ᤂᤠᤜᤢᤴ 8 - LIFOTNTᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤸᤗᤧ ᤀᤢ᤺ᤳᤋᤢᤛᤡᤖᤥ 1 ᤌᤣ ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀᤢᤘᤠ ᤔᤧᤈᤥᤃᤢᤴᤏᤠᤱᤒᤡ᥅ ᤌᤣ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤺ᤸᤗᤧ ᤁᤢᤀᤡᤰᤗᤠᤴ ᤕᤶᤒᤠ ᤔᤧᤈᤥᤃᤢᤴᤏᤠᤱᤒᤡ᥅ 2 ᤗᤠᤶᤃᤥᤀᤥᤒᤠ ᤁᤣ᤺ᤶᤒ ᤁᤣ᤺ᤶᤒᤠ ᤋᤧᤴᤜᤠ᤹ᤀᤥ. ᤗᤠᤶᤍᤥᤀᤥ ᤂᤧᤴ ᤕᤧᤶᤛᤡᤱᤛᤡᤱᤗᤥ. 3 ᤕᤧᤰᤕᤰ ᤗᤧᤵᤔᤠᤱ ᤐᤣ᤺ᤰᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤕᤠᤀᤥ. ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤥ. ᤂᤧᤴ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤀ᤺ᤰᤗᤥ 4 “ᤔᤧᤴᤇᤠᤶ ᤕᤠᤵᤔᤡᤛᤣ. ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱᤗᤥ. ᤀᤠᤱᤃᤠ᤹ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤳᤋᤢᤱᤛᤡᤱᤗᤥ॥ 5 ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠᤛᤣ. ᤂᤠᤛᤡᤱᤏᤡ᤺ᤳᤋᤧᤶᤔᤧ᤹ᤀᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤥᤛᤧᤶᤔᤧ᤹ᤀᤥ. ᤀᤍᤱᤛᤣ. ᤏᤧᤜᤡᤏᤡᤱᤘᤠ᤹ ᤜᤢ᤹ᤀᤠᤛᤡᤶᤔᤧ᤹ᤀᤥ॥ 6 ᤂᤧᤵᤛᤧᤶᤔᤧ᤹. ᤂᤡᤏᤡ᤹ ᤔᤧᤵᤔᤠ ᤁᤧᤒᤥᤱᤒᤠ ᤔᤡᤱᤛᤥᤌᤠ᤺ᤱᤛᤥ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤁᤳᤋᤢᤱᤗᤥ. ᤁᤧᤘᤠ᤹ᤒᤠ ᤐᤠᤴ ᤐᤠ᤺ᤳᤇᤧ ᤀᤠᤱᤃᤠ᤹ ᤀᤠᤶᤒᤪᤠ ᤜᤴᤍᤢᤱᤗᤥ॥ 7 ᤀᤠᤱᤃᤠ᤹ ᤀᤠᤶᤒᤪᤠ᤺ᤸᤗᤧ ᤛᤧᤰᤂᤠᤒᤠ ᤐᤠᤴ ᤐᤠ᤺ᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤶᤒᤪᤠᤛᤣ᤹ᤀᤡᤸᤗᤧ ᤑᤧᤴᤕᤠ᤺ᤶᤒᤰᤁᤡᤴ ᤁᤢᤛᤡᤰᤗᤧ᤺ᤱᤗᤥ॥ 8 ᤀᤠᤶᤒᤪᤠᤀᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤍᤥ᤺ᤵᤔᤠ ᤆᤥᤰᤗᤥ. ᤂᤧᤱᤜᤠ᤹ᤀᤥᤒᤠ ᤀᤠᤳᤋᤡᤴᤏᤠᤱ ᤐᤧᤷᤃᤧᤰ ᤘᤷᤃᤧᤰᤐᤠ ᤔᤧᤈᤥᤰᤏᤧᤸᤗᤥ॥ 