ᤂᤠᤜᤢᤴ 7 - LIFOTNT1 ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤕᤠᤱᤄᤥᤳᤋᤧ ᤁᤳᤋᤧ᤹ᤀᤥ॥ 2 ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤠ᤺ᤳᤋᤧ ᤋᤡᤶᤍᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ ᤁᤧᤃᤴᤗᤥ. ᤐᤡᤏᤧᤒᤠ ᤂᤠᤜᤢᤴᤜᤠ᤹ ᤁᤧᤔᤡᤰᤜᤠᤱᤔᤠ ᤜᤧᤰᤁᤣ ᤛᤧ᤺ᤵᤋᤧ ᤁᤧᤳᤋᤧ᤹ᤀᤥ॥ 3 ᤂᤧᤏᤧ᤹ ᤁᤧᤜᤢᤰᤆᤥᤀᤥ ᤛᤫᤠᤃᤣᤵ ᤜᤧᤰᤁᤣ ᤂᤧᤴ ᤘᤠᤖᤧᤃᤳᤋᤧ᤹ᤀᤥ. ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤂᤧᤴ ᤛᤠᤵᤋᤧ ᤑᤳᤇᤧ᤹ᤀᤥ॥ 4 ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤀᤰᤂᤣ ᤔᤧᤳᤋᤧ᤹ᤀᤥ. “ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤴᤈᤣ᤺ᤸᤗᤡᤔᤠᤏᤧᤖᤥ.” ᤜᤧᤰᤁᤩᤠᤱ ᤂᤠᤛᤡᤱᤏᤡ᤺ᤵᤔᤠᤴ “ᤀᤠᤱᤃᤠ᤹ ᤀᤠᤴᤍᤣᤱ ᤀᤠᤴᤈᤢᤶᤏᤧ” ᤔᤧᤳᤋᤧ᤹ᤀᤥ॥ 5 ᤂᤧᤒᤩᤠᤱ ᤂᤧᤴ ᤐᤠ᤺ᤴᤜᤠ᤹ᤖᤧ ᤂᤧᤏᤧ᤹ ᤕᤧᤶᤒᤠ ᤁᤥ᤺ᤳᤏᤠᤗᤠᤶ ᤏᤢ ᤑᤧᤰᤁᤧᤗᤠ᤹ᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤂᤧᤏᤧ᤹ ᤗᤠ᤺ᤳᤗᤠ᤺ᤳ ᤋᤠᤱᤃᤧᤛᤧ᤺ᤵ ᤁᤧᤃᤳᤗᤥ॥ ᤆᤠᤃᤧᤖᤠᤶᤔᤠ ᤔᤧᤴᤇᤢᤔᤠᤴᤏᤢ ᤛᤡᤱᤛᤡᤱ ᤔᤧᤳᤇᤡᤱᤔᤠ 6 ᤌᤡᤰᤗᤧᤱ ᤀᤠᤱᤃᤠ᤹ ᤀᤠᤜᤡᤶᤔᤥᤒᤠ ᤐᤣᤎᤠ᤺ᤵᤐᤥ ᤕᤢᤅᤠᤱᤗᤥ. ᤜᤧᤰᤁᤩᤠᤱ ᤜᤱᤜᤱᤍᤠᤱᤒᤠ ᤁᤢᤜᤱᤜᤠ᤹ᤀᤥᤗᤠᤶ ᤀᤥᤔᤧᤳᤋᤢᤱᤗᤥ. 7 ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ. ᤌᤠᤱᤒᤧᤴᤜᤠ᤹ᤀᤥ ᤗᤳᤇᤠ ᤁᤢᤏᤧᤜᤡ ᤁᤧᤜᤥᤵᤐᤠ ᤌᤡᤰ ᤀᤠᤱᤃᤠ᤹ ᤏᤡᤛᤢᤱᤗᤥ॥ 8 ᤔᤧᤴᤇᤢᤔᤠ ᤁᤧᤕᤢᤱᤒᤠ ᤔᤠᤖᤠᤶᤔᤥ ᤂᤧᤴ ᤗᤠᤱᤄᤣᤃᤧᤀᤠᤱ ᤘᤕᤧᤒᤠ ᤏᤢ ᤂᤧᤸᤗᤧ ᤁᤢᤜᤡᤶᤔᤥ ᤗᤧᤵᤔᤠᤱ ᤋᤃᤡ ᤌᤠᤛᤡᤱᤗ ᤐᤳᤇᤧᤒᤠ ᤏᤡᤛᤢᤱᤗᤥ— 9 ᤕᤢ᤺ᤴᤇᤡᤰ. ᤕᤧᤴᤏᤡᤴ ᤗᤧᤰᤗ ᤐᤣ᤺ᤰᤁᤡᤸᤗᤧ ᤛᤧᤴᤍᤡᤰ ᤂᤠᤔᤠᤰᤗ ᤐᤣ᤺ᤰᤗᤥ॥ 