ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 115 - LIFOTNT

ᤕᤜᤘᤣ ᤍᤠᤱᤒᤠᤴ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱ

¹ ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤔᤣ᤺ᤴ. ᤀᤠᤏᤡᤃᤣ ᤔᤣ᤺ᤴᤗᤥ. ᤂᤧᤏᤧ᤹ᤖᤰ ᤁᤧᤔᤡᤔᤡᤍᤡᤱ ᤐᤥᤱᤗᤖᤥ. ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤏᤢ ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤁᤧᤏᤠᤖᤠ ᤐᤥᤖᤖᤥ॥

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤌᤣᤀᤠᤱ ᤀᤠᤏᤡᤃᤣ ᤛᤣ᤺ᤴᤔᤧᤗᤠᤵᤋᤡᤃᤧᤒᤣ᥅ “ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤳᤋᤥ ᤘᤠ᤹ᤒᤣ᥅”

³ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠ᤺ᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠᤴ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥᤃᤢᤖᤥ॥

⁴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤠᤱᤜᤠ᤹ᤃ ᤛᤠᤶᤔᤩᤠᤱ ᤕᤢᤵᤐᤠ ᤏᤠᤘᤠ ᤀᤡᤳᤗᤠᤛᤡᤖᤥ. ᤂᤧᤱᤜᤠ᤹ᤃ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠᤖᤥ॥

⁵ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠ ᤐᤳ ᤁᤖ ᤐᤠ᤺ᤵᤔᤠ ᤔᤧᤴᤇᤢᤰᤏᤧᤸᤗᤥ. ᤔᤡᤰ ᤐᤳ ᤁᤖ ᤏᤡᤔᤠ ᤔᤧᤴᤇᤢᤰᤋᤢᤸᤗᤥ॥

⁶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ ᤐᤳ ᤁᤖ ᤂᤧᤶᤔᤠ ᤔᤧᤴᤇᤢᤰᤋᤢᤸᤗᤥ. ᤏᤧᤒᤥ ᤐᤳ ᤁᤖ ᤁᤢᤏᤠᤶ ᤂᤧᤶᤔᤠ ᤔᤧᤴᤇᤢᤰᤋᤢᤸᤗᤥ॥

⁷ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤢᤰ ᤐᤳ ᤁᤖ ᤋᤧᤶᤔᤠ ᤔᤧᤴᤇᤢᤰᤋᤢᤸᤗᤥ. ᤗᤠᤱ ᤐᤳ ᤁᤖ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤏᤧᤸᤗᤥ॥ ᤂᤧᤱᤜᤠ᤹ ᤀᤡᤈᤧ᤺ᤳᤇᤡᤰᤁᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤏᤧᤸᤗᤥ॥

⁸ ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠᤜᤠ᤹ ᤏᤠᤘᤠᤀᤡᤳᤗᤠ ᤜᤧᤰᤋᤱᤒᤠ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤴ ᤏᤠᤘᤠᤀᤡᤳᤗᤠ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤏᤠᤘᤠᤀᤡᤳᤗᤠ ᤜᤧᤰᤋᤱᤒᤠᤀᤣ ᤔᤧᤒᤥᤱᤗᤥ॥

⁹ ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤏᤡᤱᤘᤠᤴ ᤕᤜᤘᤣ ᤍᤠᤱᤒᤠᤀᤥ ᤕᤢᤰᤂᤧᤶᤔᤧ᤹ᤀᤥ. ᤂᤢᤏᤧ᤹ᤀᤣ ᤂᤡᤏᤡ᤹ ᤁᤧᤓᤠ᤹ᤖᤡᤖᤥ ᤜᤧᤰᤁᤩᤠᤱ ᤁᤶᤒᤪᤠᤱ ᤁᤧᤔᤧᤳᤋᤡᤖᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤧᤘᤠ ᤁᤧᤈᤥ᤺ᤰᤐᤠ ᤜᤠᤖᤢᤏᤖᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤛᤣ. ᤂᤡᤏᤡ᤹ ᤏᤡᤱᤘᤠᤴ ᤕᤜᤘᤣ ᤍᤠᤱᤒᤠᤀᤥ ᤕᤢᤰᤂᤧᤶᤔᤧ᤹ᤀᤥ. ᤂᤢᤏᤧ᤹ᤀᤣ ᤂᤡᤏᤡ᤹ ᤁᤧᤓᤠ᤹ᤖᤡ ᤜᤧᤰᤁᤩᤠᤱ ᤁᤶᤒᤪᤠᤱ ᤁᤧᤔᤧᤳᤋᤡᤖᤥ॥

¹¹ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤛᤣ. ᤂᤡᤏᤡ᤹ ᤏᤡᤱᤘᤠᤴ ᤂᤢᤏᤧ᤹ᤀᤥ ᤕᤢᤰᤂᤧᤶᤔᤧ᤹ᤀᤥ. ᤂᤢᤏᤧ᤹ᤀᤣ ᤂᤡᤏᤡ᤹ ᤁᤧᤓᤠ᤹ᤖᤡ ᤜᤧᤰᤁᤩᤠᤱ ᤁᤶᤒᤪᤠᤱ ᤁᤧᤔᤧᤳᤋᤡᤖᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤏᤡᤱᤘᤠ᤹ ᤀᤠᤀᤡ᤺ᤳᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤀᤠᤒᤡᤖᤥ॥ ᤂᤢᤏᤧ᤹ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤛᤡ᤹ᤖᤥ. ᤂᤢᤏᤧ᤹ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹ᤖᤥ॥

¹³ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤆᤢᤰᤐᤠ ᤏᤢ ᤕᤶᤒᤠ ᤁᤧᤖᤧᤰ ᤂᤢᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢ ᤐᤡᤖᤢᤛᤡ᤹ᤖᤥ॥

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤓᤥᤛᤡᤖᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤠᤜᤠ᤹ᤀᤠᤱ ᤑᤥᤛᤢᤛᤡᤖᤖᤥ॥

¹⁵ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤜᤠᤱᤘᤠᤔᤢ᤹ᤀᤡ ᤁᤧᤒᤡᤖᤡᤖᤥ॥

¹⁶ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤌᤠ᤺ᤱᤒᤠ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧᤴᤏᤣᤖᤥ. ᤁᤖ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤡᤖᤢᤛᤡᤒᤠᤖᤥ॥

¹⁷ ᤁᤢᤛᤡᤘᤧᤳᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤶᤓᤥᤛᤢᤸᤗᤥ. ᤂᤧᤔᤠᤍᤡᤱ ᤕᤱᤛᤱᤅᤥ ᤁᤧᤒᤣ᤺ᤰᤐᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤢᤏᤠᤖᤠ ᤔᤧᤶᤓᤥᤛᤢᤸᤗᤥ॥

¹⁸ ᤁᤖ ᤀᤠᤏᤡᤃᤧᤃ ᤀᤠᤸᤗᤥ ᤏᤢ ᤛᤍᤠᤍᤡᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤶᤒᤧᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