ᤂᤠᤜᤢᤴ 29 - LIFOTNT

¹ ᤕᤧᤳᤗᤧᤱ ᤕᤧᤳᤗᤧᤱ ᤔᤧᤓᤧ᤺ᤰᤋᤢᤛᤠᤱ ᤁᤢᤓᤠ ᤜᤠᤍᤡᤱᤅᤣ ᤌᤰᤏᤧᤓᤃᤪ. ᤘᤣ᤺ᤵᤔᤠ ᤔᤧᤱᤄᤥᤀᤣ ᤌᤡᤰᤗᤧᤱᤔᤠᤸᤗᤧ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥

² ᤛᤠᤶᤕᤥᤒᤠ ᤔᤏᤠᤴ ᤏᤢ᤹ᤍᤠᤏᤧᤓᤃᤪ ᤔᤏᤠᤜᤠ᤹ ᤔᤧᤛ᤺ᤳᤗᤥ. ᤁᤖ ᤋᤠᤰᤁᤧᤓᤧ᤹ᤒᤧᤸᤗᤧ ᤕᤢᤰ ᤆᤥᤃᤢᤸᤗᤧ ᤔᤏᤠᤜᤠ᤹ ᤔᤧᤕᤠ᤺ᤳᤗᤥ॥

³ ᤛᤡᤰᤁᤢᤶᤏᤡᤱᤘᤠ ᤁᤢᤛᤡᤖᤠ᤹ᤃᤧᤎᤠᤱᤒᤠ ᤔᤏᤠ᤺ᤸᤗᤧ ᤁᤢᤶᤒᤠ ᤁᤢᤏᤡᤱᤘᤠ᤹ ᤋᤠᤛᤢᤖᤥ. ᤁᤖ ᤕᤧᤶᤒᤠ ᤜᤱᤈᤣᤏᤠᤜᤠ᤹ᤏᤢ ᤁᤧᤘᤠ᤹ᤒᤧᤸᤗᤧ ᤕᤠᤱᤛᤠᤁᤢᤴᤎᤣᤴ ᤜᤏᤧ ᤔᤧᤰᤂᤢᤖᤥ॥

⁴ ᤂᤠᤛᤧᤴᤗᤠᤶᤒᤠ ᤜᤠᤱᤅᤡᤸᤗᤧ ᤗᤠᤈᤣᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤠᤃᤢᤖᤥ. ᤁᤖ ᤛᤢᤖᤢᤋᤩᤠᤱ ᤆᤠᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤧᤸᤗᤧ ᤂᤠᤶᤄᤢ᤺ᤴ ᤂᤠᤵᤐᤢ ᤆᤥᤃᤢᤖᤥ॥

⁵ ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤔᤢᤷᤗᤧ᤺ᤶᤒᤠ ᤐᤠᤴ ᤁᤧᤔᤧᤵᤐᤧᤸᤗᤧ ᤂᤢᤴᤇᤡ᤹ ᤗᤠᤱᤜᤠ᤹ ᤁᤧᤎᤠᤒᤠ ᤀᤡᤈᤥᤴ ᤁᤧᤛᤢᤀᤠᤱ ᤏᤧᤖᤥ॥

⁶ ᤋᤠᤰᤁᤧᤓᤧ᤹ᤒᤠᤜᤠ᤹ ᤂᤢᤴᤇᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤆᤧᤴᤏᤥ ᤔᤧᤎᤠᤖᤥ. ᤁᤖ ᤛᤠᤶᤕᤥᤒᤠᤜᤠ᤹ ᤛᤠᤶᤗᤥᤔᤠ ᤏᤢ ᤛ᤺ᤵᤔᤠ ᤔᤧᤛᤢᤰᤗᤥ॥

