ᤂᤠᤜᤢᤴ 26 - LIFOTNT

¹ ᤜᤠᤱᤘᤠᤔᤠ ᤕᤧᤶᤔᤥ ᤏᤠ᤺ᤱ ᤌᤠᤛᤢᤒᤠ ᤁᤢᤀᤡᤛᤡᤰ ᤀᤡᤃᤪ ᤁᤢᤈᤠ ᤛᤢᤶᤔᤠ ᤕᤧᤶᤔᤥ ᤘᤜᤡᤳ ᤌᤠᤛᤢᤒᤠ ᤁᤢᤀᤡᤛᤡᤰ ᤀᤍᤱ ᤔᤏᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤔᤧᤗᤠ᤹ᤖᤢᤴᤗᤥ॥

² ᤜᤢᤖᤢᤖᤢ ᤁᤧᤒᤧᤒᤠ ᤔᤠᤰᤆᤧᤖᤧ᤺ᤴ ᤏᤢ ᤀᤠᤵᤗᤥ᤺ᤰᤗᤥ᤺ᤰ ᤁᤧᤈᤠᤒᤠ ᤁ᤺ᤱᤎᤧᤱᤏᤠᤴ ᤜᤧᤰᤁᤣ ᤌᤣᤏᤠᤎᤣᤒᤠ ᤔᤠᤱᤍᤣ᤺ᤸᤗᤧᤀᤠᤱ ᤔᤧᤕᤠᤱᤄᤢᤴᤗᤥ॥

³ ᤀᤴᤏᤡᤸᤗᤧ ᤗᤠᤃᤡ ᤋᤧ᤺ᤶᤓᤢᤰ. ᤀᤍᤱᤅᤡᤸᤗᤧ ᤗᤠᤃᤡ ᤁᤖᤣᤗᤡ. ᤜᤧᤰᤁᤩᤠᤱ ᤕᤠᤰᤋᤢᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤃᤰᤔᤧᤸᤗᤧ ᤗᤠᤃᤡ ᤋᤰᤁᤠᤳ᥄

⁴ ᤀᤍᤱ ᤔᤏᤠᤴ ᤂᤧᤸᤗᤧ ᤁᤢᤀᤍᤱ ᤐᤠᤴ ᤜᤧᤰᤁᤣ ᤏᤢᤃᤵ ᤔᤧᤒᤡᤖᤧᤴᤏᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤂᤧᤏᤧ᤹ ᤀᤠᤵᤑᤣᤰᤁᤠᤱ ᤂᤧᤴ ᤜᤧᤰᤋᤱᤒᤠ ᤁᤧᤒᤥᤱᤗᤥ॥

⁵ ᤀᤍᤱ ᤔᤏᤠᤴ ᤂᤧᤸᤗᤧ ᤁᤢᤀᤍᤱ ᤐᤠᤴ ᤜᤧᤰᤁᤣᤀᤣ ᤏᤢᤃᤵ ᤐᤡᤖᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤂᤢᤏᤧ᤹ ᤀᤠᤵᤑᤣᤰ ᤁᤢᤏᤡᤔᤥ ᤛᤡᤰᤁᤢᤶᤛᤠᤒᤠ ᤐᤥᤱᤗᤥ॥

⁶ ᤀᤍᤱᤅᤡᤸᤗᤧ ᤁᤢᤜᤢᤰᤁᤥ ᤀᤡᤱᤄᤱ ᤜᤠᤱᤔᤠᤃ ᤀᤠᤵᤑᤣᤰ ᤗᤠᤱᤅᤥ ᤋ᤺ᤴᤍᤡᤸᤗᤧ ᤀ᤺ᤰᤔᤠ ᤏᤢ ᤏᤡᤱᤅᤡᤴ ᤌᤢᤱᤔᤠ ᤁᤢᤀᤡᤛᤡᤰ ᤐᤥᤱᤗᤥ॥

⁷ ᤗᤠᤱᤛᤰᤐᤧᤸᤗᤧ ᤔᤧᤴᤎᤢᤶᤔᤏᤠᤒᤠ ᤁᤢᤗᤠᤱᤜᤠ᤹ ᤐᤵᤐᤠ ᤜᤧᤰᤁᤣ ᤀᤍᤱ ᤔᤏᤠ᤺ᤸᤗᤧ ᤁᤢᤶᤒᤪᤠᤀᤥᤒᤠ ᤂᤠᤜᤢ᤺ᤴᤏᤡᤴ ᤐᤥᤱᤗᤥ॥

