ᤂᤠᤜᤢᤴ 14 - LIFOTNT1 ᤛᤡᤰᤁᤢᤶᤛᤠᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤜᤡᤶᤔᤡᤴ ᤆᤥᤃᤢᤖᤥ ᤁᤖ ᤁᤢᤏᤧᤜᤡ ᤁᤧᤜᤥ᤺ᤵᤔᤠ ᤔᤧᤴᤇᤢᤔᤠ᤺ᤸᤗᤧ ᤂᤧᤴ ᤀᤠᤒᤠᤅᤣ ᤁᤢᤜᤢᤰᤁᤡᤸᤗᤧ ᤕᤛ᤻ᤛᤢᤖᤥ॥ 2 ᤁᤢᤍᤥ᤺ᤵᤔᤠ ᤗᤠᤱᤃᤧᤄᤣ᤺ᤰᤐᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤁᤡᤖᤢᤖᤥ. ᤁᤖ ᤀᤡᤱᤗᤧᤰᤐᤠ ᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤧᤸᤗᤧ ᤂᤢᤏᤧ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ॥ 3 ᤀᤍᤱ ᤔᤏᤠ᤺ᤸᤗᤧ ᤁᤢᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴᤏᤡᤸᤗᤧ ᤀᤠᤵᤑᤣᤰ ᤂᤢᤏᤧ᤹ᤀᤥ ᤋᤰᤁᤠ᤺ᤳᤋᤡᤴ ᤌᤠᤖ ᤕᤠ᤺ᤴᤍᤢᤖᤥ. ᤁᤖ ᤛᤡᤰᤁᤢᤶᤛᤠᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤸᤗᤧ ᤂᤧᤴ ᤋᤠᤱᤛᤧ᤺ᤵᤋᤢᤖᤥ॥ 4 ᤁᤢᤶᤒᤠᤒᤠ ᤐᤡᤳᤜᤠ᤹ ᤁᤧᤜᤥᤵᤐᤠᤍᤧᤴᤏᤥ ᤆᤠᤎᤠ᤺ᤱᤜᤠ᤹ ᤁᤢᤄᤠᤗᤧᤶ ᤐᤥᤱᤗᤥ. ᤁᤖ ᤐᤡᤳᤜᤠ᤹ᤖᤧ ᤂᤢᤴᤇᤡ᤹ ᤌᤢᤶᤔᤧᤸᤗᤧ ᤛᤡᤍᤳ ᤐᤥᤃᤢᤃᤧᤴ ᤁᤢᤈᤠ ᤔᤧᤛᤢᤵᤛᤢᤖᤥ॥ 5 ᤛᤧᤰᤂᤠᤒᤠ ᤋᤥ᤺ᤴᤍᤡ ᤁᤧᤒᤡᤒᤧᤸᤗᤧ ᤀᤡᤱᤗᤧᤰ ᤔᤧᤈᤥᤃᤢᤴᤗᤥ. ᤁᤖ ᤀᤡᤱᤗᤧᤰᤐᤠ ᤋᤥ᤺ᤴᤍᤡᤸᤗᤧ ᤀᤡᤱᤗᤧᤰᤁᤣ ᤐᤠ᤺ᤴᤜᤠ᤹ ᤛ᤺ᤴᤍᤢᤖᤥ॥ 6 ᤁᤢᤏᤠᤔᤧᤴᤇᤠ᤹ ᤕᤠᤵᤔᤡ ᤁᤧᤔᤧᤵᤐᤠ ᤔᤏᤠ᤺ᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤁᤥ᤺ᤳᤋᤢ᤹ ᤁᤖ ᤌᤣᤀᤠᤱ ᤔᤧᤄᤥᤛᤢᤴᤗᤥ. ᤁᤖ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠ᤺ᤸᤗᤧ ᤏᤧᤜᤡᤏᤡᤱᤘᤠ᤹ ᤀᤢᤛᤢᤖᤢ ᤂᤥᤛᤢᤖᤥ॥ 7 ᤀᤍᤱ ᤔᤏᤠ᤺ᤴᤏᤢ ᤔᤠ᤺ᤱᤄᤠᤀᤣ ᤘᤕᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤶᤒᤪᤠᤀᤥ ᤏᤧᤜᤡᤏᤡᤱᤘᤠ᤹ ᤂᤥᤔᤧᤍᤧᤳᤏᤧᤴᤗᤥ॥ 