ᤂᤠᤜᤢᤴ 21 - LIFOTNT1 ᤜᤠᤱᤅᤡᤸᤗᤧ ᤁᤢᤛᤡᤰᤁᤢᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥ ᤘᤠ᤹ᤖᤥ. ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤧᤴ ᤁᤢᤀᤡᤛᤡᤰ ᤀᤠᤳᤋᤡ ᤜᤡᤔᤠᤍᤣᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤢᤏᤧ᤹ ᤂᤧᤳᤏᤠᤀᤣ ᤜᤡᤛᤢᤍᤣᤛᤢᤖᤥ॥ 2 ᤔᤏᤠ᤺ᤸᤗᤧ ᤁᤧᤖᤧᤰ ᤁᤢᤗᤠᤶᤜᤠ᤹ ᤁᤢᤍᤥ᤺ᤵᤔᤠ ᤆᤥᤰ ᤑᤠ᤹ᤀᤠᤱ ᤀᤡ᤺ᤳᤋᤢᤒᤡᤗᤠ. ᤁᤖ ᤛᤡᤰᤗᤢᤱᤔᤠ᤹ ᤁᤧᤛᤠ᤹ᤒᤠᤃ ᤕᤜᤘᤣ ᤍᤠᤱᤒᤧᤴᤏᤣ ᤘᤠ᤹ᤖᤥ॥ 3 ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤂᤠᤛᤧᤴ ᤆᤥᤰ. ᤜᤠᤒᤠ ᤂᤧᤴᤏᤣ ᤛᤡᤍᤢᤱᤈᤓᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ᤌᤠᤱᤗᤥ॥ 4 ᤁᤧᤜᤧᤴᤇᤡᤱᤒᤠ ᤔᤡᤰ ᤏᤢ ᤀᤠᤱᤍᤡᤱ ᤁᤧᤗ᤹ᤒᤠ ᤛᤡᤰᤗᤢᤱᤔᤠᤴ. ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤛᤣᤔᤡᤖᤥ. ᤂᤧᤱᤃ ᤗᤠᤕᤥᤖᤥ᥄ 5 ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤁᤢᤏᤡᤱᤛᤣ᤺ᤰᤜᤠ᤹ᤖᤧ ᤌᤥᤒᤥ ᤐᤥᤔᤠ ᤐᤠᤴ ᤗᤧᤵᤔᤠᤱ ᤂᤧᤴ ᤗᤠᤶᤗᤥᤛᤢᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤜᤠᤖᤠᤘᤖᤠ ᤁᤧᤈᤥᤰᤐᤧᤴ ᤕᤠᤱᤃᤧᤛᤠ᤹ᤒᤠ ᤐᤥᤱᤗᤥ॥ 6 ᤀᤡᤱᤗᤧᤰᤁᤣ ᤗᤧᤛᤥ᤺ᤳᤋᤧᤸᤗᤧ ᤀᤠᤵᤑᤣᤰ ᤋ᤹ᤕᤠ᤺ᤴᤏᤡᤴ ᤋᤥ᤺ᤶᤔᤠᤃ ᤁᤧᤒᤧᤒᤠ ᤁᤧᤒᤣ᤺ᤰᤐᤠ ᤜᤠ᤺ᤱᤃᤢᤒᤠ ᤏᤢ ᤀᤠᤛᤧᤳᤛᤧᤵᤐᤠ ᤀᤡᤈᤥᤖᤥ॥ 7 ᤋᤠᤰᤁᤧᤓᤧ᤹ᤒᤧᤸᤗᤧ ᤁᤢᤄᤷᤔᤧᤴᤍᤰ ᤆᤥ᤺ᤰᤔᤧᤸᤗᤧᤀᤣ ᤂᤧᤱᤜᤠ᤹ ᤀᤢ᤺ᤰᤂᤢᤍᤣ᤹ᤖᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤁᤢᤍᤥ᤺ᤵᤔᤠ ᤐᤠ᤺ᤴᤏᤡᤴ ᤆᤥ᤺ᤰᤔᤠ ᤂᤧᤱᤜᤠ᤹ ᤔᤧᤴᤍᤧᤴᤏᤧᤴᤗᤥ॥ 8 ᤀᤠᤵᤋᤡᤰᤛᤠᤒᤧᤴ ᤁᤡᤁᤫᤧ᤺ᤱᤃᤧ᤺ᤱᤒᤠ ᤗᤠᤶᤔᤥ ᤗᤠᤱᤄᤣ᤺ᤰᤗᤥ. ᤁᤖ ᤁᤢᤍᤥ᤺ᤵᤔᤠ ᤔᤏᤠᤴ ᤁᤢᤍᤥ᤺ᤵᤔᤠ ᤗᤠᤶᤔᤥ ᤗᤠᤱᤄᤣ᤺ᤰᤗᤥ॥ 