ᤂᤠᤜᤢᤴ 2 - LIFOTNTᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤂᤥᤃᤧᤍᤧᤵᤐᤠ ᤌᤢᤶᤄᤥᤜᤠ᤹ 1 ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤜᤢ᤹ᤏᤧᤒᤠ ᤀᤠᤒᤠ᤺ᤴᤜᤠ᤹ ᤂᤧᤶᤔᤠ ᤁᤧᤍᤧᤴᤏᤧᤓᤃᤪ ᤜᤧᤰᤁᤩᤠᤱ ᤀᤠᤀᤡᤱᤈᤠᤱᤜᤠ᤹ ᤁᤧᤏᤡᤱᤘᤠ᤹ᤀᤥ ᤁᤧᤕᤢᤰᤂᤢᤏᤧᤓᤃᤪ. 2 ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤁᤧᤄᤧᤵᤛᤢᤏᤧᤓᤃᤪ ᤜᤧᤰᤁᤩᤠᤱ ᤁᤧᤛᤡᤰᤗᤢᤱᤔᤧᤴ ᤂᤠᤛᤡᤱᤏᤡ᤺ᤵᤔᤠ ᤗᤧᤵᤔᤠᤱ ᤁᤧᤜᤡᤛᤢᤏᤧᤓᤃᤪ. 3 ᤀᤡ᤺ᤳᤇᤡᤱᤛᤠᤶᤗᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤁᤧᤈᤥᤃᤢᤏᤧᤓᤃᤪ ᤂᤠᤛᤡᤱᤏᤡ᤺ᤵᤔᤠᤖᤧ ᤗᤠᤃᤡ ᤕᤶᤒᤠ ᤀᤡᤰᤗᤠᤀᤥ ᤐᤣᤗᤡ ᤁᤧᤓᤠᤰᤁᤠᤏᤧᤓᤃᤪ. 4 ᤜᤧᤰᤁᤩᤠᤱ ᤂᤧᤏᤧ᤹ ᤕᤢᤵᤐᤠ ᤜᤧᤰᤁᤣ ᤂᤧᤴ ᤁᤧᤃᤥᤳᤋᤢᤏᤧᤓᤃᤪ ᤂᤶᤓᤩᤠᤱ ᤆᤡᤱᤔᤏᤠᤒᤠ ᤕᤠᤱᤓᤢ ᤁᤢᤀᤡᤛᤡᤰ ᤂᤧᤴ ᤁᤧᤍᤕᤢᤏᤧᤓᤃᤪ. 5 ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴ ᤁᤡᤵᤔᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤧᤜᤡ ᤁᤢᤏᤡᤱᤘᤠᤴ ᤁᤧᤄᤥᤛᤢᤖᤥ॥ 6 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤀᤠᤒᤡᤖᤥ. ᤂᤢᤏᤧ᤹ ᤁᤢᤶᤒᤪᤠᤀᤥᤗᤠᤶ ᤏᤧᤜᤡᤏᤡᤱᤘᤠ᤹ ᤏᤢ ᤂᤠᤛᤡᤱᤏᤡ᤺ᤵᤔᤠ ᤐᤠ᤺ᤴᤜᤠ᤹ ᤗ᤺ᤴᤗᤥ॥ 7 ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤗᤠᤃᤡ ᤌᤱ ᤁᤧᤏᤠ᤺ᤶᤒᤠ ᤆᤥ᤺ᤰᤔᤠᤛᤡ ᤐᤠ᤺ᤴᤏᤡᤴ ᤁᤢᤎᤠ᤺ᤱᤅᤥ ᤆᤡᤰᤂᤢᤀᤠᤱ ᤕᤢᤱᤗᤥ. ᤀᤠᤳᤋᤡᤴᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤁᤡᤴ ᤁᤢᤍᤥ᤺ᤵᤔᤠ ᤆᤥᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤢᤏᤧ᤹ᤃ ᤀᤠᤎᤣ᤺ᤰᤌᤣ᤺ᤰᤐᤠ ᤂᤥᤖᤥ. 8 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤠᤶᤔᤡᤴ ᤛᤧ᤺ᤵᤋᤢᤖᤥ. ᤜᤧᤰᤁᤩᤠᤱ ᤏᤛᤠ᤺ᤴᤏᤠᤱ ᤁᤢᤔᤠᤱᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤂᤢᤏᤧ᤹ ᤁᤶᤒᤪᤠᤱ ᤔᤧᤳᤋᤢᤖᤥ॥ 9 ᤂᤧᤒᤩᤠᤱ ᤛᤠᤶᤕᤥᤏᤡᤔᤠ ᤂᤠᤛᤧᤴᤏᤡᤴ ᤏᤢ ᤁᤧᤘᤠ᤹ᤒᤠ ᤐᤠ᤺ᤴᤏᤡᤴ ᤌᤧᤔᤠᤒᤣ— ᤂᤧᤴᤏᤢ ᤛᤥᤖᤡᤰ ᤁᤧᤖᤧᤰ ᤏᤢᤒᤠ ᤗᤠᤶᤔᤡᤴ ᤌᤣᤒᤣ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥ 10 ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤗᤠ᤺ᤳᤗᤥ. ᤜᤧᤰᤁᤩᤠᤱ ᤏᤧᤜᤡᤏᤡᤱᤘᤠᤴ ᤁᤧᤕᤠᤶᤛᤠᤶᤔᤡᤸᤗᤧ ᤗᤠᤃᤡ ᤕᤧᤕᤧᤒᤠ ᤐᤥᤱᤗᤥ॥ 11 ᤀᤡ᤺ᤳᤇᤡᤱ ᤛᤠᤶᤔᤡᤸᤗᤧ ᤂᤧᤏᤧ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤃᤳᤗᤥ. ᤂᤠᤛᤡᤱᤏᤡ᤺ᤵᤔᤧᤸᤗᤧ ᤂᤧᤏᤧ᤹ ᤋᤠᤱᤃᤧᤛᤧ᤺ᤵ ᤁᤧᤃᤳᤗᤥ॥ 