10 ᤂᤧᤒᤩᤠᤱ ᤗᤳᤇᤠ ᤔᤧᤴᤇᤢᤔᤠᤎᤡᤰ ᤂᤧᤸᤗᤧ ᤁᤢᤍᤢᤶᤛᤧ ᤗ᤺ᤴᤍᤧᤓᤧᤖᤧᤖᤥ. ᤂᤧᤴ ᤕᤧᤶᤒᤠ ᤁᤧᤃᤥ᤺ᤵᤔᤠ ᤜᤧᤰᤁᤣ ᤆᤠᤱ ᤁᤧᤈᤠᤱᤔᤠ ᤏᤢ ᤆᤠ᤺ᤳᤆᤠ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤔᤠ ᤆᤥᤃᤧᤖᤥ॥ 11 ᤆᤧᤸᤗᤧᤰᤗᤧᤰᤔᤠ ᤏᤢ ᤜᤠᤍᤡᤱ ᤁᤧᤎᤰᤔᤠ ᤆᤥᤃᤧᤖᤥ. ᤂᤧᤴ ᤀᤠᤓᤧᤸᤗᤧᤀᤠᤱ ᤁᤢᤜᤡᤶᤔᤥ ᤔᤧᤴᤕᤢᤱᤔᤏᤠᤔᤠ ᤘᤕᤧᤖᤥ. 12 ᤁᤢᤓᤠ ᤕᤧᤶᤔᤥ. ᤁᤢᤓᤠ ᤕᤧᤶᤔᤥ ᤗᤰᤂᤢᤶᤜᤠ᤹ᤀᤥ. ᤁᤧᤖᤧᤰ ᤁᤢᤛᤢᤰᤐᤠ ᤌᤰᤔᤠ ᤂᤧᤴ ᤆᤡᤱᤛᤡᤱᤅᤠᤱ ᤕᤢᤅᤧᤖᤥ॥ 13 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤋᤧᤶᤛᤢᤀᤠᤱ ᤆᤢᤵ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤁᤢᤏᤠᤖᤠᤀᤥ ᤔᤧᤴᤏᤢ᤺ᤴᤏᤣ ᤀᤰᤂᤣ ᤔᤧᤳᤋᤢᤖᤥ. 14 “ᤀᤠᤱᤃᤠ᤹ ᤀᤠᤔᤠᤱᤜᤧᤰᤁᤡᤴ ᤁᤧᤳᤋᤢᤱᤗᤥ. ᤀᤠᤀᤡᤴ ᤀᤠᤜᤡᤶᤔᤥ ᤋᤱᤈᤢᤶ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤅᤠᤱ ᤘᤠ᤹ᤖᤥ॥ 15 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤍᤢᤶᤛᤧ ᤗᤠ᤺ᤰᤁᤠᤳ ᤗ᤺ᤴᤍᤠᤱᤒᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤥ᤺ᤳᤏᤧ. ᤀᤠᤸᤗᤥ ᤋᤢᤶᤏᤧᤀᤠᤱ ᤘᤠ᤹ᤖᤥ᥄ 16 ᤀᤠᤱᤃᤠ᤹ ᤀᤠᤀᤡᤵᤏᤠᤍᤧᤴᤏᤥ. ᤔᤡᤛᤪ ᤗᤠᤈᤣ᤹ᤒᤠ ᤐᤖᤡᤰ ᤐᤖᤡᤰᤗᤧ ᤆᤠ᤺ᤶᤔᤏᤠᤒᤠ ᤗᤥ᤺ᤶᤓᤣ᤺ᤳᤋᤡᤴ ᤑᤧᤛᤢᤱᤅᤠᤱ ᤏᤧᤖᤥ॥ 17 ᤀᤠᤱᤃᤠ᤹ ᤀᤠᤏᤧᤳᤏᤠᤴ ᤔᤠᤖᤢᤰ. ᤂᤠᤶᤍᤥᤗᤡ ᤏᤢ ᤏᤠᤶᤛᤡᤱ ᤛᤧᤛᤢᤱᤅᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤆᤥᤃᤢᤱᤅᤠᤱ ᤏᤧᤖᤥ॥ 18 ᤑᤧᤖᤧ᤹ᤀᤥ. ᤋᤠᤏᤠᤶ ᤌᤠᤖᤡᤰ ᤀᤠᤴᤇᤡ᤹ ᤏᤠᤏᤢ᤹ᤏᤧᤛᤡᤖᤥ. ᤀᤠᤴᤇᤡ᤹ ᤗᤢᤱᤔᤠ᤹ ᤜᤡ᤺ᤵᤏᤧᤛᤡᤖ ᤕᤧᤕᤧ ᤗ᤹ᤛᤡᤖᤥ᥄ 19 ᤀᤠᤱᤃᤠ᤹ ᤀᤠᤕᤧᤶᤒᤠᤴ ᤜᤡᤶᤔᤥ ᤜᤥᤵᤗᤥ. ᤂᤢᤏᤧ᤹ᤃ ᤔᤠ᤺ᤱᤄᤠᤒᤠ ᤗᤠᤶᤍᤡ᤺ᤰᤁᤥ ᤐᤣᤀᤠᤱ ᤘᤠ᤹ᤖᤥ॥ 20 ᤂᤢᤏᤧ᤹ ᤁᤧᤕᤥᤒᤠ ᤕᤖᤡᤰ ᤕᤠᤱ ᤋᤣ᤹ᤖᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤗᤠᤓᤢᤴ ᤌᤠᤖᤡᤰ ᤂᤢᤏᤧ᤹ ᤜᤡᤶᤔᤥ ᤔᤧᤏᤢ᤺ᤱᤏᤧᤴᤗᤥ॥” 