ᤂᤠᤜᤢᤴ 27 - LIFOTNT

¹ ᤋᤠ᤺ᤴᤍᤡᤰᤗᤧ ᤗᤠᤃᤡ ᤕᤶᤒᤠ ᤔᤧᤗᤧᤱᤛᤡᤱᤅᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤌᤡᤰᤕᤠᤴ ᤌᤡᤰᤗᤧ ᤌᤣ ᤐᤥᤱ᤹. ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤁᤧᤴᤏᤡᤛᤢᤴᤗᤥ॥

² ᤘᤣ᤹ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤠᤖᤠ ᤔᤧᤓᤥᤛᤢᤖᤖᤥ. ᤂᤧᤏᤧ᤹ ᤀᤠᤵᤑᤣᤰ ᤔᤣ᤺ᤴᤗᤥ. ᤜᤧᤰᤁᤩᤠᤱ ᤂᤧᤏᤧ᤹ᤀᤣ ᤁᤧᤶᤒᤪᤠᤛᤣ᤹ᤀᤡᤸᤗᤧ ᤔᤣ᤺ᤴᤗᤥ ᤁᤢᤓᤠ ᤀᤣᤕᤠᤱᤒᤠᤜᤠ᤹ᤗᤠᤶ ᤐᤥᤱᤗᤖᤥ॥

³ ᤗᤢᤱᤅᤡᤴ ᤁᤧᤗᤡ᤺ᤵᤐᤠ ᤆᤥᤰᤗᤥ ᤜᤧᤰᤁᤩᤠᤱ ᤕᤧ᤺ᤱᤄᤠ᤺ᤴ ᤐᤗᤡ᤺ᤵ ᤁᤧᤗᤡ᤺ᤵᤐᤠ ᤆᤥᤰᤗᤥ. ᤁᤖ ᤀᤍᤱ ᤔᤏᤠ᤺ᤸᤗᤧ ᤛᤠᤰᤁᤧᤴ ᤑᤥ᤺ᤰᤂᤢᤒᤠᤴ ᤀᤠᤖᤛᤠᤱ ᤛᤠ᤹ᤖᤡᤰ ᤐᤗᤡ᤺ᤵ ᤁᤧᤗᤡ᤺ᤵᤐᤠ ᤆᤥᤰᤗᤥ॥

⁴ ᤛᤡᤰᤐᤥ᤺ᤰᤔᤠᤱᤃ ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤛᤠᤰᤁᤧᤴᤏᤡᤱᤃ ᤀᤠᤛᤧᤛᤧ᤺ᤵᤐᤠ ᤁᤧᤃᤢᤱᤒᤠ ᤆᤫᤠ᤺ᤳ ᤜᤧᤰᤋᤱᤒᤠ ᤆᤥᤰᤗᤥ. ᤁᤖ ᤏᤠᤜᤧᤴᤏᤡᤸᤗᤧ ᤁᤢᤒᤣᤛᤠᤱ ᤜᤠᤳ ᤕᤧᤵᤔᤠ ᤛᤢᤰᤐᤣ᥅

⁵ ᤛᤫᤠ᤺ᤳᤋᤠᤱ ᤗᤢᤱᤔᤠ᤹ ᤋᤢᤰᤔᤠᤛᤡᤏᤢ᤺ᤸᤗᤧ ᤔᤧᤄᤧᤵᤛᤢᤖᤀᤣ ᤑᤧ᤺ᤰᤔᤠᤛᤡ ᤋᤶᤔᤠᤛᤡ ᤏᤢᤒᤠᤖᤥ॥

⁶ ᤆᤢᤶᤔᤡᤸᤗᤧ ᤀᤠᤄᤠ᤺ᤶᤒᤠᤴ ᤏᤛᤠᤴ ᤆᤥ᤺ᤰᤔᤠ ᤛᤢᤰᤋᤧᤳᤗᤥ. ᤁᤖ ᤏᤡᤱᤔᤡ᤺ᤸᤗᤧ ᤆᤢᤵ ᤀᤠᤔᤧᤵᤐᤧᤴ ᤛᤠ᤹ᤖᤡᤰ ᤀᤡᤱᤗᤧᤰᤐᤠᤀᤠᤱ ᤐᤥᤱᤗᤥ॥

⁷ ᤐᤄᤠ ᤁᤧᤄᤠᤒᤠ ᤔᤏᤠᤴ ᤛᤰᤘᤠᤄᤢ᤺ᤸᤗᤧ ᤁᤢᤏᤡᤱᤗᤧ᤹ᤖᤢᤖᤥ. ᤁᤖ ᤁᤢᤛᤡᤰᤁᤧᤗᤠ᤺ᤰᤐᤧᤸᤗᤧ ᤁᤧᤄᤡ᤺ᤰᤐᤠᤴᤏᤠᤱ ᤁᤢᤈᤠᤏᤢ᤹ᤖᤥ॥

