ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 10 - LIFOTNT

ᤂᤠᤛᤧᤴᤗᤧ ᤗᤠᤃᤡ ᤐᤣᤗᤡ

¹ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤌᤣᤀᤠᤱ ᤔᤠ᤺ᤱᤄᤠ ᤁᤧᤕᤧᤵᤐᤠᤒᤣ᥅ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤩᤧ᤹ᤀᤡᤃᤧᤸᤗᤧ ᤌᤣᤀᤠᤱ ᤁᤧᤈᤡᤱᤛᤡᤱᤒᤠᤒᤣ᥅

² ᤁᤢ᤹ᤀᤡᤃᤧᤓᤧ᤹ᤒᤠᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤥ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖᤥ॥ ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ ᤘᤣ᤹ᤜᤠ᤹ ᤌᤠᤔᤠᤛᤡ ᤑᤠ᤹ᤀᤠᤱ ᤔᤧᤈᤥᤃᤢᤒᤠ ᤆᤧᤶᤓᤴᤏᤥ ᤂᤢᤴᤇᤡ᤹ ᤀᤠᤒᤠᤅᤣ ᤔᤧᤎᤠᤖᤥ॥

³ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤒᤥ ᤔᤧᤀᤡ᤺ᤳᤋᤢᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤖᤥ. ᤜᤧᤰᤁᤩᤠᤱ ᤁᤧᤄᤡ᤺ᤶᤒᤠᤜᤠ᤹ ᤔᤧᤈᤔᤢᤛᤡᤖᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤀᤡᤱᤍᤥ ᤔᤧᤔᤧᤳᤋᤢᤖᤥ॥

⁴ ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤗ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤥ᤺ᤳᤋᤢᤴᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤥᤵ ᤗ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤢᤖᤥ॥

⁵ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤛᤍᤠᤍᤡᤱ ᤁᤢᤗᤡᤱᤍᤥ ᤔᤧᤃᤧᤳᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤎᤡᤶᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡᤖᤥ॥

⁶ ᤀᤠᤏᤡᤃᤣ ᤏᤡᤱᤘᤠ᤹ᤒᤥ ᤌᤣ᤺ᤸᤗᤧᤀᤠᤱ ᤔᤧᤔᤢᤴᤍᤡᤃᤧᤴᤗᤥ. ᤀᤠᤏᤡᤃᤣ ᤛᤍᤠᤍᤡᤱ ᤛ᤺ᤳᤋᤡᤃᤧᤖᤥ ᤜᤧᤰᤁᤩᤠᤱ ᤀᤠᤓᤧᤸᤗᤧᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤀᤠᤏᤡᤃᤣ ᤔᤧᤎᤩᤧ᤹ᤀᤡᤃᤧᤴ ᤗ᤹ᤖᤡᤰ ᤔᤧᤀᤡ᤺ᤳᤋᤢᤖᤥ॥

⁷ ᤜᤧᤰᤋᤱᤒᤠᤜᤠ᤹ᤖᤧ ᤘᤣ᤹ᤜᤠ᤹ ᤛᤠᤰᤔᤢᤖᤠ ᤔᤧᤔᤧᤳᤋᤢᤛᤡ᤹. ᤀᤡᤱᤔᤧᤗᤧᤰᤋᤢᤛᤡᤖᤥ. ᤜᤧᤰᤁᤩᤠᤱ ᤕᤱᤔᤠ ᤔᤧᤛᤧᤖᤢᤛᤡᤖᤥ. ᤂᤧᤒᤩᤠᤱ ᤀᤠᤰᤂᤣᤀᤠᤱ ᤁᤢᤀᤡᤃᤧᤓᤧᤶᤒᤠ ᤐᤥᤱᤔᤠ. ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤋᤠ᤹ᤔᤧᤈᤧᤱᤗᤥ॥

⁸ ᤐᤠᤱᤓᤣᤸᤗᤧ ᤁᤢᤕᤠᤀᤥ ᤂᤧᤱᤜᤠ᤹ ᤔᤧᤈᤡᤱᤛᤡᤱᤅᤠᤱ ᤔᤧᤕᤢᤱᤗᤥ. ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤔᤧᤛᤧᤖᤢᤛᤡᤖᤥ. ᤂᤧᤱᤜᤠ᤹ᤖᤧ ᤁᤢᤓᤠ᤹ ᤁᤧᤒᤡᤒᤠ ᤁᤧᤜᤥᤵᤐᤠ ᤔᤏᤠᤜᤠ᤹ ᤔᤧᤛᤢᤃᤢᤛᤡᤖᤥ॥

⁹ ᤋᤠᤶᤓᤢᤱ ᤐᤥ᤺ᤰᤗᤠ ᤜᤧᤱᤃᤠᤳᤋᤡ ᤂᤡᤖᤡᤱᤒᤠᤴ ᤁᤢᤀᤡᤛᤡᤰ ᤂᤧᤱᤜᤠ᤹ ᤔᤧᤈᤡᤱᤛᤡᤱᤅᤠᤱ ᤔᤧᤛᤢᤃᤢᤛᤡᤖᤥ॥ ᤁᤢᤓᤠ᤹ ᤁᤧᤒᤡᤒᤠ ᤁᤧᤜᤥᤵᤐᤠᤜᤠ᤹ ᤀᤡᤀᤥ ᤌᤠᤔᤠᤛᤡᤖᤧ ᤗᤠᤃᤡ ᤔᤧᤛᤢᤃᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤀᤥ ᤔᤧᤎᤠᤛᤢᤛᤡᤀᤠᤱ ᤔᤧᤀᤢ᤺ᤰᤂᤢ ᤔᤧᤍᤣ᤹ᤖᤢᤛᤡᤖᤥ॥