9 ᤛᤡᤱᤛᤡᤱ ᤕᤧᤰᤕᤧᤰᤐᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤂᤧᤱᤜᤠ᤹ ᤁᤧᤖᤧᤰ ᤁᤧᤘᤠ᤹ᤒᤠᤀᤣ ᤆᤥᤰᤗᤥ. ᤁᤢᤏᤧᤜᤡ ᤁᤢᤏᤡᤱᤘᤠ᤹ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤆᤥᤰᤗᤥ॥ 10 ᤕᤢᤵᤐᤠ᤺ᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤀᤠᤄᤠᤜᤢᤴᤏᤡᤴ. ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤏᤢ᤺ᤸᤗᤧᤃ ᤐᤖᤢᤔᤠᤸᤗᤧ ᤂᤧᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠᤴᤏᤣ ᤛᤣᤃᤧ᤹ᤀᤥ. 11 ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤔᤢᤎᤡᤱ ᤗᤧᤱᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤂᤥᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤏᤠᤱ ᤂᤧᤴᤏᤢ ᤋᤱᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ 12 “ᤀᤠᤱᤃᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤠᤖᤥ. ᤀᤠᤱᤃᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤢᤱᤅᤠ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤏᤧᤜᤡᤏᤡᤱᤘᤠ᤹ ᤏᤢ ᤂᤠᤛᤡᤱᤏᤡ᤺ᤵᤔᤠᤴ ᤁᤳᤋᤢᤱᤗᤥ॥ 13 ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤠᤃ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤆᤡ᤺ᤵᤔᤠᤖᤥ. ᤀᤠᤱᤍᤡᤱ ᤗ᤹ᤔᤠ. ᤕᤶᤒᤠ ᤜᤧᤴᤇᤡᤱᤔᤠ. ᤋᤠᤵᤑᤧ᤺ᤶᤒᤠ ᤛᤢᤳᤏᤠ ᤏᤢ ᤔᤏᤠ ᤜᤢᤔᤠ ᤐᤱᤔᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤆᤡ᤺ᤳᤋᤢᤱᤗᤥ॥ 