⁸ ᤁᤢᤜᤠᤵᤐᤥᤗᤠᤶ ᤋᤠᤵᤁᤧᤒᤧ᤹ᤒᤠᤀᤠᤱ ᤁᤧᤒᤣ᤺ᤰᤐᤠ ᤐᤢ᤺ᤴ ᤜᤧᤰᤁᤣ ᤜᤡᤶᤔᤥᤗᤠᤶ ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤔᤏᤠᤴ ᤋᤠᤵᤁᤧᤒᤧ᤹ᤒᤠ ᤐᤥᤱᤗᤥ॥

⁹ ᤑᤢᤱᤏᤠᤶ ᤏᤢ ᤛᤢᤰᤐᤠᤸᤗᤧ ᤏᤡᤱᤘᤠ᤹ ᤛ᤺ᤳᤗ ᤆᤥᤃᤢᤖᤥ. ᤜᤧᤰᤁᤩᤠᤱ ᤆᤢᤶᤍᤣᤱᤗᤠᤶ ᤂᤥᤃᤧᤍᤧᤵᤐᤠ ᤛᤢᤶᤛᤢᤶᤒᤠ ᤛᤢᤈᤠᤴ ᤁᤢᤈᤠᤃᤧᤏᤢ᤹ᤒᤠ ᤆᤥᤰᤗᤥ॥

¹⁰ ᤀᤠᤵᤑᤣᤰ ᤁᤧᤴᤍᤣ᤺ᤱᤒᤧᤴ ᤏᤢ ᤀᤠᤵᤑᤣᤰ ᤁᤧᤶᤒᤠᤖᤧ ᤁᤢᤴᤍᤣ᤺ᤱᤒᤧᤴ ᤂᤧᤏᤧ᤹ ᤗᤠᤵᤔᤧᤓᤢᤛᤧᤴᤏᤧ᤹ᤀᤥ. ᤋᤢᤰᤂᤣ ᤗᤠᤰᤂᤣ ᤁᤧᤈᤠ᤺ᤸᤗᤧ ᤁᤧᤶᤓᤢ᤹ ᤁᤧᤴᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤂᤧᤏᤧ᤹ ᤔᤧᤒᤣᤃᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡ᤺ᤳᤋᤠᤱᤒᤠ ᤜᤡᤶᤒᤣᤛᤠᤱᤒᤧᤴ ᤔᤠ᤺ᤱᤄᤠᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ᤺ᤸᤗᤧ ᤏᤢᤒᤠ ᤆᤥᤰᤗᤥ॥

¹¹ ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤛᤡᤰᤁᤢᤶᤏᤡᤒᤠ ᤐᤥ᤺ᤰᤂᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤠᤴ ᤛ᤺ᤳᤗ ᤕᤠ᤺ᤴᤍᤧ᤹ᤀᤥ. ᤂᤧᤒᤩᤠᤱ ᤀᤠᤱᤃᤠ᤹ ᤆᤧ᤹ᤕᤠ ᤀᤡᤱᤍᤥ ᤁᤧᤔᤧᤵᤐᤠ ᤜᤠ᤺ᤳᤇᤠᤱ ᤀᤠᤱᤃᤠ᤹ ᤏᤢᤃᤵ ᤐᤡᤔᤠ ᤛᤢᤰᤋᤢᤱᤗᤥ॥

¹² ᤂᤠᤛᤡᤱᤃᤧᤏᤡ᤺ᤵᤐᤧᤸᤗᤧ ᤕᤧᤳᤋᤢᤰᤂᤣ ᤋᤠᤖ ᤐᤵᤐᤠ ᤏᤡᤛᤢᤖᤥ ᤜᤧᤰᤁᤩᤠᤱ ᤁᤢᤓᤠ ᤋᤧᤴᤏᤥ ᤛᤧ᤺ᤵᤛᤡᤱᤗᤥ. ᤁᤖ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤔᤏᤠᤴ ᤂᤧᤴ ᤗᤧᤵᤔᤠᤱᤅᤣ ᤐᤣ᤺ᤰᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤂᤢᤶᤍᤡᤱ ᤂᤥᤛᤢᤖᤥ॥

