ᤂᤠᤜᤢᤴ 23 - LIFOTNTᤂᤠᤜᤢᤴ ᥍ 1 ᤂᤧᤏᤧ᤹ ᤕᤢᤰᤛᤠᤒᤧᤴᤏᤢ ᤁᤢᤈᤠ ᤆᤠᤛᤧ ᤁᤧᤕᤢᤱᤛᤡᤱᤅᤧᤸᤗᤧ. ᤂᤧᤏᤧ᤹ ᤁᤧᤍᤃᤡ ᤌᤣᤎᤣ ᤔᤧᤕᤢᤰᤂᤢᤀᤠᤱ ᤕᤢᤱ ᤂᤧᤴ ᤔᤡᤰᤆᤥ ᤐᤥ᤹ᤖᤧᤀᤥ. 2 ᤂᤧᤏᤧ᤹ ᤕᤖᤡᤰ ᤁᤢᤈᤠᤄᤧ ᤆᤥ᤺ᤰᤔᤠ ᤕᤧᤵᤗᤧᤰ ᤁᤧᤃᤳᤋᤢᤏᤧᤓᤃᤪ. ᤂᤧᤏᤧ᤹ ᤁᤧᤍᤳᤗᤢᤶᤒᤣ᤺ᤵᤔᤥ ᤑᤧᤈᤠ᤺ᤴ ᤑᤳᤇᤧ᤹ᤀᤥ॥ 3 ᤂᤧᤸᤗᤧ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠᤴ ᤆᤠᤱᤃᤥ ᤔᤧᤗ᤹ᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤢᤈᤠᤴ ᤀᤡᤱᤀᤠᤗᤧᤰᤗᤧᤰᤐᤠ ᤆᤥᤰᤗᤥ॥ ᤂᤠᤜᤢᤴ ᥎ 4 ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥᤱᤛᤧ ᤛᤠ᤹ᤖᤡᤰ ᤔᤧᤕᤢ᤺ᤳᤇᤡᤱᤅᤧᤴᤏᤧ᤹ᤀᤥ. ᤀᤠᤓᤧᤸᤗᤧ ᤕᤠ᤺ᤴᤎᤠᤗᤠᤶ ᤀᤱᤛᤡᤱᤔᤠ ᤁᤧᤗ᤹ᤒᤠ ᤐᤠ᤺ᤴᤏᤥ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧ᤹ᤀᤥ॥ 5 ᤁᤧᤕᤠᤱᤛᤠᤁᤢᤴᤎᤣᤴ ᤔᤡᤰᤆᤡᤖᤠᤵᤐᤥ ᤂᤥᤍᤧᤳᤗᤥ. ᤜᤧᤰᤁᤩᤠᤱ ᤂᤧᤴ ᤐᤣ᤺ᤰᤂᤧᤳ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤗᤠᤵ ᤗᤡᤱᤗᤥ. ᤂᤶᤓᤩᤠᤱ ᤋᤠᤱᤛᤠᤱᤒᤥ ᤗᤧᤵᤔᤠᤱ ᤔᤢᤕᤠ ᤜᤧᤰᤁᤣ ᤐᤧᤒᤣ᤺ᤰᤗᤥ॥ ᤂᤠᤜᤢᤴ ᥏ 6 ᤂᤡ᤺ᤶᤈᤰᤘᤠ ᤔᤏᤠ᤺ᤸᤗᤧ ᤁᤢᤈᤠᤴ ᤂᤧᤏᤧ᤹ ᤔᤧᤈᤧᤴᤏᤧ᤹ᤀᤥ. ᤂᤧᤸᤗᤧ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠᤴ ᤆᤠᤔᤠ ᤏᤡᤱᤘᤠ᤹ ᤔᤧᤈᤥᤃᤧᤏᤧ᤹ᤀᤥ. 7 ᤌᤣᤀᤠᤱᤓᤧᤸᤗᤧ ᤂᤧᤱᤃ ᤁᤴ ᤐᤖᤡᤰᤐᤠ ᤔᤏᤠᤖᤥ. ᤂᤧᤸᤗᤧ ᤀᤠᤰᤂᤩᤠᤰ ᤁᤢᤔᤧᤸᤗᤢᤱ ᤔᤠᤛᤢᤱ ᤑᤠ᤹ᤀᤠᤱ ᤀᤠᤓᤧᤸᤗᤧᤛᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥ ᤂᤧᤸᤗᤧ ᤂᤧᤏᤧ᤹ “ᤆᤧ᤹ ᤌᤢᤅᤧ᤹.” ᤁᤧᤔᤧᤳᤗᤥ. ᤁᤖ ᤂᤧᤸᤗᤧ ᤁᤢᤏᤡᤱᤘᤠᤴ ᤂᤧᤏᤧ᤹ᤏᤢ ᤜᤥᤵᤗᤥ॥ 