ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 118 - LIFOTNTᤌᤱ ᤏᤠ᤺ᤶᤔᤠᤸᤗᤧ ᤏᤢᤃᤧᤴ ᤋᤥ᤺ᤶᤔᤠ 1 ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤛᤍᤠᤍᤡᤱ ᤗᤢᤱᤔᤠ᤹ ᤀᤠᤍᤢᤰᤗᤥ॥ 2 ᤀᤡᤛᤪᤠᤀᤡᤗᤛᤔᤠ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤖᤥ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤀᤠᤍᤢᤰᤗᤥ॥” 3 ᤕᤜᤘᤣ ᤍᤠᤱᤒᤠᤀᤥ ᤛᤧᤘᤠ ᤁᤧᤈᤥ᤺ᤰᤐᤠ ᤜᤠᤖᤢᤏᤖᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤔᤧᤒᤠ᤺ᤳᤋᤢᤖᤖᤥ. “ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤛᤍᤠᤍᤡᤱ ᤗᤢᤱᤔᤠ᤹ ᤀᤠᤍᤢᤰᤗᤥ॥” 4 ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ ᤁᤧᤖᤧᤰᤗᤧ ᤔᤧᤒᤠ᤺ᤳᤋᤢᤖᤖᤥ. “ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤛᤍᤠᤍᤡᤱ ᤗᤢᤱᤔᤠ᤹ ᤀᤠᤍᤢᤰᤗᤥ॥” 5 ᤀᤠᤱᤃᤠ᤹ ᤋᤢᤰᤂᤣ ᤋᤢᤔᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤃᤵ ᤐᤡᤖᤠᤱᤅᤠᤱ ᤌᤧ᤹ᤖᤠᤱᤗᤥ॥ 6 ᤀᤠᤱᤃᤠ᤹ ᤁᤢᤓᤠ᤹ ᤁᤧᤒᤡᤒᤠᤱᤃ ᤕᤜᤘᤣ ᤍᤠᤱᤒᤠᤴᤗᤥ. ᤀᤠᤱᤃᤠ᤹ ᤔᤧᤃᤡᤀᤠᤴᤗᤥ. ᤀᤠᤱᤃᤠ᤹ ᤜᤠ᤺ᤳᤗᤧ ᤌᤣ ᤔᤧᤵᤔᤠ ᤛᤢᤰᤁᤠᤒᤣ᥅ 7 ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤏᤢ ᤘᤠ᤹. ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤓᤠ᤹ᤒᤠᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤁᤧᤖᤧᤰ ᤜᤠᤖᤡ ᤔᤧᤍᤠᤒᤠᤴ ᤏᤡᤛᤢᤱᤗᤥ॥ 8 ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤥ ᤂᤧ᤺ᤶᤛᤡᤱᤔᤠᤏᤢ᤺ᤸᤗᤧᤃ ᤕᤜᤘᤣ ᤍᤠᤱᤒᤠᤸᤗᤥ ᤀᤡ᤺ᤶᤛᤡᤱᤛᤧ ᤐᤣ᤺ᤰᤔᤠᤀᤣ ᤏᤢᤒᤠᤖᤥ॥ 9 ᤔᤧᤴᤇᤠᤶ ᤕᤠᤵᤔᤡ ᤗᤠᤶᤗᤥᤒᤠᤜᤠ᤹ ᤋᤠ᤺ᤰᤐᤥ ᤆᤥ᤺ᤰᤔᤠᤛᤡᤏᤢ᤺ᤸᤗᤧᤃ ᤕᤜᤘᤣ ᤍᤠᤱᤒᤠᤸᤗᤥ ᤀᤡ᤺ᤶᤛᤡᤱᤛᤧ ᤐᤣ᤺ᤰᤔᤠᤀᤣ ᤏᤢᤒᤠᤖᤥ॥ 10 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤠᤰ ᤐᤡᤛᤠᤱᤗᤠᤶᤒᤠ ᤀᤠᤱᤃᤠ᤹ ᤁᤡᤷᤃᤵ ᤔᤧᤃᤒᤠᤱᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤗᤠᤶᤒᤠ ᤂᤧᤱᤜᤠ᤹ ᤌᤩ᤺ᤱ ᤆᤥᤃᤢᤱᤛᤡᤱᤗᤥ॥ 