21 ᤗᤧᤔᤢ ᤛᤢ᤺ᤴᤍᤢᤀᤠᤱ ᤂᤢᤏᤧ᤹ ᤂᤧᤴ ᤌᤠᤱᤒᤧᤴᤏᤡᤴ ᤔᤢᤍᤥᤂᤠᤶᤍᤥ ᤆᤥᤃᤢᤖᤥ. ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤳᤋᤢᤀᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤂᤧᤴ ᤌᤠᤛᤢᤖᤥ॥ 22 ᤛᤠᤛᤧᤵᤔᤠᤍᤧᤴᤏᤥ ᤁᤧᤎᤠᤛᤡᤱ ᤁᤧᤒᤣ᤺ᤰᤐᤠ ᤐᤡᤳ ᤜᤧᤰᤁᤣ. ᤆᤧᤴ ᤐᤡᤛᤠᤱ ᤋᤃᤡ ᤁᤧᤒᤣ᤺ᤰᤐᤠ ᤐᤧ᤺ᤱᤘᤠ ᤁᤢᤀᤡᤛᤡᤰ ᤂᤡᤔᤥᤘᤔᤥ ᤂᤢᤏᤧ᤹ ᤂᤧᤴ ᤋᤡᤶᤍᤢᤀᤠᤱ ᤁᤢᤀᤣᤃᤠᤱ ᤐᤣᤖᤥ॥ 23 ᤂᤧᤒᤩᤠᤱ ᤋᤥ᤺ᤱᤅᤡᤸᤗᤧ ᤂᤧᤸᤗᤧ ᤁᤢᤏᤧᤖᤧᤳᤋᤡᤴ ᤑᤩᤠᤰ ᤗᤛ᤻ᤛᤢᤖᤥ. ᤀᤡᤀᤥ ᤗᤧᤵᤔᤠᤱ ᤁᤧᤛᤢᤰᤐᤠ ᤁᤧᤒᤣ᤺ᤰᤐᤠ ᤐᤢ ᤁᤢᤛᤡᤱ. ᤂᤧᤸᤗᤧ ᤛᤡᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ᤀᤣ ᤔᤧᤄᤥᤛᤢᤴᤗᤥ॥ 24 ᤀᤠᤸᤗ ᤀᤠᤒᤢᤃᤧᤴ ᤀᤠᤛ᤻ᤛᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤀᤠᤱᤃᤠ᤹ ᤔᤧᤳᤏᤡᤱᤒᤠ ᤀᤠᤒᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥ 25 ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤂᤧᤸᤗᤧ ᤁᤢᤕᤧᤵᤗᤧᤰ ᤗᤧᤵᤔᤠᤱ ᤌᤠᤔᤠ ᤔᤧᤓᤠ᤺ᤰᤋᤧᤶᤔᤡᤴᤏᤧ᤹ᤀᤥ. ᤂᤧᤸᤗᤧ ᤁᤢᤗᤠᤶᤔᤥ ᤗᤧᤵᤔᤠᤱ ᤋᤠᤵᤔᤧᤒᤧ᤹ᤖᤧᤶᤔᤡᤴᤏᤧ ᤔᤧᤒᤣᤃᤡᤴᤏᤧᤀᤥ॥ 26 ᤂᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤌᤩ᤺ᤱ ᤔᤧᤰᤂᤢᤛᤡᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤁᤢᤛᤠᤏᤠ᤺ᤳ ᤁᤧᤒᤥᤱᤒᤠᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤔᤧᤘᤠ᤹ᤖᤥ॥ 27 ᤂᤧᤸᤗᤧ ᤁᤢᤜᤡᤶᤔᤡᤴ ᤂᤧᤔᤠᤍᤡᤱ ᤕᤱᤛᤱ ᤐᤣ᤺ᤰᤔᤠ ᤗᤠᤶᤗᤥ. ᤂᤧᤸᤗᤧ ᤛᤡᤔᤧᤸᤗᤧᤴ ᤕᤠᤰᤑᤠᤱᤜᤠ᤹ ᤗᤧᤵᤔᤠᤱ ᤀᤠᤃᤧᤳᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.