ᤂᤠᤜᤢᤴ 25 - LIFOTNTᤛᤥᤗᤥᤔᤏᤖᤧ ᤀᤠᤸᤗᤛᤠᤱ ᤘᤣ᤹ ᤕᤖᤡᤰ ᤁᤢᤄᤠᤜᤢᤴᤜᤠ᤹ 1 ᤛᤥᤗᤥᤔᤏᤖᤧ ᤁᤴ ᤁᤢᤄᤠᤜᤢᤴᤜᤠ᤹ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ᤺ᤸᤗᤧ ᤁᤢᤔᤏᤠᤜᤠ᤹ᤖᤧ ᤔᤧᤗᤡᤱᤄᤢᤒᤠᤖᤥ— 2 ᤁᤢᤓᤠ ᤐᤠ᤺ᤴᤜᤠ᤹ ᤛᤫᤠ᤺ᤳ ᤁᤵᤔᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤥ. ᤁᤢᤓᤠ ᤐᤠ᤺ᤴᤜᤠ᤹ ᤁᤥ᤺ᤵᤔᤠ ᤗ᤺ᤵᤔᤧᤸᤗᤧ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤔᤡᤍᤡᤱ ᤐᤥᤱᤗᤥ॥ 3 ᤀᤠᤰᤂᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤜᤠ᤹ ᤌᤠ᤺ᤱᤎᤠᤰ ᤐᤳ. ᤜᤧᤰᤁᤩᤠᤱ ᤕᤥ᤹ᤒᤠᤴ ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤥᤰᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠᤴ ᤁᤥ᤺ᤵᤔᤠ ᤜᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤰᤗᤥ॥ 4 ᤂᤧᤏᤧ᤹ ᤕᤢᤵᤐᤠ᤺ᤸᤗᤧ ᤁᤢᤜᤡ᤺ᤴ ᤗ᤺ᤳᤋᤧᤍᤣᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤁᤠᤷᤒᤥᤒᤠᤸᤗᤧ ᤁᤢᤗᤠᤃᤡ ᤕᤠ᤺ᤶᤒᤰ ᤁᤧᤒᤡᤒᤠ ᤏᤢᤒᤠ ᤆᤡᤃᤰᤘᤠ ᤗ᤺ᤶᤔᤠ ᤛᤢᤰᤗᤥ॥ 5 ᤜᤠᤱᤅᤡᤸᤗᤧ ᤁᤢᤍᤃᤡᤗᤠᤶ ᤁᤢ᤹ᤀᤡᤃᤧᤓᤧᤶᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤂᤧᤏᤧ᤹ ᤗ᤺ᤳᤋᤧᤍᤣᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤛᤠᤶᤕᤥᤏᤡᤔᤠᤗᤠᤶ ᤕᤢᤰᤛᤡᤱ ᤐᤥᤱᤗᤥ॥ 