¹⁰ ᤂᤧᤴ ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤁᤢᤓᤠ᤹ ᤁᤧᤒᤡᤒᤠ ᤁᤧᤜᤥᤵᤐᤠ ᤔᤏᤠᤜᤠ᤹ ᤀᤡᤀᤥ ᤔᤧᤎᤠᤛᤢᤛᤡᤀᤠᤱ ᤔᤧᤒᤧ᤺ᤳᤋᤠᤱ ᤔᤧᤏᤧᤖᤥ॥

¹¹ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤵᤔᤡ ᤏᤡᤱᤘᤠ᤹ ᤑᤣ᤺ᤳᤇᤧᤖᤥ. ᤂᤢᤏᤧ᤹ ᤁᤢᤔᤡᤰᤁᤡᤴ ᤛᤢᤒᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤓᤧᤸᤗᤧᤀᤠᤱ ᤔᤧᤏᤡᤛᤢᤴ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥

¹² ᤕᤜᤘᤣ ᤍᤠᤱᤒᤠᤀᤣ. ᤐᤥᤃᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤜᤢᤰᤁᤡᤴ ᤑᤥ᤺ᤰᤂᤧ᤹ᤀᤥ. ᤕᤠᤱᤃᤧᤛᤠ᤹ᤒᤠᤜᤠ᤹ ᤑᤠ᤹ᤖᤧᤛᤧ᤹ᤀᤥ॥

¹³ ᤋᤠᤰᤁᤧᤓᤧ᤹ᤒᤠᤸᤗᤧ ᤌᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤍᤥ ᤔᤧᤳᤋᤢᤒᤠᤒᤣ᥅ ᤂᤧᤸᤗᤧ ᤁᤢᤏᤡᤱᤘᤠ᤹ᤒᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤂᤢᤶᤍᤡᤱ ᤔᤧᤒᤡᤀᤠᤴ ᤗ᤹ᤖᤡᤰ ᤀᤡ᤺ᤳᤋᤢᤖᤥ॥

¹⁴ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤣ. ᤔᤧᤖᤡᤱ ᤌᤰᤔᤠ ᤏᤢ ᤋᤢᤰᤂᤣᤴ ᤁᤧᤏᤡᤛᤢᤖᤥ. ᤜᤧᤰᤁᤩᤠᤱ ᤛᤍᤠᤍᤡᤱ ᤁᤢᤓᤠ᤹ ᤐᤡᤔᤠ ᤕᤠᤖᤡᤵ ᤁᤧᤘᤠ᤹ᤖᤥ॥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤔᤏᤠᤒᤠ ᤔᤏᤠᤴ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤂᤧᤏᤧ᤹ᤀᤥ ᤋᤠᤖᤥ॥ ᤕᤧᤳᤇᤠᤒᤠᤜᤠ᤹ᤖᤧ ᤁᤢᤓᤠ᤹ ᤍᤠᤱᤒᤠᤱᤃ ᤜᤠᤒᤠ ᤂᤧᤏᤧ᤹ᤏᤧᤖᤥ॥

¹⁵ ᤋᤠᤰᤁᤧᤓᤧ᤹ᤒᤠ ᤏᤢ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤴᤇᤡ᤹ ᤜᤢᤰ ᤀᤧᤰᤂᤧ ᤐᤡᤖᤧᤛᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤔᤧᤴᤗᤧᤳᤋᤣ ᤌᤠᤖᤡᤰ ᤂᤢᤶᤍᤡᤱ ᤐᤡᤖᤧᤛᤧ᤹ᤀᤥ॥

¹⁶ ᤕᤜᤘᤣ ᤍᤠᤱᤒᤠᤴ ᤛᤍᤠᤍᤡᤱᤖᤧ ᤗᤠᤃᤡ ᤜᤠᤱᤆᤥᤰᤗᤥ. ᤜᤧᤰᤁᤩᤠᤱ ᤘᤣ᤹ ᤔᤠᤱ ᤛᤠᤶᤔᤠᤱᤜᤠ᤹ᤀᤥ ᤛᤧᤘᤠ ᤁᤧᤈᤥ᤺ᤰᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤢᤗᤠᤈᤣ᤹ᤗᤠᤶᤒᤠ ᤔᤧᤗᤴ ᤔᤧᤒᤣ᤺ᤰᤗᤥ॥

¹⁷ ᤕᤜᤘᤣ ᤍᤠᤱᤒᤠᤀᤣ. ᤋᤢᤰᤂᤣ ᤁᤧᤈᤠᤒᤠᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤴ ᤁᤧᤄᤧᤵᤛᤢᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤁᤧᤎᤢᤶᤒᤠ ᤁᤧᤈᤥᤃᤢᤖᤥ. ᤂᤧᤱᤜᤠ᤹ᤖᤧ ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤁᤧᤶᤀᤢ᤺ᤳᤋᤡᤸᤗᤧ ᤂᤧᤏᤧ᤹ ᤁᤧᤄᤧᤵᤛᤢᤖᤥ॥

¹⁸ ᤂᤧᤏᤧ᤹ ᤕᤧᤳᤇᤠᤒᤠ ᤏᤢ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤁᤧᤛᤧ᤺ᤵᤋᤢᤛᤡᤖᤥ. ᤜᤧᤰᤁᤣᤗ᤹ᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤠᤳᤋᤡᤴ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧᤀᤠᤱ ᤂᤧᤱᤜᤠ᤹ ᤕᤱᤔᤠᤛᤧᤵᤔᤠ ᤔᤧᤛᤢᤰᤋᤢᤴᤇᤡᤴᤗᤥ॥