ᤂᤠᤜᤢᤴ 17 - LIFOTNT

¹ ᤂᤧᤔᤠ᤹ ᤁᤧᤒᤥᤱᤒᤠ ᤜᤡᤶᤔᤥ ᤛᤠ ᤏᤢ ᤋ᤺ᤰ ᤆᤠᤔᤠᤏᤢ᤺ᤸᤗᤧᤃ ᤆᤡᤈᤡ ᤕᤧᤶᤕᤧᤶ ᤏᤢ ᤛᤫᤠ᤺ᤳᤋᤠᤱ ᤁᤢᤏᤢ᤹ᤔᤠ ᤔᤣ᤺ᤴᤏᤣ ᤀᤢᤶᤎᤡᤰ ᤁᤢᤈᤠ ᤆᤠᤔᤠ ᤏᤢᤒᤠᤖᤥ॥

² ᤛᤡᤰᤁᤢᤶᤛᤠᤒᤠ ᤛᤧᤘᤠᤖᤥᤒᤧᤸᤗᤧ ᤁᤢᤴᤍᤠᤱᤒᤧᤸᤗᤧ ᤛᤢᤶᤒᤥᤎᤠᤛᤠᤒᤠ ᤔᤣ᤺ᤴᤏᤣᤒᤠ ᤁᤢᤛ᤻ᤛᤠᤴ ᤕᤢᤰᤁᤥ ᤁᤳᤋᤢᤖᤥ. ᤜᤧᤰᤁᤩᤠᤱ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤁᤢᤍᤱᤒᤠ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤁᤢᤗᤰ ᤂᤧᤸᤗᤧ ᤂᤥᤛᤢᤍᤣ᤹ᤖᤢᤖᤥ॥

³ ᤕᤢᤵᤐᤠ ᤕᤥ᤺ᤶᤔᤠ ᤂᤵᤐᤩᤠ ᤏᤢ ᤛᤠᤶᤔᤩᤠᤱ ᤛᤠᤱᤔᤠ ᤔᤡᤍ᤺ᤳ ᤘᤠ᤹ᤖᤥ. ᤁᤖ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤛᤠ᤹ᤒᤠᤃ ᤕᤜᤘᤣ ᤍᤠᤱᤒᤧᤴᤏᤣ ᤘᤠ᤹ᤖᤥ॥

⁴ ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤂᤧᤵᤛᤢᤖᤥ. ᤀᤡᤱᤗᤧᤰᤛᤫᤠᤒᤧᤸᤗᤧ ᤔᤧᤰᤔᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤐᤡᤖᤢᤖᤥ॥

⁵ ᤀᤠᤳᤋᤡᤸᤗᤧ ᤕᤠᤱᤃᤧᤛᤠ᤹ᤒᤧᤴ ᤁᤡᤏᤠ᤺ᤴᤍᤡ ᤐᤡᤖᤢ᤹. ᤂᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤧᤴ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤕᤠ᤺ᤶᤒᤰ ᤆᤥᤃᤢᤖᤥ॥ ᤘᤣ᤹ᤀᤡᤸᤗᤧ ᤁᤢᤍᤢᤰᤂᤣ ᤁᤢᤗᤠᤰᤂᤣᤀᤥ ᤁᤧᤛ᤺ᤵᤐᤠ ᤀᤠᤳᤋᤡᤴᤇᤠᤱ ᤂᤢᤶᤍᤡᤱ ᤔᤧᤱᤄᤥᤀᤣ ᤐᤡᤶᤔᤠ ᤐᤣ᤺ᤰᤔᤠ ᤔᤧᤄᤥᤏᤧᤴᤗᤥ॥

⁶ ᤔᤧᤴᤇᤠ᤹ ᤔᤧᤴᤇᤠ᤹ᤔᤠᤜᤠ᤹ᤃ ᤁᤠᤵᤐᤥ ᤋᤢᤶᤛᤠᤜᤠ᤹ᤖᤧ ᤂᤢᤴᤇᤡ᤹ ᤋᤡᤆ᤺ᤛᤡᤖᤥ. ᤜᤧᤰᤁᤩᤠᤱ ᤔᤠᤒᤠᤜᤠ᤹ᤃ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤒᤥ ᤐᤵᤔᤠ ᤐᤠ᤺ᤴᤇᤡᤖᤥ॥

