤃᤠ᤹ ᤀᤠᤛᤡᤖᤠ᤹ ᤌᤠᤱᤗᤥ॥ 120 ᤂᤧᤏᤧ᤹ ᤁᤧᤈᤥᤃᤢᤸᤗᤧ ᤐᤃᤡ ᤁᤡᤀᤠᤖᤥ. ᤂᤧᤏᤧ᤹ ᤁᤧᤄᤠᤛᤧᤴᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤌᤧᤃᤰᤁᤰᤏᤠ ᤕᤱᤅᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ 121 ᤀᤠᤱᤃᤠ᤹ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤀᤠᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤀᤠᤱᤃᤠ᤹ ᤔᤧᤎᤠᤛᤠᤱᤅᤡᤴᤏᤧ᤹ᤀᤥ॥ 122 ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ “ᤑᤠ᤹ᤏᤧ” ᤑᤠ᤹ᤀᤠᤱ ᤔᤠᤱᤜᤢᤵ ᤆᤥᤃᤧ᤹ᤀᤥ. ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ᤖᤧ ᤀᤠᤱᤃᤠ᤹ ᤋᤢᤰᤂᤣ ᤆᤠ᤺ᤵᤔᤠ ᤔᤧᤱᤄᤥᤀᤠᤴᤗᤖᤥ॥ 123 ᤂᤧᤏᤧ᤹ ᤀᤠᤱᤃᤠ᤹ ᤕᤠᤵᤔᤡ ᤋᤠᤱᤛᤧ᤺ᤵᤔᤠ ᤏᤢ ᤑᤠ᤹ᤔᤠ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤁᤧᤛᤧᤴᤗᤵᤐᤡᤴ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 124 ᤗᤢᤱᤔᤠ᤹ ᤁᤧᤍᤢᤰᤁᤠᤒᤠ ᤜᤧᤰᤁᤣ ᤀᤠᤱᤃᤠ᤹ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ 125 ᤀᤠᤱᤃᤠ᤹ᤃ ᤁᤧᤛᤧᤘᤠᤖᤥᤒᤠᤀᤠᤖᤥ. ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤁᤧᤏᤡᤛᤠᤶᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤏᤧᤜᤡᤏᤡᤱᤘᤠ᤹ ᤂᤥᤛᤢᤱᤗᤥ॥ 126 ᤕᤜᤘᤣ ᤍᤠᤱᤒᤠᤀᤣ. ᤀᤠᤸᤗ ᤂᤧᤏᤧ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ. ᤔᤏᤠᤜᤠ᤹ᤖᤧ ᤁᤧᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤗᤧᤖᤢᤀᤠᤱ ᤘᤠ᤹ᤖᤥ॥ 127 ᤀᤠᤱᤃᤠ᤹ᤃ ᤁᤧᤀᤡᤱᤈᤠᤱᤜᤠ᤹ ᤛᤠᤶᤔᤩᤠᤱᤏᤢ᤺ᤸᤗᤧᤀᤠᤱ ᤀᤠᤛᤡᤖᤠ᤹ ᤌᤠᤱᤗᤥ. ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤕᤥ᤺ᤶᤔᤏᤠᤒᤠ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤱᤗᤥ॥ 128 ᤂᤧᤸᤗᤧᤆᤥᤃᤢᤸᤗᤧ ᤁᤧᤄᤠᤜᤢᤴᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤛᤧᤰᤂᤠ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤠᤰ ᤑᤧᤴᤕᤠ᤺ᤶᤒᤰᤜᤠ᤹ ᤆᤡ᤺ᤳᤋᤢᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ 129 ᤂᤧᤏᤧ᤹ ᤁᤧᤏᤡᤛᤠᤶᤜᤠ᤹ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ. ᤂᤧᤱᤜᤠ᤹ ᤁᤧᤖᤧᤰ ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 130 ᤂᤧᤏᤧ᤹ ᤁᤧᤏᤡᤛᤠᤶᤜᤠ᤹ᤖᤧ ᤁᤢᤒᤣ ᤜᤴᤏᤡᤸᤗᤧ ᤀᤠᤏᤡᤃᤣ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤂᤥᤛᤢᤶᤒᤧᤖᤥ. ᤁᤢᤏᤡᤱᤘᤠ᤹ ᤁᤧᤎᤢᤱᤒᤠᤜᤠ᤹ᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ 131 ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤌᤠᤱᤗᤥ. ᤂᤧᤸᤗᤧ ᤁᤢᤔᤡ᤺ᤵᤔᤠᤸᤗᤧ ᤀᤠᤱᤃᤠ᤹ ᤀᤠᤶᤒᤪᤠ ᤜᤠ ᤔᤧᤳᤋᤢᤱ. ᤜᤧᤰᤁᤩᤠᤱ ᤜᤧᤱᤃᤧ᤺ᤰ ᤜᤧᤱᤃᤧ᤺ᤰ ᤗ᤹ᤀᤠᤖᤥ॥ 