ᤂᤠᤜᤢᤴ 13 - LIFOTNT1 ᤛᤡᤰᤁᤢᤶᤛᤠᤒᤠ ᤛᤠ᤺ᤸᤗᤧ ᤁᤢᤶᤒᤠᤖᤧ ᤂᤠᤜᤢᤴ ᤐᤡᤖᤢᤒᤠᤴ ᤂᤧᤵᤛᤢᤖᤥ. ᤁᤢᤏᤠᤔᤧᤴᤇᤠ᤹ ᤁᤧᤈᤥ᤺ᤰᤐᤧᤸᤗᤧ ᤑᤧ᤺ᤰᤔᤏᤠᤒᤧᤴ ᤔᤧᤄᤧᤵᤛᤢᤴᤗᤥ॥ 2 ᤔᤏᤠ᤺ᤸᤗᤧ ᤁᤢᤶᤒᤪᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤗᤠᤶᤒᤠᤀᤣ ᤂᤢᤏᤧ᤹ ᤏᤢᤒᤠ ᤐᤠ᤺ᤴᤜᤠ᤹ᤖᤧᤴ ᤜᤠᤱᤛᤧᤶ ᤂᤥᤛᤢᤖᤥ. ᤁᤖ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠ ᤔᤏᤠ᤺ᤸᤗᤧ ᤜᤡᤵᤛᤡᤱᤔᤠ ᤌᤰᤛᤡᤱᤔᤠ ᤕᤠ᤺ᤶᤒᤰᤁᤡᤴ ᤂᤢᤏᤧ᤹ ᤁᤢᤛᤡᤖᤠ᤹ᤌᤠᤱᤗᤥ॥ 3 ᤁᤢᤶᤒᤪᤠᤴ ᤛᤡᤱᤛᤡᤱ ᤕᤧᤰᤕᤧᤰ ᤁᤧᤃᤵᤐᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤜᤡᤱᤔᤴᤏᤡᤴ ᤋᤠᤵᤌᤣᤰ ᤕᤠᤶᤎᤣᤰᤁᤥ ᤁᤳᤋᤢᤖᤥ. ᤁᤖ ᤛᤡᤱᤛᤡᤱ ᤕᤧᤰᤕᤧᤰ ᤔᤧᤸᤗ᤹ᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤔᤧᤰᤔᤠ ᤋᤠᤖᤢᤖᤥ॥ 4 ᤗᤧᤶᤛᤢᤘᤠᤒᤧᤸᤗᤧ ᤁᤢᤓᤠ ᤐᤠ᤺ᤴᤜᤠ᤹ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤌᤣᤀᤠᤱ ᤔᤧᤄᤥᤛᤢᤴᤗᤥ. ᤁᤖ ᤕᤠ᤺ᤶᤒᤢᤍᤡᤰᤐᤧᤸᤗᤧ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤘᤧᤳᤋᤧᤛᤖᤧ ᤂᤥᤛᤢᤖᤥ॥ 5 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤀᤡᤱᤗᤧᤰ ᤐᤠ᤺ᤴᤏᤡᤴ ᤆᤡ᤺ᤳᤋᤢᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤸᤗᤧ ᤛᤡᤖᤡᤱᤔᤔᤠ ᤏᤢ ᤆᤠ᤺ᤳᤌᤡ ᤐᤣ᤺ᤰᤔᤠ ᤋᤠᤖᤢᤖᤥ॥ 