14 ᤛᤢᤈᤠᤐᤠᤴ ᤏᤢ ᤏᤡ᤺ᤴᤎᤥ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤗᤠᤶᤔᤣ ᤐᤥᤱᤗᤥ ᤂᤧᤒᤩᤠᤱ ᤂᤧᤴ ᤜᤧᤰᤁᤣᤀᤣ ᤕᤠ᤺ᤶᤒᤰ ᤆᤥᤃᤢᤱᤗᤥ. ᤀᤠᤱᤃᤠ᤹ ᤂᤠᤛᤡᤱᤏᤡ᤺ᤵᤔᤠ ᤏᤢ ᤔᤢᤰᤛᤠᤶ ᤁᤳᤋᤢᤱᤗᤥ॥ 15 ᤀᤠᤱᤃᤠ᤹ ᤗᤠᤶᤒᤠᤀᤣ ᤜᤠᤱᤜᤠ᤹ᤖᤧ ᤜᤠᤱᤕᤢᤰ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤕᤢᤰᤛᤠᤒᤠᤜᤠ᤹ᤖᤧ ᤁᤧᤘᤠ᤹ᤒᤠ ᤁᤢᤓᤠᤱ ᤔᤧᤈᤥᤃᤢᤖᤥ. 16 ᤀᤠᤱᤃᤠ᤹ ᤗᤠᤶᤒᤠᤀᤣ ᤜᤠᤱᤕᤢᤰᤐᤠᤜᤠ᤹ᤖᤧ ᤜᤠᤱᤕᤢᤰ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤌᤥᤎᤥᤰᤐᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤕᤢᤰ ᤔᤧᤈᤥᤃᤢᤖᤥ॥ 17 ᤀᤠᤱᤃᤠ᤹ ᤔᤡ᤺ᤶ ᤁᤧᤔᤧᤵᤐᤠᤜᤠ᤹ ᤔᤡ᤺ᤶ ᤔᤧᤳᤋᤢᤱᤛᤡᤱᤗᤥ. ᤀᤠᤱᤃᤠ᤹ ᤁᤧᤃᤥ᤺ᤵᤐᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤄᤥᤀᤠᤖᤥ॥ 18 ᤀᤠᤱᤃᤠ᤹ᤏᤢ ᤁᤧᤘᤠ᤹ᤒᤠ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠᤱ. ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤕᤠᤱᤛᤠᤁᤢᤴᤎᤣ ᤏᤢ ᤏᤢ᤹ᤔᤠᤍᤠᤔᤠᤴ ᤁᤧᤃᤳᤋᤢᤖᤥ॥ 19 ᤀᤠᤱᤃᤠ᤹ᤗᤠᤶ ᤁᤧᤎᤥ᤺ᤰᤐᤠ ᤛᤡᤱᤛᤣ᤹ᤀᤡᤴ ᤛᤠᤶᤔᤩᤠᤱ ᤀᤡᤛ᤻ᤛᤣ᤺ᤱᤒᤠᤴᤏᤢ᤺ᤸᤗᤧ ᤏᤢᤒᤠ ᤆᤥᤰᤗᤥ. ᤀᤠᤱᤃᤠ᤹ ᤀᤠᤳᤋᤡᤴ ᤐᤠ᤺ᤴᤏᤡᤴ ᤗ᤺ᤳᤋᤢᤱ᤹. ᤂᤧᤸᤗᤧ ᤕᤢᤵᤐᤠ ᤀᤡᤛᤣ᤺ᤱᤒᤠᤴ ᤏᤠ᤺ᤴᤍᤢᤖᤥ॥ 20 ᤀᤠᤱᤃᤠ᤹ ᤛᤠᤶᤕᤥᤒᤠ ᤗᤠᤶᤔᤥ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴᤒᤠ ᤔᤠᤖᤠᤶᤔᤥ ᤗᤠᤱᤄᤣ᤺ᤰᤁᤠᤖᤥ॥ 21 ᤀᤠᤱᤃᤠ᤹ ᤕᤠᤵᤔᤡ ᤔᤡ᤺ᤶ ᤁᤧᤔᤧᤵᤐᤠᤜᤠ᤹ ᤀᤠᤱᤃᤠ᤹ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤌᤡᤶᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤕᤠᤱᤔᤠ ᤌᤠ᤺ᤱᤜᤠ᤹ ᤌᤡᤶᤛᤢᤱ ᤐᤡᤖᤢᤱᤛᤡᤱᤗᤥ॥ 22 “ᤕᤜᤘᤣ ᤍᤠᤱᤒᤧᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧ ᤁᤢᤜᤣ᤺ᤰᤛᤡᤱᤔᤥᤀᤣ ᤀᤠᤱᤃᤠ᤹ ᤆᤥᤃᤠᤱᤗᤥ. ᤂᤢᤏᤧ᤹ ᤁᤢᤜᤣ᤺ᤰᤛᤡᤱᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤏᤢ᤺ᤸᤗᤧᤀᤠᤱ ᤋᤃᤡᤀᤣ ᤆᤥᤃᤠᤱᤗᤥ॥ 23 ᤏᤢᤵᤔᤧᤴᤍᤡᤱᤅᤠᤱᤎᤥᤀᤣ ᤕᤢᤰᤋᤡᤱ ᤆᤥᤃᤠᤱᤅᤠᤱ ᤘᤕᤧᤖᤥ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ. ᤕᤥ᤹ᤒᤠᤴ ᤁᤢᤜᤣ᤺ᤰᤛᤡᤱᤔᤠ ᤐᤥ᤺ᤰᤂᤧᤒᤠᤏᤢ᤺ᤸᤗᤧ ᤋᤃᤡᤀᤣ ᤆᤥᤃᤠᤱᤒᤠᤖᤥ॥ 24 ᤐᤕᤶ ᤕᤶᤒᤠ ᤋᤢᤱᤃᤥᤍᤡᤱ ᤘᤖ᤺ᤱᤜᤠ᤹ ᤔᤧᤶᤒᤥᤱᤅᤣ ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤅᤠᤀᤠᤱ ᤘᤕᤠᤱᤗᤥ. ᤆᤫᤠ᤺ᤳᤋᤡᤸᤗᤧ ᤁᤧᤍᤡᤶᤒᤠ ᤕᤜ᤺ᤱ ᤘᤜ᤺ᤱᤜᤠ᤹ ᤗ᤺ᤶᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤠᤱᤃᤠ᤹ ᤘᤕᤠᤱᤗᤥ॥ 25 ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤀᤠᤵᤑᤣᤰ ᤕᤢᤰᤏᤠᤍᤧᤴᤏᤥ ᤕᤢᤱᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ. ᤌᤧᤃᤢ ᤔᤠᤱᤘᤠᤜᤠ᤹ᤏᤢ᤺ᤸᤗᤧ ᤋᤃᤡᤀᤣ. ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤅᤠᤀᤠᤱ ᤘᤕᤠᤱᤗᤥ॥ 26 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤡᤃᤪ ᤁᤸᤗᤧ ᤁᤢᤕᤢᤰᤏᤠ ᤂᤠᤶᤒᤠᤱᤅᤡᤴ ᤀᤡᤃᤪ ᤕᤥ᤹ᤒᤠᤀᤥ ᤂᤠᤶᤓᤢᤳᤇᤪᤢᤶᤒᤠ ᤁᤢᤈᤡ᤹ ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤠᤱᤗᤥ॥ 27 ᤂᤢᤏᤧ᤹ ᤋᤠᤱᤛᤠᤱᤒᤧᤴ ᤁᤢᤒᤵᤔᤠᤍᤧᤴᤏᤥ ᤑᤳᤇᤢᤸᤗᤧ. ᤋᤢᤱᤃᤥᤍᤡᤱ ᤘᤖ᤺ᤱᤅᤡᤴ ᤏᤡᤕᤠᤖᤠᤏᤡᤎᤠ᤺ᤵᤐᤡᤸᤗᤧ ᤁᤒᤢᤸᤗᤧ. ᤀᤠᤱᤃᤠ᤹ ᤂᤧᤵᤔᤥ ᤘᤕᤠᤱᤗᤥ॥ 28 ᤂᤢᤏᤧ᤹ ᤋᤠᤱᤛᤠᤰᤐᤥ ᤂᤠ᤹ᤔᤡ᤺ᤵᤐᤠᤴ ᤑᤳᤇᤢᤸᤗᤧ. ᤜᤧᤰᤁᤩᤠᤱ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤸᤗᤧ ᤁᤢᤒᤢᤴᤜᤠ᤹ ᤁᤢᤒᤢᤶᤔᤠᤍᤧᤴᤏᤥ ᤌᤎᤵ ᤔᤧᤸᤗ᤹ᤀᤣ ᤗ᤺ᤳᤋᤢᤸᤗᤧ. 