⁷ ᤏᤢᤒᤠ ᤐᤠ᤺ᤴᤏᤡᤴ ᤀᤍᤱᤅᤡᤸᤗᤧ ᤁᤢᤶᤒᤪᤠᤛᤣ᤹ᤀᤥ ᤔᤧᤄᤧᤶᤍᤢᤴᤗᤥ. ᤕᤢᤰᤛᤠᤒᤧᤸᤗᤧ ᤁᤢᤶᤒᤪᤠᤀᤥ ᤀᤡᤱᤗᤧᤰ ᤐᤠ᤺ᤴᤏᤡᤴ ᤇᤧᤴᤏᤠ ᤛᤠ᤹ᤖᤡᤰ ᤔᤧᤗᤠ᤹ᤖᤢᤴᤗᤥ॥

⁸ ᤀᤠᤳᤋᤡᤸᤗᤧ ᤛᤢᤖᤢᤋᤩᤠᤱ ᤆᤠᤔᤠ ᤐᤡᤖᤢᤛᤡ᤹. ᤂᤧᤱᤃ ᤂᤢᤏᤧ᤹ ᤁᤢᤗᤠᤃᤡ ᤁᤡᤳᤆᤠᤰ ᤜᤧᤰᤋᤱᤒᤠᤖᤥ. ᤁᤢᤗᤡᤱᤍᤥ ᤁᤧᤵᤔᤠᤴ ᤀᤠᤳᤋᤡ ᤐᤣ᤺ᤰᤔᤠᤛᤠᤱ ᤐᤥᤱ᤹ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥

⁹ ᤗᤢᤱᤜᤠ᤺ᤳᤇᤡᤱᤔᤠ ᤐᤠᤴ ᤁᤧᤔᤠ᤹ᤒᤧᤸᤗᤧ ᤔᤡ᤺ᤶᤈᤡ ᤑᤥᤛᤢᤖᤥ. ᤁᤖ ᤕᤧᤳᤗᤧᤱ ᤐᤠᤴ ᤁᤧᤃᤡᤶᤒᤠ ᤀᤠᤳᤋᤡᤸᤗᤧᤛᤠᤱ ᤀᤠᤍᤱᤍᤱᤒᤠ ᤋᤣ᤺ᤱᤈᤢᤶᤜᤠ᤹ ᤗᤢᤶᤔᤥ ᤀᤠᤛᤣᤖ ᤆᤥᤃᤢᤖᤥ॥

¹⁰ ᤀᤍᤱᤅᤡᤴ ᤁᤡᤵᤌᤡᤰᤗᤧᤱ ᤋᤧ᤺ᤶᤓᤢᤰ ᤕᤠᤰᤔᤏᤠᤒᤠᤴᤏᤢ᤺ᤸᤗᤧᤃ ᤂᤠᤛᤡᤱ ᤁᤧᤏᤡ᤺ᤵᤐᤠ ᤔᤏᤠᤴ ᤌᤡᤰᤗᤧᤱᤎᤡᤰ ᤑᤧ᤺ᤰᤔᤧᤸᤗᤧ ᤕᤠ᤺ᤴᤍᤢᤖᤥ॥

¹¹ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤴ ᤐᤡᤑᤩᤢᤱ ᤆᤥ᤺ᤰᤔᤠ ᤗᤧᤵᤔᤠᤱᤗᤰ ᤐᤳᤗᤥ. ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤳᤇᤠ ᤁᤧᤀᤠ᤺ᤵᤐᤠ ᤀᤡᤱᤛᤠᤒᤠᤴ ᤔᤧᤒᤠᤱᤄᤢᤖᤥ॥

¹² ᤀᤍᤱᤅᤡᤴ ᤂᤧᤸᤗᤧ ᤁᤢᤀᤍᤱ ᤆᤥ᤺ᤰᤔᤠ ᤐᤠ᤺ᤴᤏᤥ ᤋᤢᤶᤔᤠᤏᤢ᤺ᤸᤗᤧᤃ ᤁᤢᤛ᤻ᤛᤠ ᤔᤧᤏᤠᤵᤋᤢᤔᤠ ᤁᤢᤶᤔᤠᤔᤠ ᤔᤠ᤹᤺ᤕᤢ᤺ᤴ ᤋᤢᤶᤔᤠ ᤏᤢᤒᤠ ᤐᤥᤱᤗᤥ॥

¹³ ᤁᤢᤓᤠ ᤔᤏᤠ᤺ᤸᤗᤧ ᤏᤢᤒᤠ ᤆᤥᤃᤢ ᤐᤡᤖᤢᤒᤠᤸᤗᤧ ᤁᤢᤗᤧᤰᤘᤠ ᤏᤢᤒᤠ ᤆᤥ᤺ᤰᤔᤠ ᤐᤡᤔᤠ ᤁᤧᤒᤥᤱᤒᤠ ᤐᤠ᤺ᤴᤏᤥ ᤋᤠᤵᤑᤧ᤺ᤶᤒᤠ ᤆᤥᤃᤢᤏᤧᤓᤃᤪ. ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤧᤸᤗᤧ ᤁᤢᤜᤡᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤴᤗᤥ॥