6 ᤛᤠᤶᤕᤥᤒᤠ ᤐᤠ᤺ᤴᤏᤡᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠᤴ ᤋᤠᤱᤛᤧ᤺ᤵᤋᤢᤖᤥ. ᤁᤖ ᤁᤢ᤹ᤀᤡᤓᤧᤶᤔᤠᤸᤗᤧ ᤗᤠᤕᤥᤒᤧᤴ ᤌᤩ᤺ᤱ ᤔᤧᤰᤂᤢᤖᤥ॥ 7 ᤁᤢᤓᤠ ᤔᤏᤠᤴ ᤁᤧᤃᤵᤐᤠ ᤁᤧᤈᤠᤒᤠ ᤗᤧᤱᤛᤡᤱᤗᤥ. ᤜᤧᤰᤁᤣᤛᤠᤱ ᤂᤧᤸᤗᤧ ᤌᤣᤎᤡᤰᤁᤠᤱ ᤔᤧᤃᤳᤋᤢᤴᤗᤥ. ᤁᤢᤓᤠ ᤔᤏᤠᤴ ᤕᤠᤱᤃᤧᤛᤠ᤹ᤒᤠ ᤗᤧᤱᤛᤡᤱᤗᤥ. ᤁᤖᤛᤠᤱ ᤂᤧᤸᤗᤧ ᤘᤧᤳᤋᤧᤛᤖᤧ ᤕᤠᤱᤛᤠᤁᤢᤴᤎᤣ ᤁᤳᤋᤢᤖᤥ॥ 8 ᤕᤠᤱᤛᤠᤁᤢᤴᤎᤣ᤺ᤸᤗᤧ ᤔᤏᤠ᤺ᤸᤗᤧ ᤁᤢᤜᤡᤱᤔᤧᤴ ᤏᤡᤱᤔᤡ᤺ᤸᤗᤧᤗᤠᤶ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤒᤡᤗᤠ. ᤁᤖ ᤕᤠᤱᤃᤧᤛᤠ᤹ᤒᤧᤸᤗᤧ ᤕᤱᤔᤠᤛᤧᤵᤔᤠᤴ ᤂᤧᤶᤔᤠ ᤔᤧᤒᤥᤱᤏᤧᤴᤗᤥ॥ 9 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤜᤡᤱᤔᤴᤏᤡᤸᤗᤧ ᤛᤣᤔᤡᤴ ᤛᤣᤛᤣ ᤗ᤹ᤖᤡᤰ ᤀᤥ᤺ᤳᤗᤥ. ᤁᤖ ᤋᤠᤰᤁᤧᤓᤧᤒᤧᤸᤗᤧ ᤁᤢᤜᤡᤱᤔᤴᤏᤡᤸᤗᤧ ᤛᤣᤔᤡᤴ ᤔᤧᤛᤧᤖᤢᤖᤥ॥ 10 ᤀᤠᤱᤍᤡᤱ ᤗ᤹ᤔᤠᤖᤧ ᤂᤧᤔᤠ᤹ᤖᤰ ᤑᤥ᤺ᤰᤂᤢᤖᤥ. ᤁᤖ ᤛᤢᤈᤠ ᤁᤧᤏᤠ᤺ᤰᤐᤠᤜᤠ᤹ᤗᤠᤶ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤥᤍᤧᤳᤗᤥ॥ 11 ᤀᤡᤱᤗᤧᤰ ᤗᤠᤶᤒᤠ ᤌᤰᤔᤏᤠᤒᤠ ᤕᤠᤱᤛᤠᤁᤢᤴᤎᤣᤴ ᤕᤢᤶᤗᤒᤣ᤺ᤰᤗᤥ. ᤁᤖ ᤀᤠᤈᤧᤳ ᤀᤠᤈᤧᤳ ᤆᤥ᤺ᤰᤔᤠᤖ ᤛᤢᤶᤔᤏᤠᤒᤠ ᤕᤠᤱᤛᤠᤁᤢᤴᤎᤣᤴ ᤐᤥᤖᤒᤣ᤺ᤰᤗᤥ॥ 12 ᤏᤡᤱᤘᤠ᤹ ᤆᤥ᤺ᤰᤔᤏᤠᤒᤧᤴ ᤛᤢ᤺ᤸᤗᤧ ᤏᤡᤱᤘᤠᤴᤏᤠᤱ ᤛᤡᤖᤥ. ᤁᤖ ᤂᤥᤔᤠ ᤏᤡᤱᤘᤠ᤹ ᤐᤠ᤺ᤴᤏᤡᤴ ᤁᤧᤵᤔᤠᤃ ᤜᤡᤱᤔᤧᤸᤗᤧᤴ ᤛᤡᤱᤒᤢᤱᤗᤥ॥ 13 ᤂᤠᤜᤢᤴ ᤂᤧᤶᤔᤠ ᤔᤧᤶᤍᤧᤶᤔᤏᤠᤒᤧᤸᤗᤧ ᤂᤧᤸᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤐᤥᤱᤗᤥ. ᤁᤖ ᤀᤡᤱᤈᤠᤱᤅᤡᤴ ᤀᤡᤱᤎᤠᤱ ᤁᤧᤒᤡᤒᤧᤸᤗᤧ ᤜᤠᤱᤛᤧᤶ ᤂᤥᤛᤢ᤹ᤖᤥ॥ 