ᤂᤠᤜᤢᤴ 31 - LIFOTNTᤗᤔᤢᤀᤣᤗ ᤜᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ 1 ᤗᤔᤢᤀᤣᤗ ᤜᤠᤱᤅᤡᤴ ᤁᤢᤶᤔᤠᤖᤧ ᤜᤢ᤹ᤖᤢᤒᤠ ᤂᤠᤜᤢᤴ ᤐᤠ᤺ᤴᤈᤠ᤺ᤰᤜᤠ᤹ ᤜᤠᤒᤠ ᤁᤴᤗᤥ— 2 ᤀᤠᤛ᤻ᤛᤠᤀᤣ ᤂᤧᤵᤛᤧ᤹ᤀᤥ᥄ ᤀᤠᤛᤠᤵᤐᤥ᤺ᤰᤁᤥ ᤗᤠᤶᤒᤠᤒᤠ ᤀᤠᤛ᤻ᤛᤠᤀᤣ ᤂᤧᤵᤛᤧ᤹ᤀᤥ᥄ ᤀᤠᤛ᤻ᤛᤠᤀᤣ ᤂᤧᤵᤛᤧ᤹ᤀᤥ. ᤀᤠᤱᤃᤠ᤹ ᤆᤥᤃᤢᤱᤒᤠ ᤀᤠᤔᤠᤱᤜᤢᤵᤐᤧᤸᤗᤧ ᤁᤢᤏᤢᤃᤵᤐᤣ᥄ 3 ᤁᤧᤎᤢᤶᤔᤡᤴ ᤔᤧᤴᤇᤢᤔᤠᤜᤠ᤹ ᤔᤧᤒᤡᤖᤧᤛᤧᤴᤏᤧ᤹ᤀᤠᤱ ᤔᤧᤔᤠ᤺ᤴᤍᤧᤴᤏᤧ᤹ᤀᤥ. ᤂᤧᤏᤧ᤹ ᤁᤧᤔᤢᤰᤛᤠᤶᤔᤡᤴ ᤂᤧᤱᤜᤠ᤹ᤀᤥ ᤔᤧᤍᤣᤛᤧᤴᤏᤧ᤹ᤀᤥ ᤂᤧᤱᤜᤠ᤹ᤖᤧ ᤜᤠᤱᤜᤠ᤹ ᤔᤧᤔᤧᤰᤂᤢᤛᤡᤀᤠᤱ ᤘᤠ᤹ᤖᤥ॥ 4 ᤗᤔᤢᤀᤣᤗᤀᤣ. ᤜᤠᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡ ᤕᤖᤡᤰ ᤌᤢᤱᤔᤠ ᤔᤧᤏᤢ᤹ᤏᤧᤴᤗᤥ. ᤁᤱᤃ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤣ᤺ᤴᤗᤥ. ᤕᤢᤰᤛᤠᤒᤠᤜᤠ᤹ᤖᤧ ᤌᤡ ᤛᤡᤖᤠ᤹ᤌᤠᤱᤔᤠ ᤔᤧᤏᤠ᤹ᤏᤧᤴᤗᤥ॥ 5 ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤔᤧᤎᤢᤅᤢ᤹ ᤜᤧᤰᤁᤩᤠᤱ ᤂᤠᤛᤧᤴ-ᤁᤢᤓᤠᤱᤜᤠ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤥ. ᤜᤶᤓᤩᤠᤱ ᤔᤧᤕᤢᤰᤋᤢᤛᤡᤒᤠ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤁᤧᤖᤧᤰ ᤕᤢᤰ ᤔᤧᤱᤄᤥᤶᤏᤠᤒᤠ ᤔᤧᤈᤥᤃᤢᤛᤡᤖᤥ॥ 6 ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤌᤡ ᤔᤧᤎᤢᤅᤢᤖᤖᤥ. ᤔᤢᤍᤥᤂᤠᤶᤍᤥ ᤁᤧᤒᤥᤱᤒᤠᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡ ᤔᤧᤎᤢᤅᤢᤖᤖᤥ॥ 7 ᤂᤧᤱᤜᤠ᤹ᤖᤧ ᤔᤧᤎᤢᤅᤢᤀᤠᤱ ᤂᤢᤴᤇᤡ᤹ ᤕᤠᤱᤛᤠ᤹ᤔᤠᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤖᤥ. ᤜᤧᤰᤁᤣ᤺ᤸᤗᤧ ᤂᤢᤴᤇᤡ᤹ ᤋᤢᤰᤂᤣᤴ ᤕᤠᤶᤔᤥ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤢᤴᤗᤖᤥ॥ 8 ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤠᤖᤧ᤹ᤀᤥ. ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤗᤧ ᤗᤠᤃᤡ ᤐᤠᤖᤧ᤹ᤀᤥ॥ 9 ᤐᤠᤖᤧ᤹ᤀᤠᤱ ᤁᤧᤘᤠ᤹ᤒᤠ ᤂᤠᤛᤧᤴ ᤗᤥ᤺ᤴᤍᤧ᤹ᤀᤥ. ᤕᤠᤱᤃᤧᤛᤠ᤹ᤒᤠ ᤏᤢ ᤋᤢᤰᤂᤣ ᤁᤧᤈᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤡᤴ ᤛᤧ᤺ᤵᤋᤧ᤹ᤀᤥ॥ ᤛᤢᤶᤒᤥᤎᤠᤛᤠᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳ 10 ᤛᤢᤶᤒᤥᤎᤠᤛᤠᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳ ᤜᤠ᤺ᤳᤗᤧ ᤂᤥᤔᤠ ᤛᤢᤰᤋᤢᤒᤣ᥅ ᤂᤢᤏᤧ᤹ᤃ ᤔᤢᤎᤡᤱ ᤗᤧᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤡᤔᤧᤸᤗᤢᤱᤔᤠ ᤆᤥᤰᤗᤥ॥ 11 ᤁᤢᤕᤧᤶᤒᤠ᤺ᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤏᤠᤛᤠ᤹ᤖᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤏᤢᤒᤠ ᤐᤠᤴ ᤂᤥᤔᤠ ᤁᤧᤛᤠᤰᤐᤠ ᤔᤧᤍᤢᤔᤢᤴᤗᤥ॥ 12 ᤂᤢᤏᤧ᤹ ᤁᤢᤜᤡᤱᤜᤡᤱ ᤁᤢᤕᤧᤶᤒᤠ᤺ᤴ ᤏᤢᤒᤠ ᤐᤠᤴ ᤆᤥᤃᤢ ᤐᤡᤖᤢᤖᤥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤌᤣᤀᤠᤱ ᤜᤠᤴᤋᤡ ᤔᤧᤈᤥᤃᤢᤴᤗᤥ॥ 13 ᤂᤢᤏᤧ᤹ᤃ ᤔᤧᤸᤗᤢᤰ ᤔᤢᤖᤡᤰ ᤏᤢ ᤂᤡ᤺ᤴ ᤋᤣᤳ ᤌᤠᤰᤔᤠᤖᤧ ᤗᤠᤃᤡ ᤛᤣᤃᤢᤖᤥ ᤜᤧᤰᤁᤩᤠᤱ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤐᤳᤗᤥ॥ 14 ᤗᤧᤱᤜᤱ ᤁᤧᤈᤥ᤺ᤰᤐᤠ ᤘᤠᤗᤠᤎᤠ᤺ᤸᤗᤧ ᤁᤢᤀᤡᤛᤡᤰ. ᤂᤧᤸᤗᤧ ᤔᤠ᤺ᤱᤄᤠᤗᤠᤶᤒᤠ ᤜᤡᤶᤔᤥ ᤁᤢᤈᤠ ᤋᤠᤖᤢᤖᤥ॥ 15 ᤂᤢᤏᤧ᤹ ᤂᤠᤔᤧᤴᤀᤥ᤺ᤳᤋᤣ ᤛᤧᤴᤍᤡᤰᤛᤠ ᤐᤥ᤺ᤰᤗᤥ. ᤂᤢᤏᤧ᤹ ᤁᤢᤜᤡᤶᤛᤕᤱᤗᤧ ᤗᤠᤃᤡ ᤆᤠᤔᤠ ᤌᤢᤱᤔᤠ ᤌᤥ᤺ᤰᤋᤢᤖᤥ. ᤜᤧᤰᤁᤩᤠᤱ ᤆᤢᤰᤔᤠ ᤆᤢᤰᤔᤠ ᤁᤢᤛᤧᤘᤠᤖᤥᤔᤠᤜᤠ᤹ ᤜᤠ᤺ᤳᤋᤢᤛᤡᤖᤥ॥ 16 ᤂᤢᤏᤧ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤱ ᤀᤡᤰᤋᤠᤵᤌᤡᤰ ᤀᤡᤅᤢᤖᤥ. ᤜᤧᤰᤁᤩᤠᤱ ᤌᤃᤢᤒᤠ ᤕᤠᤱᤅᤡᤸᤗᤧ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤕᤠᤰᤋᤢᤖᤥ॥ 