ᤂᤠᤜᤢᤴ 22 - LIFOTNT1 ᤕᤖᤡᤰ ᤕᤠᤱᤛᤠᤁᤢᤴᤎᤣᤏᤢ᤺ᤸᤗᤧ ᤏᤢᤒᤠ ᤔᤡᤱ ᤛᤣ᤺ᤰᤔᤠ ᤏᤢᤒᤠᤖᤥ. ᤔᤡᤱᤛᤥ ᤌᤠᤱᤛᤥ ᤂᤥᤔᤠ ᤛᤠᤶᤔᤩᤠᤱ ᤕᤢᤵᤐᤠᤏᤢ᤺ᤸᤗᤧᤀᤠᤱ ᤐᤏᤢᤏᤢᤒᤠᤖᤥ॥ 2 ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤕᤠᤱᤃᤧᤛᤠ᤹ᤒᤧᤴ ᤏᤧᤵᤔᤠᤱ ᤁᤴ ᤐᤠ᤺ᤴᤏᤥ ᤁᤢᤍᤱᤒᤠ ᤆᤥ᤺ᤰᤛᤡᤖᤥ. ᤂᤧᤱᤜᤠ᤹ ᤁᤧᤖᤧᤰ ᤁᤧᤈᤥ᤺ᤰᤐᤠᤱᤃ ᤕᤜᤘᤣ ᤍᤠᤱᤒᤧᤴᤏᤣᤖᤥ॥ 3 ᤂᤠᤛᤡᤱᤃᤧᤏᤡ᤺ᤵᤐᤧᤸᤗᤧ ᤕᤧᤳᤋᤢᤰᤂᤣ ᤋᤠᤖ ᤐᤵᤐᤠ ᤏᤡᤛᤢᤖᤥ ᤜᤧᤰᤁᤩᤠᤱ ᤁᤢᤓᤠ ᤋᤧᤴᤏᤥ ᤛᤧ᤺ᤵᤛᤡᤱᤗᤥ. ᤁᤖ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤔᤏᤠᤴ ᤂᤧᤴ ᤗᤧᤵᤔᤠᤱᤅᤣ ᤐᤣ᤺ᤰᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤂᤢᤶᤍᤡᤱ ᤂᤥᤛᤢᤖᤥ॥ 4 ᤏ᤺ᤶᤏ᤺ᤶ ᤗ᤹ᤔᤠ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤧᤸᤗᤧ. ᤕᤠᤱᤛᤠᤁᤢᤴᤎᤣ. ᤔᤡᤱᤛᤥ ᤀᤡᤱᤎᤠᤱ ᤏᤢ ᤜᤡᤱᤔᤧᤴ ᤋᤠᤖᤢᤖᤥ॥ 5 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤜᤠ᤹ᤀᤥ ᤋᤡᤱᤜᤠ᤹ ᤏᤢ ᤀᤡᤈᤥᤜᤠ᤹ ᤔᤧᤃᤧᤛᤢᤀᤠᤱ ᤏᤧᤖᤥ. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤧᤴ ᤛᤧ᤺ᤵᤋᤢ᤹ ᤂᤢᤏᤧ᤹ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤠ᤹ᤖᤥ॥ 6 ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤥ ᤀᤅᤧ᤺ᤰᤘᤠᤴ ᤗᤠᤱᤄᤣ᤺ᤰᤛᤧ᤹ᤀᤥ. ᤂᤧᤒᤩᤠᤱ ᤁᤠᤵᤐᤥᤒᤠ ᤋᤢᤶᤗ ᤌᤠᤖᤡᤰ ᤂᤧᤴ ᤗᤠᤶᤔᤡᤴ ᤔᤧᤗᤧᤖᤢᤴᤗᤥ॥ 7 ᤕᤠᤱᤛᤠᤁᤢᤴᤎᤣᤛᤠᤒᤧᤸᤗᤧ ᤕᤠᤱᤃᤧᤛᤠᤒᤧᤴ ᤕᤢᤰᤋᤢᤖᤥ. ᤛᤡᤱᤏᤠᤳ ᤁᤧᤍᤣ᤹ᤒᤧᤴ. ᤛᤡᤱᤏᤠᤳ ᤁᤧᤒᤡᤒᤧᤸᤗᤧ ᤁᤢᤕᤥᤰ ᤐᤥᤱᤗᤥ॥ 