⁸ ᤀᤍᤱ ᤔᤏᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤑᤠ᤹ᤀᤡᤱᤃ ᤀᤷᤍᤥᤀᤥ ᤗᤢᤱᤅᤡᤴ ᤀᤡᤄᤣ᤺ᤱᤔᤠᤀᤠᤱ ᤗᤠᤵᤑᤣ᤺ᤶᤏᤠᤒᤠ ᤜᤧᤰᤁᤣᤖᤥ॥

⁹ ᤌᤡ᤺ᤸᤗᤧ ᤁᤧᤔᤒᤧᤸᤗᤧ ᤁᤢᤜᤢᤰᤁᤥᤒᤠ ᤋᤡᤱᤃᤪᤣᤰ ᤐᤢᤱ ᤜᤧᤰᤁᤣ ᤀᤍᤱ ᤔᤏᤠ᤺ᤸᤗᤧ ᤁᤢᤶᤒᤪᤠᤀᤥᤒᤠ ᤂᤠᤜᤢᤴᤏᤡᤴ ᤐᤥᤱᤗᤥ॥

¹⁰ ᤀᤍᤱᤅᤡᤴ ᤀᤡᤃᤪ ᤁᤢᤛᤡᤱ ᤔᤧᤴᤏᤡ᤺ᤵᤏᤠᤒᤠ ᤔᤏᤠᤴ ᤏᤠᤶᤕᤠᤰᤁᤥ ᤕᤠ᤺ᤶᤒᤰ ᤆᤥᤰ ᤐᤠᤱᤔᤠᤃ ᤀᤡᤔᤧᤴᤏᤡ ᤂᤠᤔᤧᤴᤏᤡ ᤋᤥᤱ ᤁᤧᤀᤠᤵᤐᤠ ᤔᤏᤠᤴ ᤁᤢᤀᤡᤛᤡ᤺ᤰᤗᤥ॥

¹¹ ᤂᤩᤠᤒᤧᤴ ᤀᤠᤵᤑᤣᤰ ᤁᤢᤒᤧ᤹ᤔᤠᤳ ᤆᤠᤛᤧ ᤏᤢ᤺ᤱᤒᤠ ᤜᤧᤰᤁᤣ. ᤀᤍᤱ ᤔᤏᤠ᤺ᤸᤗᤧ ᤁᤢᤀᤍᤱ ᤆᤥ᤺ᤰᤔᤠ ᤐᤠ᤺ᤴᤏᤡᤴ ᤕᤧᤳᤗᤧᤱ ᤆᤥᤃᤢᤖᤥ॥

¹² ᤀᤠᤵᤑᤣᤰ ᤁᤢᤏᤡᤔᤥ ᤂᤢᤏᤧ᤹ ᤀᤠᤵᤑᤣᤰ ᤛᤡᤰᤁᤢᤶᤛᤠᤒᤠ ᤁᤧᤗᤣ᤺ᤳᤇᤡᤱᤒᤠ ᤔᤏᤠᤴ ᤌᤣ ᤁᤧᤏᤡᤛᤢᤀᤠᤱ ᤘᤠ᤹ᤒᤡ᥅ ᤂᤧᤴᤏᤢ᤺ᤸᤗᤧᤃ ᤐᤖᤢᤔᤠᤸᤗᤧ ᤀᤍᤱᤅᤡᤸᤗᤧ ᤁᤢᤗᤠᤃᤡ ᤕᤖᤡᤰ ᤏᤡᤱᤛᤠᤱ ᤆᤥ᤺ᤰᤔᤠ ᤛᤢᤰᤋᤧᤳᤗᤥ॥

¹³ ᤗᤧᤶᤛᤢᤘᤠᤒᤠᤸᤗᤧ ᤐᤠ᤺ᤳᤋᤢ. “ᤔᤠᤖᤠᤶᤔᤥ ᤂᤡᤖᤡᤱᤒᤠᤴ ᤜᤢ᤺ᤰᤗᤘᤠ᤹ᤖᤥ ᤘᤠ᤹ᤖᤥ. ᤁᤡᤵᤔᤠ ᤁᤧᤄᤢᤒᤠ ᤂᤡᤖᤡᤱᤒᤠᤴ ᤗᤠᤶᤔᤥ ᤋᤠᤰᤁᤴᤏᤢ ᤘᤠ᤹ᤖᤥ॥”

