ᤂᤠᤜᤢᤴ 30 - LIFOTNTᤀᤠᤃᤢᤖᤧᤸᤗᤧ ᤁᤢᤒᤠ᤺ᤵᤔᤠ ᤐᤠ᤺ᤴᤜᤠ᤹ 1 ᤕᤠᤁᤣᤖᤧ ᤁᤢᤛ᤻ᤛᤠ ᤀᤠᤃᤢᤖᤧᤸᤗᤧ ᤁᤢᤄᤠᤜᤢᤴ ᤏᤡᤱᤘᤠ᤹ᤑᤢᤔᤠᤱ ᤐᤠ᤺ᤴᤈᤠ᤺ᤰ— ᤁᤴ ᤔᤏᤠ᤺ᤸᤗᤧ ᤀᤡᤌᤡᤀᤣᤗ ᤏᤢ ᤕᤢᤁᤠᤗᤧᤴ ᤀᤢᤘᤠ ᤆᤥᤃᤢᤛᤡᤒᤠᤖᤥ— ᤀᤠᤱᤃᤠ᤹ ᤏᤠᤛᤠᤱᤗᤥ. ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤖ ᤀᤠᤱᤃᤠ᤹ ᤏᤠ᤺ᤶᤔᤠ ᤛᤢᤰᤋᤢᤱᤗᤥ॥ 2 ᤀᤠᤱᤃᤠ᤹ᤃ ᤀᤍᤱ ᤜᤧᤰᤍᤱᤒᤠᤀᤠᤖᤥ. ᤔᤏᤠᤀᤥ ᤘᤠ᤹ᤔᤠ ᤁᤧᤒᤥᤱᤒᤠ ᤂᤠᤛᤡᤱᤏᤡ᤺ᤵᤔᤧᤴ ᤔᤧᤃᤳᤋᤠᤴᤗᤥ॥ 3 ᤀᤠᤱᤃᤠ᤹ ᤛᤡᤰᤁᤢᤶ ᤏᤡᤱᤘᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ. ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤧᤸᤗᤧ ᤁᤢᤏᤧᤜᤡᤏᤡᤱᤘᤠᤴ ᤔᤧᤃᤳᤋᤠᤴᤗᤥ॥ 4 ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤜᤠᤳ ᤌᤥ ᤌᤥ᤺ᤰᤛᤡᤱ ᤐᤣᤀᤠᤱ ᤘᤠ᤹ᤒᤣ᥅ ᤜᤧᤰᤁᤩᤠᤱ ᤕᤥ ᤌᤠᤛᤡᤱ ᤕᤧᤀᤠᤱ ᤘᤠ᤹ᤒᤣ᥅ ᤜᤠ᤺ᤳᤗᤧ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤰᤁᤥ ᤋᤧᤶᤛᤢᤀᤠᤱ ᤘᤠ᤹ᤒᤣ᥅ ᤜᤠ᤺ᤳᤗᤧ ᤆᤫᤠ᤺ᤳᤋᤡᤴ ᤂᤠᤶᤍᤣ᤺ᤳᤋᤥ ᤁᤡᤳᤋᤢᤀᤠᤱ ᤘᤠ᤹ᤒᤣ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤐᤡᤛᤠᤱ ᤁᤢᤏᤢᤵᤔᤠ ᤌᤠᤖᤡᤰ ᤜᤠ᤺ᤳᤗᤧ ᤏᤧᤛ᤻ᤛᤢᤀᤠᤱ ᤏᤧᤒᤣ᥅ ᤁᤢᤔᤡᤱᤅᤡᤴ ᤌᤧᤔᤠᤒᤣ᥅ ᤂᤶᤓᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ᤺ᤸᤗᤧ ᤁᤢᤔᤡᤱᤅᤡᤴ ᤌᤣᤒᤣ᥅ ᤂᤧᤏᤧ᤹ ᤁᤧᤗᤧᤛᤢᤏᤧᤓᤃᤪ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹ᤀᤥ॥ 5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤒᤠ᤺ᤴᤈᤠᤰᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤰᤗᤥ. ᤂᤢᤏᤧ᤹ᤀᤥ ᤁᤧᤀᤡ᤺ᤶᤛᤡᤱᤒᤠᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ᤃ ᤂᤥᤖᤥ॥ 6 ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤜᤠ᤹ᤀᤥ ᤌᤣᤀᤠᤱ ᤔᤧᤕᤥ᤹ᤖᤧᤴᤏᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤁᤧᤓᤧ᤺ᤰ ᤜᤧᤰᤁᤩᤠᤱ ᤀᤡᤱᤗᤧᤰ ᤁᤧᤈᤥ᤺ᤰᤐᤠ ᤁᤧᤗᤣ᤺ᤳᤗᤥ॥ ᤘᤣ᤹ ᤂᤠᤜᤢᤴᤜᤠ᤹ 7 ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠ ᤏᤧᤳᤇᤡ ᤐᤠᤴ ᤏᤠ᤺ᤰᤏᤧᤖᤥ. ᤀᤠᤱᤃᤠ᤹ ᤛᤡᤔᤠᤏᤢ᤺ᤸᤗᤧ ᤋᤃᤡ ᤂᤧᤱᤜᤠ᤹ ᤔᤧᤏᤠ᤹ᤖᤧᤴᤏᤧ᤹ᤀᤥ॥ 8 ᤔᤧᤴᤘᤠ᤹ᤔᤏᤠ ᤏᤢ ᤀᤡᤱᤗᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ᤗᤠᤶ ᤂᤧᤳᤋᤧ᤹ᤀᤥ. ᤀᤠᤱᤃᤠ᤹ ᤕᤠᤱᤃᤧᤛᤠ᤹ᤒᤠᤀᤠᤱ ᤔᤧᤈᤥᤃᤠᤱᤅᤡᤴᤏᤧ᤹ᤀᤥ. ᤂᤧᤒᤩᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠᤀᤠᤱ ᤔᤧᤈᤥᤃᤠᤱᤅᤡᤴᤏᤧ᤹ᤀᤥ॥ ᤁᤖ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠ ᤆᤠᤔᤠᤖᤰ ᤐᤡᤖᤠᤱᤅᤧ᤹ᤀᤥ॥ 