6 ᤜᤠᤱᤅᤡᤸᤗᤧ ᤁᤢᤍᤃᤡ ᤕᤶᤒᤠ ᤔᤏᤠ ᤔᤧᤜᤧᤴᤇᤡᤱᤅᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤕᤶᤒᤠ ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤏᤧ᤹ ᤕᤢᤱᤔᤠ ᤕᤢᤰ ᤔᤧᤃᤥ᤺ᤳᤋᤧᤴᤏᤧ᤹ᤀᤥ॥ 7 ᤕᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤕᤥ ᤌᤠᤔᤠᤏᤢ᤺ᤸᤗᤧ ᤋᤃᤡ. ᤂᤧᤱᤜᤠ᤹ᤖᤧ ᤀᤠᤵᤑᤣᤰ “ᤂᤧᤏᤧ᤹ ᤁᤳᤌᤥ ᤌᤠᤅᤧ᤹ᤀᤥ॥” ᤁᤧᤶᤔᤧᤵᤐᤧᤴ ᤁᤧᤗᤠᤃᤡ ᤏᤢᤒᤠ ᤐᤥᤱᤗᤥ॥ 8 ᤂᤧᤏᤧ᤹ ᤁᤧᤔᤡᤰᤁᤡᤸᤗᤧ ᤌᤣ᤺ᤴ ᤏᤡᤛᤢᤀᤠᤱ ᤘᤠ᤹. ᤂᤧᤴ ᤜᤠᤖᤠᤘᤖᤠ ᤁᤢᤓᤠᤱᤜᤡᤶᤔᤥ ᤔᤧᤍᤣ᤹ᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤴᤎᤠᤛᤣ᤺ᤰᤀᤥ ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤧᤏᤠᤎᤠᤛᤢᤸᤗᤧ ᤌᤣ ᤁᤧᤈᤥᤃᤢᤒᤣ᥅ 9 ᤁᤧᤜᤡᤶᤒᤣᤛᤠᤱᤒᤧᤴᤏᤢ ᤂᤧᤔᤠ᤹ ᤋᤢ᤺ᤴᤍᤣ᤹ᤜᤠ᤹ ᤐᤠ᤺ᤴᤎᤱ ᤁᤧᤈᤥᤃᤢᤸᤗᤧ. ᤘᤣ᤹ ᤔᤏᤠ᤺ᤸᤗᤧ ᤁᤢᤏᤡ᤺ᤴᤎᤥ ᤐᤠ᤺ᤴᤏᤥ ᤀᤡᤱᤗᤧᤰ ᤔᤧᤔᤧᤳᤋᤧᤴᤏᤧ᤹ᤀᤥ॥ 10 ᤔᤣ᤺ᤴᤏᤧᤓᤃᤪ ᤂᤧᤴ ᤁᤧᤄᤧᤶᤒᤧᤸᤗᤧ ᤂᤧᤏᤧ᤹ ᤛᤡᤖᤡᤱᤔᤔᤥ ᤁᤧᤎᤠᤖᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤁᤧᤔᤡᤱᤅᤡᤴ ᤀᤠᤓᤧᤸᤗᤧᤀᤠᤱ ᤔᤧᤔᤠᤏᤧᤸᤗᤥ॥ 11 ᤏᤢᤖᤡᤰᤁᤠᤱ ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤱᤃ ᤕᤢᤵᤐᤠ ᤆᤩᤧᤳᤌᤩᤠᤀᤥ ᤛᤠᤶᤔᤩᤠᤱ ᤏᤠᤱᤛᤣ᤹ᤜᤠ᤹ ᤋᤥ᤺ᤶᤔᤏᤠᤒᤠ ᤜᤧᤰᤋᤱᤒᤠᤖᤥ॥ 12 ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤀᤡᤃᤪ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤘᤠ᤺ᤳᤋᤡ ᤜᤧᤰᤁᤣ ᤛᤡᤰᤁᤢᤶᤛᤠᤒᤠ ᤔᤏᤠ᤺ᤸᤗᤧ ᤀᤠᤓᤧ᤺ᤰᤐᤠᤴ ᤁᤧᤄᤧᤶᤒᤠᤸᤗᤧᤗᤠᤃᤡ ᤐᤥᤱᤗᤥ॥ 