ᤂᤠᤜᤢᤴ 28 - LIFOTNT

¹ ᤜᤠ᤺ᤳᤗᤧᤀᤠᤱ ᤔᤧᤏᤠ᤺ᤴᤋᤢᤴᤇᤠᤱ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤴ ᤂᤧᤳᤇᤡᤱᤗᤥ. ᤁᤖ ᤛᤠᤶᤕᤥᤒᤠ ᤔᤏᤠᤴ ᤌᤧᤖᤡᤱᤒᤧᤴ ᤜᤧᤰᤁᤣ ᤋᤡᤱᤍᤡᤱ ᤗ᤹ᤖᤥ॥

² ᤗᤠᤈᤣᤴ ᤐᤡᤑᤩᤢᤱᤒᤠ ᤐᤥᤱᤅᤡᤸᤗᤧ ᤂᤧ᤹ᤕᤥ ᤕᤖᤡᤰ ᤕᤢᤰᤛᤠᤒᤠ ᤔᤧᤒᤥᤱᤗᤥ. ᤁᤖ ᤂᤠᤛᤡᤱᤏᤡ᤺ᤵᤔᤠ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤕᤢᤰᤛᤠᤒᤧᤸᤗᤧ ᤛᤏᤠᤖᤢᤱ ᤐᤥᤱᤗ ᤆᤥᤃᤢᤖᤥ॥

³ ᤁᤢᤎᤣᤀᤠᤱ ᤁᤧᤜᤥᤵᤐᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠ ᤕᤢᤰᤛᤠᤒᤧᤱᤃ ᤁᤢᤈᤠᤴ ᤌᤩ᤺ᤱ ᤁᤧᤈᤥ᤺ᤰᤐᤠ ᤁᤢᤒᤣᤰ ᤁᤢᤗᤠᤳ ᤁᤧᤎᤠᤒᤠ ᤘᤜᤡᤳ ᤜᤧᤰᤋᤱᤒᤠᤖᤥ॥

⁴ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤧᤗᤧᤵᤐᤠᤜᤠ᤹ᤖᤧ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤈᤔᤢᤛᤡᤖᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤧᤀᤡ᤺ᤵᤐᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤀᤳᤋᤢᤛᤡᤖᤥ॥

⁵ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤂᤠᤛᤧᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ. ᤁᤖ ᤕᤜᤘᤣ ᤍᤠᤱᤒᤧᤴ ᤛᤧᤘᤠ ᤁᤧᤔᤧᤵᤐᤠᤜᤠ᤹ᤖᤧ ᤁᤴ ᤏᤢᤖᤡᤰ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

⁶ ᤕᤠᤱᤃᤧᤛᤠ᤹ᤒᤠ ᤐᤥᤱᤔᤠᤛᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠᤀᤠᤱ ᤘᤠ᤹ᤔᤠ ᤑᤧᤰᤁᤧᤗᤠ᤹ᤒᤠ ᤗᤠᤶᤔᤥ ᤁᤧᤘᤠ᤹ᤒᤠ ᤕᤠᤱᤁᤢᤴᤎᤣᤛᤠᤒᤧᤴᤏᤢ᤺ᤸᤗᤧ ᤏᤢᤒᤠᤖᤥ॥

⁷ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤧᤱᤃ ᤂᤠᤛᤡᤱ ᤁᤧᤏᤡ᤺ᤵᤐᤠ ᤛᤠᤖᤥ. ᤁᤖ ᤋ᤺ᤰᤌᤧ᤺ᤰᤁᤩᤠ᤺ᤴᤏᤢ ᤋᤣ᤺ᤱᤈᤢᤶ ᤁᤧᤔᤧᤳᤇᤡᤱᤒᤠ ᤛᤠ᤺ᤸᤗᤧ ᤀᤠᤵᤑᤣᤰ ᤁᤢᤶᤒᤠᤖᤧ ᤁᤢᤈᤠ᤺ᤳᤌᤡ ᤐᤣ᤺ᤰᤔᤠ ᤐᤠᤴ ᤋᤠᤖᤢᤖᤥ॥

⁸ ᤀᤠᤳᤋᤡᤸᤗᤧ ᤛᤠ᤹ᤖᤡᤰ ᤂᤡ᤺ᤰᤗ ᤕᤠᤱᤅᤡᤸᤗᤧ ᤁᤢᤛ᤻ᤛᤠ ᤋᤠ᤺ᤰᤋᤢᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤕᤠᤱᤛᤠᤁᤢᤴᤎᤣᤴ ᤑᤥᤛᤢ᤹. ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤴ ᤘᤣ᤹ᤀᤡᤸᤗᤧᤴ ᤐᤥᤱᤗᤥ. ᤀᤠᤳᤋᤡᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ ᤂᤧᤴ ᤔᤏᤠ᤺ᤸᤗᤧ ᤂᤥᤛᤢᤖᤥ॥