9 ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤕᤖᤡᤰ ᤁᤳᤋᤢᤱᤒᤠᤸᤗᤧ ᤆᤢᤃᤢᤸᤗᤧ ᤀᤠᤍᤠᤱᤒᤠ ᤏᤠ᤹ᤏᤧᤀᤠᤱ “ᤕᤜᤘᤣ ᤍᤠᤱᤒᤧᤴ” ᤜᤠ᤺ᤵᤐᤣ ᤗ᤹ᤀᤠᤒᤡᤗᤠᤖᤥ. ᤀᤡᤃᤪ ᤀᤠᤱᤃᤠ᤹ ᤕᤠᤱᤛᤠ᤹ᤀᤠᤒᤠᤸᤗᤧ ᤆᤥᤃᤢᤸᤗᤧ ᤂᤢ᤺ᤳᤋᤠᤀᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤁᤢᤏᤠᤔᤧᤴᤇᤠ᤹ ᤆᤥᤃᤢᤱᤒᤡᤗᤠᤖᤥ॥ 10 ᤜᤡᤶᤍᤠᤱᤒᤠᤸᤗᤧ ᤁᤢᤍᤃᤡ ᤛᤧᤘᤠᤖᤥᤒᤠᤴ ᤆᤧᤰᤕᤠ ᤔᤧᤔᤧᤳᤋᤧᤴᤏᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤂᤧᤸᤗᤧ ᤂᤧᤏᤧ᤹ ᤔᤠᤱᤍᤣ ᤛᤠᤱᤃᤪᤠ ᤁᤧᤔᤧᤳᤗᤥ. ᤂᤧᤒᤩᤠᤱ ᤂᤧᤏᤧ᤹ ᤁᤢᤗᤧᤰᤘᤠ ᤋᤢᤶᤔᤠ ᤐᤥᤱᤗᤥ॥ 11 ᤀᤰᤋᤱᤒᤠ ᤔᤏᤠᤀᤠᤱ ᤔᤧᤘᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠᤴ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤠᤜᤠ᤹ ᤔᤢ᤹ᤀᤡᤛᤠᤔᤠ ᤔᤧᤶᤔᤧᤳᤋᤢᤴᤛᤡᤴᤗᤥ. 12 ᤂᤧᤱᤜᤠ᤹ ᤀᤠᤵᤑᤣᤰ ᤂᤢᤴᤇᤡ᤹ ᤏᤡᤔᤥ ᤛᤢᤳᤌᤥ ᤔᤧᤈᤥᤰᤗᤥ ᤁᤖ ᤂᤢᤴᤇᤡ᤹ ᤀᤠᤵᤑᤣᤰ ᤆᤡ᤺ᤴᤈᤡ᤺ᤴᤄᤢᤔᤠᤗᤠᤶ ᤛᤣᤛᤣ ᤔᤧᤶᤒᤥᤱᤏᤧᤴᤗᤥ. 13 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤜᤠ᤹ ᤛᤠ᤹ᤖᤡᤰ ᤁᤧᤜᤧᤴᤇᤡᤱᤒᤠ ᤆᤥᤰᤗᤥ. ᤂᤢᤴᤇᤡ᤹ ᤀᤥᤔᤧᤵᤔᤠᤴ ᤆᤠ᤹ᤖᤡᤰ ᤛᤡᤰᤁᤧᤗᤧ᤺ᤱᤒᤠ ᤆᤥᤰᤗᤥ. 14 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤒᤥ᤹ᤒᤠᤜᤠ᤹ ᤋᤠᤓᤣᤏᤢ ᤁᤢᤍᤱᤒᤠ ᤆᤥᤰᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤣ᤺ᤱᤜᤠ᤹ ᤑᤧᤈᤠᤏᤢ ᤁᤢᤍᤱᤒᤠ ᤆᤥᤰᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤕᤠᤱᤃᤧᤛᤠ᤹ᤒᤠᤜᤠ᤹ ᤔᤧᤗᤖᤢᤛᤡᤖᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤆᤠᤜᤠᤘᤀᤥ ᤁᤧᤎᤠᤒᤠᤜᤠ᤹ ᤔᤧᤗᤖᤢᤛᤡᤖᤥ॥ 