ᤂᤠᤜᤢᤴ 20 - LIFOTNT1 ᤆᤧᤸᤗᤧᤰᤛᤣ᤹ ᤌᤡᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤌᤡ᤺ᤱᤃ ᤜᤕᤱ ᤁᤡᤸᤗᤡᤱ ᤁᤧᤓᤥᤱᤒᤠ ᤆᤥᤰᤗᤥ. ᤁᤴ ᤐᤠ᤺ᤴᤜᤠ᤹ᤀᤥ ᤁᤧᤜᤶᤒᤠᤜᤠ᤹ ᤛᤡᤰᤁᤢᤶᤛᤠᤒᤠ ᤔᤧᤴᤈᤥ᤺ᤰᤏᤧᤴᤗᤥ॥ 2 ᤜᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤱᤃ ᤂᤡᤖᤡᤱᤒᤠ ᤁᤧᤜᤢ᤺ᤰᤐᤠ ᤜᤧᤰᤁᤣ ᤗ᤹ᤖᤥ. ᤂᤧᤴ ᤁᤢᤛᤡᤰ ᤁᤧᤓᤥ᤺ᤱᤒᤧᤸᤗᤧ ᤂᤢᤏᤧ᤹ ᤁᤢᤜᤡᤱᤔᤧᤴ ᤔᤠᤛᤢᤖᤥ॥ 3 ᤂᤧᤔᤠ᤹ ᤛᤡᤖᤠ᤹ ᤔᤧᤴᤎᤠᤱᤔᤧᤴ ᤔᤏᤠ᤺ᤸᤗᤧ ᤁᤢᤗᤠᤃᤡ ᤀᤡᤱᤎᤠᤱᤒᤠ ᤐᤠ᤺ᤴᤗᤥ. ᤁᤖ ᤁᤧᤖᤧᤰ ᤀᤍᤱᤜᤠ᤹ ᤂᤧᤈᤧᤰ ᤆᤥ᤺ᤰᤔᤠ ᤔᤧᤈᤠᤳᤗᤥ॥ 4 ᤗᤧᤶᤛᤢᤘᤠᤒᤧᤸᤗᤧ ᤕᤠᤰᤘᤠ ᤌᤠᤔᤠ ᤕᤧᤶᤔᤥ ᤁᤢᤀᤡᤰᤋᤠᤵᤐᤡᤴ ᤔᤧᤍᤥ᤺ᤰᤂᤢᤴᤗᤥ ᤂᤧᤸᤗᤧᤆᤥᤃᤢᤸᤗᤧ ᤆᤠᤛᤢᤶᤔᤠ ᤕᤧᤶᤔᤥ ᤁᤥ᤺ᤳᤋᤢ᤹ ᤁᤖ ᤌᤣᤀᤠᤱ ᤔᤧᤄᤥᤛᤢᤴᤗᤥ॥ 5 ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤥ ᤁᤧᤕᤠᤰᤐᤠ ᤏᤡᤱᤛᤣ᤺ᤰᤜᤠ᤹ ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤫᤠ᤺ᤳ ᤜᤧᤰᤋᤱᤒᤠᤖᤥ. ᤁᤖ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠ᤺ᤸᤗᤧ ᤂᤧᤴ ᤀᤢ᤺ᤰᤂᤢ ᤗ᤺ᤳᤋᤢᤖᤥ॥ 6 ᤕᤖᤡᤰ ᤔᤏᤠᤜᤠ᤹ᤖᤧ ᤀᤠᤵᤑᤣᤰ ᤂᤢᤴᤇᤡ᤹ᤀᤥ ᤀᤠᤵᤑᤠᤸᤗᤧᤛᤠᤱ ᤌᤎᤵ ᤔᤧᤴᤗ᤹ᤔᤏᤠᤒᤠ ᤔᤡ᤺ᤶᤈᤡ ᤁᤳᤋᤢᤶᤒᤧ ᤑᤠ᤹ᤀᤠᤱ ᤕᤶᤒᤠ ᤐᤠᤴ ᤔᤧᤒᤠ᤺ᤳᤋᤢᤖᤥ. ᤁᤖ ᤜᤧᤰᤋᤱᤒᤠ ᤛᤧᤰᤂᤠᤒᤠ ᤔᤏᤠ ᤀᤠᤳᤋᤡ ᤂᤥᤔᤠ ᤛᤢᤰᤋᤧᤵᤐᤣ᥅ 7 ᤛᤠᤶᤕᤥᤒᤠ ᤔᤏᤠᤴ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤜᤡᤱᤔᤴᤏᤥ ᤘᤠ᤹ᤖᤥ. ᤂᤢᤏᤧ᤹ ᤁᤢᤀᤣᤃᤠᤱ ᤁᤧᤘᤠ᤹ᤒᤠ ᤁᤢᤛ᤻ᤛᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥ 8 ᤜᤠᤱᤅᤡᤴ ᤜᤠᤱᤕᤢᤰᤏᤠᤀᤥ ᤂᤠᤛᤧᤴ ᤗᤥ᤺ᤴᤇᤧ ᤕᤢᤱᤛᤡᤱᤅᤡᤸᤗᤧ. ᤂᤢᤏᤧ᤹ ᤁᤢᤔᤡᤰᤁᤡᤸᤗᤧ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤛᤧᤴᤍᤢᤖᤥ॥ 9 ᤀᤠᤳᤋᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤛᤢᤰᤋᤢᤒᤣ᥅ “ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤴ ᤛᤢᤳᤌᤥ ᤁᤳᤋᤢᤱᤗᤥ. ᤀᤠᤱᤃᤠ᤹ ᤛᤢᤳᤌᤥ ᤏᤢ ᤗᤠᤕᤥ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠᤖᤥ॥” 10 ᤘᤣ᤹ ᤁᤧᤛᤧᤶᤒᤠ ᤔᤧᤴᤍᤱᤔᤏᤠᤒᤠ ᤁᤢᤎᤠᤱᤔᤠᤜᤠ᤹ ᤏᤢ ᤁᤢᤛᤡ᤺ᤰᤔᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤗᤧ᤺ᤱᤗᤥ॥ 11 ᤗᤳᤇᤠ ᤀᤅᤧ᤺ᤰᤘᤠ᤺ᤴᤏᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ᤗᤠᤶ ᤂᤢᤏᤧ᤹ ᤁᤢᤕᤧᤵᤗᤧᤰᤜᤠ᤹ ᤛᤢᤳᤌᤥ ᤏᤢ ᤁᤢᤍᤥ᤺ᤵᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤔᤠ ᤛᤢᤰᤋᤧᤳᤗᤥ॥ 12 ᤏᤠᤃᤧᤄᤧᤶᤒᤠ ᤏᤧᤰᤂᤥ᤹ᤀᤡᤴ ᤏᤢ ᤁᤧᤏᤡᤒᤠ ᤔᤡᤰᤁᤧᤴ ᤏᤧᤵᤔᤠᤱ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤆᤥᤃᤢᤒᤠᤖᤥ॥ 13 ᤂᤧᤏᤧ᤹ ᤔᤡᤰᤕᤢᤔᤧᤴ ᤁᤧᤛᤡᤖᤠ᤹ ᤔᤧᤎᤠᤅᤧᤴᤏᤧ᤹ᤀᤥ. ᤂᤧᤸᤗᤧ ᤂᤧᤏᤧ᤹ ᤀᤠᤸᤗᤛᤠᤱ ᤕᤠᤱᤃᤧᤛᤠ᤹ᤒᤠ ᤁᤧᤈᤥ᤺ᤰᤗᤥ. ᤂᤧᤏᤧ᤹ ᤔᤧᤴᤀᤡᤶᤔᤣ ᤆᤠᤱᤈᤠᤱᤅᤠᤱ ᤕᤢᤅᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤐᤥᤃᤢᤃᤧᤴ ᤁᤢᤈᤠ ᤁᤧᤃᤣ᤺ᤰᤛᤢ ᤁᤧᤃᤳᤋᤢᤖᤥ॥ 14 ᤁᤧᤀᤡᤱᤒᤧᤸᤗᤧ ᤐᤠ᤺ᤳᤋᤢ᤹. “ᤁᤴ ᤏᤢᤒᤠ ᤔᤧᤈᤥᤰᤏᤧᤴ. ᤁᤴ ᤏᤢᤒᤠ ᤔᤧᤈᤥᤰᤏᤧᤴ᥄” ᤂᤧᤒᤩᤠᤱ ᤏᤠᤏᤠᤰ ᤐᤣ᤺ᤰᤁᤠᤱ ᤀᤡᤅᤢᤒᤠ ᤐᤠ᤺ᤴᤏᤥ ᤂᤧᤴ ᤜᤧᤴᤇᤡᤱᤗᤥ॥ 15 ᤛᤠᤶᤔᤩᤠᤱ ᤘᤠ᤹. ᤜᤧ᤺ᤰᤁᤱᤃᤱᤒᤠ ᤔᤢᤎᤡᤱᤗᤢᤱᤜᤠ᤹ ᤘᤧᤳᤋᤧᤛᤖᤧ ᤘᤠ᤹ᤖᤥ. ᤁᤖ ᤏᤧᤜᤡᤏᤡᤱᤘᤠ᤹ᤖᤧ ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤃ ᤂᤥᤔᤠ ᤁᤧᤛᤠᤰᤐᤠ ᤔᤢᤎᤡᤱᤛᤡᤖᤥ॥ 