⁷ ᤛᤠᤶᤕᤥᤒᤠᤜᤠ᤹ᤖᤧ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤛᤧᤴᤏᤡᤴ ᤀᤥᤔᤧᤔᤧᤳᤋᤢᤖᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤏᤡ ᤔᤧᤸᤗᤠᤵᤋᤢᤴᤗᤥ॥

⁸ ᤕᤠᤵᤔᤡ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠᤜᤠ᤹ᤖᤧ ᤕᤧᤰᤕᤰ ᤂᤠᤖᤠᤰ ᤛᤡᤰᤐᤥ᤺ᤰᤗ ᤔᤧᤕᤠ᤺ᤴᤍᤢᤖᤥ. ᤁᤖ ᤛᤡᤰᤁᤢᤶᤏᤡᤒᤠ ᤔᤏᤠᤜᤠ᤹ᤖᤧ ᤛᤡᤰᤐᤥ᤺ᤰᤔᤠᤴ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢᤖᤥ॥

⁹ ᤛᤡᤰᤁᤢᤶᤏᤡᤒᤠ ᤔᤏᤠᤴ ᤀᤍᤱᤅᤡᤴᤏᤢ ᤂᤠᤛᤧᤴᤜᤡᤶᤔᤥ ᤐᤣ᤺ᤰᤏᤧᤓᤃᤪ. ᤀᤍᤱ ᤔᤏᤠᤴ ᤑᤰᤗ᤺ᤴ ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤵᤔᤥ ᤐᤠ᤺ᤴᤍᤱ ᤔᤧᤒᤥᤱᤏᤧᤴᤗᤥ॥

¹⁰ ᤔᤠᤰᤂᤡ᤹ ᤁᤧᤛᤧᤒᤠ ᤔᤏᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤔᤏᤠᤴ ᤔᤧᤈᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤏᤡᤖᤡᤰᤁᤠᤱ ᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤛᤧᤵᤔᤠ ᤔᤧᤃᤥ᤺ᤳᤋᤢᤖᤥ॥

¹¹ ᤀᤍᤱ ᤔᤏᤠ᤺ᤸᤗᤧ ᤁᤢᤛᤡᤰ ᤐᤥ᤺ᤰᤔᤠᤴ ᤁᤧᤖᤧᤰ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤁᤖ ᤛᤡᤰᤁᤢᤶᤛᤠᤒᤠ ᤔᤏᤠᤴ ᤛᤫᤠ᤺ᤳ ᤔᤧᤳᤇᤡᤱᤅᤠᤱ ᤘᤠ᤹ᤖᤥ॥

¹² ᤕᤢᤰᤛᤠᤒᤠ ᤔᤏᤠ᤺ᤸᤗᤧ ᤀᤡᤱᤗᤧᤰ ᤐᤠ᤺ᤴᤜᤠ᤹ ᤂᤧᤵᤛᤢᤏᤧᤓᤃᤪ. ᤂᤧᤸᤗᤧ ᤁᤧᤖᤧᤰ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤒᤥᤱᤗᤥ॥

¹³ ᤕᤠᤱᤃᤧᤛᤠ᤹ᤒᤠ ᤏᤢ ᤁᤧᤕᤢᤰᤐᤠᤜᤠ᤹ ᤁᤢᤍᤱᤒᤠᤛᤡᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤏᤧᤵᤔᤠᤱ ᤔᤡᤰᤁᤧᤏᤡᤒᤠ ᤆᤥᤃᤢᤛᤡᤖᤥ॥

¹⁴ ᤜᤠᤱᤅᤡᤸᤗᤧ ᤕᤠᤱᤃᤧᤛᤠ᤹ᤒᤧᤴ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤏᤧᤓᤃᤪ. ᤂᤧᤴ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤴ ᤛᤍᤠᤍᤡᤱ ᤁᤶᤒᤪᤠᤱ ᤐᤥᤱᤗᤥ॥