8 ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠ᤺ᤸᤗᤧ ᤁᤢᤛᤡᤰᤁᤢᤶᤏᤡᤱᤘᤠ᤹ᤸᤗᤧ ᤂᤧᤴ ᤁᤢᤍᤥ᤺ᤵᤔᤠ ᤗᤠᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤖᤥ. ᤁᤖ ᤀᤍᤱᤜᤠ᤹ᤖᤧ ᤂᤢᤴᤇᤡ᤹ ᤀᤍᤱ ᤐᤠ᤺ᤴᤏᤧᤱᤃ ᤀᤡᤱᤗᤧᤰᤗᤥ॥ 9 ᤗᤠᤕᤥᤗᤠᤶ ᤜᤡᤶᤔᤠ ᤐᤠ᤺ᤴᤏᤥ ᤀᤍᤱᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤒᤠ᤺ᤳᤋᤢᤖᤥ. ᤁᤖ ᤁᤢᤍᤥ᤺ᤵᤔᤠ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤢᤒᤠ ᤏᤡᤱᤘᤠ᤹ ᤂᤥᤍᤧᤳᤗᤥ॥ 10 ᤏᤡᤱᤘᤠ᤹ᤀᤥᤒᤠ ᤁᤢᤈᤠᤃᤧᤓᤧᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤺ᤸᤗᤧᤀᤣ ᤏᤡᤛᤢᤖᤥ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤛ᤺ᤵᤔᤧᤴ ᤜᤠ᤺ᤳᤗᤧᤀᤠᤱ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤸᤗᤥ॥ 11 ᤁᤢᤀᤡᤃᤧᤓᤧᤶᤒᤧᤸᤗᤧ ᤁᤢᤜᤡᤶᤔᤡᤴ ᤔᤧᤗᤢ᤺ᤴᤍᤢ ᤔᤧᤒᤡᤖᤢᤖᤥ. ᤁᤖ ᤁᤢᤍᤥ᤺ᤵᤔᤧᤸᤗᤧ ᤁᤢᤈᤡᤶᤜᤡᤶᤔᤥ ᤏᤢ᤹ᤔᤠᤍᤠᤔᤠ ᤐᤥᤱᤗᤥ॥ 12 ᤁᤢᤓᤠ ᤗᤠᤶᤔᤡᤴ ᤔᤏᤠ᤺ᤸᤗᤧ ᤁᤢᤏᤡᤔᤥ ᤁᤢᤍᤥ᤺ᤵᤔᤠ ᤏᤡᤍᤧᤳᤐᤡᤗᤠ. ᤁᤖ ᤂᤧᤸᤗᤧ ᤏᤡᤴᤎᤠᤛᤣ᤺ᤰᤀᤥ ᤛᤡᤔᤠᤀᤥ ᤀᤠᤃᤧᤳᤗᤥ॥ 13 ᤔᤢᤖᤠᤀᤥ ᤀᤣ᤺ᤵᤔᤠ ᤕᤢᤛᤠᤱ ᤛᤡᤰᤗᤢᤱᤔᤥ ᤜᤠ᤺ᤵᤔᤠ ᤕᤢᤔᤠ ᤛᤢᤰᤗᤥ. ᤜᤧᤰᤁᤩᤠᤱ ᤛ᤺ᤵᤔᤧᤸᤗᤧ ᤁᤢᤏᤢᤵᤔᤧᤱᤃ ᤔᤧᤖᤡᤱᤅᤥ ᤐᤥᤱᤔᤠ ᤛᤢᤰᤗᤥ॥ 14 ᤋᤠᤵᤁᤧᤒᤧ᤹ᤒᤠ ᤁᤧᤒᤣ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤁᤡᤸᤗᤧ ᤁᤢᤗᤧᤰᤘᤠ ᤔᤧᤍᤢᤔᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤏᤢᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤰᤁᤡᤸᤗᤧ ᤜᤠᤱᤛᤧᤶᤔᤡᤴ ᤔᤧᤒᤡᤖᤢᤖᤥ॥ 