¹⁴ ᤂᤧᤔᤠ᤹ ᤜᤣ᤺ᤰᤛᤡᤱᤔᤠᤱᤃ ᤌᤧᤱᤔᤏᤠᤒᤠ ᤆᤫᤠ᤺ᤳᤋᤡᤴ ᤜᤒᤠ ᤁᤢᤀᤡᤛᤡ᤺ᤰᤗᤥ. ᤂᤧᤸᤗᤧᤆᤥᤃᤢᤸᤗᤧ ᤐᤠ᤺ᤴᤎᤱ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤆᤡᤵᤗ ᤕᤠ᤺ᤴᤍᤧ᤹ᤀᤥ॥

¹⁵ ᤀᤠᤵᤋᤡᤰᤛᤠᤒᤧᤴ ᤀᤠᤵᤋᤡᤰ ᤔᤧᤱᤃᤢ᤺ᤵᤏᤠᤒᤠ ᤏᤢ ᤀᤠᤵᤋᤡᤰ ᤔᤧ᤺ᤴᤏᤣᤒᤠᤴ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤏᤧᤵᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤔᤧᤗᤧ᤺ᤱᤗᤥ॥

¹⁶ ᤀᤍᤱᤅᤡᤸᤗᤧ ᤁᤢᤜᤢᤰᤁᤥ ᤕᤠᤱᤅᤡᤴ ᤌᤧᤔᤠ ᤕᤠ᤺ᤶᤒᤰ ᤐᤥᤱᤅᤠᤱᤒᤣ᥅ ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤔᤠ ᤂᤧᤸᤗᤧ ᤏᤡᤱᤘᤠ᤹ ᤔᤧᤃᤳᤋᤢᤴᤗᤥ॥

¹⁷ ᤗᤳᤇᤠ ᤆᤢᤶᤔᤡᤸᤗᤧ ᤀᤠᤓᤧᤸᤗᤧᤛᤠᤱ ᤗᤢᤱᤔᤠ᤹ ᤀᤠᤍᤢᤰᤗᤥ. ᤑᤢ᤹ᤏᤢᤛᤠ᤹ᤜᤠ᤹ᤃ ᤋᤢᤰᤂᤣᤗᤠᤰᤂᤣᤒᤠ ᤕᤧᤶᤗᤧ ᤗᤠᤃᤡ ᤛᤠᤔᤧᤘᤠ᤺ᤴᤇᤡᤱᤗᤥ॥

¹⁸ ᤁᤢᤏᤧᤜᤡ ᤁᤧᤜᤥᤵᤐᤠ ᤔᤏᤠ᤺ᤸᤗᤧ ᤔᤠᤱᤜᤧᤰ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤢᤜᤡᤶᤒᤣᤛᤠᤱᤒᤧᤸᤗᤧ ᤁᤢᤛᤡᤱᤏᤠᤳᤋᤥ ᤋᤥ᤺ᤴᤍᤡ ᤕᤢᤱᤗᤥ॥

¹⁹ ᤂᤧᤔᤠ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤧᤸᤗᤧ ᤗᤠᤕᤥᤴ ᤁᤢᤛᤡᤖᤠ᤹ᤌᤠᤱᤗᤥ. ᤁᤧᤜᤧᤴᤇᤡᤱᤒᤠ ᤔᤏᤠ᤺ᤸᤗᤧ ᤔᤧᤰᤔᤠᤴ ᤋᤠᤖᤢᤖᤥ॥

²⁰ ᤋᤠᤵᤑᤧ᤺ᤶᤒᤠ ᤛᤡᤰᤗᤢᤱᤔᤠ᤹ ᤁᤧᤃᤵᤐᤧᤸᤗᤧ ᤕᤥᤖᤢ ᤋᤧᤵᤋᤢᤖ ᤔᤧᤃᤳᤋᤢᤴᤗᤥ. ᤀᤠᤳᤋᤡᤸᤗᤧ ᤀᤡᤱᤗᤧᤰᤐᤠ ᤗᤧᤛᤥᤳ ᤁᤳᤋᤢ᤹. ᤂᤧᤴ ᤋᤢᤰᤂᤣᤀᤥ ᤌᤠᤖᤥ॥