¹⁵ ᤋᤥ᤺ᤶᤔᤠᤖᤧ ᤗᤠᤃᤡ ᤕᤠᤰᤔᤏᤠᤒᤠ ᤁᤛᤡᤰᤐᤧᤸᤗᤧ ᤏᤢ ᤑᤧ᤺ᤰᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤀᤠᤒᤡᤖᤥ. ᤁᤖ ᤁᤢᤒᤠ᤺ᤵᤐᤠ᤺ᤳ ᤗᤧᤵᤔᤏᤠᤒᤠ ᤛᤠ᤺ᤸᤗᤧ ᤁᤢᤶᤔᤠ ᤁᤢᤏᤠᤎᤠᤛᤢ ᤐᤡᤖᤢᤖᤥ॥

¹⁶ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤏᤢ᤹ ᤔᤧᤍᤠ᤺ᤸᤗᤧ ᤗᤠᤕᤥᤴ ᤏᤠᤱ ᤐᤥᤖ ᤐᤣ᤺ᤰᤗᤥ. ᤁᤖ ᤛᤠᤶᤕᤥᤒᤠᤜᤠ᤹ᤖᤧ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤧᤴ ᤔᤧᤏᤡᤛᤢᤖᤥ॥

¹⁷ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤴ ᤜᤧᤴᤌᤡᤶᤔᤥ ᤕᤠᤰᤋᤧ᤹ᤀᤥ. ᤂᤧᤒᤩᤠᤱ ᤂᤧᤸᤗᤧ ᤂᤧᤏᤧ᤹ ᤛᤏᤠᤖᤢᤱ ᤁᤧᤒᤥᤱᤗ ᤆᤥᤃᤢᤖᤥ ᤂᤧᤸᤗᤧ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤛᤠ᤹ᤖᤡᤰ ᤁᤧᤏᤡᤱᤘᤠ᤹ ᤋᤠᤛᤢᤖᤥ॥

¹⁸ ᤋᤠ᤺ᤴᤍᤡᤃᤧᤴ ᤛᤢᤑᤥ ᤁᤧᤜᤥᤵᤐᤠᤍᤧᤴᤏᤥ ᤔᤏᤠᤜᤠ᤹ ᤕᤧᤔᤧᤴᤍᤱ ᤔᤧᤒᤥᤱᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥

¹⁹ ᤐᤠ᤺ᤴᤏᤡᤸᤗᤧᤖᤰ ᤛᤧᤘᤠᤖᤥᤒᤠᤜᤠ᤹ ᤋᤥ᤺ᤶᤔᤠ ᤛᤢᤰᤔᤧᤴᤍᤧᤳᤏᤧᤴᤗᤥ. ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤛᤠᤱ ᤏᤡᤱᤘᤠ᤹ ᤔᤧᤶᤒᤡᤖᤢᤴᤗᤥ॥

²⁰ ᤜᤠᤖᤠᤘᤖᤠ ᤁᤧᤒᤠ᤺ᤵᤐᤠ ᤔᤏᤠᤴ ᤌᤣ ᤂᤧᤏᤧ᤹ ᤁᤧᤏᤡᤛᤢᤒᤡ᥅ ᤂᤧᤴᤏᤢ᤺ᤸᤗᤧᤃ ᤀᤍᤱᤅᤡᤸᤗᤧ ᤁᤢᤗᤠᤃᤡ ᤕᤖᤡᤰ ᤏᤡᤱᤛᤠᤱ ᤘᤠ᤹ᤖᤥ॥

²¹ ᤔᤏᤠ᤺ᤸᤗᤧ ᤁᤢᤛᤧᤘᤠᤖᤥᤒᤧᤴ ᤆᤢ᤺ᤰᤁᤠᤱᤎᤥᤀᤣ ᤀᤧ᤹ᤛᤡᤱᤗ ᤕᤠ᤺ᤴᤍᤢᤏᤧᤓᤃᤪ. ᤏᤡᤴᤎᤠᤛᤣ᤺ᤰᤀᤥ ᤂᤧᤴ ᤋᤢᤰᤂᤣ ᤁᤧᤈᤠ᤺ᤵᤐᤠ ᤐᤥᤱ᤹॥

