ᤂᤠᤜᤢᤴ 15 - LIFOTNT1 ᤛᤣ᤺ᤶᤛᤣ᤺ᤶᤒᤠ ᤏᤢᤃᤵᤐᤡᤸᤗᤧ ᤛᤡᤰᤂᤧᤱᤔᤠᤴ ᤆᤡ᤺ᤰᤋᤢᤖ ᤕᤠ᤺ᤴᤍᤢᤖᤥ. ᤁᤖ ᤁᤧᤀᤠ᤺ᤶᤒᤠ ᤏᤢᤃᤵᤐᤡᤸᤗᤧ ᤛᤡᤰᤐᤥ᤺ᤰᤔᤠᤴ ᤑᤥᤛᤢᤖᤥ॥ 2 ᤛᤡᤰᤁᤢᤶᤏᤡᤒᤧᤸᤗᤧ ᤁᤢᤸᤛᤥ᤺ᤳᤋᤧᤸᤗᤧ ᤏᤧᤜᤡᤏᤡᤱᤘᤠᤴ ᤏᤢᤒᤠ ᤐᤠ᤺ᤳᤋᤢᤖᤥ. ᤁᤖ ᤀᤍᤱ ᤔᤏᤠ᤺ᤸᤗᤧ ᤁᤢᤀᤍᤱ ᤐᤠ᤺ᤴᤜᤠ᤹ᤀᤣ ᤑᤰᤛᤢᤗ᤺ᤳᤋᤢᤖᤥ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤴ ᤁᤧᤖᤧᤰ ᤐᤡᤛᤠᤱ ᤘᤠ᤹ᤖᤥ. ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤏᤧᤵᤔᤠᤱ ᤂᤢᤏᤧ᤹ ᤔᤡᤰᤆᤥ ᤔᤧᤳᤋᤢᤛᤡᤖᤥ॥ 4 ᤔᤏᤠ ᤁᤧᤘᤣ᤺ᤶᤒᤠ ᤗᤧᤛᤥ᤺ᤳᤋᤧᤱᤃ ᤜᤡᤱᤔᤴᤗᤧᤴ ᤛᤡᤱᤒᤢᤱᤗᤥ. ᤁᤖ ᤀᤡᤱᤗᤧᤰᤛᤫᤠ ᤗᤧᤛᤥ᤺ᤳᤋᤧᤸᤗᤧ ᤕᤠᤶᤛᤠᤶᤔᤡᤴ ᤂᤠ᤺ᤴᤍᤢᤖᤥ॥ 5 ᤀᤍᤱᤅᤡᤸᤗᤧ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤁᤢᤜᤧᤴᤌᤡᤶᤔᤡᤴ ᤏᤠ᤹ᤖᤢᤖᤥ. ᤑᤧ᤺ᤰᤔᤏᤠᤒᤠ ᤐᤠ᤺ᤴᤏᤡᤴ ᤁᤧᤄᤧᤶᤒᤧᤸᤗᤧ ᤂᤠᤛᤡᤱ ᤁᤧᤏᤡ᤺ᤵᤐᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ॥ 6 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤘᤧᤳᤋᤧᤛᤖᤧ ᤕᤠᤱᤛᤠᤁᤢᤴᤎᤣ ᤘᤠ᤹ᤖᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤌᤃᤢᤒᤠ ᤕᤠᤱᤛᤠ᤺ᤸᤗᤧ ᤋᤢᤰᤂᤣ ᤋᤠᤖᤢᤖᤥ॥ 7 ᤛᤡᤰᤁᤢᤶᤏᤡᤒᤧᤸᤗᤧ ᤁᤢᤶᤒᤪᤠᤘᤛᤣ᤺ᤸᤗᤧ ᤏᤧᤜᤡᤏᤡᤱᤘᤠ᤹ ᤑᤥᤛᤢᤖᤢᤖᤥ. ᤁᤖ ᤀᤍᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤧᤴ ᤜᤧᤰᤋᤱᤒᤠ ᤔᤧᤈᤥᤰᤏᤧᤸᤗᤥ॥ 