ᤂᤠᤜᤢᤴ 12 - LIFOTNT

¹ ᤜᤧᤴᤌᤡᤶᤔᤡᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠ᤺ᤸᤗᤧ ᤏᤧᤜᤡᤏᤡᤱᤘᤠᤴ ᤁᤢᤛᤡᤖᤠ᤹ ᤌᤠᤱᤗᤥ. ᤁᤖ ᤁᤢᤍᤥ᤺ᤶᤔᤠ ᤐᤠ᤺ᤴᤏᤡᤴ ᤁᤧᤈᤡ᤺ᤵᤐᤠ ᤔᤏᤠᤴ ᤀᤍᤱᤗᤥ॥

² ᤕᤜᤘᤣ ᤍᤠᤱᤒᤧᤴ ᤁᤢᤍᤥ᤺ᤵᤔᤠ ᤔᤏᤠ᤺ᤴᤏᤢ ᤛ᤺ᤳᤗᤥ. ᤁᤖ ᤋᤠᤵᤑᤧ᤺ᤶᤒᤠ ᤐᤠᤴ ᤆᤧᤶᤓ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤂᤢᤏᤧ᤹ ᤀᤠᤵᤋᤡᤰᤛᤠᤒᤠ ᤗᤣ᤺ᤳᤋᤢᤛᤡᤖᤥ॥

³ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤔᤏᤠᤴ ᤕᤧᤵᤔᤠ ᤔᤧᤛᤢᤰᤏᤧᤴᤗᤥ. ᤁᤖ ᤛᤠᤶᤕᤥᤏᤡᤒᤧᤴ ᤀᤠ᤺ᤱᤔᤠ ᤛᤢᤰᤔᤧᤍᤧᤳᤏᤧᤸᤗᤥ॥

⁴ ᤛᤢᤶᤒᤥᤎᤠᤛᤠᤔᤠ ᤔᤣ᤺ᤳᤋᤡᤴ ᤁᤢᤕᤧᤶᤒᤠ᤺ᤸᤗᤧ ᤁᤢᤍᤡ᤺ᤳᤆᤖᤥ. ᤁᤖ ᤁᤢᤏᤠᤔᤧᤴᤇᤠ᤹ ᤐᤠᤴ ᤁᤧᤍᤠ᤺ᤵᤔᤠ ᤔᤣ᤺ᤳᤋᤧᤱᤃ ᤁᤢᤕᤧᤶᤒᤠ᤺ᤸᤗᤧ ᤁᤢᤕᤧᤳ ᤁᤧᤕ᤺ᤵᤐᤠ ᤜᤧᤰᤋᤱᤔᤠᤖᤥ॥

⁵ ᤛᤠᤶᤕᤥᤒᤧᤸᤗᤧ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤧᤘᤠ᤹ᤒᤠᤀᤣ ᤆᤥᤰᤗᤥ. ᤁᤖ ᤋᤠᤰᤁᤧᤓᤧᤒᤧᤸᤗᤧ ᤁᤢᤛᤢᤈᤠᤜᤠ᤹ ᤀᤡᤱᤀᤠᤗᤧᤰᤗᤧᤰᤐᤠ ᤆᤥᤰᤗᤥ॥

⁶ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤸᤗᤧᤃ ᤁᤢᤓᤠᤖᤧ ᤁᤢᤔᤠᤰᤂᤡ᤹ ᤛᤧᤔᤠᤖᤧ ᤗᤠᤃᤡ ᤛᤢᤃᤢᤀᤠᤱ ᤕᤢᤱᤗᤥ. ᤁᤖ ᤛᤠᤶᤕᤥᤏᤡᤒᤧᤸᤗᤧ ᤁᤢᤒᤠ᤺ᤴᤏᤡᤸᤗᤧ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ॥

⁷ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤗᤠᤵᤐᤢᤱᤛᤠ᤺ᤱᤃᤠ ᤔᤧᤒᤣ᤺ᤰᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤴᤘᤠ᤹ᤏᤧᤴ ᤔᤧᤱᤃᤴᤏᤧᤴᤗᤥ. ᤁᤖ ᤛᤠᤶᤕᤥᤏᤡᤒᤧᤸᤗᤧ ᤁᤢᤜᤡᤶᤛᤕᤱᤅᤡᤴ ᤔᤧᤶᤔᤢᤴᤏᤣ ᤕᤢᤱᤃᤴᤗᤥ॥