15 ᤋᤥᤍᤡᤔᤠ ᤗᤠ᤺ᤰᤑᤧᤳᤋᤡᤸᤗᤧ ᤏᤧᤳᤇᤡ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤠ᤹ᤛᤡᤖᤥ. ᤂᤧᤴ ᤏᤧᤵᤔᤠᤱᤗᤧ ᤀᤰᤂᤣ ᤐᤠ᤺ᤳᤇᤢ. “ᤀᤠᤴᤇᤡᤃᤣ ᤕᤠᤵᤔᤡ ᤀᤠᤒᤡᤖᤧ᤹ᤀᤥ᥄” ᤛᤢᤶᤛᤡ ᤐᤠ᤺ᤴᤜᤠ᤹ ᤘᤠ᤹. ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤱᤄᤠᤏᤧᤴᤗᤥ. ᤗᤡᤛᤡ ᤐᤠ᤺ᤴᤜᤠ᤹ ᤘᤠ᤹ ᤂᤧᤱᤜᤠ᤹ ᤀᤠᤓᤧᤸᤗᤧᤀᤠᤱ “ᤕᤠ᤺ᤰᤋᤢ” ᤔᤧᤸᤗ᤹ᤏᤧᤴᤗᤥ॥ 16 ᤀᤡᤐᤢᤱᤅᤡᤴ ᤜᤧᤰᤁᤩᤠᤱ ᤁᤢᤛ᤻ᤛᤠ ᤔᤧᤴᤘᤠ᤹ᤔᤏᤠᤔᤠ ᤛᤠᤵᤐᤥ᤺ᤰᤁᤡᤴ. ᤂᤠᤶᤒᤣ᤺ᤰᤁᤡᤴ. ᤆᤫᤠ᤺ᤳᤋᤡᤸᤗᤧ ᤀᤠᤓᤧᤸᤗᤧᤀᤠᤱ ᤔᤧᤍᤡᤶᤏᤧᤴᤗᤥ. ᤂᤧᤒᤩᤠᤱ ᤔᤡ᤺ᤴ. ᤀᤠᤓᤧᤸᤗᤧᤀᤠᤱ “ᤕᤠ᤺ᤰᤋᤢ” ᤔᤧᤗ᤹ᤏᤧᤴᤗᤥ॥ 17 ᤀᤠᤵᤑᤣᤰ ᤁᤢᤶᤒᤠ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤧᤸᤗᤧ. ᤜᤧᤰᤁᤩᤠᤱ ᤂᤍᤠᤰᤔᤡ ᤁᤢᤶᤔᤠᤖᤧ ᤔᤢᤖᤠ ᤔᤧᤳᤋᤢᤒᤠᤴ ᤁᤧᤈᤡ᤺ᤵᤐᤧᤸᤗᤧ. ᤁᤢᤔᤡᤰᤁᤡᤴ ᤛᤣ᤺ᤱᤄᤠᤒᤠ ᤀᤠ᤺ᤰᤘᤠᤜᤠ᤹ᤖᤧ ᤔᤧᤀᤃᤢ ᤔᤧᤗ᤺ᤳᤋᤢᤖᤥ. ᤜᤧᤰᤁᤩᤠᤱ ᤁᤡ᤺ᤳᤌᤜᤠ᤹ᤖᤧ ᤂᤧᤴ ᤔᤧᤈᤖᤥ॥ 18 ᤛᤢᤶᤛᤡ ᤐᤠ᤺ᤴᤜᤠ᤹ ᤘᤠ᤹. ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ ᤗᤡᤛᤡ ᤐᤠ᤺ᤴᤜᤠ᤹ ᤘᤠ᤹. ᤂᤧᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤁᤠᤴᤗᤥ— 19 ᤋᤠᤱᤛᤠᤰᤐᤥ ᤁᤰᤁᤑᤡ᤺ᤰᤔᤧᤸᤗᤧ ᤁᤢᤒᤧᤔᤠᤴ. ᤕᤠᤰᤐᤣ᤹ ᤛᤶᤎᤠᤱ ᤀᤛᤣ᤺ᤰᤐᤠᤸᤗᤧ ᤁᤢᤛ᤺ᤴᤇᤡᤱᤔᤠᤴ. ᤋᤢᤱᤃᤥᤍᤡᤱ ᤘᤖ᤺ᤱᤅᤥ ᤘᤠᤗᤠᤎᤠ᤺ᤸᤗᤧ ᤁᤢᤈᤠ᤺ᤰᤔᤠᤴ ᤜᤧᤰᤁᤩᤠᤱ ᤔᤧᤴᤇ᤻ᤕᤠ᤺ᤴᤏᤢ ᤛᤥᤖᤡᤰ ᤕᤧᤶᤒᤡᤳᤇᤠ᤺ᤸᤗᤧ ᤁᤢᤘᤠ᤹ᤔᤠᤴ॥ 