8 ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤘᤕᤠᤃᤧᤴ ᤁᤢᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤛᤡᤰᤁᤧᤗᤧ᤺ᤱᤒᤠ ᤆᤥᤰᤗᤥ. ᤁᤖ ᤁᤢᤍᤥ᤺ᤵᤔᤠᤀᤠᤱ ᤁᤧᤘᤠ᤹ᤒᤠᤸᤗᤧ ᤁᤢᤒᤣ᤺ᤸᤗᤡ᤺ᤸᤗᤧ ᤂᤢᤏᤧ᤹ ᤛ᤺ᤳᤗᤥ॥ 9 ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤕᤠᤶᤃᤧᤛᤡᤱᤒᤠ ᤆᤥᤰᤗᤥ. ᤁᤖ ᤛᤠᤶᤕᤥᤏᤡᤔᤠᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥ 10 ᤀᤠᤵᤑᤣᤰ ᤁᤢᤗᤠᤶ ᤁᤧᤗᤧᤵᤐᤧᤸᤗᤧ ᤁᤧᤛᤠᤰᤐᤠ ᤜᤧᤴᤌᤡᤶ ᤋᤢᤔᤢᤖᤥ. ᤑᤧ᤺ᤰᤔᤏᤠᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤸᤗᤧ ᤆᤡ᤺ᤳᤋᤢ᤹ ᤂᤧᤴ ᤛᤡᤔᤠ ᤐᤥᤱᤗᤥ॥ 11 ᤛᤡᤔᤧᤴ ᤏᤢ ᤔᤧᤰᤔᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤢᤖᤡᤰ ᤏᤡᤎᤠ᤺ᤵᤗᤥ. ᤔᤏᤠ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤇᤧᤴᤏᤠ ᤛᤠ᤹ᤖᤡᤰ ᤏᤢᤖᤡᤰ ᤏᤡᤔᤧᤎᤠ᤺ᤵᤏᤧᤶᤒᤡ᥅ 12 ᤁᤢᤏᤠᤔᤧᤴᤇᤠ᤹ ᤁᤧᤈᤥ᤺ᤰᤐᤧᤸᤗᤧ ᤋᤥ᤺ᤶᤔᤠ ᤐᤠ᤺ᤴᤏᤡᤴ ᤁᤢᤛᤡᤖᤠ᤹ ᤔᤧᤎᤠᤱᤏᤧᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤴ ᤛᤡᤰᤁᤢᤶᤏᤡᤒᤧᤴᤗᤠᤶ ᤗᤠ᤺ᤳᤗᤠ᤺ᤳ ᤘᤠ᤹ᤖᤥ॥ 