⁸ ᤔᤏᤠᤴ ᤂᤢᤏᤧ᤹ ᤁᤢᤄᤠᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤁᤢᤀᤡᤛᤡᤰ ᤁᤢᤏᤠᤖᤠ ᤔᤧᤓᤥᤛᤢᤖᤥ. ᤁᤖ ᤐᤧᤷᤃᤧᤰ ᤘᤷᤃᤧᤰ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤴ ᤜᤡᤏᤠ᤺ᤶ ᤐᤥᤱᤗᤥ॥

⁹ ᤀᤠᤵᤑᤣᤰ ᤏᤢᤒᤠ ᤏᤡᤱᤘᤠ᤹ ᤁᤧᤃᤵᤐᤠ ᤗᤧᤱᤛᤡᤱᤔᤠᤀᤠᤱ ᤆᤠᤔᤠ ᤌᤢᤱᤔᤠᤀᤣ ᤔᤧᤱᤃᤵᤔᤠᤴᤏᤢ᤺ᤸᤗᤧᤃ ᤀᤠᤵᤑᤣᤰ ᤜᤠ᤺ᤳᤋᤠᤀᤠᤱ ᤔᤣ᤺ᤴᤏᤠ ᤗ᤹ᤔᤠᤀᤠᤱ ᤗᤳᤇᤠ ᤛᤧᤘᤠᤖᤥᤒᤠ ᤁᤵᤔᤠᤀᤣ ᤛᤠ᤹ᤖᤡᤰ ᤏᤢᤒᤠᤖᤥ॥

¹⁰ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤎᤰᤛᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ. ᤁᤖ ᤋᤠᤰᤁᤧᤓᤧ᤹ᤒᤧᤸᤗᤧᤃ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤁᤢᤕᤠ᤺ᤶᤒᤰᤁᤡᤴᤏᤠᤱ ᤛᤠ᤹ᤖᤡᤰ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤀᤠᤔᤧᤵᤔᤧᤵᤐᤠ ᤐᤥᤱᤗᤥ॥

¹¹ ᤁᤢᤀᤡᤰᤋᤠᤵ ᤁᤧᤀ᤺ᤰᤐᤠ ᤁᤧᤎᤥ᤺ᤱᤒᤧᤸᤗᤧ ᤘᤧᤳᤋᤧᤛᤖᤧ ᤁᤢᤈᤠ ᤁᤳᤋᤢᤖᤥ. ᤁᤖ ᤏᤡᤱᤘᤠ᤹ ᤀᤡ᤺ᤵᤔᤠ ᤐᤠ᤺ᤴᤏᤥ ᤁᤧᤒᤵᤐᤧᤴ ᤁᤢᤏᤧᤜᤡ ᤁᤧᤜᤥᤵᤐᤠ ᤐᤥᤱᤗᤥ॥

¹² ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ᤀᤥ ᤔᤡᤰ ᤔᤡᤰᤁᤣ᤺ᤳᤋᤢᤖᤥ. ᤁᤖ ᤛᤠᤶᤕᤥᤏᤡᤒᤧᤴ ᤂᤠ᤺ᤶᤒᤠ ᤗᤣ᤺ᤳᤇᤡᤱᤅᤠᤱ ᤕᤢᤱᤗᤥ॥

¹³ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤴ ᤀᤠᤵᤑᤣᤰ ᤗᤠᤕᤥᤒᤠ ᤁᤢᤒᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤡᤈᤥᤀᤥ ᤌᤠᤛᤢᤛᤡᤖᤥ. ᤁᤖ ᤛᤠᤶᤕᤥᤒᤠ ᤔᤏᤠᤴ ᤋᤢᤰᤂᤣ ᤗᤠᤰᤂᤣᤗᤠᤶ ᤂᤧᤳᤇᤡᤱᤗᤥ॥