²² ᤁᤢᤕᤠ᤺ᤰ ᤁᤧᤗᤧ᤹ᤒᤠ ᤔᤏᤠ᤺ᤸᤗᤧ ᤕᤖᤡᤰ ᤂᤧᤔᤠ᤹ ᤑᤥ᤺ᤰᤂᤢᤖᤥ. ᤜᤧᤰᤁᤩᤠᤱ ᤁᤢᤛᤡᤰ ᤁᤧᤈᤶᤒᤧᤸᤗᤧ ᤕᤖᤡᤰ ᤗᤠᤕᤥᤜᤠ᤹ ᤆᤥᤃᤢᤖᤥ॥

²³ ᤔᤏᤠ᤺ᤸᤗᤧ ᤁᤢᤀᤠᤱᤍᤡᤱ ᤗ᤹ᤔᤧᤸᤗᤧ ᤂᤢᤏᤧ᤹ ᤕᤥ ᤌᤠᤛᤢᤖᤥ. ᤁᤖ ᤏ᤺ᤶᤏ᤺ᤶᤒᤠ ᤕᤠᤶᤛᤠᤶ ᤁᤧᤃᤵᤐᤠ ᤔᤏᤠ᤺ᤸᤗᤧ ᤀᤡᤱᤎᤠᤱ ᤂᤥᤛᤢᤖᤥ॥

²⁴ ᤂᤢ᤺ᤴᤍᤪᤡᤰᤐᤠᤜᤠ᤹ ᤆᤢᤶᤈᤢᤶᤔᤥᤀᤣ ᤏᤡᤱᤔᤡ ᤔᤧᤒᤥᤱᤗᤥ. ᤂᤧᤱᤜᤠ᤹ ᤔᤠᤱᤜᤧᤰᤛᤡᤱᤔᤠ ᤔᤧᤒᤠᤱᤄᤢᤛᤡᤒᤧᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤋᤥ᤺ᤴᤍᤡ ᤐᤡᤔᤠ ᤔᤧᤴᤀᤠ᤺ᤴᤇᤡᤱᤅᤡᤴᤗᤥ॥

²⁵ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤃᤡᤔᤧᤴ ᤗᤳᤇᤠ ᤆᤧᤴ ᤜᤧᤰᤋᤱᤒᤠᤖᤥ. ᤁᤖ ᤕᤜᤘᤣ ᤍᤠᤱᤒᤠᤀᤥ ᤁᤢᤏᤡᤱᤘᤠ᤹ ᤁᤧᤕᤢᤱᤒᤧᤴ ᤁᤶᤒᤪᤠᤱᤅᤥ ᤘᤠ᤹ᤖᤥ॥

²⁶ ᤕᤖᤡᤰᤗᤧ ᤕᤢᤰᤛᤠᤒᤧᤴ ᤗᤠᤶ ᤏᤥᤏᤡᤱᤘᤠ᤹ ᤂᤥᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤕᤜᤘᤣ ᤍᤠᤱᤒᤠᤸᤗᤧᤖᤰ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥᤃᤢᤖᤥ॥

²⁷ ᤛᤠᤶᤕᤥᤒᤠᤸᤗᤧ ᤀᤡᤱᤗᤧᤰ ᤁᤧᤈᤥᤰᤐᤧᤴ ᤁᤢᤛᤡᤰᤗᤧ᤺ᤱᤗᤥ. ᤁᤢ᤹ᤀᤡᤃᤧᤓᤧᤶᤒᤠᤸᤗᤧ ᤛᤠᤶᤕᤥᤒᤠᤴ ᤁᤢᤛᤡᤰᤗᤧ᤺ᤱᤗᤥ॥