13 ᤁᤧᤛ᤺ᤵᤐᤠ ᤛᤡᤰᤗᤢᤱᤔᤧᤸᤗᤧ ᤏᤠᤖᤠᤴ ᤁᤧᤀᤥ᤺ᤵᤐᤠ ᤆᤥᤃᤢᤖᤥ. ᤁᤖ ᤛᤡᤰᤗᤢᤱᤔᤥᤒᤠ ᤋᤢᤰᤂᤣ᤺ᤸᤗᤧ ᤕᤠᤶᤛᤠᤶᤔᤡᤴ ᤂᤠ᤺ᤴᤍᤢᤖᤥ॥ 14 ᤂᤠᤛᤡᤱᤃᤧᤏᤡ᤺ᤵᤐᤠ ᤛᤡᤰᤗᤢᤱᤔᤧᤸᤗᤧ ᤏᤧᤜᤡᤏᤡᤱᤘᤠ᤹ ᤁᤥ᤺ᤳᤋᤢᤖᤥ. ᤁᤖ ᤀᤍᤱᤅᤡᤸᤗᤧ ᤁᤢᤶᤒᤪᤠ᤺ᤸᤗᤧ ᤀᤍᤱ ᤐᤠ᤺ᤴᤏᤡᤴᤏᤧ ᤁᤢᤛᤡᤖᤠ᤹ᤌᤠᤱᤗᤥ॥ 15 ᤋᤢᤰᤂᤣ ᤆᤠ᤺ᤵᤔᤠ ᤕᤢ᤺ᤵᤔᤠᤀᤥ ᤁᤧᤎᤠᤒᤠᤜᤠ᤹ᤖᤧᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤒᤠ ᤂᤢᤴᤇᤡ᤹ ᤜᤡᤱᤔᤧᤴ ᤌᤡᤰᤕᤠ᤺ᤴᤎᤰ ᤋᤢᤰᤂᤣᤘᤠ ᤐᤥᤱᤗᤥ. ᤁᤖ ᤁᤧᤛ᤺ᤵᤐᤠ ᤛᤡᤰᤗᤢᤱᤔᤧᤴ ᤀᤠᤓᤧᤸᤗᤧᤛᤠᤱ ᤏᤢ᤹ᤍᤠᤖᤥ॥ 16 ᤜᤕᤱᤁᤡᤸᤗᤡᤱ ᤀᤡᤛᤣ᤺ᤱ ᤘᤧᤳᤋᤧᤛᤖᤧ ᤕᤠᤱᤛᤠᤁᤢᤴᤎᤣ ᤁᤵᤔᤠᤏᤢ᤺ᤸᤗᤧᤃ ᤆᤒᤧ᤺ᤳᤇᤡᤰ ᤁᤧᤃᤵᤐᤠ ᤐᤥᤱᤔᤠᤀᤠᤱ ᤕᤜᤘᤣ ᤍᤠᤱᤒᤧᤴ ᤁᤡᤵᤔᤠ ᤏᤢᤒᤠᤖᤥ॥ 17 ᤐᤈᤡ᤺ᤳ ᤆᤡ᤺ᤳᤇᤡᤱᤔᤠᤍᤧᤴᤏᤥ ᤁᤧᤛᤥᤒᤠ ᤛᤠ ᤆᤠᤔᤠᤏᤢ᤺ᤸᤗᤧᤃ ᤗᤢᤱᤔᤠ᤹ ᤋᤢᤰᤛᤡᤱᤔᤠᤍᤧᤴᤏᤥ ᤏᤢᤎᤡᤛᤠᤰᤆᤡᤖᤰ ᤆᤠᤔᤠ ᤏᤢᤒᤠᤖᤥ॥ 18 ᤜᤠᤖᤠ ᤁᤢᤛᤡᤰ ᤁᤧᤒᤥ᤺ᤰᤐᤠ ᤔᤏᤠ᤺ᤸᤗᤧ ᤂᤧᤔᤠ᤹ ᤑᤥ᤺ᤰᤂᤢᤖᤥ. ᤁᤖ ᤏᤠᤛᤡᤃᤧᤎ᤺ᤵᤐᤠ ᤔᤏᤠ᤺ᤸᤗᤧ ᤂᤧᤈᤧᤰᤁᤡᤴ ᤆᤡᤈᤡ ᤕᤧᤶᤕᤧᤶ ᤆᤥᤃᤢᤖᤥ॥ 19 ᤗᤧᤶᤛᤢᤘᤠᤒᤧᤸᤗᤧ ᤁᤢᤗᤠᤶᤔᤡᤴ ᤋᤡᤱᤅᤡᤸᤗᤧ ᤌᤣ᤺ᤰᤋᤢᤒᤠ ᤆᤥᤰᤗᤥ. ᤁᤖ ᤁᤢᤍᤥ᤺ᤵᤔᤠ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤱᤃ ᤔᤠᤖᤠᤶᤗᤥ॥ 20 ᤛᤡᤰᤁᤢᤶᤛᤠᤒᤠ ᤛᤠ᤺ᤸᤗᤧ ᤁᤢᤶᤒᤠ ᤁᤢᤏᤡᤱᤘᤠ᤹ ᤋᤠᤛᤢᤖᤥ. ᤁᤖ ᤀᤍᤱ ᤛᤠ᤺ᤸᤗᤧ ᤁᤢᤶᤔᤠ ᤋᤢᤰᤂᤣ ᤆᤠ᤺ᤳᤋᤢᤖᤥ॥ 