12 ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤂᤧᤏᤧ᤹ ᤁᤢ᤹ᤀᤡᤓᤧᤶᤔᤠ ᤕᤧᤵᤗᤧᤰᤗᤠᤶ. ᤜᤧᤰᤁᤩᤠᤱ ᤀᤡᤱᤗᤧᤰ ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤗᤠᤶ ᤁᤧᤍᤠᤱᤗᤥ॥ 13 ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤗᤠᤶᤜᤠ᤹ ᤔᤧᤗᤧᤖᤢ ᤔᤧᤍᤣᤛᤢᤖᤥ ᤜᤧᤰᤁᤩᤠᤱ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥ ᤗᤠᤱᤔᤧᤄᤣ᤺ᤰᤗᤥ. 14 ᤂᤧᤱᤜᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤔᤧᤛ᤺ᤳᤗᤥ ᤂᤶᤓᤩᤠᤱ ᤁᤢ᤹ᤀᤡᤓᤧᤶᤔᤠ ᤂᤠᤷᤔᤧᤴᤍᤰ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤋᤠᤖᤥ. 15 ᤂᤧᤱᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤔᤡᤴ ᤐᤧᤷᤃᤧᤰᤁᤧᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤧᤵᤗᤧᤰᤜᤠ᤹ ᤁᤢᤍᤥ᤺ᤵᤔᤠ ᤔᤧᤈᤥᤰᤏᤧᤴᤗᤥ॥ 16 ᤁᤧᤳᤏᤡᤔᤠ ᤏᤢ ᤕᤧᤵᤗᤧᤰ ᤁᤧᤓᤧ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤧᤶᤔᤠ ᤁᤢᤛᤢ᤺ᤶᤔᤠ ᤐᤠ᤺ᤴᤜᤠ᤹ᤗᤠᤶ ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤁᤧᤍᤠᤱᤗᤥ. 17 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤘᤧᤶᤔᤥᤒᤠ ᤁᤢᤕᤧᤶᤒᤠ᤺ᤴ ᤗᤠᤵᤑᤢᤛᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤢᤏᤧ᤹ ᤜᤢᤵᤋᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤏᤡᤏᤡ ᤂᤧᤵᤄᤧᤶ ᤔᤧᤸᤗᤠᤵᤐᤣ ᤘᤠ᤹ᤈᤠᤖᤥ॥ 18 ᤂᤢᤏᤧ᤹ ᤁᤢᤜᤡᤶᤔᤥ ᤁᤧᤗᤠ᤺ᤵᤐᤧᤴ ᤛᤡᤔᤧᤸᤗᤧ ᤛᤱᤔᤠᤱ ᤋᤣ᤹ᤖᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤶ ᤁᤧᤏᤠ᤺ᤵᤐᤠᤜᤠ᤹ ᤂᤧᤔᤠ ᤕᤱᤛᤱᤅᤥ ᤔᤧᤃᤧᤳᤗᤥ॥ 19 ᤂᤧᤴ ᤔᤧᤴᤇᤢᤔᤠᤀᤥ ᤁᤧᤒᤣ᤺ᤰᤐᤠᤜᤠ᤹ ᤀᤠᤳᤋᤡᤴᤏᤠᤱ ᤔᤧᤏᤢ᤺ᤱᤏᤧᤴ ᤔᤧᤍᤠᤏᤧᤴᤗᤥ. ᤜᤧᤰᤋᤱᤒᤠᤜᤠ᤹ᤖᤧ ᤜᤡᤱᤔᤠ ᤗᤠᤶᤔᤡᤴᤏᤠᤱ ᤕᤠᤶᤔᤥ ᤂᤥᤔᤠ ᤔᤧᤴᤇᤢᤰᤋᤢᤴᤗᤥ॥ 20 ᤁᤸᤗᤧᤆᤥᤃᤢᤸᤗᤧ ᤏᤢᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤥ᤺ᤱ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤕᤧᤵᤗᤧᤰᤁᤥ ᤔᤧᤶᤔᤢᤴᤏᤣ ᤘᤕᤧ᤹ᤀᤥ॥ 21 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤒᤠᤜᤠ᤹ ᤗᤠᤈᤣ᤹ᤀᤥ ᤔᤧᤕᤢᤱᤗᤥ. ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤂᤧᤵᤔᤥ ᤔᤧᤘᤠ᤹ᤖᤥ॥ 22 ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ ᤗᤠᤈᤣ᤹ᤗᤠᤶ ᤜᤠ᤹ᤕᤠᤰ ᤔᤧᤀᤠ᤺ᤰᤂᤢᤛᤡᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠᤜᤠ᤹ ᤕᤠ᤺ᤴᤛᤢᤱ ᤜᤧᤰᤁᤣ ᤗᤠᤵᤔᤧᤓᤢᤛᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.