ᤂᤠᤜᤢᤴ 24 - LIFOTNTᤂᤠᤜᤢᤴ ᥈᥆ 1 ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤏᤠᤔᤧᤜᤧᤳᤋᤧᤛᤧᤴᤏᤧ᤹ᤀᤥ. ᤂᤧᤱᤜᤠ᤹ᤏᤢ ᤋᤣ᤺ᤱᤈᤢᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤧᤴᤏᤧ᤹ᤀᤥ. 2 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤧᤸᤗᤧ ᤂᤠᤷᤔᤧᤴᤍᤰ ᤐᤠᤴ ᤔᤧᤀᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠ᤺ᤸᤗᤧ ᤂᤧᤈᤧᤰ ᤐᤠᤴ ᤔᤧᤒᤠ᤺ᤳᤋᤢᤖᤥ॥ ᤂᤠᤜᤢᤴ ᥈᥇ 3 ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤜᤡᤶ ᤆᤥ᤺ᤰᤔᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤠᤛᤡᤱᤏᤡ᤺ᤵᤔᤥ ᤂᤧᤴ ᤐᤥ᤺ᤰᤗᤥ॥ 4 ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤜᤡᤶᤔᤡᤴ ᤀᤡᤔᤧᤸᤗᤢᤱᤒᤠ ᤏᤢ ᤏᤢᤒᤠ ᤐᤠ᤺ᤴᤜᤠ᤹ᤖᤧ ᤕᤠᤰᤑᤠᤱᤜᤠ᤹ ᤛᤎᤧᤰ ᤁᤧᤍᤡᤶᤒᤠ ᤆᤥᤰᤗᤥ॥ ᤂᤠᤜᤢᤴ ᥈᥈ 5 ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤁᤢᤔᤢᤰᤛᤠᤶᤔᤡᤴ ᤐᤕᤶ ᤕᤶᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠ᤺ᤸᤗᤧ ᤁᤢᤔᤢᤰᤁᤧᤴ ᤐᤥᤖᤥ॥ 6 ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤗᤠᤶᤗᤥᤔᤠ ᤐᤠᤴ ᤆᤠᤜᤠ ᤁᤧᤈᤥ᤺ᤰᤗᤥ. ᤁᤧᤏᤠ᤺ᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤛᤢᤈᤠᤛᤠᤒᤠ ᤆᤠᤜᤠ ᤔᤧᤈᤥᤰᤗᤥ॥ ᤂᤠᤜᤢᤴ ᥈᥉ 7 ᤀᤍᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤛᤠ᤹ᤖᤡᤰ ᤌᤥᤎᤥᤰᤐᤠ ᤐᤠ᤺ᤴᤗᤥ. ᤗᤠᤶᤎᤣ᤺ᤳᤋᤥ ᤁᤧᤈᤢᤶᤒᤠ ᤆᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤐᤠ᤺ᤵᤔᤠ ᤐᤠᤴ ᤂᤧᤱᤜᤠ᤹ᤖᤧ ᤌᤧᤔᤠᤀᤠᤱ ᤔᤧᤱᤃᤳᤋᤢᤴᤗᤥ॥ ᤂᤠᤜᤢᤴ ᥈᥊ 8 ᤀᤠᤳᤋᤡᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤆᤧᤶᤓᤴ ᤁᤧᤈᤥ᤺ᤰᤐᤠ ᤔᤡᤱᤗᤠᤶ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥ 9 ᤀᤍᤱᤅᤡᤸᤗᤧ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤗᤠᤕᤥ ᤗᤠᤛᤥ᤺ᤳᤗᤥ. ᤜᤧᤰᤁᤩᤠᤱ ᤔᤏᤠᤜᤠ᤹ ᤕᤠᤵᤔᤡ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤧᤴ ᤁᤢᤛᤡᤰᤗᤧ᤺ᤱᤗᤥ॥ ᤂᤠᤜᤢᤴ ᥈᥋ 10 ᤋᤢᤰᤂᤣᤗᤠᤰᤂᤣᤒᤠ ᤕᤧᤶᤔᤥ ᤁᤧᤗᤢᤱᤔᤠ᤹ ᤑᤩᤠ᤺ᤱ ᤗ᤹ᤏᤧᤓᤃᤪ. ᤂᤧᤏᤧ᤹ ᤀᤠᤰᤂᤧᤴ ᤛᤠ᤹ᤖᤡᤰ ᤔᤧᤴᤎᤢᤶᤔᤏᤠᤒᤠ ᤁᤧᤈᤥ᤺ᤰᤗᤥ᥄ 11 ᤛᤧᤳᤇᤧ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤂᤧᤏᤧ᤹ ᤛᤧ᤺ᤵᤋᤧᤛᤧ᤹ᤀᤥ. ᤆᤧᤵᤔᤠ ᤛᤧᤵᤔᤠᤛᤡᤖᤧ ᤗᤠᤃᤡ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤌᤣ᤺ᤰᤋᤧᤛᤧ᤹ᤀᤥ॥ 12 “ᤁᤖ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥ᤺ᤶᤏᤠᤖᤥ.” ᤁᤧᤗ᤹ᤖᤡᤏᤧᤓᤃᤪ ᤌᤣ ᤛᤡᤰᤗᤢᤱᤔᤠ᤹ ᤁᤧᤛᤠ᤹ᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ᤀᤥ ᤔᤧᤕᤢᤰᤂᤢᤴᤏᤠᤱᤒᤡ᥅ ᤂᤧᤏᤧ᤹ ᤁᤧᤜᤡᤱᤔᤧᤴ ᤀᤥᤃᤧᤔᤧᤵᤐᤧᤸᤗᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥᤛᤢᤴᤏᤠᤱ ᤒᤡ᥅ ᤌᤣ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤗᤧᤰᤘᤠ ᤔᤧᤏᤢ᤺ᤰᤋᤢᤴᤏᤠᤱᤒᤡ᥅ ᤂᤠᤜᤢᤴ ᥈᥌ 13 ᤀᤠᤒᤢᤃᤧᤴ ᤀᤠᤛ᤻ᤛᤠᤀᤣ. ᤛᤰᤘᤠᤄᤢᤴ ᤆᤩᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤢᤒᤠ ᤐᤥᤱᤗᤥ. ᤁᤢᤗᤧᤰᤁᤥᤒᤠ ᤛᤰᤛᤠᤄᤢ᤺ᤴ ᤁᤧᤈ᤺ᤸᤗᤧ ᤐᤗᤡᤶ ᤗᤡᤶᤗᤥ॥ 14 ᤁᤴ ᤐᤠ᤺ᤴᤏᤡᤴᤏᤠᤱ ᤏᤡᤱᤘᤠ᤹ᤀᤥ ᤕᤢᤰᤂᤧ᤹ᤀᤥ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤁᤧᤕᤠᤶᤛᤠᤶᤔᤡᤸᤗᤧ ᤗᤠᤃᤡ ᤛᤰᤘᤠᤄᤢᤖᤥ॥ ᤁᤴ ᤁᤧᤄᤥᤛᤢᤏᤧᤓᤃᤪ ᤂᤧᤏᤧ᤹ ᤁᤧᤗᤠᤃᤡ ᤋᤠᤕᤧᤶᤔᤥ ᤏᤡᤱᤛᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤈᤥᤃᤢᤒᤠ ᤏᤡᤱᤛᤠᤱᤅᤡᤴ ᤌᤣᤏᤠᤎᤣ ᤔᤧᤒᤥᤱᤏᤧᤸᤗᤥ॥ ᤂᤠᤜᤢᤴ ᥈᥍ 15 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤡᤴ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤛᤢᤃᤢᤀᤠᤱ ᤕᤢᤱᤒᤠ ᤜᤧᤰᤁᤣ ᤂᤧᤏᤧ᤹ ᤔᤧᤛᤢᤃᤧᤴᤏᤧ᤹ᤀᤥ. ᤂᤧᤸᤗᤧ ᤁᤢᤕᤢᤱᤔᤠᤍᤧᤴᤏᤡᤴ ᤜᤡᤶ ᤗᤡᤔᤧᤔᤧᤳᤋᤧᤴᤏᤧ᤹ᤀᤥ. 