21 ᤁᤢᤏᤧᤜᤡ ᤁᤧᤜᤥᤵᤐᤠ ᤔᤏᤠᤴ ᤀᤍᤱ ᤐᤠ᤺ᤴᤏᤥ ᤁᤢᤏᤡᤱᤘᤠ᤹ ᤋᤠᤖᤥ. ᤁᤖ ᤀᤡ᤺ᤳᤇᤡᤱᤛᤠᤶ ᤁᤧᤃᤵᤐᤠ ᤔᤏᤠᤴ ᤁᤢᤍᤥ᤺ᤵᤔᤠ ᤐᤠ᤺ᤴᤏᤥ ᤁᤢᤍᤥ᤺ᤵᤔᤠ ᤗᤠᤶᤔᤥ ᤐᤥᤖᤥ॥ 22 ᤛᤢᤈᤠ ᤜᤥ᤺ᤵᤔᤠᤖᤧ ᤆᤥᤃᤢᤸᤗᤧ ᤏᤡᤱᤛᤣ᤺ᤰᤜᤠ᤹ ᤁᤢᤗᤡᤱᤍᤥ ᤔᤧᤃᤧᤳᤏᤧᤴᤗᤥ. ᤁᤖ ᤕᤖᤡᤰ ᤛᤢᤈᤠᤍᤠᤱᤒᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ ᤁᤢᤗᤡᤱᤍᤥ ᤁᤧᤳᤗᤥ॥ 23 ᤁᤧᤗᤠ᤹ᤒᤠ ᤐᤠᤴ ᤏᤢ᤺ᤰᤔᤠ ᤂᤥᤛᤢᤸᤗᤧ ᤔᤏᤠᤴ ᤁᤢᤏᤡᤱᤘᤠ᤹ ᤋᤠᤖᤥ. ᤜᤧᤰᤁᤩᤠᤱ ᤁᤧᤕᤠᤱᤒᤠ ᤕᤧᤶᤔᤥ ᤐᤠ᤺ᤵᤔᤏᤠᤒᤠᤴ ᤛᤠ᤹ᤖᤡᤰ ᤏᤢᤒᤠ ᤆᤥᤰᤗᤥ᥄ 24 ᤜᤡᤱᤔᤴᤏᤥᤒᤠ ᤗᤠᤶᤔᤡᤸᤗᤧ ᤂᤠᤛᤡᤱᤃᤧᤏᤡ᤺ᤵᤐᤧᤴ ᤌᤥ ᤗᤧᤵᤔᤠᤱ ᤗᤠᤶᤗᤥᤛᤢᤖᤥ. ᤂᤧᤸᤗᤧ ᤂᤢᤏᤧ᤹ ᤂᤧᤔᤠ᤹ᤕᤱᤛᤱ ᤗᤧᤵᤔᤠᤱ ᤐᤣ᤺ᤰᤔᤠᤗᤠᤶ ᤛᤧ᤺ᤵᤋᤢᤖᤥ॥ 25 ᤀᤠᤱᤍᤡᤱ ᤁᤧᤗ᤹ᤒᤧᤸᤗᤧ ᤁᤢᤜᤡᤶᤔᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤗᤢ᤺ᤴᤍᤢ ᤐᤡᤖᤢᤖᤥ. ᤁᤖ ᤔᤣᤔᤣᤍᤢᤔᤠᤸᤗᤧ ᤁᤢᤀᤡ᤺ᤴᤍᤥᤴ ᤂᤢᤏᤧ᤹ ᤔᤧᤴᤈᤳᤋᤣ ᤏᤧᤛ᤻ᤛᤢ ᤐᤡᤖᤢᤖᤥ॥ 26 ᤕᤜᤘᤣ ᤍᤠᤱᤒᤧᤸᤗᤧ ᤁᤢ᤹ᤀᤡᤃᤧᤓᤧᤶᤒᤠᤸᤗᤧ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤛᤡᤰᤗᤧ᤺ᤱᤗᤥ. ᤁᤖ ᤛᤢᤳᤌᤥᤒᤠ ᤔᤏᤠ᤺ᤸᤗᤧ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤀᤥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤖᤥ॥ 