9 ᤂᤧᤔᤠ᤹ ᤁᤧᤈᤥ᤺ᤰᤔᤠ ᤔᤣ᤺ᤳᤋᤧᤴᤏᤢ ᤗᤳᤇᤠ ᤜᤡᤶᤔᤥ ᤕᤢᤱᤔᤠᤏᤢ᤺ᤸᤗᤧᤃ ᤁᤦᤛᤡ᤺ᤸᤗᤧ ᤗᤳᤇᤠ ᤁᤢᤛᤢᤰᤐᤥ ᤀᤣ᤺ᤰ ᤕᤢᤱᤔᤠ ᤏᤢᤒᤠᤖᤥ॥ 10 ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤥ ᤔᤡᤰᤁᤣ᤺ᤳᤋᤢᤖᤥ. ᤂᤧᤸᤗᤧ ᤁᤢᤜᤡᤶᤒᤣᤛᤠᤱᤒᤧᤸᤗᤧ ᤂᤢᤏᤧ᤹ᤗᤠᤶ ᤗᤢᤱᤔᤠ᤹ ᤋᤢᤰᤔᤠ ᤔᤧᤄᤥᤛᤢᤴᤗᤥ॥ 11 ᤁᤢᤏᤠᤔᤧᤴᤇᤠ᤹ ᤕᤠᤵᤔᤡ ᤀᤠᤔᤧᤵᤔᤧᤵᤐᤧᤴ ᤂᤢᤶᤍᤡᤱ ᤐᤡᤔᤧᤸᤗᤧ. ᤂᤧᤒᤩᤠᤱ ᤂᤠᤍᤠ᤺ᤰᤐᤠ ᤔᤏᤠ᤺ᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤛᤢᤖᤥ. ᤛᤡᤰᤁᤢᤶᤛᤠᤒᤧᤴ ᤏᤡᤛᤠᤶ ᤐᤡᤔᤧᤸᤗᤧ. ᤂᤧᤸᤗᤧ ᤏᤧᤜᤡᤏᤡᤱᤘᤠ᤹ ᤂᤥᤛᤢᤖᤥ॥ 12 ᤛᤠᤶᤕᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤠᤰᤁᤧᤓᤧᤒᤧᤸᤗᤧ ᤁᤢᤜᤡᤶᤛᤕᤱᤅᤡᤴ ᤏᤡᤱᤘᤠ᤹ ᤀᤡᤃᤣ᤺ᤰ ᤀᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤋᤠᤰᤁᤧᤓᤧ᤹ᤒᤧᤒᤠᤜᤠ᤹ᤀᤥ ᤔᤧᤰᤔᤠᤛᤡᤔᤠᤴ ᤋᤠᤖᤢᤖᤥ॥ 13 ᤕᤠᤱᤃᤧᤛᤠ᤹ᤒᤧᤸᤗᤧ ᤁᤢᤒᤣᤗᤡᤴ ᤔᤏᤠ᤺ᤸᤗᤧ ᤂᤧᤶᤄᤧᤶ ᤔᤧᤗᤠᤵᤋᤢᤴᤏᤧᤓᤃᤪ. ᤂᤢᤏᤧ᤹ᤀᤠᤱ ᤐᤣᤗᤡ ᤑᤠᤰᤁᤡᤸᤗᤧ ᤁᤢᤒᤣ᤺ᤸᤗᤡ᤺ᤸᤗᤧ ᤏᤢᤃᤵ ᤔᤧᤄᤥᤛᤢᤴᤗᤥ॥ 14 ᤛᤫᤠ᤺ᤳᤋᤠᤱ ᤐᤡᤔᤏᤠᤒᤠ ᤔᤡᤰᤋᤥ᤺ᤰᤁᤡᤸᤗᤧ ᤕᤠ᤺ᤰᤗᤧ᤹ᤔᤧᤴ ᤆᤡ᤺ᤰᤋᤢᤖᤥ. ᤜᤧᤰᤁᤩᤠᤱ ᤐ᤺ᤳᤌᤠᤱᤅᤥ ᤛᤢᤱᤔᤏᤠᤀᤠᤱ ᤐᤡᤔᤏᤠᤒᤠ ᤛᤢᤖᤢᤳ ᤕᤠᤱᤅᤡᤸᤗᤧ ᤛᤠᤰᤁᤧᤴᤏᤡᤸᤗᤧ ᤔᤡ ᤁᤧᤒᤥᤱᤒᤠ ᤛᤡᤰᤐᤥ᤺ᤰᤔᤧᤴ ᤏ᤺ᤶᤏ᤺ᤶᤒᤠ ᤆᤥᤃᤢᤖᤥ॥ 15 ᤁᤢᤍᤥ᤺ᤵᤔᤠ ᤂᤠᤛᤧᤴ ᤐᤥᤱᤅᤡᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤛ᤺ᤳᤗᤥ. ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤃ ᤂᤢᤴᤇᤡ᤹ ᤕᤱᤔᤠ ᤁᤧᤳᤗᤥ॥ 16 ᤂᤠᤛᤡᤱᤏᤡ᤺ᤵᤔᤠᤗᤠᤶ ᤔᤠ᤺ᤱᤄᤠ ᤁᤧᤒᤥᤱᤒᤠ ᤔᤏᤠᤴ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤱᤈᤢᤶᤔᤥ ᤏᤠ᤺ᤶᤛᤡᤱᤛᤧ ᤁᤧᤳᤗᤥ॥ 