14 ᤛᤡᤰᤁᤢᤶᤛᤠᤒᤧᤸᤗᤧ ᤁᤢᤏᤡᤛᤠᤶᤔᤡᤴ ᤜᤡᤱᤔᤧᤸᤗᤧ ᤁᤢᤒᤢᤴᤗᤥ. ᤂᤧᤴ ᤗᤠᤶᤒᤠ ᤔᤏᤠᤴ ᤛᤡᤔᤧᤸᤗᤧᤴ ᤆᤧᤴᤏᤥᤗᤠᤶ ᤑᤡ᤺ᤴᤇᤡᤱᤗᤥ॥ 15 ᤂᤠᤛᤡᤱᤃᤧᤏᤡ᤺ᤵᤐᤠ ᤏᤢᤒᤠ ᤔᤏᤠ᤺ᤸᤗᤧ ᤏᤢᤖᤡᤰ ᤔᤧᤵᤔᤠᤴ ᤂᤥᤛᤢᤖᤥ. ᤁᤖ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤱᤃ ᤁᤧᤛᤠᤰᤐᤠ ᤆᤥᤰᤗᤥ॥ 16 ᤂᤠᤛᤡᤱᤃᤧᤏᤡ᤺ᤵᤐᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤏᤧᤜᤡᤏᤡᤱᤘᤠ᤹ᤗᤠᤶ ᤕᤠ᤺ᤶᤒᤰ ᤔᤧᤈᤥᤰᤗᤥ. ᤁᤖ ᤀᤍᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤍᤱ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢᤖᤥ॥ 17 ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠ ᤀᤡᤱᤄᤱᤛᤠᤒᤧᤴ ᤋᤢᤰᤂᤣᤗᤠᤰᤂᤣᤀᤥ ᤌᤠᤖᤥ. ᤁᤖ ᤏᤛᤠ᤺ᤴᤛᤠᤒᤠ ᤀᤡᤱᤄᤱᤛᤠᤒᤠᤸᤗᤧ ᤘᤣ᤺ᤵᤔᤠᤴ ᤋᤠᤖᤢᤖᤥ॥ 18 ᤜᤧᤴᤌᤡᤶᤔᤡᤴ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤔᤏᤠᤒᤧᤸᤗᤧ ᤁᤢᤛᤶᤎᤠᤱ ᤕᤠᤱᤛᤠ᤹ᤔᤠ ᤏᤢ ᤛᤡᤖᤡᤱᤔᤔᤠᤴ ᤀᤡᤍᤠᤖᤥ. ᤋᤥ᤺ᤶᤔᤠᤖᤧ ᤗᤠᤃᤡ ᤑᤧ᤺ᤰᤔᤏᤠᤒᤠ ᤐᤠᤴ ᤁᤧᤄᤧᤶᤒᤠ ᤔᤏᤠ᤺ᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤖᤥ॥ 19 ᤏᤡᤱᤘᤠ᤹ ᤆᤥ᤺ᤰᤔᤏᤠᤒᤠ ᤐᤠ᤺ᤴᤏᤡᤴ ᤁᤧᤳᤋᤡᤸᤗᤧ ᤕᤠᤶᤛᤠᤶᤔᤥ ᤛᤡᤰᤀᤣ᤺ᤵᤋᤢᤖᤥ. ᤁᤖ ᤀᤍᤱᤜᤠ᤹ ᤑᤧᤴᤕᤠ᤺ᤶᤒᤰᤗᤠᤶ ᤏᤢ᤺ᤱᤔᤠ ᤂᤢᤴᤇᤡ᤹ ᤛᤡᤰᤗᤧ᤺ᤱᤗᤥ॥ 20 ᤛᤡᤰᤁᤢᤶᤛᤠᤒᤠ ᤔᤏᤠᤜᤠ᤹ᤏᤢ ᤗᤠᤱᤃᤧᤄᤣ᤺ᤰᤐᤧᤴ ᤛᤡᤰᤁᤢᤶᤛᤠᤒᤠᤀᤣ ᤐᤥᤱᤗᤥ. ᤁᤖ ᤀᤍᤱᤜᤠ᤹ᤏᤢ ᤋᤣ᤺ᤱᤈᤢᤶ ᤁᤧᤔᤧᤳᤇᤡᤱᤒᤧᤴ ᤜᤠᤴᤋᤡ ᤐᤥᤱᤗᤥ॥ 