¹⁴ ᤔᤏᤠᤴ ᤀᤠᤵᤑᤣᤰ ᤁᤢᤶᤒᤪᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤗᤠᤶᤒᤠᤀᤣ ᤏᤢᤒᤠ ᤆᤡᤃᤰᤘᤠ ᤐᤠ᤺ᤴᤜᤠ᤹ᤖᤧ ᤁᤠᤵᤋᤢᤖᤥ. ᤁᤢᤜᤢᤰᤁᤡᤸᤗᤧ ᤁᤢᤕᤠ᤺ᤶᤒᤰᤁᤡᤸᤗᤧ ᤌᤢᤶᤄᤥᤴ ᤂᤢᤏᤧ᤹ ᤛᤧᤰᤂᤠ ᤂᤥᤛᤢᤖᤥ॥

¹⁵ ᤀᤍᤱ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤴ ᤂᤢᤏᤧ᤹ ᤁᤢᤏᤡᤔᤥ ᤏᤢᤒᤠᤀᤣ ᤏᤡᤛᤢᤖᤥ. ᤁᤖ ᤂᤠᤛᤡᤱ ᤁᤧᤏᤡ᤺ᤵᤐᤠ ᤔᤏᤠ᤺ᤸᤗᤧ ᤘᤣ᤹ᤜᤠ᤹ᤖᤧ ᤂᤢᤴᤇᤡ᤹ ᤛᤢᤈᤠᤜᤠ᤹ ᤂᤧᤵᤛᤢᤖᤥ॥

¹⁶ ᤀᤍᤱ ᤔᤏᤠ᤺ᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤡᤔᤥ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ॥ ᤁᤖ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤏᤠ᤺ᤸᤗᤧ ᤁᤢᤏᤠᤔᤧᤴᤇᤠ᤹ ᤐᤥᤱᤅᤡᤸᤗᤧ ᤂᤢᤏᤧ᤹ ᤁᤢᤔᤡᤰᤁᤡᤴ ᤀᤡᤶ ᤔᤧᤳᤋᤢ ᤑᤳᤇᤢᤖᤥ॥

¹⁷ ᤛᤧᤰᤂᤠᤒᤠ ᤋᤛᤡ᤺ᤸᤗᤧ ᤁᤧᤘᤠ᤹ᤒᤠ ᤋᤥ᤺ᤴᤍᤡ ᤀᤠᤒᤡᤖᤥ. ᤁᤖ ᤀᤡᤱᤗᤧᤰᤐᤠ ᤋᤛᤡ᤺ᤸᤗᤧ ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤐᤠ᤺ᤳᤋᤢᤖᤥ॥

¹⁸ ᤔᤧᤴᤀᤡ᤺ᤳᤇᤡᤱᤅᤣ ᤐᤠ᤺ᤵᤔᤏᤠᤒᤠ ᤐᤠ᤺ᤴᤛᤢᤳᤗᤠ᤺ᤸᤗᤧ ᤋᤠᤓᤣ ᤜᤧᤰᤁᤣ ᤀᤠᤎᤢᤵᤗᤥ. ᤁᤖ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤀᤠᤘᤣ᤺ᤴᤗᤥ॥

¹⁹ ᤛᤧᤰᤂᤠ ᤁᤧᤒᤠ᤺ᤵᤐᤠ ᤔᤢᤖᤠᤛᤣ᤹ᤀᤡᤴ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ. ᤁᤖ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤗᤧᤛᤥ᤺ᤳᤋᤧᤴ ᤛᤵᤑᤠᤎᤡᤰᤗᤰ ᤘᤠ᤹ᤖᤥ॥

²⁰ ᤋᤠᤵᤑᤧ᤺ᤶᤒᤠ ᤆᤧᤶᤓᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤴ ᤏᤡᤱᤘᤠᤴ ᤀᤡᤱᤗᤧᤰᤐᤠ ᤆᤥᤰᤗᤥ. ᤁᤖ ᤛᤏᤠᤖᤢᤱᤅᤠᤱ ᤘᤠ᤹ᤔᤠᤖᤧ ᤗᤠᤃᤡ ᤐᤠᤴ ᤁᤧᤓᤥᤒᤧᤴ ᤛ᤺ᤳᤗᤥ॥