11 ᤂᤧᤱᤜᤠ᤹ᤖᤧ ᤁᤠᤰ ᤐᤡᤛᤠᤱᤗᤠᤶᤒᤠ ᤀᤠᤱᤃᤠ᤹ ᤔᤧᤃᤒᤠᤱᤅᤠᤱ ᤘᤕᤠᤱᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤂᤧᤱᤜᤠ᤹ ᤌᤩ᤺ᤱ ᤆᤥᤃᤢᤱᤛᤡᤱᤗᤥ॥ 12 ᤂᤧᤱᤜᤠ᤹ᤖᤧ ᤛᤰᤘᤠᤜᤠ᤹ᤖᤧ ᤁᤢᤀᤡᤛᤡᤰ ᤁᤠᤰ ᤐᤡᤛᤠᤱᤗᤠᤶᤒᤠ ᤆᤡᤒᤴ ᤔᤧᤒᤴᤇᤠᤱᤗᤥ. ᤁᤖ ᤋᤡᤱᤃᤪᤣᤰᤐᤠ ᤗᤠᤀᤥ ᤔᤡᤃᤧᤗᤠ᤺ᤵᤐᤠ ᤜᤧᤰᤁᤣ ᤂᤧᤱᤜᤠ᤹ ᤔᤧᤈᤣᤒᤧ ᤔᤧᤗᤠᤛᤧᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤂᤧᤱᤜᤠ᤹ ᤌᤩ᤺ᤱ ᤆᤥᤃᤢᤱᤛᤡᤱᤗᤥ॥ 13 ᤁᤡᤵᤔᤠ ᤐᤄᤢᤄᤢᤛᤧᤖ ᤔᤧᤓᤳᤋᤠᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤵᤔᤧᤴ ᤜᤠᤖᤡᤍᤠᤔᤠ ᤀᤡ᤺ᤳᤋᤠᤱᤅᤠᤱ ᤘᤕᤠᤱᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤑᤠ᤹ᤖᤠᤱᤗᤥ॥ 14 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤧᤎᤢᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤆᤥ᤺ᤰᤁᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤧ᤺ᤵᤋᤠᤱᤅᤠᤱ ᤘᤠ᤹ᤀᤠᤖᤥ॥ 15 ᤛᤠᤶᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤛ᤺ᤵᤔᤠ ᤏᤢ ᤋᤡᤕᤠᤜᤠ ᤗ᤹ᤔᤠ ᤀᤡᤰᤗᤠᤜᤠ᤹ ᤂᤧᤶᤍᤧᤳᤗᤥ. “ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥ 16 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤱ ᤁᤧᤏᤠ᤺ᤶᤒᤠ ᤀᤠᤈᤥᤃᤧᤀᤠᤱ ᤘᤠ᤹ᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ॥” 17 ᤀᤠᤱᤃᤠ᤹ ᤔᤧᤛᤡᤀᤠᤴ. ᤁᤖ ᤜᤡᤱᤅᤠᤀᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤀᤡᤱᤓᤴ ᤆᤥᤃᤢᤱᤗᤥ॥ 18 ᤂᤢᤏᤧ᤹ ᤛᤠ᤹ᤖᤡᤰ ᤂᤢᤶᤍᤡᤱ ᤐᤡᤖᤠᤱᤗᤥ. ᤁᤖ ᤀᤠᤱᤃᤠ᤹ ᤛᤡᤔᤠ ᤔᤧᤒᤠᤱᤄᤠᤱᤅᤡᤸᤗᤥ॥ 19 ᤀᤠᤱᤃᤠ᤹ ᤀᤠᤗᤠᤃᤡ ᤛᤠᤶᤕᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤜᤴᤍᤠᤱ ᤐᤡᤖᤠᤱᤅᤧ᤹ᤀᤥ. ᤂᤧᤵᤔᤥ ᤀᤠᤱᤃᤠ᤹ ᤗᤠ᤺ᤳᤋᤠᤀᤠᤱ ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤢᤱᤗᤥ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤎᤣ᤺ᤵᤐᤠᤱᤃ ᤀᤠᤶᤓᤠ ᤁᤴᤗᤥ. ᤛᤠᤶᤕᤥᤒᤠᤜᤠ᤹ᤖᤰ ᤁᤵᤔᤥᤗᤠᤶ ᤗᤠ᤺ᤵᤔᤠ ᤔᤧᤄᤥᤖᤥ॥ 