ᤂᤠᤜᤢᤴ 5 - LIFOTNTᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤣ᤺ᤴ 1 ᤀᤠᤛ᤻ᤛᤠᤀᤣ. ᤀᤠᤛᤡᤰᤁᤢᤶᤏᤡᤱᤘᤠ᤹ᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ ᤜᤧᤰᤁᤩᤠᤱ ᤀᤠᤄᤠᤛᤡᤱᤏᤡ᤺ᤵᤔᤠ ᤐᤠ᤺ᤴᤜᤠ᤹ ᤏᤢᤖᤡᤰ ᤂᤧᤵᤛᤧ᤹ᤀᤥ॥ 2 ᤀᤰᤂᤣᤗ᤹ᤖᤡᤰ ᤂᤠᤛᤡᤱ ᤁᤧᤏᤡ᤺ᤵᤐᤠ ᤁᤧᤒᤥᤱᤗᤥ. ᤜᤧᤰᤁᤩᤠᤱ ᤁᤧᤶᤒᤪᤠ᤺ᤸᤗᤧ ᤏᤧᤜᤡᤏᤡᤱᤘᤠᤴ ᤁᤧᤛᤧ᤺ᤵᤋᤢᤖᤥ॥ 3 ᤌᤣᤀᤠᤱᤓᤧᤸᤗᤧ ᤕᤧᤶᤒᤠ ᤜᤱᤈᤣᤏᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤶᤒᤪᤠᤀᤥᤗᤠᤶ ᤛᤰᤘᤠᤄᤢ ᤁᤢᤀᤡᤛᤡᤰ ᤁᤢᤈᤠᤃᤧᤏᤢ᤹ᤒᤠ ᤐᤠᤴ ᤗ᤺ᤴᤗᤥ. ᤜᤧᤰᤁᤩᤠᤱ ᤁᤢᤒᤠᤴ ᤛᤢᤳᤗᤠᤴ ᤏᤡ᤺ᤱᤃᤣ᤹ᤏᤢ᤺ᤸᤗᤧ ᤁᤧᤗᤧ᤺ᤶᤒᤠ ᤆᤥᤰᤗᤥ॥ 4 ᤁᤖ ᤁᤢᤏᤢᤵᤔᤥᤃ ᤂᤧᤴ ᤛᤢᤱᤄᤡ᤺ᤱ ᤜᤧᤰᤁᤣ ᤐᤄᤡ᤺ᤰᤂᤡ᤺ᤰᤗᤥ ᤜᤧᤰᤁᤩᤠᤱ ᤏᤠᤜᤠᤱ ᤁᤳᤏᤠᤜᤠᤱ ᤗᤧᤵᤔᤠᤱ ᤁᤢᤜᤧᤰ ᤁᤧᤒᤵᤐᤠ ᤋᤠᤓᤣ ᤁᤢᤀᤡᤛᤡᤰ ᤜᤠᤃᤧᤛᤢᤰᤔᤠ ᤐᤥᤱᤗᤥ॥ 5 ᤂᤧᤸᤗᤧ ᤁᤢᤗᤠᤱᤜᤠ᤹ ᤛᤡᤔᤠᤗᤠᤶ ᤗᤧᤵᤔᤠᤱ ᤛᤱᤔᤠᤱ ᤐᤣ᤺ᤰᤗᤥ. ᤂᤧᤸᤗᤧ ᤁᤢᤗᤠᤱ ᤋᤠᤵᤐᤣ᤹ᤜᤠ᤹ ᤁᤢᤍᤥ᤺ᤵᤔᤠ ᤂᤧᤔᤠ ᤕᤱᤛᤱᤐᤡᤛᤠᤱ ᤌᤠᤛᤡᤱᤅᤠᤱ ᤐᤳᤗᤥ॥ 6 ᤂᤧᤸᤗᤧ ᤜᤡᤱᤔᤠ ᤗᤠᤶ ᤗᤧᤵᤔᤠᤱ ᤏᤡᤱᤘᤠ᤹ᤀᤣ ᤔᤧᤒᤡᤖᤢᤴᤗᤥ. ᤂᤧᤸᤗᤧ ᤁᤢᤕᤧᤵᤗᤧᤰᤁᤡᤴ ᤋᤠᤵᤑᤧ᤺ᤶᤒᤠ ᤆᤥᤰᤗᤥ. ᤜᤧᤰᤁᤣᤛᤠᤱ ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤏᤡᤱᤘᤠ᤹ ᤔᤧᤄᤥᤛᤢᤴᤗᤥ॥ 7 ᤀᤠᤸᤗ ᤀᤠᤛ᤻ᤛᤠᤛᤣ᥄ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤜᤠ᤹ᤗᤠᤶ ᤂᤡᤏᤡ᤹ ᤔᤧᤄᤧᤳᤋᤠᤛᤡᤶᤔᤡᤴᤏᤧ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥ 8 ᤜᤧᤰᤋᤱᤔᤠ ᤔᤧᤴᤇᤢᤔᤠᤴᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ. ᤂᤧᤸᤗᤧ ᤁᤢᤜᤡᤶ ᤗᤠᤶᤎᤣᤳ ᤐᤣᤛᤠᤱ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥ 9 ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤔᤡᤱᤛᤥᤀᤡᤱᤎᤠ᤺ᤱᤅᤡᤴ ᤘᤣ᤹ᤀᤡᤴ ᤁᤧᤒᤡᤖᤢᤶᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤘᤧᤶᤔᤧᤴ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤜᤢᤰᤁᤥ ᤌᤠᤖᤥ. 10 ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤴ ᤔᤧᤈ ᤔᤧᤎᤢᤅᤢᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤜᤥ᤺ᤶᤒᤪᤡᤰᤘᤠ ᤁᤧᤛᤧᤛᤢᤶᤔᤠᤱ ᤁᤧᤎᤃᤢᤶᤒᤧᤸᤗᤧ ᤘᤣ᤹ᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤡᤴ ᤛᤎᤧᤰ ᤋᤡᤶᤗᤥ॥ 11 ᤜᤡᤱᤔᤧᤸᤗᤧ ᤏᤡᤴᤎᤠᤛᤣ᤺ᤰᤀᤥ ᤂᤡᤏᤡ᤹ ᤔᤧᤖᤡᤱ ᤁᤧᤎᤰᤋᤡᤖᤥ. ᤂᤧᤴ ᤕᤧᤶᤔᤥ ᤂᤡᤏᤡ᤹ ᤏᤧᤰᤛᤠᤴ ᤏᤢ ᤜᤥᤖᤡᤰᤐᤠᤴ ᤕ᤺ᤳᤆᤢᤳᤋᤠᤱ ᤐᤳᤗᤥ॥ 12 ᤂᤧᤒᤩᤠᤱ ᤂᤧᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤗᤥ. “ᤀᤠᤕᤠᤰᤁᤥ ᤀᤠᤱᤃᤠ᤹ ᤜᤧᤳᤌᤡᤶᤔᤡᤴ ᤆᤡ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤋᤥ᤺ᤶᤔᤠ ᤏᤢ ᤑᤧ᤺ᤰᤔᤧᤴ ᤀᤠᤏᤡᤱᤘᤠ᤹ᤀᤥᤏᤢᤀᤣ ᤏᤠ᤹ᤖᤢᤱᤗᤥ॥ 13 ᤀᤠᤛᤡᤰᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤴᤍᤧᤶᤒᤠᤖᤥ. ᤜᤧᤰᤁᤩᤠᤱ ᤀᤠᤜᤢ᤹ᤒᤠᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤥ ᤀᤠᤱᤃᤠ᤹ ᤏᤡᤱᤘᤠ᤹ᤀᤣ ᤔᤧᤶᤒᤡᤒᤠᤴᤗᤥ॥ 14 ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤛᤠ᤹ᤖᤡᤰ ᤕᤶᤒᤠ ᤁᤧᤛᤠᤰᤐᤥ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥” 15 ᤀᤠᤵᤑᤣᤰ ᤁᤧᤘᤃᤧᤱᤅᤥᤒᤠ ᤆᤫᤠ᤺ᤳᤋᤡᤴ ᤏᤢ ᤀᤠᤵᤑᤣᤰ ᤁᤧᤘᤠᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤌᤢᤅᤧ᤹ᤀᤥ॥ 16 ᤁᤧᤘᤠᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤔᤠᤖᤠᤶ ᤗᤧᤵᤔᤠᤱ ᤏᤢ ᤁᤧᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤐᤠᤱᤈᤢᤶ ᤗᤧᤵᤔᤠᤱ ᤁᤢᤱᤔᤠ ᤁᤧᤒᤠᤱᤄᤢᤒᤡ᥅ 17 ᤂᤧᤴ ᤂᤧᤏᤧ᤹ ᤁᤧᤗᤠᤃᤡᤖᤰ ᤐᤥᤱᤗᤖᤥ. ᤘᤣ᤹ᤜᤠ᤹ ᤗᤰᤁᤧᤄᤥᤒᤠ ᤐᤥᤱᤔᤠ ᤔᤧᤱᤄᤥᤏᤧᤴᤗᤖᤥ॥ 18 ᤂᤧᤏᤧ᤹ ᤁᤧᤘᤒᤢᤴᤍᤠᤰᤘᤠᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤗᤧ ᤐᤥᤱᤗᤖᤥ. ᤜᤧᤰᤁᤩᤠᤱ ᤌᤠᤱᤒᤧᤴ ᤁᤧᤘᤧᤶᤔᤥ ᤁᤧᤘᤠ᤹ᤔᤠ ᤁᤢᤔᤣ᤺ᤳᤋᤧᤴᤏᤢ ᤛ᤺ᤳᤋᤧ᤹ᤀᤥ॥ 19 ᤛᤡᤖᤠ᤹ ᤐᤎᤠᤱ ᤁᤧᤎᤠᤱᤔᤠ ᤁᤢᤶᤔᤠᤔᤠ ᤐᤧ᤺ᤱᤘᤠᤴ ᤁᤢᤀᤡᤛᤡᤰ. ᤂᤧᤸᤗᤧ ᤁᤢᤏᤢᤒᤰᤁᤥ ᤂᤧᤏᤧ᤹ ᤁᤧᤛᤡᤰᤆᤡᤶᤛᤧ᤹ᤀᤥ. ᤀᤠᤓᤧᤸᤗᤧᤛᤠᤱ ᤜᤠᤒᤠ ᤂᤧᤸᤗᤧ ᤁᤢᤗᤢᤱᤔᤠ᤹ ᤜᤡ᤺ᤶᤔᤥ ᤂᤧᤏᤧ᤹ ᤏᤠᤏᤢ᤹ᤖᤧ᤹ᤀᤠᤱ ᤘᤕᤧ᤹ᤀᤥ॥ 20 ᤀᤠᤒᤢᤃᤧᤴ ᤀᤠᤛ᤻ᤛᤠᤀᤣ. ᤌᤣᤀᤠᤱ ᤕᤧᤶᤒᤠ ᤜᤱᤈᤧᤏᤠ᤺ᤸᤗᤧ ᤁᤢᤗᤢᤱᤔᤠ᤹ ᤜᤡ᤺ᤶᤔᤥ ᤂᤧᤏᤧ᤹ ᤁᤧᤎᤠᤒᤠᤒᤣ᥅ ᤂᤧᤏᤧ᤹ ᤌᤣᤀᤠᤱ ᤀᤣᤕᤠᤱᤒᤧᤸᤗᤧ ᤁᤢᤔᤣ᤺ᤳᤋᤧᤴ ᤁᤧᤜᤧᤵᤋᤢᤒᤠᤒᤣ᥅ 21 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡ ᤕᤧᤵᤗᤧᤰᤁᤡᤱᤃ ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤜᤠᤒᤠ ᤘᤠ᤹ᤖᤥ. ᤂᤶᤓᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤗᤠᤶᤜᤠ᤹ ᤂᤢᤏᤧ᤹ ᤛᤠ᤹ᤖᤢᤖᤥ॥ 22 ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤁᤢᤈᤧᤴᤏᤥ ᤂᤧᤴ ᤌᤠᤛᤢᤖᤥ. ᤜᤧᤰᤁᤩᤠᤱ ᤀᤠᤵᤑᤣᤰ ᤁᤢᤗᤠᤕᤥᤸᤗᤧ ᤀᤡᤄᤣ᤺ᤱᤅᤡᤸᤗᤧ ᤂᤧᤴ ᤂᤣ᤺ᤰᤂᤢᤖᤥ॥ 23 ᤜᤧᤴᤌᤡᤶ ᤜᤥ᤺ᤵᤔᤠᤖᤧ ᤆᤥᤃᤢᤸᤗᤧ ᤂᤧᤴ ᤕᤃᤢᤈᤱᤛᤡ ᤐᤣ᤺ᤰᤗᤥ. ᤀᤠᤒᤠᤅᤣ ᤛᤠ᤹ᤖᤡᤰ ᤁᤢᤀᤍᤱ ᤆᤥ᤺ᤰᤔᤠᤖᤧ ᤂᤧᤴ ᤋᤠᤵᤐᤧ᤹ ᤐᤣ᤺ᤰᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.