⁹ ᤁᤢᤓᤠᤖᤧ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤗᤧᤵᤔᤠᤱ ᤁᤢᤏᤧᤰᤂᤥ᤹ᤒᤠᤴ ᤜᤢ᤹ᤖᤢᤏᤧᤓᤃᤪ. ᤂᤧᤴ ᤔᤏᤠ᤺ᤸᤗᤧ ᤐᤣᤗᤡ ᤑᤠᤰᤋᤢᤒᤠᤴᤏᤠᤱ ᤕᤠᤶᤃᤧᤛᤡᤱᤒᤠ ᤐᤥᤱᤗᤥ॥

¹⁰ ᤜᤠ᤺ᤳᤗᤧ ᤀᤡᤱᤗᤧᤰ ᤆᤥᤃᤢᤀᤠᤱ ᤁᤢᤍᤥ᤺ᤵᤔᤠᤴ ᤑᤧᤴ ᤗᤠᤶ ᤗᤧᤵᤔᤠᤱ ᤋᤣ᤹ᤖᤢ. ᤂᤧᤴ ᤀᤠᤵᤑᤣᤰ ᤏᤧᤛ᤻ᤛᤢᤒᤠ ᤁᤢᤈᤧᤴᤏᤥ ᤂᤢᤏᤧ᤹ ᤌᤠᤖᤥ. ᤁᤖ ᤀᤠᤵᤋᤡᤰ ᤔᤣ᤺ᤴᤏᤣᤒᤠᤸᤗᤧ ᤘᤧᤳᤋᤧᤛᤖᤧ ᤁᤢᤄᤥᤔᤠ ᤗᤰ ᤂᤥᤛᤢᤖᤥ॥

¹¹ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤴ ᤁᤢᤏᤡᤔᤥ ᤛᤡᤰᤁᤢᤶᤏᤡᤒᤠ ᤐᤥᤱᤔᤠ ᤛᤢᤰᤗᤥ. ᤁᤖ ᤕᤧᤰᤕᤧᤰᤐᤠ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤸᤗᤧ ᤂᤧᤴ ᤏᤢᤖᤡᤰ ᤏᤡᤛᤢᤖᤥ॥

¹² ᤛᤠᤶᤕᤥᤏᤡᤒᤧᤸᤗᤧ ᤏᤠ᤺ᤴᤍᤢᤸᤗᤧ ᤕᤶᤒᤠ ᤛ᤺ᤵᤔᤠ ᤀᤣ᤺ᤵᤔᤠ ᤐᤥᤱᤗᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤧᤴ ᤜᤠᤱᤕᤢᤰᤁᤥ ᤁᤧᤳᤋᤡᤸᤗᤧ ᤔᤏᤠᤜᤠ᤹ ᤔᤧᤈᤡᤱᤛᤡᤱᤗᤥ॥

¹³ ᤁᤢᤗᤠᤕᤥᤜᤠ᤹ ᤁᤧᤈᤡᤱᤒᤧᤸᤗᤧᤴ ᤁᤢᤏᤢ᤹ᤔᤠ ᤁᤢᤍᤠᤔᤠ ᤔᤧᤒᤥᤱᤏᤧᤴᤗᤥ. ᤁᤖ ᤁᤢᤗᤠᤕᤥᤜᤠ᤹ᤗᤠᤶ ᤁᤧᤜᤡ᤺ᤶᤒᤠᤀᤠᤱ ᤁᤧᤗᤧᤵᤐᤧᤸᤗᤧ ᤗᤢᤱᤃᤢᤶ ᤂᤥᤛᤢᤖᤥ॥

¹⁴ ᤕᤜᤘᤣ ᤍᤠᤱᤒᤧᤴᤏᤢ ᤀᤠᤓᤧᤸᤗᤧᤛᤠᤱ ᤁᤧᤃᤡᤒᤠ ᤔᤏᤠᤴ ᤔᤢ᤹ᤀᤡᤛᤠᤒᤠᤖᤥ. ᤁᤖ ᤛᤡᤰᤗᤢᤱᤔᤥ ᤜᤠᤍᤡᤱᤃᤧᤎᤰᤐᤠ ᤔᤏᤠᤴ ᤋᤢᤰᤂᤣᤀᤥ ᤌᤠᤖᤥ॥

¹⁵ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ᤀᤥ ᤕᤢᤰ ᤁᤧᤈᤥ᤺ᤰᤐᤠ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤁᤧᤜᤢ᤺ᤰᤐᤠ ᤌᤧᤖᤡᤱᤒᤧᤴ ᤀᤡᤃᤪ ᤀᤠᤓᤵᤑᤵᤐᤠ ᤔᤠ᤹᤺ᤕᤢ᤺ᤴ ᤁᤢᤀᤡᤛᤡ᤺ᤰᤐᤠᤖᤥ॥