¹³ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤔᤏᤠ᤺ᤸᤗᤧ ᤁᤢᤛᤡᤱᤏᤠᤳᤋᤥ ᤋᤥ᤺ᤴᤍᤡ ᤁᤧᤕᤢᤱᤛᤡᤱᤒᤠ ᤔᤏᤠ᤺ᤸᤗᤧ ᤁᤢᤍᤣ᤺ᤳᤋᤡᤴᤏᤠᤱ ᤏᤠᤵᤋᤧ᤹ᤀᤥ. ᤋᤠᤵᤁᤧᤒᤧ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤗᤠᤃᤡ ᤜᤧᤰᤁᤣ ᤆᤥᤃᤢᤒᤠᤏᤧᤓᤃᤪ. ᤂᤧᤸᤗᤧ ᤋᤡᤰ ᤕᤢᤰᤂᤢᤒᤠᤴ ᤕᤢᤰᤂᤧ᤹ᤀᤥ॥

¹⁴ ᤁᤢᤓᤠᤖᤧ ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤧᤴ ᤀᤠᤴᤍᤣᤴ ᤋᤠᤏᤠᤶᤛᤠ ᤕᤶᤒᤠ ᤀᤡᤰᤗᤠᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤏᤧᤓᤃᤪ. ᤂᤧᤱᤃ ᤛᤠᤰᤔᤢᤖᤠ ᤔᤠᤱᤍᤣ ᤔᤧᤳᤋᤢᤒᤠ ᤜᤧᤰᤁᤣ ᤐᤥᤱᤗᤥ॥

¹⁵ ᤂᤧᤔᤠ᤹ ᤁᤧᤈᤥ᤺ᤰᤔᤠ ᤔᤣ᤺ᤳᤋᤧᤴ ᤘᤜᤡᤳ ᤌᤠᤔᤠ ᤕᤧᤶᤔᤥ ᤋᤡᤒᤣᤗᤠᤒᤣ ᤁᤧᤎᤠᤒᤠᤀᤠᤱ ᤁᤧᤒᤵᤐᤠ ᤆᤫᤠ᤺ᤳ ᤋᤧᤵᤐᤰᤘᤠ ᤜᤧᤰᤋᤱᤔᤠᤖᤥ॥

¹⁶ ᤂᤧᤴ ᤕᤢᤰᤁᤥ ᤁᤵᤔᤠᤃ ᤛᤢᤖᤡ᤺ᤳᤋᤡᤴ ᤕᤢᤰᤁᤥ ᤁᤵᤔᤠᤏᤢ ᤁᤢᤍᤱᤒᤠᤖᤥ. ᤀᤡᤃᤪ ᤜᤢᤰᤁᤡᤸᤗᤧ ᤏᤡᤱᤃᤣ᤺ᤴ ᤐᤢᤵᤔᤏᤠᤒᤠ ᤁᤢᤀᤡᤛᤡ᤺ᤰᤗᤥ॥

¹⁷ ᤑᤧᤴᤈᤣᤸᤗᤧ ᤑᤧᤴᤈᤣᤴ ᤕᤠᤖᤠᤵᤋᤢᤒᤠ ᤁᤢᤀᤡᤛᤡᤰ ᤔᤏᤠ᤺ᤸᤗᤧ ᤘᤣ᤹ ᤔᤏᤠᤴ ᤆᤠ᤺ᤵᤐᤠ ᤆᤥᤃᤢᤖᤥ॥

¹⁸ ᤐᤳᤇᤣ᤹ᤒᤢᤱᤔᤠᤴ ᤀᤥᤃᤧᤔᤧᤵᤐᤠ ᤁᤧᤈᤥ᤺ᤰᤐᤧᤸᤗᤧ ᤂᤧᤸᤗᤧ ᤁᤢᤈᤠ᤹ᤀᤡᤴ ᤆᤖᤥ. ᤜᤧᤰᤁᤩᤠᤱ ᤁᤢᤴᤍᤠᤱᤒᤠ ᤁᤶᤒᤪᤠᤱ ᤁᤧᤔᤧᤵᤐᤠ ᤛᤧᤘᤠᤖᤥᤒᤧᤴ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤐᤥᤱᤗᤥ॥

¹⁹ ᤆᤫᤠ᤺ᤳᤋᤡᤸᤗᤧ ᤔᤏᤠ ᤏᤠᤖᤠᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤡᤰᤗᤢᤱᤔᤧᤸᤗᤧ ᤕᤧᤵᤗᤧᤰᤁᤡᤴ ᤏᤡᤎᤠ᤺ᤵᤛᤢᤖᤥ॥

²⁰ ᤛᤡᤔᤧᤴ ᤏᤢ ᤔᤧᤰᤔᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤗᤥ. ᤔᤏᤠ᤺ᤸᤗᤧ ᤁᤢᤔᤡᤰᤁᤧᤴᤏᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤄᤠᤏᤧᤴᤗᤥ॥