21 ᤗᤠᤕᤥᤒᤠᤜᤠ᤹ ᤋᤢᤰᤂᤣ ᤗᤠᤰᤂᤣ᤺ᤸᤗᤧ ᤏᤠ᤺ᤳᤋᤢᤛᤡᤖᤥ. ᤁᤖ ᤛᤠᤶᤕᤥᤒᤠᤜᤠ᤹ᤖᤧ ᤏᤢᤒᤠ ᤐᤠ᤺ᤴᤏᤡᤸᤗᤧᤴ ᤜᤠᤱᤛᤧᤴ ᤔᤧᤄᤥᤛᤢᤖᤥ॥ 22 ᤁᤧᤏᤢ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤔᤧᤴᤇᤠ᤹ᤜᤠ᤹ᤖᤧ ᤗᤠᤃᤡ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣ ᤔᤧᤗᤧᤖᤢ ᤔᤧᤎᤠ᤹ᤖᤢᤛᤡᤖᤥ. ᤁᤖ ᤗᤠᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤴ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤗᤢᤵᤛᤢᤖᤥ॥ 23 ᤔᤧᤴᤎᤥᤱ ᤔᤧᤴᤈᤥ᤺ᤰᤁᤣ ᤁᤧᤏᤧᤒᤠ ᤂᤠᤶᤔᤡᤸᤗᤧ ᤕᤠᤱᤃᤧᤛᤠ᤹ᤒᤧᤸᤗᤧ ᤁᤢᤗᤠᤃᤡ ᤘᤧᤳᤋᤧᤛᤖᤧ ᤐᤥᤃᤢᤃᤧᤴ ᤁᤢᤈᤠ ᤑᤳᤇᤢ ᤐᤡᤖᤢᤒᤡᤗᤠᤖᤥ. ᤁᤖ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤸᤗᤥᤶᤔᤏᤠᤒᤧᤸᤗᤧ ᤂᤧᤴ ᤏᤠᤵᤋᤢᤍᤣ᤹ᤖᤢᤖᤥ॥ 24 ᤁᤛᤡᤰᤐᤠ ᤔᤧᤴᤕᤠᤰᤔᤏᤠᤒᤠ ᤐᤠ᤺ᤸᤗᤧ ᤁᤢᤛ᤻ᤛᤠᤴ ᤆᤡ᤺ᤳᤋᤢᤖᤥ. ᤁᤖ ᤁᤢᤛ᤻ᤛᤠᤴ ᤗᤢᤱᤔᤠ᤹ ᤁᤧᤍᤢᤰᤐᤠ ᤐᤠ᤺ᤸᤗᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤴ ᤜᤧᤴᤌᤡᤶ ᤕᤠᤰᤋᤢᤖᤥ॥ 25 ᤛᤠᤶᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤄᤠ ᤆᤠᤔᤠ ᤔᤧᤃᤳᤋᤢᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤥᤰᤁᤧᤴ ᤛᤠᤰᤔᤧᤴᤈᤠ ᤐᤥᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.