ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 112 - LIFOTNTᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤏᤢ᤹ᤔᤧᤍᤠᤖᤥ 1 ᤕᤜᤘᤣ ᤍᤠᤱᤒᤠᤴ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤏᤢ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤧᤰᤂᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠᤴ ᤔᤢ᤹ᤀᤡᤛᤠᤒᤠᤖᤥ॥ 2 ᤂᤧᤸᤗᤧ ᤁᤢᤛ᤻ᤛᤠ ᤁᤢᤶᤔᤧᤴᤇᤠ᤹ᤜᤠ᤹ ᤗᤠᤈᤣ᤹ᤀᤥ ᤔᤢᤰᤁᤧᤃᤢᤒᤠ ᤔᤧᤒᤥᤱᤗᤥ. ᤁᤢᤍᤥ᤺ᤵᤔᤠ ᤔᤏᤠ᤺ᤸᤗᤧ ᤁᤢᤛ᤻ᤛᤠ ᤁᤢᤀᤣᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥ 3 ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ᤏᤢ ᤕᤠᤱᤛᤠᤁᤢᤴᤎᤣ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤠᤶᤕᤥᤏᤡᤔᤠᤴ ᤛᤍᤠᤍᤡᤱ ᤘᤠ᤹ᤖᤥ॥ 4 ᤁᤢᤍᤥ᤺ᤵᤔᤠ ᤔᤏᤠᤜᤠ᤹ᤖᤧ ᤗᤠᤃᤡ. ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥᤀᤠᤱ ᤀᤥ᤺ᤳᤋᤡ ᤀᤥ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤏᤢ᤹ᤒᤠ. ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤔᤧᤈᤥᤰᤗᤥ॥ 5 ᤏᤡᤱᤘᤠ᤹ ᤁᤧᤜᤶᤒᤠᤀᤠᤱ ᤘᤣ᤹ᤜᤠ᤹ ᤛᤡᤱᤏᤠᤳ ᤁᤧᤒᤡᤒᤠ ᤏᤢ ᤀᤡᤱᤗᤧᤰ ᤔᤧᤴᤈᤥ᤺ᤰᤁᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤴ ᤛ᤺ᤳᤋᤠᤱ ᤘᤠ᤹ᤖᤥ॥ 6 ᤛᤠᤶᤕᤥᤒᤠ ᤔᤏᤠᤴ ᤀᤠᤓᤧᤸᤗᤧᤀᤠᤱ ᤁᤢᤗᤡᤱᤍᤥ ᤔᤧᤱᤃᤧᤵᤔᤏᤠᤒᤠ ᤔᤧᤒᤥᤱᤏᤧᤸᤗᤥ. ᤂᤢᤏᤧ᤹ᤃ ᤔᤏᤠᤜᤠ᤹ᤖᤧ ᤛᤍᤠᤍᤡᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥ 7 ᤑᤧᤴ ᤀᤡᤱᤄᤱ ᤂᤧᤵᤛᤢᤛᤠᤱ ᤂᤧᤴ ᤀᤠᤓᤧᤸᤗᤧᤀᤠᤱ ᤔᤧᤃᤡᤏᤧᤸᤗᤥ. ᤕᤜᤘᤣ ᤍᤠᤱᤒᤠᤴ ᤏᤛᤠᤴ ᤆᤥᤃᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠᤴ ᤕᤥᤎᤥ ᤔᤧᤗ᤹ᤏᤧᤸᤗᤥ॥ 8 ᤂᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤌᤣᤀᤠᤱ ᤔᤧᤗ᤹ᤏᤧᤴ. ᤜᤧᤰᤁᤩᤠᤱ ᤂᤧᤴ ᤔᤧᤃᤡᤏᤧᤴ ᤔᤧᤕᤱᤏᤧᤸᤗᤥ. ᤁᤢᤏᤢᤵᤔᤥ ᤂᤧᤸᤗᤧ ᤁᤢᤏᤡᤱᤔᤡᤜᤠ᤹ ᤜᤠᤖᤡ ᤔᤧᤍᤠᤒᤠ ᤏᤡᤛᤢᤛᤡᤖᤥ॥ 9 ᤏᤡᤱᤘᤠ᤹ ᤁᤧᤜᤶᤒᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤴ ᤛᤍᤠᤍᤡᤱ ᤛᤍᤠᤍᤡᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤔᤢᤰᤁᤧᤃᤢᤒᤠ ᤐᤥᤱᤅᤠᤱ ᤔᤡᤱᤛᤥᤎᤠ᤺ᤱᤛᤥ ᤂᤥᤛᤢᤖᤥ॥ 10 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤛᤡᤰᤐᤥ᤺ᤰᤗᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤠᤒᤥ᤹ᤒᤠᤴ ᤔᤧᤕᤧ᤺ᤰᤂᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤔᤧᤰᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤥᤛᤢᤶᤒᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤒᤠᤴᤏᤠᤱ ᤔᤠᤒᤣ᤺ᤰᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.