132 ᤂᤧᤏᤧ᤹ ᤁᤧᤔᤡᤱᤅᤡᤴ ᤔᤡ᤺ᤶ ᤁᤧᤔᤧᤵᤐᤠᤜᤠ᤹ ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤖᤥ ᤜᤧᤰᤁᤩᤠᤱ ᤀᤥᤃᤧᤔᤧᤳᤋᤢᤛᤡᤖᤥ. ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ᤀᤠᤱ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤥ॥ 133 ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤆᤥ᤺ᤶᤔᤠᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ. ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤖᤧ ᤔᤧᤏᤠ᤺ᤴᤏᤠᤸᤗᤖᤥ॥ 134 ᤀᤠᤱᤃᤠ᤹ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ᤗᤠᤶ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤐᤠ ᤛᤢᤰᤋᤢᤱᤗᤖᤥ॥ 135 ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤖ ᤀᤥᤔᤧᤳᤋᤠᤱᤅᤧ᤹ᤀᤠᤱ ᤜᤠᤱᤘᤠ ᤔᤠᤱᤘᤠ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥ ᤌᤡᤶᤜᤠ᤹ ᤜᤢ᤹ᤖᤠᤱᤅᤧ᤹ᤀᤥ॥ 136 ᤀᤠᤔᤡᤰᤁᤥᤗᤠᤶ ᤀᤠᤔᤡᤰᤘᤠ ᤋᤧᤖᤧᤖᤧ ᤌᤠᤵᤗᤥ. ᤌᤣᤀᤠᤱᤓᤧᤸᤗᤧ ᤕᤠᤵᤔᤡᤜᤠ᤹ᤖᤧ ᤁᤧᤛᤠᤶᤕᤥ ᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤁᤢᤍᤥ᤺ᤵᤔᤠ ᤂᤠᤛᤧᤴ 137 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤛᤠᤶᤕᤥᤒᤠ ᤁᤧᤈᤥ᤺ᤰᤗᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤗᤠ᤹ᤒᤠ ᤆᤥᤰᤗᤥ॥ 138 ᤕᤠᤵᤔᤡ ᤁᤧᤒᤡᤖᤧᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤛᤠᤶᤕᤥᤒᤠ ᤆᤥᤰᤗᤥ. ᤂᤧᤱᤜᤠ᤹ ᤁᤧᤖᤧᤰ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤆᤥᤰᤗᤥ॥ 139 ᤀᤠᤱᤃᤠ᤹ ᤀᤠᤛᤡᤰᤁᤡᤸᤗᤧ ᤔᤡ ᤁᤢᤀᤡᤛᤡᤰ ᤐᤥᤱᤅᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤱᤔᤡᤜᤠ᤹ᤖᤧ ᤁᤧᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ॥ 140 ᤂᤧᤏᤧ᤹ ᤁᤧᤔᤠᤱᤜᤢᤵᤜᤠ᤹ ᤛᤠ᤹ᤔᤠᤸᤗᤧ ᤛᤧᤰᤂᤠᤒᤠ ᤆᤥᤰᤗᤥ. ᤂᤧᤴ ᤁᤧᤔᤠᤱᤜᤢᤵᤜᤠ᤹ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤌᤠᤱᤗᤥ॥ 141 ᤀᤠᤱᤃᤠ᤹ ᤔᤧᤴᤈᤥᤒᤠ ᤆᤥ᤺ᤰᤁᤠ ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖᤥ. ᤁᤖ ᤂᤧᤏᤧ᤹ ᤁᤧᤏᤡᤛᤠᤶᤜᤠ᤹ ᤏᤡᤱᤘᤠ᤹ ᤔᤧᤓᤣ᤺ᤴᤏᤠᤸᤗᤥ॥ 142 ᤂᤧᤏᤧ᤹ᤃ ᤛᤍᤠᤍᤡᤱ ᤛᤠᤶᤕᤥᤒᤠ ᤁᤧᤈᤥ᤺ᤰᤗᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤓᤧᤸᤗᤧᤛᤠᤱ ᤛᤧᤰᤂᤠᤒᤠ ᤆᤥᤰᤗᤥ॥ 