¹⁴ ᤁᤢᤀᤧᤵᤔᤠᤜᤠ᤹ᤀᤥ ᤗᤠᤶᤎᤣ᤺ᤳᤋᤡᤴ ᤏᤠ ᤏᤢ ᤁᤳᤏᤠ ᤀᤡᤒᤠ ᤁᤢᤀᤡᤛᤡᤰ ᤗᤧᤶᤛᤢᤘᤠᤒᤠ ᤔᤏᤠᤴ ᤁᤢᤏᤧᤳᤏᤠᤀᤥ ᤗᤧᤱᤛᤡᤱᤗ ᤏᤧᤖᤥ॥

¹⁵ ᤗᤧᤶᤛᤢᤘᤠᤒᤠᤸᤗᤧ ᤁᤢᤜᤢᤰᤁᤡᤴ ᤁᤢᤍ᤺ᤰ ᤆᤩᤧᤳᤌᤩᤠᤀᤥ ᤑᤳᤇᤢᤖᤥ. ᤂᤧᤒᤩᤠᤱ ᤁᤢᤶᤒᤪᤠᤀᤥ ᤌᤠᤖᤡᤰ ᤌᤠᤰᤔᤠᤀᤠᤱ ᤐᤗᤧᤶ ᤗᤧᤶᤗᤥ॥

¹⁶ ᤁᤢᤀᤡ᤺ᤳᤋᤠᤖ ᤁᤧᤍᤱᤒᤠᤀᤠᤱ ᤏᤢᤃᤵ ᤁᤧᤒᤡᤒᤠ ᤏᤢᤛᤡ ᤔᤏᤠᤜᤠ᤹ᤏᤢ᤺ᤸᤗᤧ ᤗᤧᤶᤛᤢᤘᤠᤒᤧᤴ ᤀᤠᤵᤑᤣᤰ ᤂᤢᤏᤧ᤹ ᤛᤡᤰᤁᤢᤶᤏᤡᤒᤠ ᤀᤡ᤺ᤳᤇᤡᤱᤗᤥ॥

¹⁷ ᤂᤢᤏᤧ᤹ ᤀᤠᤵᤑᤣᤰᤏᤢ᤺ᤸᤗᤧ ᤘᤣ᤹ ᤕᤠᤵᤔᤡ᤺ᤸᤗᤧ ᤁᤢᤄᤧᤔᤠ᤹ᤀᤥ ᤜᤢᤰ ᤁᤧᤕᤠᤰᤐᤠ ᤔᤏᤠᤴ ᤏᤢ ᤋᤠᤵᤛᤫᤠᤒᤠ ᤂᤩᤠᤒᤧᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤁᤧᤍᤧᤶᤒᤠᤀᤠᤱ ᤁᤧᤀᤢ᤺ᤱᤒᤠ ᤔᤏᤠ᤺ᤱᤃ ᤗᤳᤇᤠᤖᤥ॥

¹⁸ ᤂᤧᤱᤃ ᤁᤧᤏᤠᤱᤒᤠ ᤜᤧᤰᤋᤱᤒᤠᤖᤥ ᤂᤧᤸᤗᤧ ᤔᤡᤎᤰᤐᤢ ᤗᤠᤵᤁᤧᤓᤢᤒᤠ ᤏᤢ ᤀᤠᤛᤧᤳᤛᤧᤵᤐᤠ ᤋᤥᤱ ᤁᤧᤀᤠᤵᤐᤠ ᤁᤢᤀᤡᤛᤡ᤺ᤰᤗᤥ.

¹⁹ ᤂᤧᤸᤗᤧ ᤁᤢᤜᤡᤶᤒᤣᤛᤠᤱᤒᤠᤴ ᤀᤡᤱᤗᤧᤰᤋᤢ ᤛᤢᤖᤢᤀᤠᤱ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ᤃ ᤘᤖᤧ᤹ᤖᤰ ᤆᤥᤃᤢᤱᤅᤠᤱ ᤘᤕᤠᤱᤗᤥ᥄”

²⁰ ᤛᤡᤱ ᤔᤧ᤺ᤴᤏᤣᤃ ᤔᤡᤴ ᤛᤡᤖᤥ. ᤆᤧ᤹ᤕᤠ ᤁᤧᤒᤱᤒᤠ ᤜᤥ᤺ᤵᤐᤡᤸᤗᤧ ᤂᤧᤔᤠ᤹ᤀᤡᤴ ᤆᤡᤵᤗᤥ॥

²¹ ᤔᤡᤄᤠᤰᤗᤠᤶ ᤔᤡᤛᤣ᤺ᤰ ᤑᤧᤰᤗᤥ. ᤛᤡᤱᤗᤠᤶ ᤔᤡ ᤋᤡ᤺ᤳᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤈᤧᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤂᤧᤔᤠ᤹ ᤑᤥ᤺ᤰᤂᤢᤖᤥ॥