17 ᤛᤢᤰᤂᤣᤘᤠᤀᤥ ᤘᤠ᤹ᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤧᤴ ᤕᤠᤱᤃᤧᤛᤠ᤹ᤒᤠ ᤐᤥᤱᤗᤥ. ᤆᤧᤸᤗᤧᤰᤛᤣ ᤌᤡ ᤏᤢ. ᤈᤤᤋᤢᤏ ᤏᤡ᤺ᤱᤃᤣ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤓᤧᤸᤗᤧᤀᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥᤱᤏᤧᤴᤗᤥ॥ 18 ᤛᤠᤶᤕᤥᤒᤠᤴ ᤁᤧᤎᤧ᤹ᤒᤠ ᤁᤢ᤹ᤀᤡᤃᤧᤓᤧᤶᤒᤧᤴ ᤐᤥᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠᤴ ᤁᤢᤍᤥ᤺ᤵᤔᤠᤜᤠ᤹ᤖᤧ ᤗᤠᤃᤡ ᤌᤧ᤹ᤔᤠ ᤆᤡᤃᤰᤘᤠ ᤔᤧᤒᤥᤱᤗᤥ॥ 19 ᤜᤠᤈᤧᤰᤆᤧᤰᤔᤠ ᤏᤢ ᤁᤢᤛᤡᤰ ᤁᤧᤒᤥ᤺ᤰᤔᤠ ᤔᤣ᤺ᤳᤋᤧᤴᤏᤢ ᤕᤢᤱᤔᤠᤏᤢ᤺ᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤘᤠ᤹ᤔᤠ ᤏᤢᤒᤠᤖᤥ॥ 20 ᤛᤡᤰᤁᤢᤶᤏᤡᤒᤧᤸᤗᤧ ᤁᤢᤜᤡᤶᤔᤡᤴ ᤏᤢᤒᤠ ᤁᤢᤈᤠ ᤏᤢ ᤏᤡ᤺ᤱᤃᤣᤸᤗᤧ ᤋᤡᤶᤗᤥ. ᤁᤖ ᤀᤍᤱ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤌᤩ᤺ᤱ ᤔᤠ᤺ᤴᤍᤢᤖᤥ॥ 21 ᤛᤠᤶᤕᤥᤏᤡᤔᤠ ᤜᤧᤰᤁᤩᤠᤱ ᤌᤎᤵ ᤔᤧᤴᤗ᤹ᤔᤏᤠᤒᤠ ᤔᤡ᤺ᤶᤈᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤧᤸᤗᤧ. ᤜᤡᤱᤔᤴ. ᤏᤢ᤹ᤔᤠᤍᤠᤔᤠ ᤏᤢ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤖᤥ॥ 22 ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤁᤧᤎᤢᤶᤒᤧᤸᤗᤧ ᤁᤢᤕᤧᤰᤕᤰᤁᤡᤴ ᤑᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤜᤧᤴᤍᤢᤒᤠ ᤁᤧᤎᤢᤶᤒᤠ ᤕᤰᤁᤡᤴ ᤗᤢ᤺ᤴᤍᤢᤍᤣᤛᤢᤖᤥ॥ 23 ᤀᤠᤵᤑᤣᤰ ᤔᤢᤖᤠ ᤏᤢ ᤗᤧᤛᤥ᤺ᤵᤐᤠ ᤁᤶᤒᤪᤠᤱ ᤁᤧᤔᤧᤵᤐᤠ ᤔᤏᤠᤴ ᤂᤢᤏᤧ᤹ ᤁᤧᤛᤠᤰᤐᤠ ᤋᤢᤰᤂᤣᤗᤠᤰᤂᤣᤀᤥ ᤋᤠᤱᤛᤧ᤺ᤵᤛᤡᤱᤗᤥ॥ 24 ᤀᤠᤱᤍᤡᤱ ᤁᤧᤗ᤹ᤒᤠ ᤏᤢ ᤕᤶᤒᤠ ᤁᤧᤜᤧᤴᤇᤡᤱᤒᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤔᤡᤱ “ᤁᤢᤏᤠᤔᤧᤴᤇᤠ᤹ ᤕᤠᤵᤔᤡ ᤀᤠᤔᤧᤵᤔᤧᤵᤐᤠᤖᤥ” ᤂᤧᤸᤗᤧ ᤀᤠᤱᤃᤠ᤹ ᤀᤣ᤺ᤰ ᤁᤧᤗ᤹ᤒᤠ ᤛᤢᤳᤏᤠ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ॥ 