²¹ ᤛᤠᤶᤕᤥᤒᤠ ᤛᤶᤎᤠᤱ ᤌᤣᤀᤠᤱ ᤜᤠᤴᤋᤡ ᤔᤧᤒᤥᤱᤏᤧᤴᤗᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ ᤋᤢᤰᤂᤣ ᤗᤠᤰᤂᤣ᤺ᤸᤗᤧ ᤋᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥

²² ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤔᤢᤖᤠᤛᤣ᤹ᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤁᤧᤗᤧ᤺ᤱᤗᤥ. ᤁᤖ ᤂᤢᤏᤧ᤹ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤔᤏᤠ᤺ᤴᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥

²³ ᤂᤠᤛᤡᤱᤃᤧᤏᤡ᤺ᤵᤐᤧᤸᤗᤧ ᤁᤢᤏᤧᤜᤡ ᤁᤢᤏᤡᤱᤘᤠᤴ ᤂᤢᤏᤧ᤹ ᤀᤠᤵᤑᤣᤰ ᤁᤳᤋᤢᤖᤥ. ᤁᤖ ᤀᤍᤱ ᤔᤏᤠ᤺ᤸᤗᤧ ᤁᤢᤀᤍᤱ ᤐᤠ᤺ᤴᤏᤡᤴ ᤂᤡᤔᤥ ᤀᤠᤵᤑᤣᤰ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ॥

²⁴ ᤕᤠ᤺ᤶᤒᤢᤍᤡᤰᤁᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤢᤰᤁᤡᤸᤗᤧ ᤕᤢᤰ ᤆᤥᤃᤢᤖᤥ. ᤁᤖ ᤗᤧᤶᤛᤢᤘᤠᤒᤧᤸᤗᤧ ᤁᤢᤏᤢᤵᤔᤠᤱᤃ ᤕᤥᤃ᤻ᤒᤠ ᤐᤥᤱᤗᤥ॥

²⁵ ᤛᤡᤰᤗᤢᤱᤔᤠ᤹ᤀᤥ ᤋᤢᤰᤂᤣ ᤁᤧᤈᤠᤒᤠ ᤔᤏᤠᤴ ᤔᤧᤴᤎᤢᤶᤔᤏᤠᤒᤠ ᤐᤥᤱᤗᤥ. ᤁᤖ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤠ᤺ᤴᤏᤡᤸᤗᤧ ᤜᤠᤱᤜᤠᤱ ᤀᤠᤔᤧᤳᤗᤥ॥

²⁶ ᤛᤠᤶᤕᤥᤒᤠ ᤔᤏᤠᤴ ᤆᤢᤶᤍᤣᤱᤗᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤥ. ᤁᤖ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ ᤗᤠᤶᤔᤡᤸᤗᤧ ᤂᤧᤱᤜᤠ᤹ ᤀᤠᤒᤠᤅᤣ ᤗᤠᤶᤓᤥ᤺ᤳᤋᤢᤛᤡᤖᤥ॥

²⁷ ᤗᤧᤶᤛᤢᤘᤠᤒᤠ ᤛᤠᤘᤠᤃᤧᤶᤒᤧᤸᤗᤧ ᤛᤠᤘᤠᤴ ᤔᤧᤄᤥᤛᤢᤴᤗᤥ. ᤁᤖ ᤕᤠ᤺ᤶᤒᤢᤍᤡᤰᤐᤠ ᤔᤏᤠ᤺ᤸᤗᤧ ᤕᤠᤱᤛᤠᤁᤢᤴᤎᤣ ᤌᤃᤢᤖᤥ॥

²⁸ ᤛᤠᤶᤕᤥᤒᤠ ᤗᤠᤶᤔᤥ ᤜᤡᤱᤔᤴ ᤘᤠ᤹ᤖᤥ. ᤂᤧᤴ ᤔᤠᤖᤠᤶᤔᤡᤴᤏᤢ ᤛᤥᤛᤥᤖᤡᤰ ᤏᤢᤵᤔᤧᤴᤍᤡᤱ ᤜᤡᤱᤔᤴ ᤘᤠ᤹ᤖᤥ॥