²¹ ᤕᤢᤵᤐᤠ ᤕᤥ᤺ᤶᤔᤠ ᤂᤵᤐᤩᤠ ᤏᤢ ᤛᤠᤶᤔᤩᤠᤱ ᤛᤠᤱᤔᤠ ᤔᤡᤍ᤺ᤳ ᤘᤠ᤹ᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠᤴ ᤁᤢᤏᤠᤖᤠ ᤔᤧᤓᤥᤛᤢᤒᤠ ᤗᤠᤶ ᤛᤠ᤹ᤔᤠ ᤛᤢᤰᤋᤧᤳᤗᤥ॥

²² ᤀᤍᤱ ᤔᤏᤠᤴ ᤛᤢᤶᤒᤠᤱᤅᤥ ᤌᤧᤰᤔᤠᤀᤠᤱ ᤜᤠᤰᤔᤠᤛᤠᤱ. ᤗᤢᤱᤛᤢᤶᤔᤥ ᤆᤠ᤺ᤴ ᤕᤠᤰᤔᤠᤀᤠᤱ ᤕᤢ᤺ᤵᤔᤏᤠᤒᤠ ᤜᤧᤰᤁᤣ ᤆᤥ᤺ᤰᤔᤠᤛᤠᤱ. ᤂᤧᤏᤧ᤹ ᤂᤧᤸᤗᤧ ᤁᤢᤀᤍᤱ ᤆᤥ᤺ᤰᤔᤠᤴ ᤂᤢᤏᤧ᤹ᤗᤠᤶ ᤁᤧᤸᤗ᤺ᤳᤋᤢᤴᤗᤥ॥

²³ ᤂᤧᤏᤧ᤹ ᤁᤧᤔᤧᤸᤗᤢᤰᤜᤠ᤹ ᤀᤠᤰᤂᤣ ᤔᤧᤗ᤹ ᤏᤢᤖᤡᤰ ᤏᤡᤱᤘᤠ᤹ ᤂᤥᤛᤧ᤹ᤀᤥ. ᤁᤧᤎᤰᤛᤠ ᤗᤢᤵᤜᤠ᤹ ᤏᤢᤖᤡᤰᤁᤠᤱ ᤕᤠᤖᤈᤥᤃᤧᤛᤧ᤹ᤀᤥ॥

²⁴ ᤌᤣᤀᤠᤱᤓᤧᤸᤗᤧ ᤕᤠᤱᤛᤠᤁᤢᤴᤎᤣᤴ ᤛᤍᤠᤍᤡᤱ ᤔᤧᤘᤠ᤹ᤏᤧᤴᤗᤥ. ᤜᤧᤰᤁᤩᤠᤱ ᤋᤡᤆ᤺ᤴᤏᤠᤱ ᤁᤠᤰ ᤌᤠ᤺ᤰᤜᤠ᤹ᤖᤧ ᤗᤠᤃᤡ ᤔᤧᤘᤠ᤹ᤏᤧᤴᤗᤥ॥

²⁵ ᤕᤠ᤹ᤗᤠᤱᤅᤡᤴ ᤀᤡ᤺ᤱᤔᤠᤍᤣᤔᤠᤀᤠᤱ ᤂᤠᤖᤰ ᤁᤧᤗᤡᤱᤒᤠ ᤁᤢᤏ᤺ᤰ ᤆᤠᤓᤧᤳᤗᤠ᤺ᤴ ᤏᤡᤎᤠ᤺ᤵᤗᤥ. ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ᤀᤥᤗᤠᤶ ᤕᤠ᤺ᤴᤛᤢᤱᤜᤠ᤹ ᤑᤢᤱᤔᤠ ᤐᤥᤱᤗᤥ.

²⁶ ᤂᤧᤒᤩᤠᤱ ᤂᤧᤏᤧ᤹ ᤔᤧᤸᤗᤢᤰᤜᤠ᤹ᤖᤧ ᤆᤠᤱᤔᤠ ᤋᤣᤳ ᤁᤧᤶᤒᤡᤖᤥ. ᤜᤧᤰᤁᤩᤠᤱ ᤀᤡᤰᤋᤠᤵ ᤀᤡᤱᤔᤠ ᤕᤠᤱᤅᤡᤴ ᤔᤧ᤺ᤴᤍᤠᤜᤠ᤹ᤗᤠᤶ ᤋᤠᤖᤥ॥

²⁷ ᤔᤧ᤺ᤴᤍᤠ᤺ᤸᤗᤧ ᤁᤢᤏᤢ᤺ᤸᤗᤧ ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱᤜᤠ᤹ ᤆᤠᤔᤠ ᤁᤧᤕᤥᤖᤡᤖᤥ. ᤜᤧᤰᤁᤩᤠᤱ ᤁᤧᤛᤧᤘᤠᤖᤥᤔᤠᤜᤠ᤹ ᤆᤠ᤺ᤵᤔᤠᤛᤡᤖᤧ ᤗᤠᤃᤡ ᤐᤥᤱᤗᤥ॥