25 ᤗᤧᤶᤛᤢᤘᤠᤒᤧᤸᤗᤧ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤸᤗᤧᤀᤣ ᤂᤢᤏᤧ᤹ ᤛᤩᤧᤖᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤢᤰᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤍᤧᤴᤏᤧᤴᤗᤥ॥ 26 ᤗᤧᤴᤍᤡᤰ ᤏᤠᤶᤎᤠᤎᤠᤀᤣ ᤂᤧᤸᤗᤧ ᤇᤧᤴᤏᤠ ᤕᤖᤡᤰ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤖᤥ. ᤁᤖ ᤛᤠᤶᤕᤥᤒᤠᤸᤗᤧᤃ ᤜᤢᤰᤐᤰ ᤕᤶᤒᤠ ᤆᤥᤃᤢᤀᤠᤱ ᤀᤠᤒᤡᤖᤥ॥ 27 ᤋᤠᤰᤁᤧᤓᤧ᤹ᤒᤧᤸᤗᤧ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤕᤠᤶᤃᤧᤛᤡᤱᤒᤠ ᤆᤥᤰᤗᤥ. ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤺ᤸᤗᤧ ᤋᤥ᤺ᤶᤔᤏᤠᤒᤧᤴ ᤀᤠᤰᤂᤧᤴ ᤛᤠ᤹ᤖᤡᤰ ᤛᤡᤰᤗᤧ᤺ᤱᤅᤡᤖᤥ᥄ 28 ᤔᤧᤴᤘᤠ᤹ᤔᤏᤠᤒᤠ ᤀᤡᤱᤗᤧᤰᤐᤠ ᤋᤥ᤺ᤴᤍᤡ ᤁᤧᤒᤠ᤺ᤵᤐᤧᤴ ᤔᤧᤰᤗᤥ. ᤁᤖ ᤏᤢᤖᤡᤰ ᤁᤧᤄᤧᤶᤒᤧᤸᤗᤧ ᤁᤢᤗᤡᤱᤍᤥ ᤁᤧᤳᤗ ᤏᤡᤛᤢᤒᤧᤴ ᤐᤠ᤺ᤳᤋᤢᤖᤥ॥ 29 ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤴ ᤜᤠᤱᤜᤠᤱ ᤁᤧᤗ᤹ᤒᤠ ᤁᤢᤀᤡᤛᤡᤰ ᤗᤠᤱᤄᤣ᤺ᤰᤗᤥ. ᤁᤖ ᤁᤢᤍᤥ᤺ᤵᤔᤠᤀᤠᤱ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤕᤧᤵᤗᤧᤰᤜᤠ᤹ ᤀᤡ᤺ᤳᤋᤢᤖᤥ॥ 30 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤗᤡᤱᤍᤥ ᤁᤧᤵᤔᤠ ᤁᤧᤛᤢᤰᤐᤠ ᤀᤰᤋᤱᤒᤠ ᤛᤡᤰᤁᤢᤶ ᤏᤡᤱᤘᤠ᤹. ᤀᤡ᤺ᤳᤇᤡᤱᤛᤠᤶ ᤀᤡᤃᤪ ᤏᤡᤱᤛᤣᤰ ᤜᤥᤵᤗᤥ॥ 31 ᤌᤱ ᤌᤰᤔᤠ ᤕᤧᤴᤏᤡᤸᤗᤧ ᤗᤠᤃᤡ ᤀᤴᤜᤠ᤹ ᤕᤠᤖᤡᤵ ᤆᤥ᤺ᤰᤔᤠᤛᤡ ᤐᤥᤱᤗᤥ. ᤁᤖ ᤌᤱ ᤏᤠ᤺ᤶᤔᤠᤃ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤢᤜᤢᤰᤁᤥ ᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.