27 ᤁᤧᤄᤡ᤺ᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤛᤕᤱᤅᤥ ᤋᤢᤰᤂᤣ ᤗᤠᤰᤂᤣ ᤋᤠᤖᤢᤖᤥ. ᤁᤖ ᤀᤠᤳᤋᤡᤸᤗᤧ ᤛᤢᤖᤢᤋᤩᤠᤱᤅᤡᤴ ᤆᤡ᤺ᤳᤋᤢ᤹ ᤂᤧᤴ ᤜᤡᤱᤗᤥ॥ 28 ᤛᤠᤶᤕᤥᤏᤡᤒᤧᤸᤗᤧ ᤁᤢᤛᤡᤰᤗᤢᤱᤔᤧᤸᤗᤧ ᤏᤢᤃᤵ ᤐᤠ᤺ᤴᤜᤠ᤹ ᤛᤠ᤹ᤖᤢᤖᤥ. ᤁᤖ ᤋᤠᤰᤁᤧᤓᤧ᤹ᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤑᤰᤛᤢᤗ᤺ᤳᤋᤢᤖᤥ॥ 29 ᤕᤜᤘᤣ ᤍᤠᤱᤒᤧᤴ ᤁᤢ᤹ᤀᤡᤃᤧᤓᤧᤶᤒᤧᤴ ᤗᤠᤶᤒᤠ ᤗᤠ᤺ᤳᤗᤠ᤺ᤳ ᤘᤠ᤹ᤖᤥ. ᤁᤖ ᤂᤢᤏᤧ᤹ ᤛᤠᤶᤕᤥᤏᤡᤒᤧᤸᤗᤧ ᤁᤢᤒᤣᤗᤡᤴ ᤂᤧᤵᤛᤢᤖᤥ॥ 30 ᤔᤢᤛᤢᤶ ᤁᤧᤀᤣ᤺ᤵᤐᤠ ᤏᤠᤖᤠ᤺ᤸᤗᤧ ᤛᤡᤰᤗᤢᤱᤔᤧᤴ ᤛ᤺ᤳᤗ ᤕᤠ᤺ᤴᤍᤢᤖᤥ. ᤜᤧᤰᤁᤩᤠᤱ ᤛᤢᤏᤠᤀᤡᤱᤅᤡᤸᤗᤧ ᤕᤧᤵᤐᤠᤜᤠ᤹ ᤁᤧᤎᤢᤶᤒᤠ ᤆᤥᤃᤢᤖᤥ॥ 31 ᤀᤠᤳᤋᤡᤸᤗᤧ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤏᤥ ᤑᤧ᤺ᤰᤔᤏᤠᤒᤧᤴ ᤂᤧᤵᤛᤢ᤹. ᤂᤧᤸᤗᤧ ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤋᤱᤈᤢᤶ ᤂᤥᤛᤢᤖᤥ॥ 32 ᤑᤧ᤺ᤰᤔᤏᤠᤒᤠ ᤐᤠ᤺ᤴᤏᤡᤴ ᤁᤧᤈᤡ᤺ᤵᤐᤧᤸᤗᤧ ᤀᤠᤵᤑᤣᤰ ᤆᤡ᤺ᤳᤇᤡᤱᤗᤥ. ᤁᤖ ᤋᤥ᤺ᤶᤔᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤁᤧᤒᤡᤒᤧᤸᤗᤧ ᤀᤡ᤺ᤳᤇᤡᤱᤛᤠᤶ ᤂᤥᤛᤢᤖᤥ॥ 33 ᤕᤜᤘᤣ ᤍᤠᤱᤒᤧᤴ ᤁᤢᤃᤡᤵᤔᤧᤸᤗᤧᤀᤣ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤀᤠᤜᤢ᤹ᤖᤢᤖᤥ. ᤀᤡᤱᤎᤠᤱ ᤂᤥᤔᤠᤏᤢ᤺ᤸᤗᤧ ᤋᤃᤡ ᤏ᤺ᤶᤏ᤺ᤶ ᤗ᤹ᤔᤧᤴ ᤋᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.