16 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤒᤠᤴ ᤏᤢᤛᤡᤗᤧᤱ ᤆᤥ᤺ᤴᤇᤠᤱ. ᤕᤠᤶᤔᤥ ᤐᤥ᤺ᤰᤗᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤠᤱᤍᤢᤰᤔᤧᤸᤗᤧ ᤔᤧᤰᤂᤢᤛᤡᤖᤥ॥ ᤂᤠᤜᤢᤴ ᥈᥎ 17 ᤂᤧᤏᤧ᤹ ᤁᤧᤏᤡᤱᤔᤡᤴ ᤁᤧᤛᤠᤰᤐᤥ ᤌᤠ᤺ᤸᤗᤧ ᤔᤧᤛ᤺ᤳᤋᤧᤴᤏᤧ᤹ᤀᤥ. ᤂᤢᤏᤧ᤹ ᤆᤥ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤕᤧᤕᤧ ᤔᤧᤗ᤹ᤖᤧᤴᤏᤧ᤹ᤀᤥ. 18 ᤔᤣ᤺ᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤛᤢᤀᤠᤱ ᤂᤢᤏᤧ᤹ ᤔᤧᤍᤧᤴᤏᤧᤸᤗᤥ. ᤜᤧᤰᤁᤩᤠᤱ ᤂᤧᤴ ᤗᤠᤶᤒᤠ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤂᤧᤳᤋᤢᤍᤣᤛᤢᤖᤥ॥ ᤂᤠᤜᤢᤴ ᥈᥏ 19 ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤁᤧᤏᤡᤱᤘᤠ᤹ ᤔᤧᤍᤢᤃᤧᤴᤏᤧ᤹ᤀᤥ. ᤀᤡᤃᤪ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤠᤔᤧᤜᤧᤳᤋᤧᤛᤧᤴᤏᤧ᤹ᤀᤥ. 20 ᤌᤣᤀᤠᤱᤓᤧᤸᤗᤧ ᤋᤠᤰᤁᤧᤓᤧᤒᤧᤸᤗᤧ ᤋᤠᤕᤧᤶᤔᤥ ᤁᤢᤏᤡᤱᤛᤠᤱ ᤜᤥᤵᤗᤥ. ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤛᤣᤔᤡᤴ ᤔᤧᤛᤧᤖᤢ ᤔᤧᤒᤡᤖᤢᤖᤥ॥ ᤂᤠᤜᤢᤴ ᥉᥆ 21 ᤀᤠᤛ᤻ᤛᤠᤀᤣ. ᤕᤜᤘᤣ ᤍᤠᤱᤒᤠᤴ ᤜᤧᤰᤁᤩᤠᤱ ᤜᤠᤱᤅᤡᤴᤏᤢ ᤁᤡᤛᤧ᤹ᤀᤥ. ᤜᤧᤰᤁᤩᤠᤱ ᤜᤠᤱᤐᤡᤑᤩᤢᤱ ᤁᤧᤈᤥ᤺ᤰᤐᤠᤜᤠ᤹ᤏᤢ ᤔᤧᤍᤱᤛᤡᤱᤅᤡᤴᤏᤧ᤹ᤀᤥ. 22 ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤏᤧᤵᤔᤠᤱᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤡᤰᤗᤧᤱᤗᤧ ᤂᤠᤵᤐᤢᤌᤩ᤺ᤱ ᤐᤥᤱᤔᤧᤴ ᤐᤠᤱᤄᤢ ᤋᤠᤛᤢᤛᤡᤖᤥ॥ ᤜᤧᤰᤁᤩᤠᤱ ᤀᤠᤰᤋᤱᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤢᤴᤇᤡ᤹ ᤐᤠᤱᤄᤢ ᤋᤠᤛᤢᤛᤡ ᤁᤧᤗ᤹ᤒᤧᤴ ᤀᤠᤳᤋᤡᤸᤗᤧ ᤏᤡᤱᤘᤠ᤹ ᤂᤥᤛᤢᤒᤣ᥅ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤀᤠᤸᤗᤛᤠᤱ ᤘᤣ᤹ ᤂᤠᤜᤢᤴ ᤐᤠ᤺ᤴᤜᤠ᤹ 23 ᤁᤴ ᤐᤠ᤺ᤴᤜᤠ᤹ᤀᤠᤱ ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤁᤢᤄᤠᤜᤢᤴᤗᤥ— ᤂᤠᤛᤧᤴᤗᤥ᤺ᤶᤔᤧᤸᤗᤧ ᤀᤣ᤺ᤰ ᤐᤀᤣ᤺ᤰ ᤆᤥ᤺ᤰᤔᤠ ᤏᤢᤒᤠ ᤔᤣ᤺ᤴᤗᤥ॥ 24 ᤀᤠᤳᤋᤡᤸᤗᤧ ᤀᤠᤵᤋᤡᤰᤛᤠᤒᤧᤴ “ᤁᤢᤍᤥ᤺ᤵᤔᤠ ᤁᤧᤈᤥᤰ” ᤔᤧᤳᤋᤢ᤹. ᤔᤏᤠᤜᤠ᤹ᤖᤧ ᤂᤧᤴ ᤔᤠᤱᤍᤣ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤴ ᤆᤧᤰᤕᤠ ᤔᤧᤔᤧᤳᤋᤢᤖᤥ॥ 