ᤂᤠᤜᤢᤴ 19 - LIFOTNT

¹ ᤕᤠᤱᤃᤧᤛᤠ᤹ᤒᤠ ᤏᤢ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠᤀᤠᤱ ᤘᤠ᤹ᤔᤠᤃ ᤀᤠᤵᤋᤡᤰᤛᤠᤒᤠ ᤏᤢ ᤀᤍᤱ ᤐᤥᤱᤔᤠᤏᤢ᤺ᤸᤗᤧ ᤛᤠ᤹ᤖᤡᤰ ᤏᤢᤒᤠᤖᤥ॥

² ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤔᤣ᤺ᤴᤏᤣ ᤛᤡᤰᤛᤶᤔᤠ ᤏᤢᤒᤠ ᤔᤧᤒᤥᤱᤏᤧᤴᤗᤥ. ᤜᤠᤖᤠᤘᤖᤠ ᤁᤧᤈᤥ᤺ᤰᤐᤠᤸᤗᤧ ᤐᤠᤴ ᤑᤣ᤺ᤴᤍᤢᤖᤥ॥

³ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤀᤍᤱ ᤆᤥ᤺ᤰᤔᤠᤖᤧ ᤁᤢᤜᤡᤱᤔᤴ ᤔᤧᤰᤗᤥ. ᤜᤧᤰᤁᤣᤛᤠᤱ ᤂᤧᤸᤗᤧ ᤁᤢᤛᤡᤰᤁᤢᤶᤔᤡᤸᤗᤧ ᤕᤜᤘᤣ ᤍᤠᤱᤒᤧᤴ ᤐᤠ᤺ᤴᤌᤡᤰᤋᤢᤖᤥ॥

⁴ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤕᤖᤡᤰ ᤋᤣ᤺ᤱᤈᤢᤶᤜᤠ᤹ ᤆᤥᤃᤢᤛᤡᤖᤥ. ᤁᤖ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤸᤗᤧ ᤏᤡ᤺ᤳᤋᤠᤱᤒᤠ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ᤖᤧᤀᤠᤱ ᤂᤧᤴ ᤔᤧᤗᤧᤖᤢᤔᤧᤎᤀᤠᤱ ᤔᤧᤒᤣ᤺ᤰᤗᤥ॥

⁵ ᤀᤡᤱᤗᤧᤰᤐᤠ ᤋᤥ᤺ᤴᤍᤡ ᤁᤧᤒᤡᤒᤧᤴ ᤂᤢᤶᤍᤡᤱ ᤔᤣ᤺ᤴᤏᤣ ᤐᤡᤶᤔᤠ ᤔᤧᤄᤥᤏᤧᤴᤗᤥ. ᤜᤧᤰᤁᤩᤠᤱ ᤔᤧᤴᤘᤠ᤹ᤔᤏᤠ ᤐᤠᤴ ᤁᤧᤛ᤺ᤶᤒᤠ ᤔᤏᤠᤴ ᤆᤥ᤺ᤰᤕᤢᤶᤓᤥ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤔᤧᤄᤥᤏᤧᤸᤗᤥ॥

⁶ ᤕᤢᤰᤛᤠᤒᤧᤸᤗᤧ ᤏᤢᤖᤡᤰ ᤔᤧᤳᤋᤡᤃᤧᤖ ᤁᤧᤗ᤹ᤒᤠ ᤕᤖᤡᤰᤗᤧ ᤔᤧᤃᤥ᤺ᤳᤋᤢᤖᤥ. ᤜᤧᤰᤁᤩᤠᤱ ᤔᤡᤰᤐᤣ᤹ ᤁᤧᤒᤡᤒᤠ ᤁᤧᤖᤧᤰ ᤔᤏᤠ᤺ᤸᤗᤧ ᤁᤢᤈᤢᤶ ᤔᤧᤒᤥᤱᤗᤥ॥

⁷ ᤕᤠᤱᤃᤧᤛᤠ᤹ᤒᤠ ᤔᤏᤠᤴ ᤁᤧᤖᤧᤰ ᤀᤠᤵᤑᤣᤰ ᤁᤢᤃᤠ᤹ᤀᤡᤜᤠ᤹ᤖᤧ ᤔᤧᤏᤠ᤹ᤖᤢᤖᤥ. ᤂᤢᤏᤧ᤹ ᤁᤢᤴᤍᤣ᤺ᤱᤒᤠᤜᤠ᤹ᤖᤧᤃ ᤇᤧᤴᤏᤠ ᤛᤠ᤹ᤖᤡᤰ ᤗᤠᤵᤔᤧᤓᤢᤛᤢᤒᤡᤗᤠᤖᤥ᥄ ᤂᤢᤏᤧ᤹ ᤐᤣᤗᤡ ᤑᤠᤰᤋᤢᤛᤡᤖ ᤂᤧᤱᤜᤠ᤹ ᤏᤠ᤺ᤳᤋᤢᤛᤡ ᤋᤡᤶᤍᤢᤛᤡᤛᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤠᤳᤋᤡᤀᤠᤱ ᤔᤧᤄᤥᤛᤢᤛᤡᤴᤗᤥ॥