20 ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤕᤧᤵᤗᤧᤰᤁᤡᤴ ᤀᤰᤋᤱᤒᤠ ᤆᤥᤰᤗᤥ— ᤂᤧᤸᤗᤧ ᤕᤧᤶᤒᤡᤳᤇᤠᤴ ᤗᤖᤢᤍᤣᤛᤢᤀᤠᤱ ᤁᤢᤶᤒᤪᤠᤴ ᤋᤢᤃᤢ᤹ ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤌᤣᤀᤠᤱ ᤔᤧᤶᤓᤣ᤺ᤴᤏᤣ ᤘᤠ᤹ᤀᤧᤖᤥ᥄” 21 ᤛᤢᤶᤛᤡ ᤐᤠᤴ ᤘᤠ᤹. ᤂᤧᤸᤗᤧ ᤂᤠᤶᤒᤣ᤺ᤰᤔᤠᤴ ᤕᤰᤂᤢᤖᤥ. ᤗᤡᤛᤡ ᤐᤠᤴ ᤘᤠ᤹ ᤂᤧᤴ ᤌᤶᤔᤠᤀᤣ ᤔᤧᤛᤢᤰᤋᤢᤴᤗᤥ— 22 ᤕᤥ᤺ᤃ᤻ᤒᤧᤴ ᤜᤠᤱ ᤐᤥᤱᤒᤠ. ᤀᤍᤱ ᤔᤏᤠ᤺ᤸᤗᤧ ᤁᤢᤄᤠᤄᤠ ᤆᤠᤔᤠ ᤂᤥᤛᤢᤒᤠ. 23 ᤏᤠᤔᤧᤴᤏᤢ᤹ᤖᤢᤶᤔᤠ ᤔᤧᤴᤇᤢᤔᤠ᤺ᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤒᤠᤴ ᤜᤧᤰᤁᤩᤠᤱ ᤁᤢᤜᤡᤶᤍᤠᤱᤔᤠᤴ ᤂᤧᤳᤋᤢᤀᤠᤱ ᤀᤠᤵᤑᤣᤰ ᤜᤡᤶᤍᤠᤱᤔᤠ ᤁᤧᤒᤥᤱᤔᤠ ᤕᤥ᤺ᤃ᤻ᤔᤠᤴ॥ 24 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤡᤛᤡ ᤐᤠ᤺ᤴᤜᤠ᤹ ᤆᤢᤰᤛᤠ ᤘᤠ᤹ᤖᤥ. ᤁᤖᤛᤠᤱ ᤂᤧᤱᤜᤠ᤹ ᤆᤠ᤹ᤖᤡᤰ ᤛᤡᤰᤁᤢᤶᤏᤡᤒᤠ ᤆᤥᤰᤗᤥ— 25 ᤛᤡᤰᤆᤥᤒᤠᤜᤠ᤹ ᤔᤧᤴᤎᤢᤶᤔᤏᤠᤒᤠ ᤛᤠ᤹ᤖᤡᤰ ᤆᤢᤰᤛᤠ ᤌᤰᤛᤠᤛᤡᤖᤥ ᤁᤖᤛᤠᤱ ᤜᤠᤱᤘᤠᤔᤠ ᤕᤧᤶᤔᤥ ᤂᤧᤱᤜᤠ᤹ᤖᤧ ᤆᤠᤔᤠ ᤁᤢᤈᤠ ᤕᤠᤱᤔᤧᤄᤥ᤺ᤳᤋᤢᤖᤥ. 26 ᤁᤢᤔᤡ ᤁᤧᤜᤥᤵᤐᤠ ᤛᤢᤒᤠᤜᤠ᤹ ᤔᤧᤴᤎᤢᤔᤏᤠᤒᤠ ᤌᤰᤛᤠᤛᤡᤖᤥ ᤁᤖᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶ ᤕᤠᤰᤐᤣ᤹ᤀᤥ ᤔᤧᤈᤥᤃᤢᤖᤥ. 27 ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤜᤥᤵᤗᤥ. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤔᤧᤜᤢᤵᤛᤡᤱᤅᤠᤱ ᤌᤰᤛᤢᤒᤠᤜᤠ᤹ ᤜᤧᤰᤁᤣ ᤁᤢᤗᤢᤵ ᤁᤢᤗᤢᤵ ᤗᤠᤱᤔᤧᤄᤣ᤺ᤰᤗᤥ. 28 ᤜᤴᤍᤃᤣ᤺ᤰᤁᤧᤴ ᤜᤢᤰᤁᤡᤸᤗᤧ ᤋᤧᤶᤔᤠ ᤛᤢᤰᤋᤧᤳᤗᤥ ᤁᤖᤛᤠᤱ ᤜᤠᤱᤜᤡᤶᤔᤥ ᤂᤧᤴ ᤂᤥᤍᤧᤳᤗᤥ॥ 29 ᤛᤢᤶᤛᤡ ᤐᤠ᤺ᤴᤜᤠ᤹ ᤘᤠ᤹. ᤂᤧᤱᤜᤠ᤹ ᤗᤠᤱᤔᤧᤄᤣ᤺ᤰᤁᤡᤸᤗᤧ ᤆᤠᤱᤈᤠᤱ ᤔᤧᤗ᤹ᤖᤥ. ᤗᤡᤛᤡ ᤂᤧᤱᤜᤠ᤹ ᤔᤧᤜᤧᤴᤇᤡᤱᤗ ᤏᤠ ᤏᤢ ᤁᤳᤏᤠ ᤗᤠᤱᤔᤧᤄᤣ᤺ᤰᤗᤥ— 30 ᤂᤡᤖᤡᤱᤒᤠᤴ ᤌᤰᤛᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤎᤢᤶᤒᤠ ᤆᤥᤰᤗᤥ. ᤂᤧᤴ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤁᤢᤍᤃᤠᤱᤅᤠᤱ ᤔᤧᤃᤡᤏᤧᤴᤗᤥ. 31 ᤀᤧ᤺ᤳᤗᤧ᤹ᤀᤠᤱ ᤀᤧ᤺ᤳᤗᤧ᤹ ᤗᤠᤱᤃᤧᤄᤣ᤺ᤰᤐᤠ ᤀᤡᤱᤘᤠ. ᤔᤧ᤺ᤴᤍᤠᤒᤁᤠ ᤏᤢ. ᤌᤰᤛᤢᤒᤠᤜᤠ᤹ ᤁᤢᤃᤒᤪᤡᤱ ᤁᤧᤕᤧᤶᤒᤠᤀᤠᤱ ᤗᤠᤱᤃᤧᤄᤣ᤺ᤰᤐᤠ ᤜᤠᤱ॥ 32 ᤂᤧᤏᤧ᤹ ᤀᤍᤱ ᤗᤠᤶᤔᤡᤴ ᤁᤧᤏᤠ᤺ᤳᤋᤢᤀᤠᤱ ᤀᤠᤵᤑᤣᤰ ᤁᤧᤈᤶᤛᤡᤱᤏᤧᤓᤃᤪ. ᤀᤡᤃᤪ ᤂᤧᤏᤧ᤹ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤘᤠ᤹ᤏᤧᤓᤃᤪ. ᤂᤧᤏᤧ᤹ ᤁᤧᤶᤒᤪᤠ᤺ᤴ ᤁᤧᤜᤢᤰᤜᤠ᤹ᤖᤧ ᤀᤠᤸᤗᤥ ᤋᤧᤵᤋᤧ᤹ᤀᤥ᥄ 33 ᤌᤣᤀᤠᤱᤓᤧᤸᤗᤧ ᤐᤡᤳᤏᤢᤴ ᤀᤡ᤺ᤱᤔᤠᤀᤠᤱ ᤂᤩᤢ᤹ ᤗ᤺ᤴᤗᤥ. ᤜᤧᤰᤁᤩᤠᤱ ᤏᤧᤒᤥ᤺ᤴ ᤏᤢᤰᤔᤧᤸᤗᤧ ᤔᤠᤰᤂᤡ᤹ ᤘᤕᤢᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤡᤰ ᤑᤥ᤺ᤱᤔᤧᤸᤗᤧ ᤂᤧᤔᤠ᤹ ᤐᤥᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.