¹⁶ ᤂᤠᤛᤡᤱ ᤔᤧᤴᤏᤣᤒᤠ ᤕᤢᤰᤛᤠᤒᤧᤸᤗᤧ ᤁᤢᤔᤏᤠᤜᤠ᤹ ᤛᤠ᤹ᤖᤡᤰ ᤕᤢ᤺ᤳᤋᤢᤛᤡᤖᤥ. ᤁᤖ ᤋᤠᤵᤑᤧ᤺ᤶᤒᤠᤗᤠᤶ ᤕᤠᤱᤎᤰᤔᤠ ᤁᤧᤈᤡ᤺ᤵᤐᤠ ᤔᤏᤠ᤺ᤸᤗᤧ ᤁᤢᤎᤠ᤺ᤰ ᤆᤠ᤹ᤖᤥ॥

¹⁷ ᤔᤏᤠᤛᤧᤵᤔᤠ ᤀᤠᤵᤋᤡᤰᤁᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤒᤠ ᤔᤏᤠᤴ ᤁᤢᤛᤡᤛᤡ ᤌᤠᤖᤡᤰ ᤂᤧᤳᤇᤡᤱᤅᤠᤱ ᤘᤠ᤹ᤖᤥ. ᤂᤧᤴ ᤜᤠ᤺ᤳᤗᤧᤀᤠᤱ ᤁᤢᤓᤠ᤹ ᤐᤡᤔᤠ ᤔᤧᤏᤢᤏᤧᤴᤗᤥ॥

¹⁸ ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤠ᤺ᤳᤋᤢᤒᤠ ᤗᤠᤶᤔᤡᤴ ᤀᤠᤵᤋᤡᤰ ᤔᤧᤴᤏᤣᤒᤠ ᤆᤥᤰ. ᤂᤧᤴ ᤌᤣᤀᤠᤱ ᤔᤧᤸᤗ᤹ᤀᤣ ᤌᤠᤵᤌᤣ᤺ᤰ ᤕᤠᤶᤎᤣᤰᤁᤥ ᤘᤠ᤹ᤖᤥ. ᤁᤖ ᤀᤠᤳᤋᤡᤴᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤜᤠ᤹ ᤑᤧᤰᤁᤧᤗᤠ᤹ᤒᤠ ᤆᤥᤰ. ᤂᤧᤴ ᤔᤏᤠᤜᤠ᤹ ᤜᤰᤆᤄᤳ ᤁᤢᤒᤠᤱ ᤁᤧᤒᤣ᤺ᤰᤐᤠ ᤔᤧᤒᤥᤱᤗᤥ॥

¹⁹ ᤁᤢᤀᤡᤰᤋᤠᤵ ᤁᤧᤀ᤺ᤰᤐᤠ ᤁᤧᤎᤥ᤺ᤱᤒᤧᤸᤗᤧ ᤘᤧᤳᤋᤧᤛᤖᤧ ᤁᤢᤈᤠ ᤁᤳᤋᤢᤖᤥ. ᤁᤖ ᤔᤢᤍᤥᤂᤠᤶᤍᤥᤒᤠ ᤐᤠ᤺ᤴᤜᤠ᤹ ᤗᤧᤵᤔᤠᤱ ᤁᤧᤗᤥ᤺ᤰᤐᤠᤜᤠ᤹ ᤕᤠᤱᤔᤧᤛᤠ᤹ᤖᤥ॥

²⁰ ᤏᤛᤠ᤺ᤴᤛᤠᤒᤠ ᤔᤏᤠ᤺ᤸᤗᤧ ᤘᤧᤳᤋᤧᤛᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤂᤥᤛᤢᤖᤥ. ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥᤱᤔᤠ ᤀᤡᤃᤣ᤺ᤰ ᤏᤡᤱᤘᤠ᤹ ᤁᤧᤀᤡ᤺ᤵᤐᤠᤜᤠ᤹ ᤂᤢᤶᤍᤡᤱ ᤔᤧᤱᤄᤥᤀᤣ ᤘᤠ᤹ᤔᤠ ᤔᤧᤱᤄᤥᤏᤧᤴᤗᤥ॥

²¹ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠ ᤏᤢᤒᤠ ᤐᤠᤴ ᤔᤣ᤺ᤴᤗᤥ. ᤜᤧᤰᤁᤣᤛᤠᤱ ᤁᤢᤗᤧᤵ ᤌᤡᤰ ᤂᤖᤧ᤺ᤱᤅᤡᤸᤗᤧ ᤗᤠᤃᤡ ᤔᤏᤠ᤺ᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤖᤥ॥