143 ᤋᤢᤰᤂᤣ ᤏᤢ ᤗᤠᤰᤂᤣᤜᤠ᤹ ᤀᤠᤱᤃᤠ᤹ ᤀᤠᤛᤶᤍᤠᤱ ᤆᤢᤰᤋᤧᤀᤠᤱ ᤘᤠ᤹ᤖᤥ. ᤁᤖ ᤁᤧᤀᤡᤱᤈᤠᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰᤛᤶᤗ ᤕᤠ᤺ᤴᤏᤠᤖᤥ॥ 144 ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤛᤍᤠᤍᤡᤱ ᤛᤠᤶᤕᤥᤒᤠ ᤆᤥᤰᤗᤥ. ᤂᤧᤱᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤐᤡᤖᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤖᤥ॥ ᤆᤥ᤺ᤰᤕᤢᤶᤓᤥᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ 145 ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤐᤣᤗᤡ ᤑᤠᤰᤏᤧᤖᤥ. ᤕᤜᤘᤣ ᤍᤠᤱᤒᤠᤀᤣ. ᤏᤢᤃᤵ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 146 ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤖᤥ. ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 147 ᤏᤠᤶ ᤁᤧᤵᤔᤠᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤖᤥ. ᤂᤧᤏᤧ᤹ ᤁᤧᤔᤠᤱᤜᤢᤵᤐᤥ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ 148 ᤂᤧᤏᤧ᤹ ᤁᤧᤔᤠᤱᤜᤢᤵᤜᤠ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤱᤗᤥ. ᤜᤧᤰᤁᤣᤗ᤹ᤖᤡᤰ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤀᤠᤱᤃᤠ᤹ ᤔᤧᤴᤀᤡᤶᤔᤣ ᤕᤢᤱᤅᤠᤖᤥ॥ 149 ᤕᤜᤘᤣ ᤍᤠᤱᤒᤠᤀᤣ. ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤠᤱ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 150 ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤏᤡ᤺ᤳᤋᤠᤱ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤀᤠᤓᤧᤸᤗᤧᤀᤠᤱ ᤁᤧᤛᤠᤶᤕᤥ ᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ॥ 151 ᤁᤖ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤒᤣᤛᤠᤱᤅᤣ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤀᤡᤱᤈᤠᤱᤜᤠ᤹ ᤛᤧᤰᤂᤠᤒᤠ ᤆᤥᤰᤗᤥ॥ 152 ᤀᤢᤴᤇᤣ᤺ᤴᤇᤠ ᤀᤠᤱᤃᤠ᤹ ᤁᤧᤏᤡᤛᤠᤶᤜᤠ᤹ ᤏᤡᤛᤢᤱ ᤗᤧᤛᤢᤱᤅᤠᤱ ᤘᤠ᤹ᤀᤠᤖᤥ. ᤂᤧᤱᤜᤠ᤹ᤃ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤈᤥᤃᤢᤀᤠᤱ ᤘᤠ᤹ᤖᤥ॥ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ 153 ᤀᤠᤱᤃᤠ᤹ ᤀᤠᤍᤢᤰᤂᤣ ᤀᤠᤗᤠᤰᤂᤣᤜᤠ᤹ ᤀᤥᤔᤧᤳᤋᤧ᤹ᤀᤠᤱ ᤛᤧ᤺ᤵᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤡᤱᤘᤠ᤹ᤔᤧᤶᤔᤢ᤺ᤴᤏᤣ ᤘᤠ᤹ᤀᤠᤖᤥ॥ 154 ᤀᤠᤱᤃᤠ᤹ ᤗᤧᤵᤛᤠᤱ ᤐᤳᤇᤧ᤹ᤀᤠᤱ ᤐᤠᤖᤧ᤹ᤀᤥ. ᤜᤧᤰᤁᤩᤠᤱ ᤏᤠᤅᤠᤱᤅᤧ᤹ᤀᤥ॥ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 155 ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤛᤧᤴᤗᤵ ᤔᤧᤱᤄᤥᤛᤢᤸᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤧᤛᤠᤶᤕᤥ ᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ॥ 156 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤱᤃᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤁᤠᤖᤥ. ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤠᤱ ᤛᤧ᤺ᤵᤋᤠᤱᤅᤧ᤹ᤀᤥ॥ 157 ᤀᤠᤱᤃᤠ᤹ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠ ᤏᤢ ᤁᤧᤄᤢᤶᤒᤠ ᤏᤡᤱᤔᤡᤜᤠ᤹ ᤕᤖᤡᤰ ᤔᤧᤘᤠ᤹ᤖᤥ. ᤜᤧᤰᤁᤣᤛᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤗᤧᤳᤋᤣ ᤘᤠ᤹ᤀᤠᤖᤥ॥ 158 ᤀᤡᤱᤗᤧᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤱᤃᤠ᤹ ᤀᤥᤔᤧᤳᤋᤢᤱᤛᤡᤱᤅᤡᤸᤗᤧ ᤀᤠᤏᤡᤱᤘᤠ᤹ ᤐᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤧᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ॥ 159 ᤀᤥᤔᤧᤳᤋᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤁᤧᤏᤡᤛᤠᤶᤜᤠ᤹ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤌᤠᤱᤗᤥ. ᤂᤧᤏᤧ᤹ᤃ ᤗᤢᤱᤔᤠ᤹ ᤋᤢᤰᤔᤠ ᤀᤠᤓᤧᤸᤗᤧᤀᤠᤱ ᤕᤠᤵᤔᤡ ᤁᤧᤸᤗᤧᤳᤏᤧᤸᤗᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 160 ᤁᤧᤖᤧᤰ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤁᤢᤒᤣᤴ ᤛᤧᤰᤂᤠᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤁᤠᤰ ᤁᤧᤛᤠᤶᤕᤥ ᤂᤠᤛᤧᤴᤜᤠ᤹ ᤛᤍᤠᤍᤡᤱ ᤁᤧᤘᤠ᤹ᤒᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤋᤥ᤺ᤴᤇᤡᤱᤔᤠ 161 ᤔᤢᤰᤛᤠᤶᤛᤠᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤌᤣᤏᤠᤎᤣ ᤋᤢᤰᤂᤣ ᤔᤧᤈᤠ᤺ᤳᤋᤠᤖᤥ. ᤁᤖ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤀᤡᤱᤎᤠᤱ ᤐᤡᤖᤢᤱᤗᤥ॥ 162 ᤔᤠᤱᤜᤢᤵ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤠᤖᤥ. ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤧᤄᤥᤒᤠ ᤔᤏᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤖᤥ॥ 163 ᤁᤧᤖᤧᤰ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤀᤠᤛᤡᤖᤠ᤹ ᤔᤧᤎᤠᤱᤏᤧᤴ ᤜᤧᤰᤁᤩᤠᤱ ᤆᤡ᤺ᤳᤋᤢᤱᤗᤥ. ᤁᤖ ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤠᤛᤡᤖᤠ᤹ ᤌᤠᤱᤗᤥ॥ 164 ᤀᤠᤱᤃᤠ᤹ ᤌᤡᤰ ᤕᤧᤴᤏᤥ ᤏᤢᤛᤡᤗᤧᤱ ᤌᤠᤖᤡᤰ ᤏᤢᤃᤧᤴ ᤐᤡᤏᤧᤖᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤅᤡᤴ ᤛᤠᤶᤕᤥᤒᤠ ᤆᤥᤰᤗᤥ॥ 