17 ᤂᤢᤏᤧ᤹ ᤆᤠ᤺ᤳᤆᤠ᤺ᤳ ᤗ᤹ᤖᤡᤰ ᤁᤢᤕᤠ᤺ᤶᤒᤰᤁᤡᤴ ᤆᤥᤃᤢᤖᤥ. ᤂᤢᤏᤧ᤹ ᤁᤢᤕᤠ᤺ᤶᤒᤰᤗᤧ ᤗᤠᤃᤡ ᤁᤢᤜᤢᤰᤜᤠ᤹ ᤁᤧᤎᤢᤶᤒᤠ ᤆᤥᤰᤗᤥ॥ 18 ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤐᤥᤖᤒᤣ᤺ᤰᤐᤠ ᤏᤡᤛᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤣᤔᤡᤴ ᤛᤧᤴᤍᤡᤰ ᤔᤧᤛᤡᤏᤧᤴᤗᤥ॥ 19 ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤀ᤺ᤳᤋᤠ᤺ᤸᤗᤧ ᤁᤢᤗᤠ᤺ᤴ ᤕᤠᤱᤛᤡᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤢᤰᤁᤡᤸᤗᤧ ᤁᤢᤀᤡᤔᤧᤴ ᤋᤧᤶᤛᤢᤖᤥ॥ 20 ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤢᤜᤢᤰᤐᤰ ᤕᤶᤒᤠ ᤆᤥᤃᤢᤀᤠᤱ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤁᤢᤜᤢᤰᤁᤡᤴ ᤛᤴᤇᤢᤖᤥ॥ 21 ᤏᤠ᤺ᤱ ᤌᤠ᤺ᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤁᤢᤀᤣᤜᤠ᤹ᤖᤧ ᤗᤠᤃᤡ ᤔᤧᤃᤡᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤜᤧ᤺ᤰᤁᤱᤃᤱᤒᤠ ᤁᤧᤃᤥᤒᤠ ᤆᤠᤱ ᤔᤧᤈᤠᤰᤂᤢᤖᤥ॥ 22 ᤂᤢᤏᤧ᤹ ᤏᤧᤳᤏᤠᤀᤥ ᤑᤧᤔᤠᤖᤧ ᤗᤠᤃᤡ ᤂᤠᤶᤍᤣ᤺ᤳ ᤗᤥ᤺ᤶᤓᤣ᤺ᤳ ᤌᤠᤃᤢᤖᤥ. ᤂᤢᤏᤧ᤹ ᤏᤤᤏᤠᤛᤢᤳ ᤏᤢ ᤐᤖᤠᤴᤗᤠ ᤆᤠᤱ ᤆᤠᤰᤂᤢᤖᤥ॥ 23 ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤀᤣ ᤀᤡᤱᤎᤠᤱ ᤔᤧᤒᤡᤖᤢᤖᤥ. ᤂᤧᤵᤔᤥ ᤂᤢᤏᤧ᤹ ᤗᤠᤈᤣ᤹ᤀᤥᤒᤠ ᤗᤠᤶᤗᤥᤒᤠ ᤋᤢᤶᤓᤠᤰᤛᤠᤜᤠ᤹ᤏᤢ ᤕᤢᤱᤃᤴᤗᤥ॥ 24 ᤂᤢᤏᤧ᤹ ᤏᤤᤏᤠᤛᤢᤳ ᤆᤡᤖᤡᤰᤁᤧᤴ ᤆᤠᤱᤍᤣ᤺ᤳᤜᤠ᤹ ᤋᤕᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤋᤣᤳᤆᤠᤱᤜᤠ᤹ ᤛᤱᤄᤢᤖᤥ. ᤂᤧᤒᤩᤠᤱ ᤑ᤹ᤀᤡᤜᤠ᤹ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤖᤥ ᤛᤱᤄᤢᤖᤥ॥ 