15 ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤧᤸᤗᤧ ᤌᤣ ᤐᤠ᤺ᤴᤏᤡᤴᤇᤠᤱ ᤏᤛᤠᤴ ᤆᤥᤃᤢ᤹ᤖᤥ. ᤁᤖ ᤁᤢᤏᤧᤜᤡ ᤁᤧᤍᤢᤶᤒᤠ ᤔᤏᤠ᤺ᤸᤗᤧ ᤕᤧᤰᤕᤧᤰᤁᤠᤱ ᤗᤠᤱᤃᤠᤱ ᤆᤳᤋᤢᤖᤥ॥ 16 ᤛᤡᤰᤁᤢᤶᤛᤠᤒᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤁᤡᤖᤢᤖᤥ. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤔᤠ᤺ᤱᤄᤠ ᤘᤠ᤹ᤖᤥ. ᤁᤖ ᤀᤍᤱᤅᤡᤱᤃ ᤁᤢᤛᤡᤰ ᤁᤧᤈᤶᤒᤠ ᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤔᤧᤸᤗ᤹ᤀᤣ ᤜᤠᤖᤠᤘᤖᤠᤒᤠ ᤆᤥᤰᤗᤥ॥ 17 ᤁᤢᤛᤡᤰ ᤁᤧᤈᤶᤒᤠ ᤔᤏᤠ᤺ᤸᤗᤧ ᤀᤍᤱ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ. ᤜᤧᤰᤁᤩᤠᤱ ᤀᤡᤛᤫᤠᤒᤠ ᤔᤏᤠᤴ ᤕᤠᤶᤃᤧᤛᤡᤱᤒᤠ ᤆᤥᤰᤗᤥ॥ 18 ᤁᤢᤏᤧᤜᤡ ᤔᤧᤴᤍᤢᤶᤏᤠᤒᤠ ᤔᤏᤠ᤺ᤸᤗᤧ ᤀᤍᤱ ᤐᤠ᤺ᤴᤗᤰ ᤂᤥᤛᤢᤖᤥ. ᤁᤖ ᤂᤠᤛᤡᤱᤃᤧᤏᤡ᤺ᤵᤐᤧᤸᤗᤧ ᤏᤧᤜᤡᤏᤡᤱᤘᤠ᤹ᤖᤧ ᤋᤡᤆ᤺ᤴ ᤂᤥᤛᤢᤖᤥ॥ 19 ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤏᤢᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤍᤃᤠᤱ ᤀ᤺ᤰᤂᤢᤶ ᤐᤵᤔᤠ ᤐᤥᤱᤗᤥ॥ 20 ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤠᤜᤠ᤹ᤖᤧᤀᤣ ᤕᤠᤱᤃᤧᤛᤠ᤹ᤒᤠᤜᤠ᤹ ᤔᤧᤏᤠ᤹ᤖᤢᤛᤡᤖᤥ. ᤁᤖ ᤁᤧᤃᤵᤐᤠ ᤁᤧᤈᤠᤒᤠᤜᤠ᤹ᤖᤧᤃ ᤕᤖᤡᤰ ᤋᤣ᤺ᤱᤈᤢᤶ ᤔᤧᤃᤳᤋᤢᤛᤡᤖᤥ॥ 21 ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤠᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤧᤸᤗᤧ ᤗᤠᤕᤥ ᤆᤥᤃᤢᤖᤥ. ᤁᤖ ᤁᤢᤎᤣᤀᤠᤱ ᤁᤧᤜᤥᤵᤐᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤔᤏᤠᤴ ᤔᤢ᤹ᤀᤡᤛᤠᤒᤠᤖᤥ॥ 