²² ᤐᤠᤴ ᤁᤧᤒᤱᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤇᤣ᤺ᤰᤘᤠᤜᤠ᤹ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠ ᤀᤢᤶ ᤜᤧᤰᤁᤣ ᤗ᤹ᤖᤥ. ᤂᤧᤱᤜᤠ᤹ ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤥ ᤌᤠᤖᤡᤰ ᤁᤧᤳᤗᤥ॥

²³ ᤂᤠᤶ ᤂᤵᤐᤩᤠᤀᤥ ᤕᤢᤵᤐᤠ ᤐᤳᤋᤢ ᤑᤶᤔᤏᤠᤒᤠ ᤁᤢᤀᤡᤛᤡᤰ ᤁᤢ᤹ᤀᤡᤃᤧᤓᤧᤶᤒᤠᤸᤗᤧ ᤛᤡᤰᤗᤢᤱᤔᤧᤴ ᤁᤧᤗᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤌᤡᤶᤛᤢᤖᤥ॥

²⁴ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤏᤠᤴ ᤁᤢᤒᤠ᤺ᤴᤏᤡᤸᤗᤧ ᤌᤣ᤺ᤰᤛᤡᤱᤗᤥ. ᤁᤖ ᤁᤢᤛᤡᤰᤗᤢᤱᤔᤥᤃ ᤂᤧᤸᤗᤧ ᤀᤡᤱᤗᤧᤰ ᤐᤠ᤺ᤴᤏᤡᤴ ᤕᤢᤰᤂᤢᤖᤥ॥

²⁵ ᤂᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤢᤒᤠ ᤆᤥ᤺ᤰᤛᤠᤱ ᤏᤛᤠᤴ ᤔᤧᤈᤥᤃᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤛᤡᤰᤗᤢᤱᤔᤠᤴ ᤏᤢᤛᤡ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ᤖᤧ ᤛᤎᤧᤰ ᤁᤧᤍᤡᤶᤒᤠ ᤆᤥᤰᤗᤥ॥

²⁶ ᤂᤧᤸᤗᤧ ᤘᤣ᤹ᤜᤠ᤹ ᤂᤠ᤺ᤶᤔᤠᤛᤡ ᤁᤢᤏᤡᤱᤘᤠᤴ ᤆᤡᤱᤔᤠ ᤛᤢᤰᤋᤢᤖᤥ. ᤁᤖ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤜᤠ᤹ ᤁᤧᤖᤧᤰᤗᤥ ᤀᤥᤛᤣ᤺ᤴᤍᤠᤱ ᤐᤥᤱᤗᤥ॥

²⁷ ᤔᤏᤠ᤺ᤸᤗᤧ ᤗᤢᤶᤒᤠᤳ ᤋᤕᤢᤏᤧᤓᤃᤪ ᤂᤠ᤹ᤕᤥ ᤂᤢᤏᤧ᤹ ᤀᤠᤵᤑᤣᤰ ᤌᤠᤖᤥ. ᤔᤏᤠ᤺ᤸᤗᤧ ᤗᤢᤱᤅᤡᤴ ᤁᤧᤱᤄᤢᤏᤧᤓᤃᤪ ᤂᤧᤴ ᤗᤢᤱᤅᤡᤴ ᤁᤧᤱᤅᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤧᤵᤋᤢᤖᤥ॥

²⁸ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤸᤗᤧ ᤁᤢᤀᤡᤱᤗᤧᤰᤁᤡᤸᤗᤧ ᤀᤠᤳᤋᤡᤴ ᤁᤢᤏᤡᤱᤘᤠ᤹ ᤋᤢᤰᤗ ᤆᤥᤃᤢ. ᤜᤠᤒᤠ ᤂᤧᤴᤏᤣ ᤆᤡ᤺ᤳᤋᤢᤖᤥ. ᤔᤢᤷᤗᤧ᤺ᤶᤒᤠ ᤐᤠᤴ ᤁᤧᤒᤠ᤺ᤵᤐᤠ ᤔᤢᤖᤠ᤺ᤸᤗᤧ ᤀᤠᤔᤧᤱᤗᤥ॥