25 ᤂᤢᤏᤧ᤹ ᤁᤧᤎᤢᤶᤔᤠ ᤏᤢ ᤔᤡᤱᤛᤥ ᤀᤡᤱᤎᤠᤱᤛᤠᤔᤠ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤍᤠᤒᤠ ᤕᤧᤴᤜᤠ᤹ᤖᤧ ᤗᤠᤃᤡ ᤔᤢᤕᤧᤱ ᤀᤣ᤺ᤵᤔᤠ ᤛᤢᤰᤗᤥ॥ 26 ᤂᤢᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤐᤠᤴ ᤐᤠ᤺ᤳᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤌᤎᤵ ᤔᤧᤴᤗ᤹ᤔᤏᤠᤒᤠ ᤔᤡ᤺ᤶᤈᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤖᤢᤛᤡᤖᤥ॥ 27 ᤂᤢᤏᤧ᤹ ᤁᤢᤜᤡᤶᤛᤕᤱᤗᤧ ᤗᤠᤃᤡ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤀᤥᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤑᤠᤸᤗᤧᤀᤠᤱ ᤁᤢᤗᤧᤶᤔᤧᤕᤢᤏᤧᤴᤗᤥ॥ 28 ᤂᤢᤏᤧ᤹ ᤁᤢᤛ᤻ᤛᤠ ᤁᤢᤀᤣᤜᤠ᤹ ᤔᤧᤕᤧᤶᤛᤡᤱᤅᤠᤱ ᤁᤢᤏᤠᤖᤠ ᤔᤧᤓᤥᤛᤢᤖᤥ. ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧᤀᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤁᤢᤴᤒᤥ ᤑᤥᤛᤢᤖᤥ. 29 “ᤕᤖᤡᤰ ᤔᤧᤴᤇᤢᤔᤠᤜᤠ᤹ᤖᤧ ᤛᤠ᤹ᤖᤡᤰ ᤛᤢᤶᤒᤥᤎᤠᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤖᤥ. ᤁᤖ ᤂᤧᤱᤜᤠ᤹ ᤁᤧᤖᤧᤰ ᤂᤧᤏᤧ᤹ ᤁᤧᤏᤠ᤺ᤴᤍᤢᤛᤡᤀᤠᤱ ᤘᤠ᤹ᤖᤥ॥” 30 ᤏᤢᤒᤠ ᤏᤠᤖᤢᤶᤓᤢᤱᤅᤡᤴ ᤀᤡᤱᤀᤠᤗᤧᤰᤗᤧᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤶᤛᤡᤱᤔᤠᤴ ᤀᤡᤃᤧᤗᤧᤶᤒᤠ ᤁᤧᤒᤣ᤺ᤰᤐᤠ ᤆᤥᤰᤗᤥ. ᤁᤖ ᤕᤜᤘᤣ ᤍᤠᤱᤒᤧᤴᤏᤢ ᤁᤧᤃᤡᤔᤠ ᤔᤧᤴᤇᤢᤔᤠᤴᤏᤣ ᤁᤢᤏᤠᤖᤠ ᤑᤥᤔᤠ ᤐᤥᤱᤗᤥ॥ 31 ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤆᤥᤃᤢᤒᤠᤀᤥ ᤂᤢᤏᤧ᤹ᤀᤣ ᤔᤡᤱᤛᤥ ᤐᤡᤖᤧ᤹ᤀᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤰᤁᤡᤸᤗᤧ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤀᤣ ᤂᤢᤏᤧ᤹ ᤀᤡᤱᤎᤠᤱ ᤁᤧᤄᤥᤔᤠ ᤆᤥᤃᤢᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.