29 ᤂᤢᤏᤧ᤹ ᤘᤖ᤺ᤱᤅᤡᤸᤗᤧ ᤁᤢᤀᤡ᤺ᤴᤍᤥᤜᤠ᤹ ᤏᤧᤛ᤻ᤛᤢᤸᤗᤧ— ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤁᤠ᤺ᤰᤋᤢᤀᤠᤱ ᤆᤫᤠ᤺ᤳᤋᤡᤴ ᤗᤠ᤺ᤰᤁᤠᤳ ᤔᤧᤸᤗ᤺ᤶᤔᤠ ᤔᤧᤶᤒᤣ᤺ᤰᤔᤠᤖᤧ ᤗᤠᤃᤡ ᤏᤢ— ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤒᤢᤱᤜᤠ᤹ ᤕᤢᤰᤂᤢᤸᤗᤧ. 30 ᤀᤠᤱᤃᤠ᤹ ᤁᤠᤒᤪᤥᤒᤠ ᤜᤧᤰᤁᤣ ᤂᤢᤏᤧ᤹ ᤁᤢᤒᤣᤛᤠᤱ ᤘᤕᤠᤱᤗᤥ. ᤀᤠᤱᤃᤠ᤹ ᤌᤡᤰᤕᤠ᤺ᤴᤎᤰ ᤀᤠᤏᤡᤱᤘᤠ᤹ ᤋᤩᤧᤀᤠᤱ ᤘᤕᤠᤱᤗᤥ. ᤂᤢᤏᤧ᤹ ᤁᤢᤒᤣ᤺ᤰᤛᤠᤱ ᤀᤠᤱᤃᤠ᤹ ᤐᤛ᤺ᤳᤛ᤺ᤳᤋᤠᤱᤗᤥ॥ 31 ᤂᤢᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤠᤛᤡᤰ ᤛᤔᤧᤀᤠᤱ ᤘᤕᤠᤱᤗᤥ॥ 32 “ᤀᤠᤸᤗ ᤀᤠᤛ᤻ᤛᤠᤛᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤀᤠᤱᤃᤠ᤹ ᤀᤠᤗᤠᤶᤜᤠ᤹ ᤀᤠᤳᤋᤡᤴᤜᤠ᤹ᤖᤧ ᤔᤧᤏᤠ᤺ᤳᤋᤢ ᤔᤧᤍᤡᤶᤍᤢ ᤂᤧᤱᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥ 33 ᤀᤠᤱᤃᤠ᤹ ᤀᤠᤄᤠᤜᤢᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤛᤡᤰᤁᤢᤶᤏᤡᤒᤠ ᤐᤥ᤺ᤰᤂᤧᤶᤔᤧ᤹ᤀᤥ. ᤂᤧᤴ ᤜᤡᤏᤠ᤺ᤶ ᤔᤧᤔᤧᤳᤋᤧᤶᤔᤡᤴᤏᤧ᤹ᤀᤥ॥ 34 ᤀᤠᤳᤋᤡᤸᤗᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤢ᤹. ᤀᤠᤳᤋᤡᤴ ᤌᤡᤰᤕᤠ᤺ᤴᤎᤰ ᤀᤠᤗᤠᤶᤎᤣ᤺ᤵᤐᤥ ᤋᤠᤀᤠᤱ ᤀᤡᤃᤣ᤺ᤰᤁᤠᤱ ᤀᤥᤔᤧᤳᤋᤠᤖ. ᤀᤠᤗᤠᤶᤎᤣ᤺ᤵᤐᤥ ᤜᤠᤱᤅᤠ ᤔᤢ᤹ᤀᤡᤛᤠᤒᤠ ᤔᤏᤠ᤺ᤱᤃ ᤜᤠᤒᤠ ᤂᤧᤴᤏᤣᤖᤥ॥ 35 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤀᤠᤱᤃᤠ᤹ ᤂᤥᤀᤠ. ᤂᤧᤸᤗᤧ ᤜᤡᤱᤔᤴ ᤂᤥᤛᤢᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤴᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥ 36 ᤁᤖ ᤀᤠᤳᤋᤡᤸᤗᤧ ᤀᤠᤱᤃᤠ᤹ ᤂᤥᤔᤠ ᤔᤧᤄᤥᤀᤠᤴ. ᤂᤧᤴ ᤀᤠᤒᤠᤅᤣ ᤜᤠᤴᤋᤡ ᤆᤥ᤺ᤰᤛᤡᤱᤗᤥ. ᤀᤠᤱᤃᤠ᤹ ᤁᤧᤈᤡ᤺ᤵᤐᤠ ᤁᤠᤰᤗᤧ ᤛᤡᤔᤧᤴ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.