22 ᤌᤣ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤀᤡ᤺ᤵᤐᤠᤜᤠ᤹ ᤋᤠᤵᤔᤧᤶᤒᤧ᤹ᤏᤧᤶᤒᤡ᥅ ᤁᤖ ᤏᤢᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ᤖᤧ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡᤴ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤆᤥ᤺ᤰᤔᤠᤴ ᤔᤧᤄᤥᤛᤢᤖᤥ॥ 23 ᤁᤧᤖᤧᤰ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤡᤸᤗᤧ ᤀᤡᤴᤎᤠ ᤐᤥᤱᤗᤥ. ᤁᤖ ᤐᤠ᤺ᤴᤗᤰ ᤁᤧᤒᤠ᤺ᤵᤐᤧᤱᤃ ᤕᤠᤱᤃᤧᤛᤠ᤹ᤔᤥ ᤌᤠᤖᤥ॥ 24 ᤛᤡᤰᤁᤢᤶᤏᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤴ ᤂᤢᤴᤇᤡ᤹ ᤋᤡᤆᤖᤥ. ᤁᤖ ᤀᤍᤱᤜᤠ᤹ᤖᤧ ᤂᤢᤴᤇᤡ᤹ ᤂᤠᤍᤠ᤺ᤰᤐᤠ ᤐᤠ᤺ᤴᤏᤡᤸᤗᤧ ᤀᤍᤱᤅᤣ ᤐᤥᤱᤗᤥ॥ 25 ᤛᤧᤰᤂᤠᤒᤠ ᤋᤥ᤺ᤴᤍᤡ ᤐᤠ᤺ᤴᤏᤡᤸᤗᤧ ᤜᤡᤱᤔᤧᤴ ᤋᤠᤱᤛᤧ᤺ᤵᤋᤢᤖᤥ. ᤁᤖ ᤀᤡᤱᤗᤧᤰᤐᤠ ᤋᤥ᤺ᤴᤍᤡᤸᤗᤧ ᤀᤡᤱᤗᤧᤰ ᤐᤠ᤺ᤴᤜᤠ᤹ ᤋᤥ᤺ᤴᤍᤢᤖᤥ॥ 26 ᤀᤠᤳᤋᤡᤸᤗᤧ ᤕᤜᤘᤣ ᤍᤠᤱᤒᤧᤴ ᤁᤡᤖᤢ᤹. ᤂᤧᤸᤗᤧ ᤁᤢᤕᤰᤁᤡᤴ ᤋᤠᤵᤌᤣᤰ ᤕᤠᤶᤎᤣᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤁᤢᤀᤣᤜᤠ᤹ᤖᤧ ᤗᤠᤃᤡ ᤁᤴ ᤗᤳᤇᤠ ᤋᤠᤱᤛᤧ᤺ᤵᤛᤡᤱᤔᤠᤍᤧᤴ ᤐᤥᤱᤗᤥ॥ 27 ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤠᤃ ᤜᤡᤱᤔᤧᤸᤗᤧ ᤁᤢᤒᤢᤴᤗᤥ. ᤂᤧᤴ ᤗᤠᤶᤒᤠ ᤔᤏᤠᤴ ᤛᤡᤔᤧᤸᤗᤧ ᤆᤧᤴᤜᤠ᤹ᤀᤥᤗᤠᤶ ᤐᤡᤴᤗᤥ॥ 28 ᤕᤖᤡᤰ ᤕᤥᤓᤥ᤹ᤒᤠ ᤂᤠᤏᤡ᤺ᤳᤋᤡᤸᤗᤧ ᤜᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤥ. ᤕᤥᤓᤥ᤹ᤒᤠ ᤔᤣ᤺ᤴᤏᤣᤒᤠ ᤕᤢᤰᤛᤠᤒᤧᤴ ᤌᤣᤀᤠᤱ ᤔᤣ᤺ᤴᤗᤥ॥ 