8 ᤔᤧᤴᤘᤠ᤹ᤔᤏᤠ ᤂᤠᤛᤧᤴ ᤁᤧᤜᤣ᤹ᤒᤠᤸᤗᤧ ᤔᤧᤰᤔᤠᤛᤡᤔᤠᤴ ᤛᤢᤵᤛᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤡᤰᤛᤶᤔᤧᤸᤗᤧ ᤋᤰᤁᤠ᤺ᤳᤋᤧᤴ ᤀᤧᤰᤗᤥ॥ 9 ᤁᤧᤏᤢ᤹ᤒᤠ ᤔᤏᤠ᤺ᤸᤗᤧ ᤀᤠᤵᤑᤣᤰᤁᤠᤱ ᤔᤢ᤹ᤀᤡᤛᤠᤶ ᤂᤥᤛᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍ᤺ᤰᤁᤧᤴ ᤕᤠᤱᤃᤧᤛᤠ᤹ᤒᤧᤴ ᤑ᤺ᤰᤂᤢ ᤐᤡᤖᤢᤖᤥ॥ 10 ᤁᤢᤏᤠᤔᤧᤴᤇᤠ᤹ ᤁᤧᤒᤠ᤺ᤵᤐᤧᤴ ᤗᤠ᤺ᤰᤁᤠᤳ ᤗ᤺ᤳᤋᤧ᤹ᤀᤥ. ᤂᤶᤓᤩᤠᤱ ᤂᤧᤈᤧᤰ ᤐᤠ᤺ᤴᤏᤡᤴ ᤔᤠᤒᤣ᤺ᤰᤗᤥ. ᤐᤠ᤺ᤴᤎᤱ ᤏᤢ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤏᤢᤵᤗᤥ॥ 11 ᤀᤠᤳᤋᤡᤸᤗᤧ ᤛᤡᤰᤗᤢᤱᤔᤧᤴ ᤛᤢᤳᤌᤥᤒᤠ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤁᤢᤒᤠ᤺ᤴᤏᤡᤴ ᤗᤢᤱᤃᤢᤶᤒᤠ ᤆᤥᤰ. ᤂᤢᤏᤧ᤹ ᤁᤢᤗᤠᤃᤡ ᤜᤠᤱᤅᤡᤴᤏᤠᤱ ᤁᤢᤴᤍᤣ᤺ᤱᤒᤠ ᤐᤥᤱᤗᤥ॥ 12 ᤕᤜᤘᤣ ᤍᤠᤱᤒᤧᤸᤗᤧ ᤏᤛᤠᤴ ᤁᤧᤗᤧᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤕᤠ᤺ᤶᤒᤰ ᤆᤥᤰᤗᤥ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤐᤠ᤺ᤴᤈᤠᤰᤁᤡᤴ ᤛᤧ᤺ᤵᤋᤢᤖᤥ॥ 13 ᤗᤧᤶᤛᤢᤘᤠᤒᤧᤸᤗᤧ ᤐᤠ᤺ᤳᤋᤢ᤹. “ᤗᤠ᤺ᤰᤁᤠᤳ ᤂᤡᤖᤡᤱᤒᤠᤎᤡᤰ ᤘᤠ᤹ᤖᤥ᥄ ᤔᤠᤖᤠᤶᤜᤠ᤹ᤀᤥ ᤐᤣ᤺ᤰᤁᤠᤏᤧᤓᤃᤪ ᤀᤠᤱᤃᤠ᤹ ᤛᤧᤳᤋᤠᤖᤥ॥” 14 ᤆᤠᤃᤧᤗᤠᤶᤔᤧᤸᤗᤧ ᤁᤢᤶᤒᤪᤠᤴ ᤗᤳᤇᤠ ᤁᤢᤍᤡ᤺ᤶᤒᤣ᤹ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤥ ᤁᤧᤎᤠᤒᤠᤜᤠ᤹ ᤂᤧᤵᤔᤥ ᤔᤧᤎᤠᤖᤥ॥ 15 ᤀᤅᤧ᤺ᤰᤘᤠ᤺ᤸᤗᤧ ᤁᤢᤏᤡᤱᤘᤠᤴ ᤀᤍᤱᤐᤠᤴ ᤀᤡᤛᤣ᤺ᤱᤒᤠ ᤆᤥᤰᤗᤥ. ᤁᤖ ᤜᤧᤴᤌᤡᤶ ᤋᤰᤁᤠᤳ ᤗᤠᤶᤒᤠ ᤂᤧᤴ ᤋᤥ᤺ᤴᤇᤡᤱᤗᤥ॥ 16 ᤕᤠᤱᤛᤠᤁᤢᤴᤎᤣ ᤑᤥᤔᤠᤖᤧ ᤗᤠᤃᤡ ᤕᤠᤱᤃᤧᤛᤠ᤹ᤒᤧᤴ ᤁᤧᤕᤢᤰᤐᤠ. ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤔᤡᤰᤋᤥ᤺ᤰᤜᤠ᤹ ᤁᤧᤒᤡᤒᤠ ᤏᤧᤵᤔᤠᤱ ᤔᤏᤠᤜᤠ᤹ ᤕᤠᤱᤃᤧᤛᤠ᤹ᤒᤠ ᤐᤥᤱᤛᤡᤖᤥ॥ ᤛᤡᤰᤁᤢᤶᤛᤠᤒᤧᤸᤗᤧ ᤛᤢᤶᤒᤥᤱ ᤁᤢᤄᤠᤜᤢᤴ ᤐᤠ᤺ᤴᤜᤠ᤹—ᤂᤠᤜᤢᤴ ᥇ 17 ᤛᤡᤰᤁᤢᤶᤛᤠᤒᤧᤸᤗᤧ ᤁᤢᤄᤠᤜᤢᤴᤜᤠ᤹ ᤕᤧᤰᤕᤧᤰᤁᤠᤱ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤜᤢ᤹ᤏᤧᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ. 18 ᤌᤣᤀᤠᤱᤓᤧᤸᤗᤧ ᤂᤧᤴ ᤐᤠ᤺ᤴᤜᤠ᤹ ᤁᤧᤛᤡᤰᤗᤢᤱᤔᤥ ᤁᤧᤕᤢᤰᤂᤢᤏᤧᤓᤃᤪ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤁᤧᤶᤒᤪᤠᤀᤥ ᤘᤠ᤹ᤏᤧᤓᤃᤪ ᤛ᤺ᤵᤔᤠ ᤐᤥᤱᤗᤥ॥ 19 ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴ ᤏᤠᤃᤧᤛᤠ᤹ᤖᤢᤖ ᤑᤠ᤹ᤀᤠᤱ ᤂᤧᤴ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤀᤡᤴ ᤂᤧᤏᤧ᤹ ᤜᤢ᤹ᤏᤧᤖᤥ. ᤀᤥᤖᤥ. ᤀᤠᤱᤃᤠ᤹ ᤂᤧᤏᤧ᤹ᤀᤣ ᤜᤢ᤹ᤏᤧᤖᤥ॥ 20 ᤌᤣ ᤁᤧᤗᤠᤃᤡ ᤛᤢᤶᤒᤥᤱ ᤂᤠᤜᤢᤴ ᤐᤠ᤺ᤴᤜᤠ᤹. ᤛᤢᤈᤠᤜᤠ᤹ ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤠ᤺ᤴᤈᤠ᤺ᤰᤜᤠ᤹ ᤛᤠᤵᤋᤢᤱᤒᤠ ᤔᤣ᤺ᤴᤏᤠᤱᤒᤡ᥅ 21 ᤂᤧᤏᤧ᤹ ᤁᤧᤒᤠᤱᤒᤧᤸᤗᤧ ᤁᤢᤒᤣᤛᤠᤱ ᤁᤢᤍᤥ᤺ᤵᤔᤠ ᤏᤢᤃᤵᤜᤠ᤹ ᤐᤡᤔᤠ ᤁᤧᤛᤢᤰᤋᤢᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤧᤰᤂᤠ ᤏᤢ ᤏᤛᤠ᤺ᤴᤛᤠᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤜᤢ᤹ᤏᤧᤒᤠ ᤔᤣ᤺ᤴᤏᤠᤱᤒᤡ᥅ ᤂᤠᤜᤢᤴ ᥈ 22 ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤠ᤹ᤒᤠᤱ ᤔᤧᤜᤥᤵ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤕᤢᤰᤋᤧᤛᤧᤴᤏᤧ᤹ ᤋᤢᤰᤂᤣ ᤔᤧᤈᤠ᤺ᤳᤋᤧᤛᤧᤴᤏᤧ᤹ᤀᤥ. ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤂᤠᤛᤧᤴᤜᤡᤶᤔᤥ ᤕᤢᤰᤔᤠᤛᤡ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤥ. 23 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢ᤺ᤴᤍᤣ᤺ᤴ ᤂᤢᤏᤧ᤹ ᤁᤢᤜᤢᤰᤁᤥ ᤕᤠᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤏᤠᤵᤐᤠᤜᤠ᤹ ᤂᤢᤏᤧ᤹ ᤏᤠᤵᤋᤢᤛᤡᤖᤥ॥ ᤂᤠᤜᤢᤴ ᥉ 24 ᤁᤢᤛᤡᤰ ᤁᤧᤈᤶᤒᤠ ᤔᤏᤠᤜᤠ᤹ ᤋᤣ᤺ᤱ ᤔᤧᤈᤥᤃᤧᤛᤧᤴᤏᤧ᤹ᤀᤥ. ᤜᤏᤧ ᤁᤢᤕᤠ᤺ᤰ ᤁᤧᤗᤧ᤹ᤒᤠ ᤕᤠᤵᤔᤡᤜᤠ᤹ᤏᤢ ᤆᤢᤶ ᤔᤧᤔᤧᤳᤇᤡᤱᤅᤡᤴᤏᤧ᤹ᤀᤥ. 25 ᤔᤣ᤺ᤴᤏᤧᤓᤃᤪ ᤂᤧᤸᤗᤧ ᤁᤢᤕᤧᤵᤗᤧᤰᤁᤡᤴ ᤁᤧᤜᤢ᤹ᤛᤡᤱᤗᤥ. ᤜᤧᤰᤁᤩᤠᤱ ᤀᤡᤈᤥᤀᤥ ᤀᤠᤒᤠᤅᤣ ᤁᤧᤎᤠᤖᤥ॥ ᤂᤠᤜᤢᤴ ᥊ 26 ᤕᤠᤱᤅᤥ ᤕᤢᤱᤔᤠ ᤁᤧᤒᤥᤱᤒᤠ ᤐᤠ᤺ᤴᤏᤥ ᤜᤢᤰᤔᤧᤕᤠᤰᤋᤧᤴᤏᤧ᤹ᤀᤥ. ᤀᤡᤃᤪ ᤀᤣᤕᤠᤱᤒᤧᤸᤗᤧ ᤁᤢᤛᤡᤱᤏᤠᤳᤋᤥ ᤔᤧᤕᤢᤅᤧᤴᤏᤧ᤹ᤀᤥ॥ 27 ᤂᤧᤏᤧ᤹ ᤛᤡᤱᤏᤠᤳᤋᤡᤴ ᤜᤢᤱᤔᤠ ᤁᤧᤴᤇᤢᤰᤋᤢᤴᤏᤧᤓᤃᤪ. ᤁᤧᤏᤧᤳᤏᤠ᤺ᤴᤏᤠᤱ ᤂᤧᤏᤧ᤹ᤗᤠᤶ ᤁᤧᤶᤏᤠᤵᤗᤥ॥ ᤂᤠᤜᤢᤴ ᥋ 28 ᤀᤢᤏᤠᤜᤢᤖᤡᤒᤠ ᤗᤢᤱ ᤀᤡ᤺ᤴᤍᤥᤴ ᤔᤧᤄᤧᤳᤋᤧᤴᤏᤧ᤹ᤀᤥ. ᤂᤧᤱᤃ ᤁᤧᤶᤒᤠ ᤁᤧᤴᤎᤒᤠᤛᤡᤖᤧ ᤔᤧᤜᤠᤰᤋᤢᤒᤠᤖᤥ॥ ᤂᤠᤜᤢᤴ ᥌ 29 ᤁᤢᤕᤠ᤺ᤶᤒᤰᤁᤥ ᤁᤢᤓᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤔᤏᤠ ᤁᤧᤏᤡᤛᤢᤒᤡ᥅ ᤂᤢᤏᤧ᤹ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤠ᤺ᤶᤒᤰ ᤆᤥᤃᤢᤖᤥ. ᤔᤧᤴᤈᤥᤛᤧᤴᤈᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.