⁸ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤁᤧᤄᤥᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤗᤢᤱᤔᤠ᤹ ᤋᤢᤰᤋᤢᤖᤥ. ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤔᤏᤠᤴ ᤁᤧᤏᤢ᤹ᤒᤠ ᤁᤧᤍᤠᤒᤠ ᤐᤥᤱᤗᤥ॥

⁹ ᤀᤡᤱᤗᤧᤰ ᤋᤥ᤺ᤴᤍᤡ ᤁᤧᤒᤡᤒᤧᤴ ᤂᤢᤶᤍᤡᤱ ᤔᤣ᤺ᤴᤏᤣ ᤐᤡᤶᤔᤠ ᤔᤧᤄᤥᤏᤧᤴᤗᤥ. ᤜᤧᤰᤁᤩᤠᤱ ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤁᤧᤛ᤺ᤶᤒᤧᤴ ᤔᤧᤰᤗᤥ॥

¹⁰ ᤀᤍᤱ ᤔᤏᤠᤴ ᤛᤢᤰᤂᤣᤘᤠᤀᤥ ᤜᤡᤱᤔᤠ ᤔᤧᤄᤧᤶᤍᤢᤴᤗᤥ. ᤕᤥ᤺ᤃ᤻ᤒᤠ᤺ᤸᤗᤧ ᤜᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤢᤰ ᤆᤥ᤺ᤰᤔᤠᤃ ᤀᤠᤸᤗᤛᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤗᤥ᥄

¹¹ ᤁᤢᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤔᤏᤠᤴ ᤏᤠᤛᤡᤃᤧᤎ᤺ᤵᤐᤠ ᤆᤥᤃᤢᤖᤥ. ᤁᤢᤏᤡᤱᤘᤠ᤹ ᤁᤧᤍᤢᤰᤐᤠ ᤐᤠ᤺ᤴᤏᤥ ᤁᤢᤔᤡᤰᤁᤧᤴ ᤀᤡᤶᤔᤧᤵᤔᤠ. ᤂᤢᤏᤧ᤹ ᤁᤢᤗᤠᤃᤡ ᤜᤠᤱᤘᤠ ᤔᤠᤱᤘᤠ ᤐᤥᤱᤗᤥ॥

¹² ᤜᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤱᤃ ᤂᤡᤖᤡᤱᤒᤠ ᤜᤢ᤺ᤰᤐᤠ ᤜᤧᤰᤁᤣ ᤗ᤹ᤖᤥ. ᤁᤖ ᤂᤢᤏᤧ᤹ ᤁᤢᤏᤢ᤹ᤔᤧᤱᤃ ᤕᤠᤴ ᤛᤶᤎᤠᤱᤒᤠ ᤜᤡ᤺ᤰᤘᤠ ᤜᤧᤰᤁᤣ ᤗ᤹ᤖᤥ॥

¹³ ᤀᤍᤱ ᤕᤧᤶᤒᤡᤳᤇᤠ ᤛᤠᤴ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤁᤢᤗᤠᤃᤡ ᤔᤧᤰᤔᤠᤖᤥ. ᤜᤠᤈᤧᤰᤆᤧᤰᤔᤠ ᤔᤣ᤺ᤳᤋᤡᤴ ᤆᤰ ᤆᤰ ᤗ᤹ᤖᤡᤰ ᤘᤠᤃᤧᤕᤢᤒᤠᤀᤠᤱ ᤁᤧᤒᤵᤐᤠ ᤆᤫᤠ᤺ᤳ ᤋᤧᤵᤐᤰᤘᤠ ᤜᤧᤰᤋᤱᤔᤠᤖᤥ॥

¹⁴ ᤜᤡᤶᤎᤠ᤺ᤱᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣᤜᤠ᤹ ᤔᤠᤒᤠᤗᤠᤶ ᤋᤠᤖᤥ. ᤁᤖ ᤛᤡᤶᤛᤡᤶ ᤕᤧᤰᤕᤧᤰ ᤁᤧᤗ᤹ᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳᤋᤧᤱᤃ ᤕᤜᤘᤣ ᤍᤠᤱᤒᤠ ᤗᤠᤶᤒᤠᤀᤣ ᤁᤧᤍᤠᤔᤠᤖᤥ॥