8 ᤂᤧᤏᤧ᤹ ᤆᤒᤧ᤺ᤳᤇᤡᤰᤗᤰ ᤁᤧᤈᤒᤠᤴᤏᤠᤱ ᤁᤧᤒᤧᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤴ ᤁᤧᤈᤔᤢᤒᤧᤴ ᤜᤏᤧ ᤆᤠᤛᤥᤰᤗᤥ॥ ᤂᤠᤜᤢᤴ ᥇᥆ 9 ᤀᤍᤱ ᤔᤏᤠᤜᤠ᤹ᤏᤢ ᤂᤧᤏᤧ᤹ ᤔᤧᤒᤠᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤴᤈᤠ᤺ᤰᤁᤡᤸᤗᤧ ᤂᤠᤛᤡᤱᤏᤡ᤺ᤵᤔᤠᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤖᤥ॥ ᤂᤠᤜᤢᤴ ᥇᥇ 10 ᤀᤢᤏᤠᤜᤢᤖᤡᤀᤠᤱᤎᤥᤒᤠ ᤗᤢᤱ ᤀᤡ᤺ᤴᤍᤥᤜᤠ᤹ ᤔᤧᤈᤳᤋᤧᤴᤏᤧ᤹ᤀᤥ. ᤀᤡᤃᤪ ᤕᤧᤳᤇᤠ ᤜᤥ᤹ᤍᤥᤰᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤋᤠᤵᤜᤠ᤹ ᤔᤧᤕᤢᤰᤋᤧᤴᤏᤧ᤹ᤀᤥ. 11 ᤌᤣᤀᤠᤱᤓᤧᤸᤗᤧ ᤂᤧᤴᤜᤠ᤹ᤖᤧ ᤂᤢᤴᤇᤡ᤹ ᤁᤧᤎᤧ᤹ᤒᤧᤴ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ. ᤁᤧᤍᤰᤗᤧᤱᤘᤠᤀᤥ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢ᤺ᤴᤍᤣᤴ ᤑᤥ᤺ᤰᤂᤢᤖᤥ॥ ᤂᤠᤜᤢᤴ ᥇᥈ 12 ᤂᤧᤏᤧ᤹ ᤁᤧᤛᤡᤰᤗᤢᤱᤔᤧᤴ ᤂᤠᤜᤢᤴ ᤗᤧᤵᤔᤠᤱ ᤜᤡᤛᤧ᤹ᤀᤥ. ᤜᤧᤰᤁᤩᤠᤱ ᤁᤧᤴᤓᤠᤰᤜᤠ᤹ᤖᤧ ᤏᤧᤜᤡᤏᤡᤱᤘᤠ᤹ ᤐᤠᤴ ᤂᤧᤵᤛᤧ᤹ᤀᤥ॥ ᤂᤠᤜᤢᤴ ᥇᥉ 13 ᤀᤅᤧ᤺ᤰᤘᤠᤴ ᤜᤧᤴᤌᤡᤶ ᤕᤠᤰᤔᤠ ᤔᤧᤗᤧᤖᤧᤴᤏᤧ᤹ᤀᤥ. ᤁᤛᤡᤰᤐᤠ ᤁᤧᤕᤠᤰᤋᤢᤀᤠᤱ ᤂᤢᤶᤍᤡᤱ ᤁᤧᤒᤡᤖᤢᤸᤗᤧ ᤂᤧᤴ ᤔᤧᤛᤡᤏᤧᤴᤗᤥ॥ 14 ᤁᤛᤡᤰᤐᤠ ᤕᤠᤰᤋᤧ᤹ᤀᤠᤱ ᤂᤢᤏᤧ᤹ ᤂᤢᤶᤛᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤔᤠᤗᤠᤶ ᤋᤠᤱᤄᤧ᤹ᤀᤥ॥ ᤂᤠᤜᤢᤴ ᥇᥊ 15 ᤀᤠᤛ᤻ᤛᤠᤀᤣ. ᤁᤧᤛᤡᤰᤗᤢᤱᤔᤧᤴ ᤛᤡᤰᤁᤢᤶᤏᤡᤒᤠ ᤆᤥ᤺ᤰᤏᤧᤓᤃᤪ. ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤴ ᤛᤧᤰᤂᤠᤀᤣ ᤛ᤺ᤳᤗᤥ॥ 16 ᤂᤧᤏᤧ᤹ ᤁᤧᤶᤒᤪᤠᤛᤣ᤹ᤀᤡᤸᤗᤧ ᤁᤧᤘᤠ᤹ᤒᤠ ᤐᤠᤴ ᤁᤧᤒᤠ᤺ᤳᤋᤢᤸᤗᤧ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤴ ᤂᤧᤴ ᤕᤧᤶᤔᤥ ᤛ᤺ᤳᤗᤥ॥ ᤂᤠᤜᤢᤴ ᥇᥋ 17 ᤂᤧᤏᤧ᤹ ᤁᤧᤛᤡᤰᤗᤢᤱᤔᤧᤸᤗᤧ ᤗᤠᤕᤥᤒᤠᤜᤠ᤹ ᤏᤠᤔᤧᤜᤧᤳᤋᤢᤛᤡᤴᤗᤖᤥ. ᤁᤖ ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤧᤴ ᤁᤡᤔᤠ ᤔᤧᤗᤧᤖᤧᤴᤏᤧ᤹ᤀᤥ॥ 18 ᤛᤧᤰᤂᤠᤀᤣ ᤋᤠᤕᤧᤶᤔᤥ ᤂᤧᤏᤧ᤹ ᤁᤧᤗᤠᤃᤡ ᤏᤡᤱᤛᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤈᤥᤃᤢᤒᤠ ᤏᤡᤱᤛᤠᤱᤅᤡᤴ ᤜᤏᤧ ᤔᤧᤒᤥᤱᤏᤧᤴᤗᤥ॥ ᤂᤠᤜᤢᤴ ᥇᥌ 19 ᤀᤠᤛ᤻ᤛᤠᤀᤣ. ᤂᤧᤵᤛᤧ᤹ᤀᤠᤱ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧ᤹ᤀᤥ. ᤂᤧᤒᤩᤠᤱ ᤁᤧᤛᤡᤰᤗᤢᤱᤔᤧᤴ ᤁᤢᤍᤥ᤺ᤵᤔᤠ ᤗᤠᤶᤔᤥ ᤁᤳᤋᤧ᤹ᤀᤥ॥ 20 ᤕᤖᤡᤰ ᤆᤧᤸᤗᤧᤰᤛᤣ ᤌᤡ ᤁᤧᤎᤢᤱᤒᤠ ᤀᤡᤃᤪ ᤛᤠ᤹ᤖᤡᤰ ᤛᤠᤃᤧᤈᤠᤒᤠ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ. 21 ᤌᤣᤀᤠᤱᤓᤧᤸᤗᤧ ᤌᤡᤔᤛᤠᤱᤜᤠ᤹ ᤏᤢ ᤋ᤺ᤰᤌᤧ᤺ᤰᤁᤧᤜᤠ᤹ ᤕᤠᤱᤔᤧᤛᤠ᤹ᤖᤥ. ᤜᤧᤰᤁᤩᤠᤱ ᤁᤧᤈᤠᤒᤠ ᤏᤢ ᤁᤧᤀᤡᤶᤒᤠᤖᤰ ᤁᤧᤒᤥᤱᤏᤧᤓᤃᤪ ᤜᤠᤖᤠ ᤁᤢᤍᤪᤧᤰ ᤋᤣᤳ ᤁᤧᤈᤠᤰᤂᤢᤀᤠᤱ ᤗᤠᤱᤃᤧᤄᤣ᤺ᤰᤗᤥ॥ ᤂᤠᤜᤢᤴ ᥇᥍ 22 ᤂᤧᤏᤧ᤹ ᤛᤠᤃᤧᤘᤠ᤺ᤴᤇᤡᤱᤗ ᤁᤧᤕᤠ᤺ᤴᤍᤧᤒᤠ ᤁᤧᤶᤒᤠᤖᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤁᤧᤶᤔᤠ ᤁᤠᤵᤔᤢᤔᤠ ᤋᤢᤶᤔᤡᤸᤗᤧ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤴᤏᤧ᤹ᤀᤥ॥ 