165 ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤢᤛᤡᤖᤠ᤹ ᤁᤧᤎᤠᤱᤒᤠᤜᤠ᤹ ᤜᤠᤱᤜᤠᤱ ᤔᤧᤗ᤹ᤖᤥ. ᤜᤧᤰᤁᤩᤠᤱ ᤌᤣ᤺ᤸᤗᤧᤀᤠᤱ ᤂᤧᤱᤜᤠ᤹ ᤁᤧᤱᤔᤠ ᤔᤧᤛᤢᤰᤋᤢᤴᤛᤡᤸᤗᤥ॥ 166 ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤧ᤺ᤵᤐᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤜᤠᤱᤏᤧᤖᤥ. ᤜᤧᤰᤁᤩᤠᤱ ᤁᤧᤀᤡᤱᤈᤠᤱᤜᤠ᤹ᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤆᤥᤃᤢᤱᤗᤥ॥ 167 ᤀᤠᤱᤃᤠ᤹ ᤁᤧᤏᤡᤛᤠᤶᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤛᤡᤰᤗᤢᤱᤔᤥ ᤗᤠᤶᤒᤠᤀᤣ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤌᤠᤱᤗᤥ॥ 168 ᤀᤠᤱᤃᤠ᤹ ᤁᤧᤀᤡᤱᤈᤠᤱᤜᤠ᤹ ᤏᤢ ᤁᤧᤄᤠᤜᤢᤴᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ. ᤆᤥᤃᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤛᤢᤖᤥ॥ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ 169 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤵᤛᤧ᤹ᤀᤥ. ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤐᤡᤖᤠᤱᤅᤧ᤹ᤀᤥ॥ 170 ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 171 ᤀᤠᤱᤃᤠ᤹ ᤀᤠᤓᤧᤸᤗᤧᤛᤠᤱ ᤁᤧᤏᤠᤖᤠ ᤑᤥᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤁᤧᤜᤢ᤹ᤀᤠᤖᤥ॥ 172 ᤀᤠᤱᤃᤠ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤠᤶᤗᤥᤀᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤜᤠ᤹ ᤛᤠᤶᤕᤥᤒᤠ ᤆᤥᤰᤗᤥ॥ 173 ᤀᤠᤱᤃᤠ᤹ ᤑᤠ᤹ᤔᤠᤖᤧ ᤗᤠᤃᤡ ᤛᤍᤠᤍᤡᤱ ᤕᤠᤖᤡᤵ ᤘᤕᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 174 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤋᤠᤱᤃᤧᤛᤧ᤺ᤵᤐᤠ ᤑᤠ᤹ᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤗᤥ. ᤀᤠᤱᤃᤠ᤹ᤃ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤀᤠᤛᤡᤰᤛᤶᤗᤥ॥ 175 ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤖᤖᤥ. ᤜᤧᤰᤁᤩᤠᤱ ᤁᤧᤏᤠᤖᤠ ᤑᤥᤔᤠ ᤛᤢᤰᤋᤢᤱᤗᤖᤥ. ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤗᤠᤶᤒᤠ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ᤀᤥ॥ 176 ᤁᤧᤔᤠᤒᤠ ᤔᤧᤸᤗᤢᤰ ᤁᤢᤀᤡᤛᤡᤰ ᤀᤠᤱᤃᤠ᤹ ᤋᤠᤵᤐᤧ᤹ᤖᤠᤱᤅᤠᤱ ᤘᤠ᤹ᤀᤠᤖᤥ. ᤕᤧ᤹ᤀᤠᤱ ᤁᤧᤛᤧᤘᤠᤖᤥᤒᤠᤴ ᤁᤥ᤺ᤳᤋᤠᤱ ᤗ᤺ᤳᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤣ ᤘᤠ᤹ᤀᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.