13 ᤐᤥᤃᤢᤃᤧᤴ ᤁᤢᤈᤠ ᤛᤢᤶᤔᤠ ᤕᤧᤶᤔᤥ ᤁᤧᤛᤣ᤺ᤶᤒᤠ ᤆᤫᤠ᤺ᤳ ᤌᤢᤱᤔᤏᤠᤒᤠ ᤜᤧᤰᤁᤣ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤀᤡᤱᤄᤱᤛᤠᤒᤧᤴ ᤂᤢᤏᤧ᤹ ᤁᤧᤒᤠᤱᤒᤠᤜᤠ᤹ᤖᤧ ᤗᤠᤃᤡ ᤐᤥᤱᤗᤥ. ᤂᤧᤸᤗᤧ ᤂᤢᤏᤧ᤹ ᤁᤢᤴᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤆᤠᤱᤈᤠᤱ ᤆᤥᤃᤢᤖᤥ॥ 14 ᤀᤠᤵᤑᤣᤰ ᤔᤠᤱᤜᤢᤵ ᤁᤧᤈᤥ᤺ᤰᤐᤠᤀᤠᤱ ᤔᤡᤰᤋᤥᤰ ᤔᤧᤴᤍᤠ᤺ᤵᤔᤏᤠᤒᤠ ᤔᤏᤠᤴ ᤕᤶᤒᤠ ᤐᤠᤴ ᤐᤠ᤺ᤳᤗᤥ. ᤂᤧᤱᤃ ᤘᤜᤡᤳ ᤔᤣ᤺ᤴᤏᤣᤒᤠ ᤂᤠ᤹ᤔᤡᤳ ᤏᤢ ᤛᤢᤖᤡᤳ ᤁᤣᤈᤱ ᤜᤧᤰᤋᤱᤒᤠᤖᤥ॥ 15 ᤏᤠᤛᤡᤌ᤺ᤵᤔᤠ ᤐᤠ᤺ᤴᤏᤡᤸᤗᤧ ᤕᤢᤰᤛᤠᤒᤧᤴ ᤗᤧᤶᤔᤠ ᤛᤢᤰᤋᤧᤳᤗᤥ. ᤜᤧᤰᤁᤩᤠᤱ ᤛᤢᤶᤛᤢᤶᤒᤠ ᤗᤧᤛᤥ᤺ᤳᤋᤧᤸᤗᤧ ᤕᤧᤵ ᤗᤢᤱᤛᤡ ᤕ᤺ᤶᤔᤠ ᤛᤢᤰᤋᤢᤖᤥ॥ 16 ᤛᤰᤘᤠᤄᤢᤴ ᤁᤧᤕᤠᤱᤄᤢᤏᤧᤓᤃᤪ ᤁᤧᤕᤥᤕᤥᤖᤰ ᤆᤩᤧ᤹ᤀᤥ. ᤁᤴ ᤕᤖᤡᤰ ᤁᤧᤈᤏᤧᤓᤃᤪ ᤂᤧᤏᤧ᤹ ᤁᤧ᤹ᤒᤧᤵᤔᤠ᤺ᤳ ᤁᤧᤳᤗᤥ॥ 17 ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤢᤓᤠ ᤕᤧᤶᤔᤥᤖᤰ ᤐᤣᤃᤧ᤹ᤀᤥ. ᤂᤧᤏᤧ᤹ ᤕᤧᤳᤗᤧᤱ ᤁᤧᤒᤣ᤺ᤰᤏᤧᤓᤃᤪ ᤂᤧᤸᤗᤧ ᤁᤧᤈᤡ᤺ᤳᤗᤥ॥ 18 ᤁᤢᤜᤡᤶᤒᤣᤛᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤱᤗᤧᤰ ᤋᤥ᤺ᤴᤍᤡ ᤁᤧᤒᤡᤒᤧᤴ ᤋᤰᤁᤠᤳ ᤀᤡᤃᤪ ᤋᤠᤓᤣ ᤁᤡᤃᤪ ᤜᤠᤛᤶᤛᤶᤒᤠ ᤋᤥᤱ ᤜᤧᤰᤋᤱᤒᤠ ᤔᤏᤠᤖᤥ॥ 19 ᤋᤢᤰᤂᤣᤘᤠ ᤕᤧᤶᤔᤥ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠ ᤔᤏᤠᤴ ᤏᤠᤛᤠ᤹ᤔᤠᤃ ᤁᤧᤍᤢᤰᤐᤠ ᤜᤠᤒᤥ᤹ᤒᤠ ᤀᤡᤃᤪ ᤁᤧᤛᤰᤐᤠ ᤗᤠᤱ ᤐᤵᤐᤠ ᤁᤢᤀᤡᤛᤡ᤺ᤰᤗᤥ॥ 20 ᤏᤡᤱᤘᤠ᤹ ᤋᤢᤰᤂᤣᤀᤥ ᤁᤧᤎᤠᤒᤧᤸᤗᤧ ᤗᤠᤃᤡ ᤛᤠᤶᤃᤧᤗᤥᤒᤠ ᤔᤏᤠᤴ ᤆᤢᤱᤛᤡ᤺ᤰᤔᤠ ᤕᤧᤴᤏᤥ ᤂᤠᤶᤍᤣ᤺ᤳᤋᤡᤴ ᤁᤧᤏᤠᤵᤐᤠᤃᤧᤍᤣ᤹ᤒᤠ ᤜᤧᤰᤁᤣ ᤀᤡᤃᤪ ᤕᤠᤱᤄᤣ᤺ᤰᤀᤥ ᤁᤧᤛᤢ᤺ᤵᤐᤧᤴ ᤜᤢᤱᤔᤏᤠ ᤁᤣ᤺ᤵᤔᤏᤠ ᤜᤧᤰᤁᤣ ᤐᤥᤱᤗᤥ॥ 