21 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ᤃ ᤁᤧᤏᤠᤖᤠ ᤑᤥᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤧᤏᤧ᤹ ᤁᤧᤄᤧᤵᤛᤢ ᤁᤧᤒᤡᤖᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤌᤱ ᤁᤧᤏᤠ᤺ᤶᤒᤠ ᤁᤧᤈᤥᤃᤠᤱᤅᤠᤱ ᤘᤠ᤹ᤖᤥ॥ 22 ᤗᤢᤱᤃᤧᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤁᤢᤶᤔᤠᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 23 ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤆᤥᤃᤢᤒᤠᤖᤥ. ᤜᤧᤰᤁᤩᤠᤱ ᤁᤴ ᤀᤠᤏᤡ᤹ ᤏᤡᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ॥ 24 ᤀᤠᤀᤡᤴᤒᤠ ᤕᤧᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠᤖᤥ. ᤀᤠᤏᤡ᤹ ᤛ᤺ᤳᤋᤡᤖ ᤗᤠ᤺ᤰᤂᤡᤖ ᤕᤠᤶᤏᤠ᤺ᤶ ᤆᤥᤃᤢᤶᤗᤥ॥ 25 ᤕᤜᤘᤣ ᤍᤠᤱᤒᤠᤀᤣ. ᤕᤠᤵᤔᤡ ᤀᤠᤛᤧ᤺ᤵᤋᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤕᤠᤵᤔᤡ ᤁᤢᤗᤡᤱᤍᤥ ᤁᤧᤖᤡᤃᤧᤖ ᤀᤠᤕᤠ᤺ᤴᤍᤧ᤹ᤀᤥ॥ 26 ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤁᤧᤍᤠᤒᤠᤴ ᤔᤢ᤹ᤀᤡᤛᤠᤒᤠᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤀᤠᤛᤡᤃᤧᤖᤥ॥ 27 ᤕᤜᤘᤣ ᤍᤠᤱᤒᤠᤴᤏᤣ ᤏᤡᤱᤘᤠ᤹ᤑᤢᤔᤠᤱᤗᤥ. ᤀᤠᤏᤡ᤹ ᤗᤢᤶᤔᤥ ᤂᤢᤏᤧ᤹ ᤏᤢ᤹ᤔᤠᤍᤠᤔᤠ ᤀᤠᤈᤥᤃᤧ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤛᤡᤱᤒᤥᤖᤠ᤺ᤰᤜᤠ᤹ ᤕᤠᤱᤅᤠᤛᤡᤶᤔᤧ᤹ᤀᤥ. ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴ ᤂᤡᤖᤡ ᤀᤡᤖᤧᤶᤔᤧ᤹ᤖ ᤋᤱᤏᤠᤶ ᤋᤥᤛᤧᤶᤔᤧ᤹ᤀᤥ॥ 28 ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ᤀᤥ ᤏᤢᤃᤧᤴ ᤋᤥ᤺ᤴᤍᤢᤱᤗᤥ॥ ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤐᤕᤶ ᤕᤶᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤕᤶᤒᤠ ᤀᤡᤰᤗᤠ᤺ᤸᤗᤧ ᤐᤠ᤺ᤳᤋᤢᤱᤗᤥ॥ 29 ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤧᤏᤢ᤹ᤒᤠ ᤆᤥᤰᤗᤥ. ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤐᤠ ᤐᤠ᤺ᤴᤏᤡᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.