16 ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤔᤏᤠ᤺ᤸᤗᤧ ᤁᤢᤛᤡᤱᤏᤠᤳᤋᤥ ᤋᤥ᤺ᤴᤍᤡ ᤁᤧᤕᤢᤱᤛᤡᤱᤒᤠ ᤔᤏᤠ᤺ᤸᤗᤧ ᤁᤢᤍᤣ᤺ᤳᤋᤡᤴᤏᤠᤱ ᤏᤠᤵᤋᤧ᤹ᤀᤥ. ᤂᤧᤸᤗᤧ ᤋᤠᤵᤁᤧᤒᤧ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤃᤡ ᤜᤧᤰᤁᤣ ᤆᤥᤃᤢᤒᤠᤃᤪ. ᤂᤧᤴ ᤁᤢᤍᤣ᤺ᤳ ᤁᤢᤈᤠᤱᤅᤡᤴ ᤋᤡᤰ ᤕᤢᤱᤔᤠ ᤐᤥᤱᤗᤥ॥ 17 ᤔᤏᤠ᤺ᤸᤗᤧ ᤀᤡᤱᤗᤧᤰᤗᤠᤶ ᤂᤥᤛᤢᤒᤠ ᤁᤢᤈᤠᤴ ᤁᤢᤗᤠᤃᤡ ᤁᤢᤈᤠᤏᤢ᤹ᤖᤥ. ᤁᤖ ᤁᤢᤏᤢᤵᤔᤥᤃ ᤁᤢᤶᤒᤪᤠ ᤁᤢᤗᤧ᤺ᤶ ᤗᤢᤱᤈᤡᤃᤣ᤺ᤰ ᤕᤠᤰᤋᤢᤒᤠ ᤜᤧᤰᤁᤣ ᤗ᤹ᤖᤥ॥ 18 ᤏᤢᤒᤠ ᤛᤢᤈᤠᤐᤠᤴ ᤏᤠ᤺ᤰᤋᤧᤛᤧ᤹ᤀᤠᤱ ᤏᤡᤱᤛᤣ᤺ᤰᤜᤠ᤹ ᤆᤥᤃᤧ᤹ᤀᤥ. ᤌᤱ ᤆᤥ᤺ᤰᤔᤠ ᤘᤠ᤹ᤏᤧᤓᤃᤪ ᤗᤠᤶᤗᤥ ᤐᤠ᤺ᤴᤜᤠ᤹ ᤂᤥᤛᤧ᤹ᤀᤥ॥ 19 ᤐᤠᤴ ᤁᤧᤒᤱᤒᤧᤸᤗᤧ ᤛᤫᤠ᤺ᤵᤐᤠ ᤐᤠ᤺ᤴᤏᤥ ᤀᤡᤱᤗᤧᤰ ᤆᤥᤃᤢᤖᤥ. ᤂᤧᤸᤗᤧᤆᤥᤃᤢᤸᤗᤧ ᤁᤢᤶᤒᤪᤠ ᤁᤧᤀᤡ᤺ᤵᤐᤠ ᤔᤏᤠᤗᤠᤶᤒᤠ ᤔᤠ᤺ᤱᤄᤠ ᤘᤕᤧ᤹ᤀᤥ॥ 20 ᤁᤢᤓᤠᤖᤧ ᤀᤠᤵᤑᤣᤰ ᤁᤢᤶᤒᤠ ᤀᤡᤃᤪ ᤁᤢᤶᤔᤠ ᤛᤠᤰᤔᤢᤖᤠ ᤔᤠᤱᤍᤣ ᤔᤧᤳᤋᤢᤏᤧᤓᤃᤪ. ᤛᤣᤔᤡᤴ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥ ᤔᤧᤛᤧᤖᤢᤒᤠᤜᤧᤰᤁᤣ ᤂᤧᤸᤗᤧ ᤁᤢᤜᤡᤱᤔᤴᤗᤧᤴ ᤛᤣᤔᤡᤴ ᤔᤧᤛᤧᤖᤢᤖᤥ॥ 21 ᤜᤠᤖᤠᤀᤣ ᤂᤥᤃᤧᤍᤧᤵᤐᤠ ᤗᤰᤂᤥᤔᤠᤴ ᤁᤢᤏᤢᤵᤔᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤒᤥᤱᤏᤧᤴᤗᤥ॥ 22 ᤀᤰᤂᤣ ᤔᤧᤸᤗ᤹ᤀᤧ᤹. “ᤁᤧᤓᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ᥄” ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴ ᤜᤠᤱᤄᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤠᤱᤃᤧᤛᤧ᤺ᤵᤗᤥ॥ 23 ᤔᤧᤱᤃᤧᤵᤔᤏᤠᤒᤠ ᤁᤢᤛᤡ᤺ᤰᤔᤠ ᤁᤢᤎᤠᤱᤔᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤗᤧ᤺ᤱᤗᤥ. ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤋᤧᤶᤍᤢᤖᤡ᤺ᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤧᤍᤠᤛᤢᤴᤗᤥ॥ 24 ᤔᤏᤠ᤺ᤸᤗᤧ ᤁᤢᤗᤠᤱᤃᤠ᤺ᤱᤜᤠ᤹ ᤕᤜᤘᤣ ᤍᤠᤱᤒᤠᤗᤠᤶᤔᤣ ᤛᤣ᤺ᤰᤕᤢᤰ ᤐᤥᤱᤗᤥ. ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤠᤵᤑᤣᤰ ᤁᤢᤗᤠᤶᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤒᤣ᥅ 25 ᤛᤡᤱᤛᤡᤱ ᤔᤧᤸᤗ᤹ᤀᤣ ᤁᤢᤓᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤠ ᤛᤢ᤺ᤵᤔᤠᤀᤠᤱ ᤔᤠᤱᤜᤧᤰ ᤆᤥ᤺ᤰᤔᤏᤠᤒᤧᤴ ᤕᤠᤱᤛᤡᤖᤰ ᤏᤡᤱᤘᤠ᤹ ᤀᤡ᤺ᤵᤔᤠᤃ ᤔᤏᤠ᤺ᤸᤗᤧ ᤁᤢᤗᤠᤃᤡ ᤆᤧᤱᤄᤪᤱᤒᤠ ᤐᤥᤱᤗᤥ॥ 26 ᤛᤡᤰᤁᤢᤶᤏᤡᤒᤠ ᤜᤠᤱᤅᤡᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ ᤕᤠᤀᤣᤵᤋᤢᤛᤡᤖᤥ. ᤂᤢᤏᤧ᤹ ᤂᤧᤱᤜᤠ᤹ᤖᤧ ᤛᤶᤎᤠᤱ ᤆᤠᤏᤢᤰᤔᤠ ᤁᤠᤵᤗᤥ᤺ᤰᤁᤧᤴ ᤀᤡᤛᤢᤖᤥ॥ 27 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤔᤡ᤺ᤸᤗᤧ ᤔᤏᤠ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤁᤥ᤺ᤳᤋᤢᤖᤥ. ᤂᤧᤸᤗᤧ ᤂᤢᤏᤧ᤹ ᤁᤢᤛᤡᤃᤠᤱᤒᤠ ᤁᤢᤛᤡᤰᤗᤢᤱᤔᤧᤴ ᤁᤥ᤺ᤳᤋᤢ ᤗ᤺ᤳᤋᤢᤖᤥ॥ 28 ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤏᤢ ᤏᤛᤠ᤺ᤴᤛᤠᤒᤠ ᤆᤥ᤺ᤰᤔᤧᤸᤗᤧ ᤜᤠᤱᤅᤡᤴ ᤁᤶᤒᤪᤠᤱ ᤔᤧᤵᤋᤢᤖᤥ. ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤗᤠᤶᤒᤠᤀᤣ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤋᤠᤱᤛᤧ᤺ᤵᤋᤢᤖᤥ॥ 29 ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤖᤧ ᤂᤢᤴᤇᤡ᤹ ᤔᤡᤔᤡᤍᤡᤱᤅᤡᤴ ᤂᤢᤴᤇᤡ᤹ ᤌᤢᤶᤔᤧᤴᤗᤥ. ᤁᤧᤓᤢᤵᤐᤠ ᤌᤧᤃᤣ᤺ᤰᤁᤡᤴ ᤁᤠᤵᤐᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤘᤠ ᤔᤠᤱᤘᤠᤖᤥ॥ 30 ᤜᤢᤰᤐᤢᤳᤜᤠ᤹ ᤏᤢ ᤁᤠ᤺ᤶᤔᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤀᤡ᤺ᤰᤛᤢᤍᤣ᤹ᤖᤢᤖᤥ. ᤜᤧᤰᤁᤩᤠᤱ ᤋᤧ᤺ᤶᤓᤢᤰᤁᤡᤸᤗᤧ ᤛᤡᤰᤗᤢᤱᤔᤧᤴ ᤛᤢᤳᤌᤥ ᤐᤥᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.