¹⁵ ᤗᤧᤶᤛᤢᤘᤠᤒᤠ ᤐᤥᤱᤔᤧᤸᤗᤧ ᤔᤢᤖᤢᤰ ᤂᤠᤖᤢᤰ ᤔᤡᤰᤕᤢᤔᤠ ᤋᤠᤖᤢᤖᤥ. ᤁᤧᤗᤧᤶᤒᤠ ᤔᤏᤠᤴ ᤛᤠᤰᤔᤧᤴᤈᤠ ᤘᤔᤧᤴᤎᤢᤱ ᤘᤠ᤹ᤔᤠ ᤐᤥᤱᤗᤥ॥

¹⁶ ᤂᤠᤜᤢᤴ ᤐᤠᤴ ᤂᤧᤶᤔᤠ ᤁᤧᤍᤧᤶᤒᤧᤸᤗᤧ ᤁᤢᤜᤡᤱᤔᤧᤴ ᤛᤧ᤺ᤵᤋᤢᤖᤥ. ᤁᤖ ᤂᤧᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤧᤴ ᤛᤡᤖᤥ॥

¹⁷ ᤕᤠᤱᤃᤧᤛᤠ᤹ᤒᤧᤴ ᤗᤢᤱᤔᤠ᤹ ᤋᤢᤰᤔᤠᤃ ᤕᤜᤘᤣ ᤍᤠᤱᤒᤧᤴ ᤌᤧᤳᤗᤱ ᤐᤡᤔᤏᤠᤒᤠᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤆᤥᤃᤢᤒᤠᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤂᤧᤴ ᤋᤢᤶᤄᤥ ᤐᤡᤖᤢᤖᤥ॥

¹⁸ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ ᤜᤧᤴᤌᤡᤶ ᤕᤠᤰᤋᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤀᤥ ᤏᤡᤱᤛᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤳᤗᤠ᤹ᤔᤠᤀᤥ ᤂᤧᤏᤧ᤹ ᤀᤠᤵᤑᤣᤰ ᤕᤧᤕᤧ ᤗ᤹ᤖᤡᤰ ᤗᤰᤁᤧᤄᤥᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ॥

¹⁹ ᤁᤢᤛᤡᤰ ᤁᤧᤈᤶᤒᤠ ᤔᤏᤠ᤺ᤸᤗᤧ ᤂᤢᤶᤍᤡᤱ ᤂᤥᤔᤠᤀᤣ ᤐᤥᤱᤗᤥ. ᤂᤧᤴ ᤂᤧᤏᤧ᤹ ᤁᤧᤏᤠᤅᤢᤏᤧᤓᤃᤪ ᤂᤧᤏᤧ᤹ ᤂᤧᤴ ᤕᤠᤶᤔᤥ ᤀᤧᤳᤗᤧᤱ ᤀᤧᤳᤗᤧᤱ ᤁᤧᤏᤠᤅᤢᤖᤀᤣ ᤐᤥᤱᤗᤥ॥

²⁰ ᤛᤢᤈᤠᤜᤠ᤹ ᤂᤧᤵᤛᤧ᤹. ᤜᤧᤰᤁᤩᤠᤱ ᤂᤠᤜᤢᤴᤜᤠ᤹ ᤂᤧᤶᤔᤠ ᤋᤧᤴᤍᤧ᤹ᤀᤥ. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤂᤧᤏᤧ᤹ ᤛᤡᤰᤁᤢᤶᤛᤠᤒᤠ ᤁᤧᤒᤥᤱᤗᤥ॥

²¹ ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤥ ᤕᤖᤡᤰ ᤆᤥ᤺ᤰᤔᤠ ᤐᤠ᤺ᤵᤔᤠ ᤐᤠᤴ ᤕᤠᤰᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧᤀᤣ ᤏᤠ᤺ᤴᤍᤢᤖᤥ॥

²² ᤔᤏᤠ᤺ᤸᤗᤧ ᤀᤠᤵᤑᤠᤸᤗᤧᤛᤠᤱ ᤁᤧᤘᤠ᤹ᤒᤠ ᤔᤡ᤺ᤶᤈᤡᤴ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤖᤥ. ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤐᤠ᤺ᤵᤔᤠᤏᤢ᤺ᤸᤗᤧᤃ ᤕᤠᤱᤃᤧᤛᤠ᤹ᤒᤠ ᤐᤥᤱᤔᤠᤀᤣ ᤏᤢᤒᤠᤖᤥ॥