29 ᤏᤠᤛᤡ ᤁᤧᤎ᤺ᤵᤐᤠ ᤔᤏᤠ᤺ᤸᤗᤧ ᤁᤢᤀᤡᤳᤇᤡᤱ ᤛᤠᤶᤔᤡᤴ ᤕᤶᤒᤠ ᤆᤥᤰᤗᤥ. ᤁᤖ ᤁᤢᤛᤡᤰ ᤁᤧᤈᤶᤒᤠ ᤔᤏᤠ᤺ᤸᤗᤧ ᤁᤢᤀᤍᤱ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ॥ 30 ᤆᤡᤈᤡ ᤕᤧᤶᤕᤧᤶᤒᤠ ᤛᤡᤰᤗᤢᤱᤔᤧᤸᤗᤧ ᤌᤰᤁᤡᤴ ᤜᤡᤱᤔᤴ ᤐᤡᤖᤢᤖᤥ. ᤁᤖ ᤏᤠᤜᤧᤴ ᤔᤡᤰᤛᤥ᤺ᤸᤗᤧ ᤕᤧᤵᤐᤠ ᤗᤢᤱᤛᤡᤜᤠ᤹ ᤕ᤺ᤳᤇᤢᤖᤥ॥ 31 ᤕᤠᤱᤃᤧᤛᤠ᤹ᤒᤠᤴ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤧᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤒᤠ ᤀᤥᤛᤣ᤺ᤴᤎᤠᤱ ᤐᤥᤱᤗᤥ. ᤁᤖ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤴ ᤗᤢᤱᤔᤠ᤹ ᤁᤧᤍᤢᤰᤐᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤒᤠ ᤐᤥᤱᤗᤥ॥ 32 ᤋᤢᤰᤂᤣ ᤗᤠᤰᤂᤣ ᤐᤥᤱᤍᤠ᤺ᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤔᤧᤰᤗᤥ. ᤁᤖ ᤛᤠᤶᤕᤥᤏᤡᤒᤧᤸᤗᤧᤃ ᤛᤡᤔᤠᤀᤥᤀᤠᤱ ᤀᤡ᤺ᤶᤛᤡᤱᤔᤠᤍᤧᤴ ᤂᤥᤛᤢᤖᤥ॥ 33 ᤛᤡᤱᤛᤡᤱ ᤕᤧᤰᤕᤧᤰ ᤁᤧᤗ᤹ᤒᤧᤸᤗᤧ ᤁᤢᤛᤡᤰᤗᤢᤱᤔᤥ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤕᤠᤱᤎᤥᤰᤗᤥ. ᤁᤖ ᤀᤍᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤀᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱᤗᤥ॥ 34 ᤛᤠᤶᤕᤥᤒᤠ ᤐᤠ᤺ᤴᤏᤡᤸᤗᤧ ᤗᤠᤈᤣᤴ ᤌᤠ᤺ᤱ ᤑᤥ᤺ᤰᤂᤢᤖᤥ. ᤁᤖ ᤗᤠᤕᤥ ᤆᤥ᤺ᤰᤔᤠᤃ ᤀᤠᤳᤋᤡᤴ ᤔᤧᤴᤇᤠᤶ ᤛᤢᤘᤠᤱᤗᤧ ᤗᤠᤃᤡᤛᤠᤱ ᤆᤠ᤺ᤳᤌᤡ ᤐᤣ᤺ᤰᤔᤠ ᤐᤠ᤺ᤴᤗᤥ॥ 35 ᤜᤠᤱᤅᤡᤴ ᤛᤡᤰᤁᤢᤶᤛᤠᤒᤠ ᤛᤧᤘᤠᤖᤠᤒᤧᤴᤏᤢᤀᤣ ᤁᤢᤏᤡᤱᤘᤠ᤹ ᤋᤠᤖᤥ. ᤁᤖ ᤛᤡᤖᤡᤱᤔᤔᤠ ᤁᤧᤍᤠ᤺ᤵᤐᤠ ᤛᤧᤘᤠᤖᤥᤒᤧᤸᤗᤧ ᤂᤢᤏᤧ᤹ ᤁᤢᤛᤡᤰᤁᤧᤴ ᤑᤥ᤺ᤰᤂᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.