²² ᤁᤧᤄᤡ᤺ᤶᤒᤠ ᤔᤏᤠᤜᤠ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥᤱᤔᤠ ᤏᤡᤱᤘᤠ᤹ ᤔᤧᤈᤥᤰᤗᤥ. ᤜᤧᤰᤁᤩᤠᤱ ᤕᤠᤱᤛᤠ᤹ᤔᤧᤸᤗᤧ ᤂᤢᤴᤇᤡ᤹ ᤜᤠᤱᤄᤢᤛᤡᤖ ᤘᤠ᤹ ᤁᤧᤗ᤹ᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤣ ᤔᤧᤄᤥᤛᤢᤴᤗᤥ॥

²³ ᤔᤢᤷᤗᤧ᤺ᤶᤒᤠ ᤐᤠᤴ ᤐᤠ᤺ᤵᤔᤠ ᤗᤧᤛᤥᤳ ᤁᤧᤃᤵᤐᤠ ᤔᤏᤠ᤺ᤴᤏᤢ᤺ᤸᤗᤧ ᤁᤧᤓᤧ᤺ᤰᤐᤠ ᤔᤏᤠ᤺ᤸᤗᤧ ᤁᤢᤏᤢᤵᤔᤥ ᤕᤖᤡᤰ ᤗᤢᤱᤍᤢᤰ ᤂᤥᤛᤢᤖᤥ॥

²⁴ ᤁᤢᤶᤒᤠ ᤀᤡᤃᤪ ᤁᤢᤶᤔᤠ ᤁᤧᤏᤠᤵᤐᤠᤀᤠᤱ “ᤁᤱᤃ ᤑᤧᤴᤐᤠᤴ ᤔᤣ᤺ᤴᤗᤥ” ᤁᤧᤗ᤹ᤒᤠ ᤛᤠ᤺ᤱᤃ ᤕᤠᤵᤔᤡ ᤑᤧᤳᤁᤧᤗᤠ᤹ᤒᤧᤸᤗᤧ ᤁᤢᤴᤍᤣ᤺ᤱᤒᤠᤖᤥ॥

²⁵ ᤁᤧᤄᤡ᤺ᤶᤒᤠ ᤔᤏᤠ᤺ᤸᤗᤧ ᤂᤧᤔᤠ᤹ ᤂᤧᤈᤧᤰ ᤑᤥ᤺ᤰᤂᤢᤖᤥ. ᤁᤖ ᤕᤜᤘᤣ ᤍᤠᤱᤒᤧᤴ ᤏᤠᤃᤧᤛᤠ᤹ᤒᤧᤸᤗᤧ ᤁᤢᤏᤢ᤹ᤔᤠ ᤁᤢᤍᤠᤔᤠ ᤐᤥᤱᤗᤥ॥

²⁶ ᤀᤠᤵᤑᤣᤰ ᤏᤠᤃᤧᤛᤠ᤹ᤛᤡᤱᤒᤠ ᤔᤏᤠᤴ ᤀᤍᤱᤗᤥ. ᤁᤖ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤁᤧᤘᤠ᤹ᤒᤧᤴ ᤛᤧ᤺ᤵᤛᤡᤱᤗᤥ॥

²⁷ ᤀᤠᤳᤋᤡᤸᤗᤧ ᤕᤠᤱᤃᤧᤛᤠ᤹ᤒᤠᤴ ᤆᤠᤔᤠ ᤌᤢᤱᤔᤠ ᤐᤡᤖᤢ᤹. ᤂᤧᤸᤗᤧ ᤌᤧᤔᤠ ᤐᤠ᤺ᤴᤏᤡᤴᤏᤠᤱ ᤛᤢ᤺ᤶᤒᤠ ᤔᤧᤍᤢᤔᤢᤴᤗᤥ. ᤁᤖ ᤀᤠᤳᤋᤡᤸᤗᤧ ᤂᤧᤱᤜᤠ᤹ ᤗᤧᤵᤔᤠᤱ ᤁᤢᤔᤡᤰᤁᤧᤴ ᤀᤡᤶ ᤔᤧᤳᤋᤢ᤹. ᤂᤧᤴ ᤕᤖᤡᤰ ᤛᤠᤱᤃᤪᤠ ᤔᤠᤱᤍᤣᤀᤥ ᤌᤠᤖᤥ॥

²⁸ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤜᤠᤱᤕᤢᤰᤁᤥ ᤁᤧᤳᤋᤡᤸᤗᤧ ᤔᤏᤠᤜᤠ᤹ ᤆᤡᤱᤛᤡᤱᤔᤠ ᤔᤧᤜᤣ᤺ᤰᤗᤥ॥ ᤁᤖ ᤋᤠᤰᤁᤧᤓᤧ᤹ᤒᤧᤴ ᤔᤧᤰᤁᤡᤸᤗᤧ ᤛᤠᤶᤕᤥᤏᤡᤒᤧᤴ ᤏᤢ᤹ᤍᤠᤖᤥ॥