²³ ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤠ ᤐᤠ᤺ᤴᤏᤡᤸᤗᤧ ᤜᤡᤱᤔᤴᤏᤥ ᤗᤠᤶᤀᤠᤗᤥᤖᤥ. ᤂᤧᤒᤩᤠᤱ ᤔᤏᤠᤴ ᤁᤢᤏᤡᤱᤘᤠ᤹ ᤋᤠᤍᤠ ᤘᤠ᤹ᤖᤥ. ᤜᤧᤰᤁᤩᤠᤱ ᤋᤢᤰᤂᤣ ᤗᤠᤰᤂᤣ᤺ᤸᤗᤧ ᤂᤧᤴ ᤔᤧᤛᤢᤛᤢᤴᤗᤥ॥

²⁴ ᤁᤢᤗᤧᤶᤔᤠ ᤁᤧᤕᤢᤒᤧᤸᤗᤧ ᤁᤢᤜᤢᤰᤁᤡᤴ ᤆᤩᤧᤳᤌᤩᤠᤀᤥ ᤗᤣ᤺ᤳᤋᤢᤖᤥ. ᤁᤖ ᤂᤢᤏᤧ᤹ ᤁᤢᤜᤢᤰᤁᤡᤴ ᤁᤢᤶᤒᤪᤠᤀᤥᤀᤠᤱ ᤔᤧᤎᤧᤰᤋᤢᤴᤗᤥ᥄

²⁵ ᤔᤏᤠ ᤁᤢᤏᤠᤔᤧᤴᤇᤠ᤹ ᤕᤠᤵᤔᤡ ᤁᤧᤔᤧᤵᤐᤧᤴ ᤋᤧ᤺ᤶᤓᤢᤰ ᤕᤠᤰᤔᤠᤖᤥ. ᤂᤧᤒᤩᤠᤱ ᤂᤠᤍᤠ᤺ᤰᤐᤠ ᤔᤏᤠᤴ ᤛᤡᤰᤁᤢᤶ ᤏᤡᤱᤘᤠ᤹ ᤜᤢ᤹ᤛᤡᤱᤗᤥ॥ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠᤴ ᤑᤧ᤺ᤰᤔᤠᤖᤥ. ᤂᤶᤓᤩᤠᤱ ᤂᤧᤸᤗᤧ ᤁᤢᤏᤧᤜᤡ ᤁᤢᤏᤡᤱᤘᤠᤴ ᤑᤥᤛᤢᤖᤥ॥

²⁶ ᤁᤢᤶᤒᤠ ᤁᤧᤏᤠᤵᤐᤠ ᤏᤢ ᤁᤢᤶᤔᤠ ᤗᤠ᤺ᤰᤁᤠᤳ ᤁᤧᤗ᤺ᤵᤐᤠ ᤁᤧᤍᤣᤒᤠ ᤕᤧᤶᤒᤡᤳᤇᤠᤛᤠ᤺ᤸᤗᤧ ᤆᤠ᤺ᤳᤌᤡ ᤐᤣ᤺ᤰᤔᤠ ᤏᤢ ᤛᤡᤖᤡᤱᤔᤔᤠ ᤋᤠᤖᤢᤖᤥ॥

²⁷ ᤀᤠᤒᤢᤃᤧᤴ ᤀᤠᤛ᤻ᤛᤠᤀᤣ᥄ ᤂᤧᤏᤧ᤹ ᤂᤠᤜᤢᤴ ᤂᤧᤶᤔᤠ ᤁᤧᤗᤧᤖᤢᤏᤧᤓᤃᤪ. ᤂᤧᤏᤧ᤹ ᤏᤧᤜᤡᤏᤡᤱᤘᤠ᤹ ᤐᤠ᤺ᤴᤜᤠ᤹ᤗᤠᤶ ᤋᤠᤵᤁᤧᤒᤧ᤹ ᤁᤧᤒᤣ᤺ᤰᤗᤥ॥

²⁸ ᤑᤧᤰᤁᤧᤗᤠ᤹ᤒᤠ ᤋᤥ᤺ᤴᤍᤡ᤺ᤸᤗᤧ ᤂᤠᤛᤧᤴᤏᤡᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤋᤠᤰᤁᤧᤓᤧᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤋᤠᤵᤑᤧ᤺ᤶᤒᤠᤴ ᤗᤖᤢᤍᤣᤛᤢᤖᤥ॥

²⁹ ᤂᤢᤶᤍᤡᤱᤜᤠ᤹ᤃ ᤁᤢᤏᤠᤔᤧᤴᤇᤠ᤹ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡᤀᤣ ᤕᤠᤖᤡᤵ ᤐᤥᤱᤗᤥ. ᤜᤧᤰᤁᤩᤠᤱ ᤋᤧ᤺ᤶᤓᤢᤰᤁᤧᤱᤃ ᤀᤍᤱᤜᤠ᤹ᤖᤧ ᤂᤢᤴᤇᤡ᤹ ᤀᤣ᤺ᤰᤌᤠ᤺ᤰᤔᤧᤸᤗᤧ ᤗᤠᤃᤡᤖᤥ॥