²¹ ᤀᤍᤱ ᤕᤧᤶᤒᤡᤳᤇᤠᤛᤠ ᤁᤧᤃᤵᤐᤧᤸᤗᤧ ᤁᤢᤏᤡᤱᤘᤠ᤹ ᤋᤢᤰᤂᤣ ᤆᤠᤖᤥ. ᤂᤖᤔᤧᤴᤍᤰᤐᤧᤸᤗᤧ ᤁᤢᤶᤒᤠᤴ ᤔᤧᤛ᤺ᤳᤏᤧᤴᤗᤥ॥

²² ᤕᤧᤕᤧᤒᤠ ᤛᤡᤰᤗᤢᤱᤔᤧᤱᤃ ᤏᤢᤒᤠ ᤛᤡᤍᤠ᤹ ᤐᤠᤱᤍᤠ᤹ᤖᤥ. ᤁᤖ ᤀᤠᤕᤢᤰᤕᤢᤰᤐᤠ ᤕᤠᤶᤛᤠᤶᤔᤡᤸᤗᤧ ᤕᤧᤵᤐᤠ ᤗᤢᤱᤛᤡ ᤜᤣᤛᤢᤖᤥ॥

²³ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤂᤠᤛᤧᤴᤏᤡᤴ ᤑᤧᤳᤗᤠ᤺ᤶᤔᤠᤖᤧ ᤗᤠᤃᤡ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤋᤠ᤺ᤰᤋᤢ ᤆᤖᤥ॥

²⁴ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠᤴ ᤂᤢᤏᤧ᤹ ᤁᤢᤏᤡᤔᤥ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤃᤵᤐᤠ ᤐᤥᤱᤗᤥ. ᤁᤖ ᤀᤍᤱᤅᤡᤸᤗᤧ ᤁᤢᤔᤡᤰᤁᤧᤴ ᤕᤥ᤹ᤒᤠ᤺ᤸᤗᤧ ᤁᤢᤏᤢᤵᤔᤥ ᤌᤧᤶᤒᤠ ᤋᤠᤰᤁᤴᤗᤥ॥

²⁵ ᤀᤍᤱ ᤕᤧᤶᤒᤡᤳᤇᤠᤛᤠ᤺ᤸᤗᤧ ᤁᤢᤶᤒᤠᤴ ᤏᤡᤱᤘᤠ᤹ ᤋᤢᤰᤔᤥ ᤌᤠᤛᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤃᤵᤔᤠ ᤁᤢᤶᤔᤠ ᤁᤢᤏᤡᤱᤘᤠ᤹ ᤋᤠ᤹ᤈᤧᤱᤗ ᤕᤠ᤺ᤴᤍᤢᤖᤥ॥

²⁶ ᤁᤢᤀᤠᤵᤋᤡᤰ ᤁᤧᤜᤥᤵᤐᤠ ᤔᤏᤠᤴ ᤛᤠᤶᤒᤠᤴ ᤁᤢ᤺ᤵᤔᤠ ᤏᤢᤒᤠ ᤔᤣ᤺ᤴᤗᤥ. ᤀᤡᤃᤪ ᤁᤢᤍᤥ᤺ᤵᤔᤠ ᤛᤢᤜᤠᤱᤕᤢᤰᤐᤠᤜᤠ᤹ ᤋᤧ᤺ᤶᤓᤢᤰ ᤕᤠᤰᤔᤠᤛᤡ ᤏᤢᤒᤠ ᤔᤣ᤺ᤴᤗᤥ॥

²⁷ ᤁᤢᤏᤧᤜᤡ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤛᤡᤱᤛᤡᤱᤅᤠᤱ ᤐᤠ᤺ᤴᤛᤢᤳᤗᤠᤜᤠ᤹ ᤐᤠ᤺ᤳᤋᤢᤖᤥ. ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠᤴ ᤁᤢᤛᤡᤰ ᤏᤧᤏᤧ ᤗ᤹ᤖᤥ॥

²⁸ ᤛᤫᤠ᤺ᤳ ᤁᤧᤕᤢᤱᤒᤠ ᤀᤍᤱᤅᤡᤴᤏᤠᤱ ᤛᤡᤰᤁᤢᤶᤛᤠᤒᤠ ᤔᤧᤗᤣ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤸᤛᤥ᤺ᤳᤋᤧᤴ ᤛᤧ᤺ᤵᤋᤢᤏᤧᤓᤃᤪ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤧᤔᤧᤳᤋᤢᤖᤥ॥