25 ᤁᤖ ᤀᤠᤵᤋᤡᤰᤛᤠᤒᤧᤴ ᤀᤠᤵᤋᤡᤰᤛᤠᤒᤠᤀᤣ ᤁᤧᤔᤧᤵᤐᤠᤜᤠ᤹ ᤔᤧᤏᤢ᤹ᤔᤧᤍᤠᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤖᤡᤰ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤖᤥ॥ 26 ᤁᤢᤍᤥ᤺ᤵᤔᤠ ᤏᤢᤃᤵ ᤏᤢ᤺ᤰᤔᤠᤃ ᤆᤢᤶᤔᤡᤴ ᤜᤧᤵᤔᤏᤠᤒᤠ ᤁᤢᤀᤡᤛᤡ᤺ᤰᤗᤥ॥ 27 ᤗᤠᤁᤠᤳᤐᤠ ᤕᤠ᤺ᤶᤒᤰᤜᤠ᤹ ᤆᤥᤃᤧ ᤛᤢᤖᤧ᤹ᤀᤥ. ᤜᤧᤰᤁᤩᤠᤱ ᤀᤡᤰᤋᤠᤵᤜᤠ᤹ ᤕᤠᤖᤡᤵ ᤆᤥᤃᤧ᤹ᤀᤥ. ᤂᤧᤴ ᤀᤣᤃᤠᤱ ᤂᤧᤏᤧ᤹ ᤁᤧᤜᤡᤶᤔᤡᤴ ᤆᤥᤃᤧ᤹ᤀᤥ॥ 28 ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤏᤧ ᤌᤣᤏᤠᤎᤣ ᤛᤠᤂᤡ ᤔᤧᤒᤡᤖᤧᤴᤏᤧ᤹ᤀᤥ. ᤀᤡᤃᤪ ᤁᤧᤶᤒᤪᤠᤛᤣ᤹ᤀᤡᤴ ᤀᤡᤱᤗᤧᤰ ᤕᤠ᤺ᤶᤒᤰᤗᤧ ᤗᤠᤃᤡ ᤔᤧᤔᤢᤴᤍᤧᤴᤏᤧ᤹ᤀᤥ॥ 29 ᤂᤧᤏᤧ᤹ ᤀᤰᤂᤣ ᤔᤧᤒᤠ᤺ᤳᤋᤧᤴᤏᤧ᤹. “ᤂᤧᤸᤗᤧ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤢᤱᤗᤥ. ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱᤒᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ᥄” 30 ᤀᤠᤱᤃᤠ᤹ ᤗᤧᤶᤛᤢᤘᤠᤒᤠ ᤌᤡᤰᤗᤧ ᤁᤢᤀᤡᤰᤋᤠᤵᤐᤥᤗᤠᤶ ᤐᤣᤃᤠᤱᤗᤥ. ᤜᤧᤰᤁᤩᤠᤱ ᤁᤢᤏᤧᤜᤡ ᤁᤧᤜᤥᤵᤐᤠ ᤌᤡᤰᤗᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤗᤠᤶ ᤐᤣᤃᤠᤱᤗᤥ. 31 ᤂᤧᤴ ᤁᤧᤖᤧᤰ ᤐᤡᤛᤠᤱ ᤋᤡᤱᤃᤪᤣᤰᤜᤠ᤹ ᤗᤡᤱᤛᤧᤀᤠᤱ ᤕᤢᤅᤧᤖᤥ. ᤀᤡᤰᤋᤠᤵ ᤁᤢᤗᤧ᤺ᤶ ᤕᤠ᤺ᤴᤛᤢᤱᤜᤠ᤹ ᤋᤠᤒᤧᤀᤠᤱ ᤏᤧᤛ᤻ᤛᤧᤖᤥ. ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧᤖᤥ॥ 32 ᤀᤠᤱᤃᤠ᤹ ᤀᤥᤔᤧᤳᤋᤢᤱᤒᤠ ᤐᤠ᤺ᤴᤜᤠ᤹ ᤀᤠᤛᤡᤰᤗᤢᤱᤔᤥ ᤀᤡ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤏᤡᤛᤢᤱᤒᤠ ᤐᤠ᤺ᤴᤜᤠ᤹ᤗᤠᤶ ᤏᤡᤛᤠᤶ ᤜᤢ᤹ᤛᤡᤱᤅᤠᤱᤗᤥ॥ 33 ᤛᤵᤑᤠᤎᤡᤰ ᤀᤡᤶᤔᤠ ᤏᤢ ᤛᤶᤔᤠᤈᤡᤰ ᤀᤡᤶᤎᤰᤘᤠ ᤗᤥᤔᤠᤖᤧ. ᤜᤢᤰᤁᤡᤴ ᤀᤡᤓᤢᤵᤔᤠᤀᤠᤱ ᤛᤵᤑᤠᤎᤡᤰ ᤏᤠ᤺ᤶᤛᤡᤱᤔᤠᤖᤧ. 34 ᤕᤠᤱᤛᤠ᤹ᤔᤧᤴ ᤂᤧᤏᤧ᤹ᤀᤥ ᤑᤠ᤺ᤴᤍᤠ ᤁᤢᤀᤡᤛᤡᤰ ᤋᤠᤖᤥ. ᤁᤢᤜᤥ᤺ᤵᤔᤠ ᤁᤢᤛᤠᤰᤔᤧᤴ ᤋᤠᤓᤣ ᤁᤧᤜᤣᤒᤠ ᤔᤏᤠ ᤁᤢᤀᤡᤛᤡᤰ ᤋᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.