23 ᤛᤧᤰᤂᤠᤴ ᤀᤡᤅᤧ᤹. ᤜᤧᤰᤁᤩᤠᤱ ᤂᤧᤴ ᤔᤧᤛᤱᤄᤧᤴᤏᤧ᤹ᤀᤥ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹. ᤜᤧᤴᤌᤡᤶ ᤏᤢ ᤂᤠᤛᤡᤱᤏᤡ᤺ᤵᤔᤠᤴ ᤂᤥᤛᤧ᤹ᤀᤥ. 24 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤶᤒᤠ ᤛᤠ᤹ᤖᤡᤰ ᤛ᤺ᤳᤗᤥ. ᤛᤡᤰᤁᤢᤶᤛᤠᤒᤠ ᤛᤠ ᤁᤧᤃᤵᤐᤠ ᤐᤠᤴ ᤁᤢᤛ᤻ᤛᤠ᤺ᤴᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥ 25 ᤐᤠᤏᤢᤍᤡᤱ ᤁᤧᤶᤒᤠ ᤏᤢ ᤔᤠᤏᤢᤍᤡᤱ ᤁᤧᤶᤔᤠ ᤜᤠᤱᤜᤠᤱ ᤗ᤹ᤛᤡᤖᤖᤥ. ᤂᤧᤏᤧ᤹ ᤁᤧᤃᤵᤔᤠ ᤔᤠᤏᤢᤍᤡᤱ ᤁᤧᤶᤔᤠ ᤐᤛ᤺ᤳ ᤛ᤺ᤳᤗᤖᤥ॥ ᤂᤠᤜᤢᤴ ᥇᥎ 26 ᤀᤠᤒᤢᤃᤧᤴ ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤁᤧᤛᤡᤰᤗᤢᤱᤔᤧᤴ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤁᤧᤔᤡᤰᤁᤡᤸᤗᤧ ᤀᤠᤱᤃᤠ᤹ ᤀᤠᤗᤠᤶᤔᤡᤴ ᤋᤡᤶᤍᤢᤖᤖᤥ. 27 ᤌᤣᤀᤠᤱᤓᤧᤸᤗᤧ ᤁᤧᤳᤏᤡᤔᤠ ᤔᤧᤴᤇᤢᤔᤠᤴ ᤗᤳᤇᤠ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤗᤢᤶᤒᤠᤳ ᤜᤧᤰᤋᤱᤔᤠᤖᤥ. ᤜᤧᤰᤁᤩᤠᤱ ᤕᤠᤶᤃᤧᤒᤥ᤺ᤵᤔᤠ ᤔᤧᤴᤇᤢᤔᤠᤴ ᤗ᤺ᤶᤔᤧᤴᤍᤧᤵᤏᤠᤒᤠ ᤆᤡᤜᤢ᤹ᤜᤢ᤹ᤒᤠ ᤘᤠᤒᤠᤰ ᤜᤧᤰᤋᤱᤔᤠᤖᤥ॥ 28 ᤂᤧᤸᤗᤧ ᤑᤠ᤺ᤴᤍᤠ ᤁᤢᤀᤡᤛᤡᤰ ᤔᤏᤠ ᤛᤢᤰᤁᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳᤋᤡᤴ ᤕᤖᤡᤰ ᤑᤥᤛᤢᤖᤥ॥ ᤂᤠᤜᤢᤴ ᥇᥏ 29 ᤜᤠ᤺ᤳᤗᤧ ᤋᤢᤰᤂᤣ ᤋᤢᤔᤢᤒᤣ᥅ ᤜᤠᤳ ᤏᤡᤱᤘᤠ᤹ ᤋᤢᤰᤔᤥ ᤌᤠᤒᤣ᥅ ᤜᤠᤳ ᤂᤧᤔᤠ᤹ᤀᤥ ᤌᤠᤒᤣ᥅ ᤜᤠᤳ ᤗᤢᤱᤜᤠ᤺ᤵᤔᤥ ᤌᤠᤒᤣ᥅ ᤜᤠᤳ ᤜᤏᤧ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤁᤠ᤺ᤶᤒᤣ᥅ ᤜᤠ᤺ᤳᤗᤧ ᤁᤢᤔᤡᤰᤜᤠ᤹ ᤔᤠᤰᤂᤡ᤹ ᤜᤧᤰᤁᤣ ᤜᤧ᤺ᤳᤋᤠᤱᤒᤠ ᤐᤥᤱᤒᤣ᥅ 30 ᤂᤧᤱᤜᤠ᤹ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ ᤌᤡ ᤌᤢᤱᤔᤥᤀᤣ ᤔᤧᤏᤠᤰᤁᤠᤱ ᤔᤧᤕᤠᤰᤗᤥ. ᤂᤧᤱᤜᤠ᤹ᤖᤧ ᤔᤠᤖᤢᤰ ᤑ᤺ᤶᤔᤏᤠᤒᤠ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ ᤌᤡ ᤁᤧᤕᤠᤰᤐᤠ ᤆᤸᤗᤠᤱᤏᤠ ᤂᤥᤷᤕᤠᤴ ᤔᤧᤛᤠ᤹ᤖᤢᤖᤥ॥ 31 ᤜᤧ᤺ᤳᤋᤠᤱᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤀᤍᤰᤋᤰ ᤀᤥᤔᤧᤔᤧᤳᤋᤧᤴᤏᤧ᤹ᤀᤥ. ᤆᤸᤗᤠᤱᤏᤠ ᤂᤥᤷᤕᤠᤀᤥ ᤂᤧᤴ ᤗᤡᤱᤔᤧᤸᤗᤧ ᤁᤢᤒᤢ᤺ᤳᤌᤢᤱᤘᤠ ᤗ᤺ᤴᤗᤥ. ᤂᤧᤴ ᤀᤢᤛᤢᤖᤢ ᤁᤢᤍᤥ᤺ᤵᤔᤠ ᤕᤥ ᤛᤖᤰ ᤗᤠ᤺ᤵᤐᤣ᤺ᤰᤗᤥ᥄ 32 ᤏᤡᤴᤎᤠᤛᤣ᤺ᤰᤀᤥ ᤂᤧᤸᤗᤧ ᤕᤠᤱᤜ᤺ᤰ ᤁᤢᤀᤡᤛᤡᤰ ᤁᤧᤀ᤺ᤰᤗᤥ. ᤜᤧᤰᤁᤩᤠᤱ ᤕᤠᤱᤜ᤺ᤁᤧᤴ ᤜᤧᤰᤁᤣ ᤁᤢᤏᤡᤱᤅᤡᤴ ᤕᤠᤰᤋᤢ ᤁᤧᤒᤡᤖᤥ॥ 33 ᤁᤧᤔᤡᤰᤁᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤏᤡᤕᤠᤖᤠᤜᤠ᤹ ᤏᤡᤛᤢᤖᤥ. ᤜᤧᤰᤁᤩᤠᤱ ᤁᤧᤏᤡᤱᤘᤠ᤺ᤸᤗᤧ ᤀᤠᤏᤠᤰᤏᤠᤰᤐᤠ ᤐᤠ᤺ᤴᤜᤠ᤹ ᤀᤡ᤺ᤳᤋᤢᤖᤥ॥ 34 ᤂᤧᤏᤧ᤹ ᤋᤢᤱᤃᤥᤍᤡᤱ ᤘᤖ᤺ᤱᤅᤥ ᤁᤧᤀᤡᤶᤔᤠᤱ ᤁᤧᤏᤧᤒᤠ ᤜᤧᤰᤁᤣ ᤗ᤹ᤖᤥ. ᤘᤠᤗᤠᤎᤠ ᤛᤡᤳᤗᤠᤱᤅᤥᤒᤠ ᤀᤡᤍᤠ᤺ᤰᤁᤥ ᤁᤧᤓᤥ᤺ᤴᤇᤡᤱᤒᤠ ᤜᤧᤰᤁᤣ ᤗ᤹ᤖᤥ॥ 35 ᤂᤧᤏᤧ᤹ ᤁᤧᤒᤠ᤺ᤳᤋᤢ᤹. “ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤜᤡᤵᤐᤠᤖᤥ. ᤁᤖ ᤀᤠᤱᤃᤠ᤹ ᤔᤧᤃᤠ᤺ᤴᤏᤠᤴᤗᤥ᥄ ᤂᤧᤱᤜᤠ᤹ᤖᤧ ᤔᤧᤎᤰᤁᤠᤖᤥ. ᤁᤖ ᤏᤡᤱᤘᤠ᤹ᤀᤣ ᤔᤧᤄᤥᤀᤠᤴᤗᤥ᥄ ᤀᤠᤓᤧᤸᤗᤧ ᤛᤥᤀᤠᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤌᤢᤱᤔᤠ ᤛᤢᤰᤋᤢᤱᤒᤣ᥅” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.