21 ᤁᤧᤏᤡᤱᤔᤡᤴ ᤛᤠᤰᤔᤧᤴᤈᤠ ᤘᤠ᤹ᤏᤧᤓᤃᤪ. ᤆᤠᤔᤠ ᤁᤢᤈᤠ ᤐᤡᤖᤧ᤹ᤀᤥ. ᤁᤢᤘᤠᤔᤡ᤺ᤰᤁᤠᤱ ᤘᤠ᤹ᤏᤧᤓᤃᤪ. ᤌᤢᤱᤔᤠ ᤆᤫᤠ᤺ᤳ ᤐᤡᤖᤧ᤹ᤀᤥ॥ 22 ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤛᤡᤖᤡᤱᤔ᤺ᤔᤧᤸᤗᤧᤴ ᤔᤡᤍ᤺ᤳᤋᤧᤴ ᤁᤧᤜᤢᤰᤂᤢᤒᤠ ᤜᤧᤰᤁᤣ ᤐᤥᤱᤗᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤜᤠᤱᤛᤧᤶ ᤁᤧᤒᤡᤖᤥ॥ 23 ᤌᤠᤱᤃᤧᤳ ᤗᤧᤵᤔᤠᤱᤒᤠ ᤛᤢᤖᤡᤳᤋᤧᤸᤗᤧ ᤘᤠᤜᤡᤳ ᤌᤠᤛᤢᤒᤠ ᤜᤧᤰᤁᤣ ᤀᤡᤱᤗᤧᤰᤛᤫᤠ ᤗᤧᤛᤥ᤺ᤳᤋᤧᤸᤗᤧ ᤏᤠᤖᤠᤴ ᤔᤠᤱᤄᤪᤢ ᤔᤧᤳᤋᤢ ᤋᤠᤖᤢᤖᤥ॥ 24 ᤂᤧᤔᤠ᤹ ᤁᤧᤈᤥ᤺ᤰᤔᤠ ᤔᤣ᤺ᤳᤋᤡᤴᤏᤢ ᤗᤳᤌᤡᤰ ᤜᤡᤶᤔᤥ ᤕᤢᤱᤔᤠᤏᤢ᤺ᤸᤗᤧᤃ ᤁᤦᤛᤡ᤺ᤸᤗᤧ ᤗᤳᤇᤠ ᤁᤢᤛᤢᤰᤐᤥ ᤕᤢᤱᤔᤠ ᤏᤢᤒᤠ ᤐᤥᤱᤗᤥ॥ 25 ᤁᤧᤏᤠᤒᤠ ᤕᤠᤶᤛᤠᤶᤔᤡᤸᤗᤧ ᤗᤠᤃᤡ ᤁᤧᤛᤣ᤺ᤶᤒᤠ ᤆᤫᤠ᤺ᤳ ᤜᤧᤰᤁᤣ ᤔᤠ᤺ᤱᤄᤠ ᤗᤠᤈᤣ᤹ᤗᤠᤶ ᤁᤧᤃᤧᤵᤐᤠ ᤏᤢᤒᤠ ᤀᤡᤱᤄᤱᤅᤡᤴ ᤐᤥᤱᤗᤥ॥ 26 ᤋᤠᤰᤁᤧᤓᤧᤒᤧᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥ᤺ᤰᤔᤠ ᤁᤧᤒᤠᤱᤒᤠ ᤛᤠᤶᤕᤥᤒᤠ ᤔᤏᤠᤴ ᤔᤠᤰᤂᤢᤴᤍᤩᤠ ᤆᤫᤠ᤺ᤳᤋᤧᤸᤗᤧ ᤘᤒᤢᤴᤍᤠᤰᤁᤡᤴ ᤑᤧᤳᤗᤠ᤺ᤴᤍᤢᤒᤠ ᤜᤧᤰᤋᤱᤒᤠᤖᤥ॥ 27 ᤛᤠ᤹ᤖᤡᤰ ᤕᤖᤡᤰ ᤛᤰᤘᤠᤄᤢ ᤆᤠᤔᤠ ᤏᤢᤒᤠ ᤔᤣ᤺ᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤵᤑᤣᤰ ᤆᤶᤛᤡᤱᤔᤠᤴᤏᤠᤱ ᤏᤢᤒᤠ ᤔᤣ᤺ᤴᤗᤥ॥ 28 ᤁᤢᤛᤡᤰ ᤌᤶᤔᤠ ᤔᤧᤴᤇᤢᤰᤔᤏᤠ ᤔᤏᤠ᤺ᤱᤃ ᤗᤢᤱᤎᤠᤰᤜᤠ᤹ ᤁᤧᤗᤢ᤺ᤶᤒᤠ ᤁᤧᤒᤣ᤺ᤰᤐᤠ ᤕᤧᤰᤕᤰ ᤁᤢᤓᤠ᤹ᤒᤠᤱ ᤁᤧᤜᤥᤵᤐᤠ ᤜᤧᤰᤋᤱᤒᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.